Banababo Rena Ba Oketšegilego Ba A Nyakega Tirelong Ya Bobulamadibogo
1 Paulo o re opeleditše gore ‘ka mehla re be le go gontši mo re go dirago modirong wa Morena.’ (1 Ba-Kor. 15:58, NW) Go ba bantši se se bolela go tsenela tirelo ya bobulamadibogo. Ngwageng wo o fetilego wa tirelo ba fetago 800 ba ile ba okeletšwa dihlopheng tša babulamadibogo Afrika Borwa e nnoši!
2 Mo nakong ye palo e kgolo ya bao ba hlankelago e le babulamadibogo nageng ye ke dikgaetšedi. (Ps. 68:11) E tla ba lethabo le lekaakang go phuthego ge e ba banababo rena ba oketšegilego ba ka tlatša dihlopha tša bahlanka ba nako e tletšego! (Ps. 110:3) Ke mo go kwešišegago gore banababo rena ba bantši ba swanelwa ke go hlokomela boikarabelo bjo boima bja modiro wa boiphedišo le ditlamo tša lapa. Ba bangwe gape ba šoma ka thata bakeng sa go hlokomela dinyakwa tša moya tša phuthego. Re leboga banna ba bao ba katanago ka matla ka baka la Mmušo.—1 Tim. 4:10.
3 Gaešita le ge go le bjalo, na ba oketšegilego ba lena banababo rena le ka tsenela tirelo ya bobulamadibogo? Ge e ba mosadi wa gago a bula madibogo, na o ka mo tlatša? Ge e ba o rotše modiro, na o ka se dumele gore ga go sa na tsela e nngwe e kgotsofatšago yeo o ka dirišago nako ya gago ka yona go feta go e diriša bodireding bja nako e tletšego? Ge e ba o fetša sekolo lenyaga, na o ile wa naganišiša ka mo go tseneletšego le ka thapelo ka go amogela tirelo ya bobulamadibogo e le moratho o išago ditokelong tše di oketšegilego tša tirelo?—Ba-Ef. 5:15-17.
4 Ngwanabo rena yo mongwe o ile a rekiša kgwebo ya gagwe e atlegago gomme a tšea modiro wa nakwana e le gore a ka kgona go bula madibogo. Ka ketelelo pele ya gagwe e botse, ba bararo ba bana ba gagwe ba bane ba ile ba ba babulamadibogo gatee-tee ge ba fetša sekolo. Wa bone le yena o ile a fišegela go ba tlatša. Ngwana yo wabo rena le lapa la gagwe ba šegofaditšwe ka mo go humilego.
5 Mojako o Mogolo o Bulegile: Tirelo ya bobulamadibogo e ka bula “mojako o mogolo wo o lebišago modirong.” (1 Ba-Kor. 16:9, NW) Banababo rena bao e lego babulamadibogo ba ka dirišwa kudu ka phuthegong. Modiro wa phišego wa tšhemo o okeletša boemong bja bona bja moya gomme o tlaleletša tšwelopeleng ya bona ya pušo ya Modimo. Go bula madibogo go ka bula tsela e išago ditokelong tše di oketšegilego tša tirelo. Ka morago ga ngwaga wa pele wa go bula madibogo, go na le tšhegofatšo ya go ba gona Sekolong sa Tirelo ya Bobulamadibogo. Bahlanka ba bodiredi le bagolo ba ba ba sa nyalago ba ka katanela go ba gona Sekolong sa Tlwaetšo ya Bodiredi. Banyalani ba ba swanelegago ba ka dira kgopelo ya Sekolo sa Gilead. Banababo rena mo gongwe mafelelong ba ka swanelega bakeng sa modiro wa bosepedi. Ee, bodiredi bja bobulamadibogo bo bula mojako o išago ditokelong tše tše dikgolo kudu tša tirelo mokgatlong wa Jehofa.
6 Banababo rena bao ba ka bulago sebaka bakeng sa tirelo ya bobulamadibogo bja ka mehla ba ka hwetša lethabo le legolo kudu leo le tlišwago ke go nea kudu.—Dit. 20:35.