Babulamadibogo ba a Nea le go Amogela Ditšhegofatšo
“BOBULAMADIBOGO bo bohlokwa kudu go feta mošomo o atlegago wa boiphedišo. Ga go na selo seo se kgotsofatšago go feta go thuša batho go tseba Jehofa le therešo ya gagwe.” Ke kamoo go boletšego mosadi yo mongwe wa Mokriste yo a kgethilego bobulamadibogo—go bolela ka Mmušo ka nako e tletšego—e le modiro wa gagwe wa bophelo. Ke mešomo e mekae e mengwe ya bophelo yeo e ka tlišago lethabo le bjalo?
Bobulamadibogo ke bobedi pakane e phagamego le tokelo e bohlokwa. Motho a ka kgetha bjang bophelo bjo bjalo? Go nyakega’ng go kgomarela bobulamadibogo ka nako e telele e le gore o bune ditšhegofatšo tšeo bo di neago?
Dilo tše pedi di bohlokwa. Sa pele, maemo a swanetšego. Ba bantši ba phela maemong ao ka mo go kwagalago a dirago gore go bula madibogo go se kgonege. Sa bobedi, ditshwanelego tše di swanetšego tša moya le boemo bja kgopolo. Ke therešo gore go sa šetšwe ge e ba maemo a gona bjale a dumelela motho go bula madibogo goba go se bjalo, ka moka re ka katanela go tšweletša dika tša kgolo ya Bokriste.
Lebaka Leo ka Lona ba Bangwe ba Bulago Madibogo
Ditshwanelego tša go bula madibogo ka mo go atlegilego ke dife? Ee, bokgoni bja go bolela bo bohlokwa. Babulamadibogo ba swanetše go tseba kamoo ba ka neelago ditaba tše di lokilego go batho bao ba sa ba tsebego, ba dire maeto a go boela go bao ba thabelago, gomme ba sware dithuto tša legae tša Beibele. Go hloka bokgoni bjo go ka nyamiša mmulamadibogo. Lega go le bjalo, dilo tše dingwe le tšona di bohlokwa.
Ka mohlala, selo se sengwe le se sengwe seo se tswalanago le borapedi bja rena se kgokagane le tswalano ya rena le Jehofa le mokgatlo wa gagwe. Se se akaretša bobulamadibogo. Mmulamadibogo yo mofsa yo a bitšwago Rado o hlalositše ka gore: “Go motho yo mofsa, ga go na selo se kaone go feta go gopola Jehofa le go sepela tseleng ya therešo.” Ee, go bula madibogo ke tsela e botse bakeng sa bafsa gore ba bontšhe lerato la bona go Jehofa le go ba kgaufsi le yena.—Mmoledi 12:1.
Tsebo le kwešišo le tšona di bohlokwa. (Ba-Filipi 1:9-11) Ge e le gabotse, tsebo le kwešišo ke sebešeletši seo se bolokago entšene ya rena ya moya e šoma. Thuto ya ka mehla ya motho ka noši e bohlokwa go phema go ba ba lapilego moyeng, go lahlegelwa ke phišego ya rena le tumelo. Go ba gona, tsebo yeo re nago le yona e swanetše go kgoma e sego feela kgopolo eupja gape le pelo. (Diema 2:2) Ka gona, go tlaleletša thutong ya motho ka noši, re nyaka nako bakeng sa thapelo le go naganišiša e le gore tsebo yeo re e hwetšago e re kgome pelo. Ka gona, ge e ba maemo a rena a dumela, re tla nyaka go bula madibogo.—Bapiša le Esera 7:10.
Go tsenela tirelo ya bobulamadibogo gape go nyaka moya wa boikgafo. Lesogana leo le bitšwago Ron le be le dirile dithulaganyo tša lona ka moka bakeng sa go bula madibogo. Le be le letetše feela maemo a loketšego e le gore le ka tšwela pele. Ka mo go kgethegilego, le be le nyaka mošomo wo o bego o tla le dumelela go bula madibogo gomme ka nako e swanago le thabele matsaka a mangwe a bophelo. Ge le be le botša kgaetšedi yo a gotšego ka tsebo ka se, karabo ya gagwe e ile ya le šikinya. Kgaetšedi o itše: “Jehofa o šegofatša mediro e sego dikholofetšo.” Lesogana le ile la hwetša mošomo o nago le moputso wa tlasana wo o bego o dumelela nako ya go bula madibogo. Go diriša Mateo 6:25-34 go tla thuša motho go tšwela pele ka moputso o monyenyane.
Boikemišetšo bja boipoetšo bja go latela ditšhišinyo tše botse le bjona bo ka tlaleletša tabeng ya go tsenela ga rena tirelo ya bobulamadibogo. Bophelong bja gagwe bja bofsa e le Mokriste, Hanna o ile a hlagolela kganyogo ya go bula madibogo. Eupja ga se a ka a bula madibogo ge a sa godiša lapa gomme ka morago o ile a tsenela mošomo wa kgwebo. Ka go theetša keletšo e botse e tšwago go bagolo ba phafogilego, o ile a tlogela mošomo wa gagwe o kgahlišago wa boiphedišo gomme a tsenela tirelo ya bobulamadibogo. Hanna mo nakong ye o na le lethabo le legolo ka go tliša ba bangwe boineelong le go thuša ba ba tapilego.
Go leboga seo therešo e se dirilego bophelong bja motho le gona e ka ba tlhohleletšo ya go bula madibogo. Ela hloko taba ya mosadi yo mongwe yo a nyamilego kudu yo lenyalo la gagwe le bego le thubega. Boemo bjo bo ile bja fetoga ka mo go makatšago ge a be a ithuta therešo ya Lentšu la Modimo le go e diriša. Ka go thabišwa ke seo therešo e mo diretšego sona, o ile a phetha ka gore tsela e kaone ya go bontšha tebogo e be e tla ba gore a bule madibogo gomme a thuše ba bangwe. O ile a dira se gomme gona bjale o thabela ditšhegofatšo tša dithuto tše dintši tša Beibele le bophelo bjo bo thabišago bja lapa.
Ba Bangwe ba ka Thuša
Babulamadibogo gantši ba tšweletša babulamadibogo ba bangwe. Rado, yo go boletšwego ka yena pejana, o be a na le nywaga e tshelelago ge babulamadibogo ba babedi ba be ba ithuta Beibele le batswadi ba gagwe. Ge e be e sa le yo monyenyane kudu, o be a sepela ka mehla le bagoeledi ba ba nako e tletšego bodireding bja tšhemo. Rado ka noši e bile mmulamadibogo wa ka mehla a na le nywaga e 17. Lesogana le lengwe, e lego Arno, le be le godišeditšwe lapeng la Bokriste eupja la ba leo le fokolago moyeng. Ka morago, le ile la ikemišetša go tsošološa matla a lona a moya gomme bjale le re: “Ke amogetše dikgothatšo tše ntši go tšwa go babulamadibogo. Ke ile ka ikgweranya le bona kudu nakong ya maikhutšo a sekolo gomme ka dinako tše dingwe ke be ke bega diiri tše ka bago 60 ka kgwedi tirelong ya tšhemo. Ka morago ga moo, mogato wa go ya bobulamadibogong bja ka mehla [bjo bo nyakago diiri tše 90 kgwedi le kgwedi] e be e se o mogolo gakaalo.” Go naganišiša ka keletšo ya 1 Ba-Korinthe 7:29-31 ya go se diriše lefase ka mo go tletšego go ile gwa thuša bafsa ba bjalo e le ka kgonthe.
Moya wa bobulamadibogo o ka amogelwa gabonolo kudu lapeng leo dikgahlego tša moya di bewago pele gomme batswadi ba kgothaletša bana ba bona go tsenela bodiredi bja nako e tletšego. Philo yo a goletšego lapeng le bjalo o bolela gore: “Ba bantši ba ile ba nkgothaletša gore ke tšwetše pele dithuto tša-ka, gore ke šomele bokamoso bjo bo bolokegilego. Eupja batswadi ba-ka ba ile ba nthuša go dira kgetho e bohlale. Ba ile ba mpotša gore ge e ba ke be ke nyaka e le ka kgonthe go ikagela bokamoso, selo sa pele-pele seo se etago pele e swanetše go ba go hlagolela tswalano le Jehofa.”
Mosadi yo mofsa yo a bitšwago Thamar le yena o bolela tirelo ya gagwe ya bobulamadibogo e le yeo e bakilwego ke mohlala le maiteko a batswadi ba gagwe. O re: “Nka se ke ka bolela ka go nepa nako yeo ke ilego ka ba le pono ya moya ka bophelo, eupja ke a tseba gore ga se ka belegwa le yona. Mokgwa wa batswadi ba-ka wa go ba le karolo ka mehla tirelong ya tšhemo le go ba gona dibokeng, gotee le lerato la bona le le tseneletšego la go rata therešo, di nthušitše kudu go godiša pono ya-ka ya moya.”
Go Kgomarela Phetho ya Gago
Ka morago ga gore motho a tsenele tirelo ya bobulamadibogo, go phegelela go bjona go mo dira gore a kgone go buna mohola o tletšego wa phetho yeo ya bohlale. Go ka newa dikeletšo tše dintši tše šomago go fihlelela seo. Ka mohlala, babulamadibogo ba dira gabotse ka go ithuta kamoo ba ka beakanyago nako ya bona ka gona go e dira yeo e enywago ka mo go kgonegago. Lega go le bjalo, ntlha ya bohlokwa kudu e sa dutše e le tswalano ya motho le Jehofa le mokgatlo wa Gagwe.
Seo se sepedišanago le se ke boemo bja kgopolo bja go rapela. Cor o re, “Ge ke be ke tsena therešong, ke be ke nyaka kudu go bula madibogo.” Lega go le bjalo, tatagwe o ile a nyaka gore pele a fetše thuto ya gagwe Yunibesithing ya tša Temo. Ka morago ga moo, Cor o ile a thoma go bula madibogo. Ge nako e dutše e e-ya o ile a nyala, gomme mosadi wa gagwe a kopanela le yena modirong wa bobulamadibogo. Nakong ya ge mosadi a imile, Cor o ile a lebeletšana le kgonagalo ya go tlogela mošomo wa bobulamadibogo. Cor o re, “Ke ile ka rapela Jehofa gantši gomme ka bea pele ga gagwe kganyogo ya pelo ya-ka ya go tšwela pele ke bula madibogo.” Mafelelong Cor o ile a hwetša mohuta wa mošomo wo o bego o mo dira gore a kgone go bula madibogo mola a dutše a godiša lapa.
Go kgotsofatšwa ke dilo tše di bonagalago tšeo di tlogago di nyakega ke ntlha e nngwe yeo gantši e thušago motho go dula bodireding bja bobulamadibogo. Moapostola Paulo o ngwadile gore: “Menaxanô e se bê ya mexabaru. Le bê ba ba kxodilwexo ke tše di lexo xôna. Yêna mong ó boletše a re: Nka se kê ka Xo lahla; nka se kê ka Xo tloxêla.” (Ba-Hebere 13:5) Go kgotsofatšwa ke dilo tše di lego gona go thušitše Harry le Irene go tšwela pele ba bula madibogo. Irene, yo e lego sefofu, e bile mmulamadibogo ka nywaga e seswai. O re, “Le ka mohla ga se ra ka ra lebelela boemo bja rena bja tša ditšhelete e le bothata. Re ile ra fo hlokomela gore re se ithweše merwalo e sa nyakegego ya tša ditšhelete. Ka mehla re be re bala ditshenyagalelo. Maphelo a rena a be a le bonolo ka mehla, le ge a be a thabiša kudu, gomme a be a humile ka ditšhegofatšo.”
Lethabo le Ditšhegofatšo tše Dintši
Ka go lebelela morago nywageng e senyane ya go bula madibogo, Thamar o re: “O ba kgaufsi kudu le Jehofa, bjalo ka ge eka o go swere ka seatla.” (Psalme 73:23) Diteko tše dingwe le tšona di tla kgopolong. Thamar o oketša ka gore, “Go se phethagale ga-ka ka noši ge go kopana le ga ba bangwe go be go ntshwenya ka mehla. Go feta moo, ke be ke tla lebelela banabešo le dikgaetšedi bao ba kgethilego tsela e putsago kudu ka dilo tše di bonagalago ya bophelo, gomme kgetho ya bona e bonala e le yeo e ipiletšago ge ke be ke le ka ntle ke sepela puleng le phefong. Eupja gare-gare pelong ya-ka, le ka mohla ke be ke sa nyake go fetoša mafelo. Ke’ng gape ntle le go bula madibogo seo se ka tlišago lethabo le bjalo, kgotsofalo e bjalo ya moya le ditšhegofatšo tše bjalo?” Na o tla lebelela lethabo le bjalo le ditšhegofatšo e le tša bohlokwa kudu?
Ka gobane babulamadibogo ba diriša nako e ntši ba le bodireding bja Bokriste, ba boemong bja go thuša batho ba bantši go hwetša tsebo ya therešo ya Beibele. Harry le Irene, bao ba boletšwego pejana, ba re: “Go na le ditokelo tše dintši tšeo di ka hwetšwago ka mokgatlong wa Jehofa, eupja go thuša motho yo a sa tšwago go thabela gore a tšwele pele go fihla boemong bja go ba mohlanka wa Jehofa ke tokelo yeo e di fetago tšohle.”
Mmulamadibogo yo mongwe o boletše ditaba gabotse ge a be a re: “Mantšu a Diema 10:22 [PK] a ipontšhitše e le a therešo boemong bja-ka: ‘Tšhegofatšo ya Jehofa e a humiša, gomme ga e ekeletšwe ka bohloko.’ Nako le nako, lengwalo le le ile la phethagatšwa go nna nywageng yeo ke bego ke direla Jehofa.”
Batswadi, na le tsenya ka go bana ba lena kganyogo ya go bula madibogo? Babulamadibogo, na le leka go gotetša kganyogo ye go ba bangwe? Bagolo, na le thekga babulamadibogo ka phuthegong ya lena le go thuša go aga moya wa bobulamadibogo go ba bangwe? Anke batho ba oketšegilego ba Jehofa ba ikwe ba rata go katanela ditšhegofatšo tše bjalo tše humilego ge ba dutše ba e-ba le karolo tirelong ya bobulamadibogo.