Kamoo Go Ka Rekwago Ka Gona Nako E Swanetšego
1 Go ba le go gontši mo re go dirago tirelong ya Jehofa go re boloka re swaregile! (1 Ba-Kor. 15:58, bapiša le NW.) Re lemoga go nyakega ga go ithuta re le motho ka o tee ka o tee le ge re le lapa, go bala Beibele letšatši le letšatši, go lokišetša diboka tša phuthego le go ba gona go tšona gotee le go ba le karolo ka mehla bodireding bja tšhemo. Balebeledi ba na le boikarabelo bja go diša ba bile ba hlokomela mediro e mengwe ya phuthego. Ba bangwe ba na le boikarabelo bjo bogolo bja lapa goba boikarabelo bjo bo fapa-fapanego go ba bangwe. Gore se sengwe le se sengwe se dirwe ka tshwanelo, motho yo mongwe le yo mongwe o swanetše go ba le teka-tekano le thulaganyo e botse ya motho ka noši.
2 Rulaganya Dilo tše di Tlago Pele: Go atlega ‘go ithekeleng nako e swanetšego’ go ithekgile ka temogo ya rena le kahlolo e botse. (Ba-Ef. 5:15, 16, NW) Re swanetše go lemoga seo “dilo tša bohlokwa kudu” e lego sona gomme re di bee ka godimo lelokelelong la rena la dilo tše di tlago pele. (Ba-Fil. 1:10, NW) Banyalani ba bangwe ba hlalositše lapa la bona la pušo ya Modimo ka tsela ye: “Re dira gore therešo e laole maphelo a rena . . . Therešo ga se karolo ya bophelo bja rena, eupša ke bophelo bja rena. Dilo tše dingwe ka moka di theilwe go yona.” Go etiša borapedi le tirelo ya Jehofa pele bophelong bja motho ke gabohlokwa.
3 Hlaola Dilo tše di Jago Nako: Go na le diiri tše 168 bekeng, gomme re swanetše go diriša nako ya rena e lego gona ka bohlale. Gore re hwetše nako e lekanego bakeng sa mediro ya pušo ya Modimo, re swanetše go hlaola le go fokotša dilo tše di jago nako. Nyakišišo e nngwe e utolotše gore motho yo mogolo yo a tlwaelegilego kua United States o diriša diiri tše di fetago tše 30 ka beke a bogetše TV! Go ba bangwe, nako e ntši e senywa go balwa dipuku tša lefase. Ba bangwe ba ka hwetša gore ba gafa nako e fetago tekanyo medirong ya bogwera, dilong tša go itloša bodutu, boitapološong goba mohuteng o itšego wa papadi ya computer. Mo gongwe re ka swanelwa ke go lekodišiša mokgwa wa rena wa letšatši le letšatši go bona kamoo re ka dirišago nako ya rena gakaone ka gona. Bohlale bo nyaka gore re lekanetše nako yeo re e gafelago mediro e sego ya bohlokwa.
4 Hlagolela Mokgwa o Mobotse wa ka Mehla: Go sa šetšwe gore maemo a rena a motho ka noši ke afe, yo mongwe le yo mongwe wa rena a ka reka nako bakeng sa go phegelela dilo tša moya. Ba bangwe ba hweditše gore go thoma letšatši le lengwe le le lengwe e sa le mesong go ba thuša go phetha go gontši. Ge e ba re fetša nako e ntši leetong la go ya mošomong goba re letetše ba bangwe, re ka diriša karolo e nngwe ya nako yeo bakeng sa mmalo wa Beibele, re lokišetša diboka goba re theeditše taba e lokišeditšwego ke Mokgatlo dikhaseteng. Malapa a holega kudu ka go beela nako e itšego ka thoko ka mehla bakeng sa go ithuta a le gotee. Ge e ba setho se sengwe le se sengwe sa lapa se swara nako ge se e-tla thutong ya lapa, seo se nea yo mongwe le yo mongwe nako e oketšegilego.
5 Letšatši le lengwe le le lengwe leo le fetago, re swanetše go lemoga kudu gore “lebaka ké la pitlaxanô.” (1 Ba-Kor. 7:29) Maphelo a rena a ithekgile kamoo re dirišago ka gona nako ya rena e šetšego ya bohlokwa. Re tla šegofatšwa ge e ba re reka nako e swanetšego e le gore re ka boloka dikgahlego tša Mmušo di le boemong bja pele!—Mat. 6:33.