Ba Kgothaletšeng go ba Barutiwa ba Gagwe
1 Go 1 Ba-Korinthe 3:6, Paulo o ngwadile gore: “Nna ke byetše; Apôllô ó nošeditše; xomme Modimo ké Yêna a medišitšexo.” Paulo o dirišitše kgopolo ye go thuša banababo gore ba bone go nyakega ga go šoma ba kopane ka tlase ga bohlogo bja Kriste. Ka tsela ye, o ba thušitše le go lemoga tema e bohlokwa yeo ba bego ba e kgatha modirong o bohlokwa wa go bjala le go nošetša.
2 Modiro woo wa go phološa bophelo o swanetše go fihlišwa bofelong mehleng yona ye. Bjalo ka Bakriste ba ineetšego, re rwele boikarabelo bjo bo swanago bjo bogolo bja go thuša ba bangwe gore ba be balatedi ba Jesu. (Dit. 13:48) O tla latelela bjang kgahlego yeo o kgonnego go e tsoša ka go diriša puku ya Motho yo a Phagamego Kudu yo a Kilego a Phela?
3 Ge e ba o boela go etela motho yo a amogetšego puku, o ka re:
◼ “Nakong e fetilego ge re be re boledišana, re ahla-ahlile seo Jesu Kriste a bego a le sona ge e le motho. Ke thabetše go go tlogelela puku ya Motho yo a Phagamego Kudu yo a Kilego a Phela. Ke eng se se go kgomilego kudu ka thuto ya Jesu le ka semelo sa gagwe?” Dumelela karabo. Phetla go kgaolo 113 gomme le ahla-ahle mohlala wa Jesu o phalago yohle wa boikokobetšo. Bala Ba-Filipi 2:8 go bontšha kamoo moapostola Paulo a bego a lebelela kgopolo ya Jesu ya boikokobetšo ka gona. Ka morago o ka hlalosa kamoo go ka ithutwago mo gontši ka gona ka thuto ya ka mehla ya Beibele.
4 Mo gongwe o ka kgetha matseno a:
◼ “Re boledišane ka dilo tšeo Jesu a di dirilego ge a be a le lefaseng, tše di bontšhago gore ka kgonthe o kgomega ka rena. O nagana gore o tla dira’ng mafelelong, go hlakodiša ba ba tlaišegilego gakaakaa?” Dumelela karabo. Phetla go kgaolo 133 gomme o hlahlobe ditlhaloso tšeo di lego serapeng sa bohlano. Phetla seswantšho se se lego letlakaleng le le latelago gomme o hlalose kamoo go tlago go ba ka gona ge thato ya Modimo e dirwa lefaseng bjalo ka ge e dirwa legodimong. Hlalosa mehola e tlago go hwetšwa ka go ithuta mo go oketšegilego.
5 Ge e ba go be go se na kgahlego e lekanego go ka sepediša puku mathomong, mohlomongwe o ka thoma poledišano ya gago ka tsela ye:
◼ “Ke nagana gore bobedi bja rena re a dumela gore batho ba bantši lehono ba phela bophelo bja bona ka go ekiša motho yo mongwe yo ba mo lebelelago e le mohlala wa bona. Jesu Kriste ke mohlala o mobotse kudu o ka latelwago woo yo mongwe le yo mongwe a ka bago le wona. Ke tla rata go abelana le wena thuto e bohlokwa kudu yeo ke ithutilego yona ka go ithuta ka mohlala o beilwego ke Jesu. [Phetla go kgaolo 40 ka pukung ya Motho yo a Phagamego Kudu, ke moka o lebiše tlhokomelo thutong ya Jesu e botho mabapi le kgaugelo.] Se se nkgopoditše kudu kamoo ke swanetšego go bontšha seka se ka gona go ba bangwe.” Bala Mateo 5:7. Ge e ba bjale go bonala go e-na le kgahlego e kgolo, sepediša puku goba poroutšha ya Na Modimo Ruri o na le Taba le Rena?
6 Goba mo gongwe o ka nyaka go leka matseno a ao a lebanyago:
◼ “Nakong e fetilego ge ke be ke le mo, re ile ra boledišana ka bohlokwa bja go hwetša tsebo mabapi le Jesu. Johane 17:3 e bolela gore go hwetša tsebo e bjalo go bolela ‘bophelô byo bo sa felexo.’ Re ka dira seo bjang?” Dumelela karabo. Tšwela pele ka go hlalosa thulaganyo ya rena ya thuto ya Beibele le kamoo e ka dirišwago ka gona.
7 Paulo o bolela gore mošomi punong “ó tlo fiwa moputsô wa xaxwe, wo o lebanexo modirô wa xaxwe.” (1 Ba-Kor. 3:8) Ge e ba re katana ka mafolofolo go thušeng ba bangwe gore ba be balatedi ba Jesu, moputso wa rena ruri e tla ba o mogolo.