Go Dirwe Go Gontši Ka Mehla
1 Batho ba Jehofa ke batho ba ba swaregilego. Re na le boikarabelo bjo bogolo mabapi le malapa a rena, mešomo le sekolo. Go feta tšohle, ka mehla go na le “go gontši mo [re] go dirago modirong wa Morena.” (1 Ba-Kor. 15:58, NW) Re swanetše go lokišetša le go ba gona dibokeng tša beke le beke tša phuthego. Re kgothatšwa gore re se ke ra fetša beke re sa ka ra ba le karolo bodireding bja tšhemo. Ka mehla go swanetšwe go beelwe nako e lekanego ka thoko bakeng sa thuto ya motho ka noši le thuto ya lapa ya Beibele. Bagolo le bahlanka ba bodiredi ba hwetša dikabelo tše dintši tša phuthego. Ka dinako tše dingwe re kgopelwa gore re thuše ba ba swanelegago bao ba diilago.
2 Ka dinako tše dingwe, ba bangwe ba rena re ka ikwa re palelwa ke sohle se re swanetšego go se dira. Lega go le bjalo, batho ba ba swaregilego kudu ba ka ba gare ga ba ba thabilego kudu ge e ba teka-tekano le pono e swanetšego di kgomarelwa.—Mmo. 3:12, 13.
3 Moapostola Paulo e be e le yo mongwe yo a bego a e-na le go gontši mo a bego a go dira. Le ge a be a hlokomela dinyakwa tša gagwe ka go šoma mošomo wa boiphedišo e le modiri wa ditente, o ile a itapiša go feta baapostola ba bangwe. O ile a šoma e le moebangedi a sa lape, a bolela phatlalatša le ka ntlo le ntlo, a bile a sa hlokomologe boikarabelo bja gagwe e le modiši wa mohlape. (Dit. 20:20, 21, 31, 34, 35) Go sa šetšwe lenaneo la gagwe le le pitlaganego, Paulo ka mehla o be a fišegela go dira mo go oketšegilego tirelong ya Jehofa.—Bapiša le Ba-Roma 1:13-15.
4 Paulo o ile a kgomarela teka-tekano ya gagwe le pelo e thabilego ka go bota Jehofa gore a mo fe matla. O ile a hwetša bodiredi bja gagwe e le bjo bo putsago le bjo bo kgotsofatšago. (Ba-Fil. 4:13) O be a tseba gore Modimo a ka se ke a lebala modiro wa gagwe. (Ba-Heb. 6:10) Lethabo la go thuša ba bangwe go tseba Jehofa le ile la mo matlafatša. (1 Ba-Thes. 2:19, 20) Kgodišego ya go bona kholofelo ya gagwe e theilwego Beibeleng e phethega e ile ya mo tutueletša gore a dule a le mafolofolo.—Ba-Heb. 6:11.
5 Le rena re swanetše go ela hloko mohola o tšweletšwago ke go itapiša ga rena. Go ba gona ga rena dibokeng tša beke le beke tša phuthego le go tšea karolo go tšona go thuša go aga le go kgothatša ba bangwe. (Ba-Heb. 10:24, 25) Maiteko a rena a kgonthe a go fihlelela bohle ka ditaba tše di lokilego a tlaleletša tšwelopeleng ya phuthego ka ge go hlagolelwa kgahlego gomme batho ba bafsa ba kopanela le rena. (Joh. 15:8) Go thuša ba ba diilago go godiša moya o etšago wa lapa le momaganego ka phuthegong. (Jak. 1:27) Go feta moo, go etša Paulo, le ka mohla ga se ra swanela go lebala gore go swarega medirong e holago go thabiša Jehofa Modimo kudu. Go mo direla re go lebelela e le tokelo e kgolo. Go rena ga go na tsela e nngwe e kaone ya go phela!
6 Go na le mohola o okeleditšwego go ba le go gontši mo re go dirago. Ge re dutše re swaregile ka go phegelela thulaganyo ya ka mehla e holago ya moya, nako e bonala e feta ka lebelo kudu. Ka go tseba gore letšatši le lengwe le le lengwe le le fetago le re batametša lefaseng le lefsa, re amogela ka lethabo bophelo bjo bo tletšego bjo re bo thabelago mo nakong ye. Re bile re lemoga bohlale bja go dula re swaregile, ka ge re e-na le nako e nyenyane ya go phegelela dilo tše di sa holego tša lefase.—Ba-Ef. 5:15, 16.
7 Ruri, go na le go gontši mo re ka go dirago modirong wa Morena. Eupša re ka dula re thabile ge e ba re dula re bota Jehofa Modimo le Jesu Kriste, bao ba dirago gore tirelo ya rena e be e lapološago le e putsago.—Mat. 11:28-30; 1 Joh. 5:3.