Kgothaletša ba Bangwe go Latela Motho yo a Phagamego Kudu
1 Bjalo ka ge go begilwe go Mateo 5:14, Jesu o boditše barutiwa ba gagwe gore: “Lena Le seetša sa lefase.” Balatedi ba Jesu ba be ba swanetše go botša batho gohle ka Mmušo wa Jehofa le tokišetšo ya Gagwe e lerato ya phologo ka Jesu. Re nagana ka thomo yeo, re lebeletše pele go sepediša puku ya Motho yo a Phagamego Kudu yo a Kilego a Phela kgweding ya December. Ditšhišinyo tše dingwe tšeo mo gongwe o ka ratago go di diriša šidi.
2 Ka morago ga go itsebiša, mo gongwe o ka bea se se latelago ka mantšu a gago:
◼ “Ba bantši ba ile ba ipotšiša ka mohuta wa motho yoo Jesu e bego e le yena ge a be a phela e le motho lefaseng le. O nagana gore ke ka ditsela dife a bego a fapana le ba bangwe? [Dumelela karabo.] Puku ye e kgahlišago ya Motho yo a Phagamego Kudu yo a Kilego a Phela e anega dintlha tše bohlokwa tša bophelo le bodiredi bja gagwe, e bile e nea temogo mabapi le mohuta wa motho yo e bego e le yena. Ka morago ga go e bala, ba bangwe ba ikwa eka ba bile le sebaka sa go ba gotee le yena ka boyena, ba ba le karolo ditlaišegong tša gagwe gomme ba iponela bodiredi bja gagwe ka mahlo.” Šupa seswantšhong sa pele ka pukung, se se gatelelago sehlogo. Ka morago ga moo phetla matseno gomme o bale serapa sa bobedi ka tlase ga sehlogwana se se rego “Go Holega ka go Ithuta ka Yena.” Sepediša puku ka moneelo wa R10,50.
3 Goba mo gongwe o ka bolela selo se se swanago le se:
◼ “Sehleng se batho ba nagana ka Jesu. Lega go le bjalo, ka ge go direga dilo tše dintši gakaakaa tše mpe lefaseng ka moka, ba bangwe ba ka ipotšiša ge e ba Jesu a tloga a tshwenyega ka rena. O ikwa bjang ka seo?” Dumelela karabo. Phetla go kgaolo 24 ya puku ya Motho yo a Phagamego Kudu gomme o hlalose ka boripana lebaka leo ka lona Jesu a ilego a tla lefaseng. Ka morago ga moo bala Johane 15:13, o gatelela lerato la Jesu le le tšwago pelong go ba bangwe. Gopola go swara dimakasine tša morago-rago, poroutšha goba pampišana e swanetšego e hwetšagalago bakeng sa go di neela ge e ba puku e sa amogelwe.
4 Tšhišinyo e nngwe še:
◼ “Bafsa ba bantši ba tsoma mehlala yeo ba ka e ekišago, eupja go thata go hwetša e mebotse. Jesu Kriste o beetše yo mongwe le yo mongwe mohlala o phethagetšego. [Bala 1 Petro 2:21.] Bophelo bja gagwe ka moka bo be bo theilwe borapeding bja Tatagwe wa legodimong. O nagana gore go be go tla ba bjang ge nkabe batho ba bantši ba be ba leka go mo ekiša?” Dumelela karabo. Šupa go serapa sa boraro se se lego letlakaleng le le latelwago ke letlakala la mafelelo la puku, seo se hlalosago dika tša gagwe tše di kgethegilego. Hlalosa kamoo puku ya Motho yo a Phagamego Kudu e ka re thušago ka gona ka moka ga rena gore re be Bakriste ba kaone.
5 Mohlomongwe o ka rata go diriša selo se se swanago le se:
◼ “Ge motho yo mongwe a bolela ka Jesu Kriste, batho ba bantši ba nagana ka yena e le lesea goba e le monna yo a tlaišegago yo a lego kgaufsi le go hwa. Kgopolo ya bona ka Jesu e akaretša feela matswalo a gagwe le lehu la gagwe. Dilo tše dibotse tšeo a di boletšego le tšeo a di dirilego nakong ya bophelo bja gagwe gantši ga di lemogwe. Seo a se phethilego se kgoma motho yo mongwe le yo mongwe yo a kilego a phela lefaseng le. Ke ka lebaka leo go lego bohlokwa gore re ithute mo gontši ka mo re ka kgonago ka gona ka dilo tše di kgahlišago tšeo a re diretšego tšona.” Bala Johane 17:3. Phetla letlakaleng la pele la matseno a puku ya Motho yo a Phagamego Kudu gomme o bale serapa sa bone. Hlalosa kamoo puku e ka hwetšwago ka gona gomme ya dirišetšwa thuto ya motho ka noši.
6 Kgonthišetša gore o boloka pego ya ba ba thabelago le dipuku tše di sepedišitšwego, e le gore o kgone go ba latelela ka go dira maeto a go boela. Ge go sa na le nako, anke re tsomeng ka mafolofolo batho ba dipelo tše di botegago gomme re ba thuše go ba balatedi ba Mophološi wa rena Jesu Kriste.—Mat. 16:24.