Na O Swaregile Kudu?
1 Paulo o kgothaleditše gore ‘ka mehla [re] na le mo gontši mo re ka go dirago modirong wa Morena.’ (1 Ba-Kor. 15:58, NW) Re kgothaletšwa go kgomarela mokgwa wa letšatši le letšatši bakeng sa thuto ya motho ka noši, re be le karolo ka mehla bodireding, re be gona dibokeng ka potego le go hlokomela dikabelo tša phuthego ka mafolofolo. Go oketša go seo, re swanetše go thuša ba bangwe bao ba nyakago thušo ya rena. Ka ge go e na le mo gontši mo go ka dirwago, ka dinako tše dingwe re ka ikwa re gakanegile, ra nagana gore re swanelwa ke go tsoma ditsela tša go fokotša morwalo wa modiro wa rena.
2 Go na le maemo ao a ka dirago gore go be bohlale gotee le go ba mo go kwalago go široga mediro e itšego goba go fokotša bogolo bja yona. Batho ba bangwe ba nagana gore go letetšwe gore ba dire selo se sengwe le se sengwe seo ba bangwe ba ba kgopelago gore ba se dire. Go se be le teka-tekano tabeng ye go ka tšweletša dikgateletšo le kgakanego tšeo mafelelong di ka fetogago tše di senyago.
3 E-bang ba Leka-lekanego: Senotlelo sa teka-tekano se letše tabeng ya go diriša keletšo ya Paulo ya go “kgonthišetša dilo tša bohlokwa kudu.” (Ba-Fil. 1:10, NW) Seo se fo bolela gore re tsepelela dilong tšeo di lego bohlokwa e le ka kgonthe gomme ge e ba nako le maemo di dumela, re hlokomela dilo tše dingwe tšeo e lego tša bohlokwa bjo bonyenyane. Boikarabelo bja lapa ka kgonthe bo phagametše dilo tšeo di lego bohlokwa. Boikarabelo bjo itšego bja tša boiphedišo bo swanetše go hlokomelwa. Lega go le bjalo, Jesu o rutile gore dilo tša rena tše di tlago pele di swanetše go thewa motheong wa gore re tsome Mmušo pele. Sa pele re swanetše go dira dilo tšeo di tlago go re dumelela go phethagatša boineelo bja rena go Jehofa.—Mat. 5:3; 6:33.
4 Ka go nagana ka se, re tla kgonthišetša gore re fokotša thulaganyong ya rena ya go ba ba swaregilego mediro le ge e le efe yeo e sego bohlokwa ya motho ka noši, mediro e feteletšego ya boithabišo le ditumelelano tše sego bohlokwa le ba bangwe. Ge re rulaganyetša modiro wa rena wa beke e nngwe le e nngwe, re tla beela nako ka thoko bakeng sa thuto e lekanego ya motho ka noši, go ba le karolo ka mo go leka-lekanego tirelong, go ba gona dibokeng le dilong le ge e le dife tše dingwe tšeo di tswalanego kudu le borapedi bja rena. Nako e šetšego e ka arolelwa mediro e mengwe, go ithekgile kamoo e tlaleletšago ka gona go fihleleleng pakane ya rena e kgolo ya go ba Bakriste ba leka-lekanego bao ba etišago Mmušo pele.
5 Lega go le bjalo, re ka no fela re e-kwa morwalo wa rena e le o gateletšago. Ge e ba go le bjalo, re swanetše go arabela taletšong ya Jesu e rego: “Tlang xo Nna bohle ba Le lapišitšwexo, ba Le imêlwaxo; Nna ke tlo Le khutšiša.” (Mat. 11:28) Gape lebelela go Jehofa, “yo a re rwalelago morwalo letšatši le letšatši” le yo a neago motho yo a lapilego matla. O holofetša gore le ka mohla a ka se ke a dumelela moloki a šuthišwa. (Ps. 55:22; 68:19, NW; Jes. 40:29) Re ka kgodišega gore dithapelo tša rena di tla arabja, gwa re kgoniša go phegelela bophelong bjo mafolofolo bja modiro wa pušo ya Modimo.
6 Ge re dutše re kgonthišega gore re ba ba swaregilego tabeng ya go phegelela dikgahlego tša bohlokwa kudu tša Mmušo, re ka thaba ka go tseba gore modiro wa rena ga se wa lefeela Moreneng.—1 Ba-Kor. 15:58.