Dirišang Diporoutšha Tše Di Fapa-fapanego Bodireding Bja Lena
1Lehono batho ba thabela ditaba tše di fapa-fapanego. Ge o e-ya tirelong ya tšhemo ka July, o ka swara diporoutšha tše mmalwa tše di sa swanego, o diriša e itšego yeo e tlago go ipiletša go batho tšhemong. Mohlomongwe o ka rata go leka a mangwe a matseno a:
2Ge o sepediša poroutšha ya “Mmušo Woo o Tlago go Tliša Paradeise,” o ka botšiša gore:
◼ “O nagana gore lefase le be le tla ba bjang ge nkabe Modimo e be e le yena mmuši a nnoši? [Dumelela karabo.] Gore Modimo a tšee pušo ya lefase ke selo se re se kgopelago ka go lebanya ge re rapela Thapelo ya Morena goba ya Tata Wešo, yeo Jesu Kriste a re rutilego yona. [Phetla go letlakala 3, gomme o bale serapa sa pele seo se tsopolago Mateo 6:10.] Ge e ba o rata go tla go phela lefaseng le le swanago le leo, o swanetše go bala poroutšha ye.” Ithapele go e tlogela ka moneelo wa R1,00.
3Poroutšha ya “Ge Motho yo o mo Ratago e E-hwa” e ka bolelelwa ka tsela ye:
◼ “Na o nagana gore go tla ka gwa tla letšatši leo ka lona go ka se bego le o tee wa rena yo a tlago go lahlegelwa ke yo a mo ratago lehung? [Dumelela karabo.] Poroutšha ye e ngwadilwego gabotse e ile ya homotša ba dimilione ka kholofetšo e kgonthišeditšwego ya Beibele ya gore letšatši le le bjalo le a tla nakong e tlago e lego kgaufsi. [Phetla go letlakala 5, gomme o bale serapa sa bohlano go akaretša le 1 Ba-Korinthe 15:21, 22. Ka morago o phetle seswantšhong se se lego go letlakala 30.] Mo moswantšhi o swantšhitše lethabo leo re tlago go le hwetša ge re amogela baratiwa ba rena bao ba hwilego tsogong. Eupša tiragalo yeo e thabišago e tla direga kae? Poroutšha ye e tla go bontšha karabo ya Beibele ya potšišo yeo.” Ge e ba poroutšha e amogelwa, mo gongwe o ka oketša ka gore: “Ke tla rata go boa ka morago gomme ke hlalose taba ye go iša pele.”
4Mohlomongwe o ka bolelela poroutšha ya “‘Bonang, Dilo ka Moka ke di Dira tše Mpsha,’” o diriša matseno a a lebanyago go thoma thuto ya Beibele:
◼ “Batho ba bantši ba na le dipotšišo mabapi le Beibele. Mo gongwe o ka ba o kile wa rata go tseba ka karabo ya e nngwe ya tše. [Phetla go letlakala 30.] Potšišo ye ya mafelelo e ile ya tsoša kgahlego ya ba bantši: ‘O ka itokišetša bjang bophelo bjo bo sa felego Paradeiseng?’” Ge e ba o ahla-ahla dirapa 57-8 go matlakala 29-30 le go bala Kutollo 21:3, 4, o tla ba o theile motheo bakeng sa go thoma thuto ya Beibele. Phetha ka go tlogela poroutšha le go rulaganyeletša leeto la go boela nakong yeo o tlago go kgona go ahla-ahla tše dingwe tša dipotšišo.
5Mo gongwe o ka rata go leka thero ye e bonolo ka poroutšha ya “Leina la Modimo Leo le Tlago go ba Gona ka mo go sa Felego”:
◼ “E nngwe ya dilo tša pele tše ke ithutilego tšona Beibeleng e bile leina la Modimo. Na o a tseba gore ke lefe? [Dumelela karabo.] E re ke go bontšhe. Le mo Beibeleng go Psalme 68:4. [Bala.] Poroutšha ye e bontšha kamoo leina la Modimo, Jehofa, le tšwelelago ka gona malemeng a mantši ao a fapanego. [Mmontšhe lepokisi go letlakala 8.] Ge e ba o tla rata go ithuta mo go oketšegilego ka Jehofa le merero ya gagwe, o swanetše go bala poroutšha ye.” Nea mong wa ntlo poroutšha.
6Ka go diriša diporoutšha tše di bjalo tše botse tše di fapa-fapanego, ruri re tloga re hlamilwe gabotse “xo bexêla babôtlana ’taba tše di botse.”—Jes. 61:1.