Letlolo la Dipotšišo
◼ Ke tlhokomelo efe yeo e swanetšego go newa ditlabakelo tše re di dirišago modirong wa go nea bohlatse?
1 Le ge a nagana ka thero e swanetšego ya Mangwalo, mogoeledi e ka ba yo a sego a lokišetša ge go tliwa ditlabakelong tšeo a di dirišago. Ge a le mojakong, a ka ba a se na dipuku tše di lego nakong tšeo di sepedišwago nakong yeo. Dimakasine, diporoutšha le dipampišana tše di lego ka mokotleng wa gagwe wa go nea bohlatse di ka ba di šošobane goba di gagogile. A ka palelwa ke go hwetša phensele goba pego ya ntlo le ntlo ka ge mokotla wa gagwe o sa beakanywa ka tshwanelo. Ke gabohlokwa go šetša ditlabakelo tša gago pele o e-ya tirelong ya tšhemo.
2 Ke dilo dife tšeo mokotla o hlamilwego gabotse wa go nea bohlatse o swanetšego go ba le tšona? Beibele e bohlokwa. Tsenya sesola sa dipego tša ntlo le ntlo. Kgonthišetša gore o na le dipuku tšeo di sepedišwago kgweding. Dimakasine tša morago-rago go akaretša le dipampišana le diporoutšha, le tšona di a nyakega. Swara kopi ya puku ya Go Boledišana. Go ba le Tirelo ya Rena ya Mmušo yeo e dirišwago go tla go dumelela go boeletša dithero tše di šišintšwego pele o e-ya mojakong. Ge le šoma tšhemong yeo mo gongwe le ka kopanago le batho bao ba bolelago leleme lešele, e ka ba mo gobotse go ba le pukwana ya Good News for All Nations. Go ba le kopi ya e nngwe ya dipuku tša rena tše di rulaganyeditšwego bafsa go tla go thuša gore o itokišeletše go boledišana le bafsa bao ba lego mahlalagading.
3 Selo se sengwe le se sengwe se o se dirišago se swanetše go beakanywa ka bothakga ka mokotleng wa gago. Ga go nyakege gore mokotla ka bowona e be o mofsa, eupša o swanetše go ba o hlwekilego le o lego boemong bjo bobotse. Mokotla wa gago wa go nea bohlatse ke karolo ya ditlabakelo tša gago tšeo o di dirišago go goeletšeng ditaba tše di lokilego. O boloke o le boemong bjo bobotse.