Ditšhegofatšo Tša Bodiredi Bja Bobulamadibogo
“Tšhegofatšo ya Jehofa e a humiša, gomme ga e ekeletšwe ka bohloko.” —DIEMA 10:22, PK.
1, 2. (a) Mmulamadibogo yo mongwe o hlalositše bjang maikwelo a gagwe mabapi le bodiredi bja nako e tletšego? (b) Ke ka baka la’ng babulamadibogo ba hwetša ka mo go tletšego kudu lethabo la go dira barutiwa?
“NA GO ka ba le lethabo le ge e le lefe le legolo go feta go bona motho yo o ithutago le yena e e-ba moreti yo mafolofolo wa Jehofa? Ke mo go thabišago le mo go matlafatšago tumelo go bona kamoo Lentšu la Modimo le lego matla ka gona go tutuetšeng batho gore ba dire diphetogo maphelong a bona e le gore ba kgahliše Jehofa.” Ke kamoo go ngwadilego mmulamadibogo yo a tšwago Canada yo a bilego bodireding bja nako e tletšego ka nywaga e fetago 32. Mabapi le bodiredi bja gagwe bja bobulamadibogo o re: “Ga ke kgone go akanya ke dira selo le ge e le sefe se sengwe. Ke tloga ke sa kgone go akanya selo le ge e le sefe seo se bego se tla ntlišetša lethabo le le swanago.”
2 Na o a dumela gore go tšea karolo go thušeng motho yo mongwe gore a tsene tseleng e yago bophelong go thabiša kudu? Go ba gona, babulamadibogo ga se bona ba nnoši bao ba hwetšago lethabo le bjalo. Bahlanka ba Jehofa ka moka ba ka tlase ga taelo ya go ‘dira ditšhaba ka moka barutiwa’ gomme ba katanela go dira bjalo. (Mateo 28:19) Lega go le bjalo, ka ge babulamadibogo ba kgona go tšea diiri tše dintši bodireding bja tšhemo, gantši ba hwetša ka mo go tletšego kudu lethabo la go dira barutiwa. Eupša go bula madibogo go na le meputso e mengwe gape. Boledišana le babulamadibogo gomme ba tla go botša gore go bula madibogo ke tsela e kgahlišago kudu ya go hwetša ‘tšhegofatšo ya Jehofa yeo e humišago motho.’—Diema 10:22, PK.
3. Ke eng seo se ka re tutuetšago ge re dutše re tšwela pele re hlankela Jehofa?
3 Morago bjale babulamadibogo bao ba tšwago dikarolong tše di fapa-fapanego tša lefase ba ile ba kgopelwa gore ba hlalose ditšhegofatšo tšeo ba di hweditšego bodireding bja nako e tletšego. Anke re ahla-ahleng seo ba ilego ba se bolela. Lega go le bjalo, o se ke wa nyema moko ge e ba tirelo ya gago e le e nyenyane ka baka la boemo bjo bo fokolago bja tša maphelo, botšofadi goba maemo a mangwe. Gopola gore selo sa bohlokwa ke go hlankela Jehofa ka moya ka moka maemong le ge e le afe. Lega go le bjalo, go kwa ditlhaloso tša babulamadibogo ba bangwe go ka godiša kgahlego ya gago ya go tsenela modiro wo o putsago ge e ba go kgonega.
Maikwelo a Tseneletšego a Kgotsofalo le Lethabo
4, 5. (a) Ke ka baka la’ng go abelana le ba bangwe ditaba tše di lokilego e le phihlelo e putsago gakaakaa? (b) Babulamadibogo ba ikwa bjang ka go tšea karolo bodireding ka nako e tletšego?
4 Jesu o itše: “Lešexo la monei le phala la monewa.” (Ditiro 20:35) Ee, go nea ka go hloka boithati go na le meputso ya gona. (Diema 11:25) Se ke sa therešo kudu-kudu ge go tliwa tabeng ya go abelana ditaba tše di lokilego le ba bangwe. Ka kgonthe, ke mpho efe e kgolo yeo re bego re ka e nea mogagabo rena go e na le go mo thuša go hwetša tsebo ya go tseba Modimo yeo e išago bophelong bjo bo sa felego?—Johane 17:3.
5 Ga go makatše gore bao ba lego bodireding ka nako e tletšego gantši ba hlalosa lethabo le maikwelo a tseneletšego a kgotsofalo ao ba a hwetšago bodireding bja bona. Mmulamadibogo wa nywaga e 64 yo a tšwago Brithania o re: “Ke a tseba gore ga go na modiro o mongwe wo o ka bego o ile wa ntlišetša kgotsofalo yeo e tlišitšwego ke go abelana le ba bangwe therešo.” Mohlologadi yo a tšwago Zaire o hlalositše seo bobulamadibogo bo ilego bja se bolela go yena ka gore: “Tirelo ya bobulamadibogo e be e le khomotšo ya kgonthe go nna ka morago ga go lahlegelwa ke monna wa-ka yo a rategago. Ge ke e-ya gantši tirelong go ya go thuša ba bangwe, ke kwa tahlegelo e nyamišago go se nene. Ke holofela dikholofetšong tša Jehofa le go nagana kudu ka tsela yeo nka thušago bao ke ithutago le bona ka yona gore ba dire diphetogo maphelong a bona. Ge letšatši le lengwe le le lengwe le sobela, ke robala boroko gomme pelo ya-ka e tlala lethabo.”
6. Babulamadibogo ba bangwe ba bile le lethabo lefe le le kgethegilego?
6 Ba bangwe bao ba nago le nywaga-some e mentši ba bula madibogo ba bile le lethabo le le kgethegilego la go hlankela mafelong a lego kgole le go hloma diphuthego tšeo mafelelong di ilego tša gola go ba ditikologo. Ka mohlala, kua Abashiri, Hokkaido (e lego sehlakahlaka sa ka leboa-boa la Japane), go na le kgaetšedi yo a nago le nywaga e 33 e le mmulamadibogo. O gopola gore kopanong ya gagwe ya mathomo ya tikologo—bakeng sa Hokkaido ka moka—go be go e-na le ba 70 feela. Bjale gona bjale? Go na le ditikologo tše 12 sehlakahlakeng seo ka palo-moka ya bagoeledi ba fetago 12 000. Akanya kamoo pelo ya gagwe e falalago lethabo ka gona ge a le dikopanong tše dinyenyane le tše dikgolo a e-na le mašaba a bagoeledi-gotee le yena ba Mmušo sehlakahlakeng seo!
7, 8. Babulamadibogo ba bantši ba kgale ba bile le lethabo lefe?
7 Babulamadibogo ba bangwe ba nago le nako e telele ba thabetše go bona barutwana ba Beibele ba kolobetšwa ke moka ba obelela ditokelo tše oketšegilego tša tirelo. Kua Japane kgaetšedi yo a šomilego dikabelong tše senyane tše di sa swanego tša bobulamadibogo ga e sa le go tloga ka 1957 o gopola a sepedišetša mosadi yo mofsa yo a šomago pankeng makasine wa Phafoga! Ge dikgwedi tše senyane di fela mosadi yo mofsa o be a kolobeditšwe. Ka morago o ile a nyalwa gomme yena le monna wa gagwe ya ba babulamadibogo ba kgethegilego. E bile mo go thabišago gakaakang go kgaetšedi wa mmulamadibogo ge kabelong ya gagwe ya boraro, phuthego ya gabo e be e etelwa ke molebeledi wa yona yo mofsa wa mosepedi le mosadi wa gagwe—e le yo e bego e le morutwana wa gagwe wa Beibele!
8 Ga go makatše ge bao ba dirilego bodiredi bja bobulamadibogo modiro wa bona wa bophelo ka moka ba bo lebelela e le “tokelo e bohlokwa-hlokwa yeo e swanetšego go lebogwa” bjalo ka ge mmulamadibogo yo mongwe wa nywaga e 22 a hlalositše se!
Bohlatse bja Tlhokomelo ya Jehofa
9. Jehofa o holofetša bahlanka ba gagwe eng ka ge e le Monei yo Mogolo, gona se se bolela’ng go rena?
9 Jehofa Monei yo Mogolo o holofetša go thekga bahlanka ba gagwe, go ba hlokomela moyeng le ka dilo tše di bonagalago. Kgoši Dafida wa kgale o be a ka bolela gabotse gore: “Ke be ke le lesoxana, ka bá ka tšofala kè sešo ka bôna moloki à lahlilwe, le bana ba xaxwe bà diila.” (Psalme 37:25) Go ba gona, kgonthišetšo ye ya Modimo ga e re imolle boikarabelo bja go nea malapa a rena dilo tše di bonagalago, e bile ga e re nee tumelelo ya go letela go fa kudu ga banababo rena ba Bakriste. (1 Ba-Thesalonika 4:11, 12; 1 Timotheo 5:8) Lega go le bjalo, ge re gafa dilo tše dingwe ka go rata maphelong a rena e le gore re hlankele Jehofa ka mo go tletšego kudu, a ka se ke a re lahla.—Mateo 6:33.
10, 11. Babulamadibogo ba bantši ba tseba’ng go tšwa phihlelong ka bokgoni bja Jehofa bja go hlokomela?
10 Babulamadibogo lefaseng ka moka ba tseba go tšwa phihlelong gore Jehofa o hlokomela bao ba ipeago ka diatleng tša gagwe tše hlokomelago. Nagana ka taba ya banyalani ba babulamadibogo bao ba ilego ba hudugela torotswaneng yeo go yona go bego go nyakega thušo e kgolo kudu ya baboledi ba Mmušo. Ka morago ga dikgwedi tše sego kae, mošomo wa boiphedišo o ile wa thoma go se sa hwetšagala gomme tšhelete yeo ba bego ba e bolokile ya fela. Ka gona ba ile ba amogela akhaonto ya tša phemelo ya koloi ya R359. Ngwanabo rena o hlalosa gore: “Re be re se na tsela ya go e lefa. Re ile ra rapela kudu-kudu bošegong bjoo.” Letšatšing le le latetšego ba ile ba amogela karata e tšwago go lapa leo ka bolona le bego le se na tšhelete. Karata e hlalositše gore lapa le be le amogetše pušetšo ya motšhelo gomme ka ge e be e le e fetago seo ba bego ba se letetše, le be le nyaka go abela banyalani ba babulamadibogo karolo ya yona. Ka gare go be go e-na le tšheke ya R359! Ngwanabo rena wa mmulamadibogo o re: “Le ka mohla nka se ke ka lebala letšatši leo—ke ile ka thaba o šoro! Re ile ra leboga go fa kudu ga lapa le kudu.” Jehofa le yena o leboga botho bjo bo bjalo bjo bo swanago le moya wa go fa kudu wo a o kgothaletšago bahlanka ba gagwe.—Diema 19:17; Ba-Hebere 13:16.
11 Babulamadibogo ba bantši ba ka anega diphihlelo tše di swanago. Ba botšiše gomme ba tla go botša gore le ka mohla ga se ba ka ba “tlogelwa ka mo go feletšego.” Ge a lebelela morago nywageng e fetago 55 a le bodireding bja nako e tletšego, mmulamadibogo yo a nago le nywaga e 72 o re, “Le ka mohla Jehofa ga se a ka a nnyamiša.”—Ba-Hebere 13:5, 6.
“Tsela e Phalago Tšohle ya go Batamela Kgaufsi Kudu le Jehofa”
12. Ke ka baka la’ng modiro wa go goeletša ditaba tše di lokilego e le tokelo e kgolo gakaakaa?
12 Therešo ya gore Jehofa o bile o re kgopela gore re goeletše ditaba tše di lokilego tša Mmušo wa gagwe e re nea tokelo. O re lebelela—gaešita le ge re le batho ba sa phethagalago—re le “badirišani” ba gagwe modirong wo wa go phološa bophelo. (1 Ba-Korinthe 3:9; 1 Timotheo 4:16) Ge re dutše re bolela go ba bangwe ka Mmušo wa Modimo, ge re dutše re goeletša bofelo bja bokgopo, ge re dutše re hlalosetša batho lerato la gagwe le le tlabago ka go lokišetša topollo, ge re dutše re phetla Lentšu la gagwe le le phelago gomme re ruta batho ba dipelo tše di botegago ka dikagare tša lona tše bohlokwa, re fo gogelwa kgaufsi kudu le Mmopi wa rena Jehofa.—Psalme 145:11; Johane 3:16; Ba-Hebere 4:12.
13. Ba bangwe ba re’ng ka mafelelo a bodiredi bja bona bja bobulamadibogo tswalanong ya bona le Jehofa?
13 Babulamadibogo ba kgona go tšea nako e ntši kgweding e nngwe le e nngwe ba ithuta le go ruta ka Jehofa. Ba kwa se se kgoma bjang tswalano ya bona le Modimo? Mogolo wa kua Fora yo e bilego mmulamadibogo ka nywaga e fetago e lesome o araba ka gore: “Go bula madibogo ke tsela e phalago tšohle ya go batamela kgaufsi kudu le Jehofa.” Mmulamadibogo yo mongwe nageng yeo, yo a feditšego nywaga e 18 bodireding bja nako e tletšego o re: “Tirelo ya bobulamadibogo e re dumelela go ‘leka re bone gore Jehofa o lokile,’ letšatši le lengwe le le lengwe re loga tswalano e tiilego le go feta le Mmopi wa rena.” (Psalme 34:8) Kgaetšedi wa kua Brithania yo e bilego mmulamadibogo ka nywaga e 30 o ikwa ka mo go swanago. O re: “Go swanelwa ke go monya tlhahlo go moya wa Jehofa bodireding bja-ka go mpatametša kgaufsi kudu le yena. Ke ile ka kwa e le ka kgonthe mabakeng a mantši gore moya wa Jehofa o be o ntlhahlela legaeng le itšego ka nako e swanetšego.”—Bapiša le Ditiro 16:6-10.
14. Babulamadibogo ba holwa bjang ke go diriša Beibele le dipuku tše di theilwego Beibeleng letšatši le letšatši bakeng sa go ruta ba bangwe?
14 Babulamadibogo ba bantši ba hwetša gore go diriša Beibele le dipuku tše di theilwego Beibeleng letšatši le letšatši bakeng sa go hlalosa le go ruta ditherešo tša Mangwalo go ba thuša go gola ka tsebo ya Lentšu la Modimo. Ngwanabo rena wa nywaga e 85 kua Sepania yo a nago le nywaga e 31 e le mmulamadibogo o hlalosa gore: “Go bula madibogo go nthušitše gore ke hwetše tsebo e tseneletšego ya Beibele, e lego tsebo yeo ke e dirišeditšego go thuša batho ba bantši gore ba tsebe Jehofa le merero ya gagwe.” Kgaetšedi yo a tšwago Brithania yo a nago le nywaga e 23 a bula madibogo o re: “Bodiredi bja nako e tletšego bo nthušitše go hlagolela kganyogo e tšwago pelong ya dijo tša moya.” Go hlalosetša ba bangwe “lebaka la kholofelo yeo e lego go [wena]” go ka matlafatša dikgodišego tša gago ka noši mabapi le ditumelo tšeo o di ratago. (1 Petro 3:15) Mmulamadibogo yo a tšwago Australia o re: “Go bula madibogo go kaonefatša tumelo ya-ka ge ke dutše ke ipolela go ba bangwe.”
15. Ba bantši ba be ba dutše ba rata go dira’ng e le gore ba tsenele bodiredi bja bobulamadibogo gomme ba dule go bjona, gona ka baka la’ng?
15 Go molaleng gore badiredi ba ba babulamadibogo ba kgodišegile gore ba kgethile sebopego sa tirelo se se tlišago ditšhegofatšo tše di sa balegego tše di tšwago go Jehofa. Ga go makatše ge ba bantši ba ile ba thabela go dira dipeakanyo maphelong a bona gaešita le go gafa modiro wa boiphedišo wa bophelo ka moka le mahumo a dilo tše di bonagalago, e le gore ba tsenele bodiredi bja bobulamadibogo gomme ba dule go bjona!—Diema 28:20.
Na Pelo ya Gago e Hlologetšwe go Dira mo go Oketšegilego?
16, 17. (a) Ge e ba o ipotšiša ge e ba o ka kgona go bula madibogo, ke eng seo mo gongwe o ka se dirago? (b) Ba bangwe ba ikwa bjang ge ba sa kgone go bula madibogo?
16 Ka morago ga go ahla-ahla seo babulamadibogo ba se bolelago ka ditšhegofatšo tša bodiredi bja bobulamadibogo, mohlomongwe o ipotšiša ge e ba go bula madibogo e le selo se se go swanetšego. Ge e ba go le bjalo, ke ka baka la’ng o sa boledišane le mmulamadibogo yo a dirilego gore bodiredi bja nako e tletšego bo atlege? O ka ba wa hwetša e le mo go thušago go boledišana le yo mongwe wa bagolo ka phuthegong, motho yo a go tsebago—a tsebago boemo bja gago bja tša maphelo, mafokodi a gago le boikarabelo bja gago bja lapa. (Diema 15:22) Ditlhaloso tša kgonthe tša ba bangwe di ka go thuša go ela ka kelohloko ge e ba o ka kgona go bula madibogo. (Bapiša le Luka 14:28.) Ge e ba o kgona go bula madibogo, ruri o tla hwetša ditšhegofatšo tše dikgolo.—Maleaki 3:10.
17 Lega go le bjalo, go thwe’ng ka bagoeledi ba bantši ba botegago ba Mmušo bao ba sa kgonego go bula madibogo gaešita le ge ba ka ba ba hlologetšwe go dira mo gontši bodireding? Ka mohlala, nagana ka maikwelo a kgaetšedi yo mongwe wa Mokriste yo a katanelago go godiša bana ba gagwe ba bane a nnoši. O re: “Ke ikwa ke nyamile ka gobane ke be ke le mmulamadibogo wa ka mehla, eupša gona bjale ga ke kgone go ya tirelong ya tšhemo go swana le kamoo ke bego ke e-ya ka gona ka baka la maemo a-ka.” Kgaetšedi yo o rata bana ba gagwe kudu gomme o nyaka go ba fepa. Ka nako e swanago o hlologelwa go dira mo gontši modirong wa boboledi. O hlalosa gore: “Ke rata bodiredi.” Bakriste ba bangwe ba ikgafilego bao lerato la bona la go rata Modimo le ba tutueletšago gore ba nyake go hlankela Jehofa ‘ka pelo ya bona ka moka’ ba na le maikwelo a swanago.—Psalme 86:12.
18. (a) Jehofa o letetše’ng go rena? (b) Ke ka baka la’ng re sa swanela go nolega moko ge e ba maemo a lekanetša seo re kgonago go se dira?
18 Gopola gore seo Jehofa a se letetšego go rena ke tirelo ya moya ka moka. Seo se se se bolelago se ka fapana kudu go ya ka batho. Ba bangwe ba kgona go beakanya ditaba tša bona e le gore ba hlankele e le babulamadibogo ba ka mehla. Ba bangwe ba bantši ba ingwadiša e le babulamadibogo ba go thuša nako le nako goba ka mo go sa kgaotšego ba fetša diiri tše 60 kgweding e nngwe le e nngwe bodireding. Lega go le bjalo, batho ba bantši kudu ba Jehofa ba ikgafa modirong wa go bolela le go ruta ka moya ka moka e le bagoeledi ba phuthego. Ka gona, ge e ba o tloga o fokola mmeleng, o tšofetše, o e-na le boikarabelo bja lapa goba maemo a mangwe, o se ke wa nolega moko. Ge feela o nea se sekaone seo o nago le sona, tirelo ya gago ke ya bohlokwa mahlong a Modimo go etša ya bao ba lego bodireding bja nako e tletšego!
Bohle ba ka Bontšha Moya wa Bobulamadibogo
19. Moya wa bobulamadibogo ke eng?
19 Gaešita le ge o ka se kgone go ingwadiša o le mmulamadibogo, o ka bontšha moya wa bobulamadibogo. Moya wa bobulamadibogo ke eng? Tokollo ya July 1988 ya Tirelo ya Rena ya Mmušo e itše: “O ka hlaloswa e le go ba le kgopolo e nepagetšego malebana le taelo ya go bolela le go dira barutiwa, go nwelela ka botlalo go bontšheng lerato le go kgongwa ke ba bangwe, go ba yo a ikgafago, go hwetša lethabo ka go latela Morena ka tshwanelo le go thabela dilo tša moya, e sego dilo tše bonagalago.” O ka bontšha bjang moya wa bobulamadibogo?
20. Batswadi ba ka bontšha bjang moya wa bobulamadibogo?
20 Ge e ba o le motswadi yo a nago le bana ba banyenyane, o ka ba kgothaletša ka pelo ka moka modiro wa bophelo ka moka e le babulamadibogo. Kgopolo ya gago e nepagetšego ka bodiredi e ka gatelela go bona go nyakega ga go dira tirelo ya Jehofa selo sa bohlokwa kudu maphelong a bona. Mo gongwe o ka laletša babulamadibogo le balebeledi ba basepedi gotee le basadi ba bona legaeng la gago e le gore bana ba gago ba ka holwa ke mehlala ya bao ba hweditšego lethabo bodireding bja nako e tletšego. (Bapiša le Ba-Hebere 13:7.) Gaešita le ka magaeng a aroganego bodumeding, batswadi ba dumelago ba ka thuša bana ba bona go dira bodiredi bja nako e tletšego pakane bophelong ka polelo le ka mohlala.—2 Timotheo 1:5; 3:15.
21. (a) Ka moka re ka thekga bjang bao ba bulago madibogo? (b) Bagolo ba ka dira’ng go kgothatša babulamadibogo?
21 Ka phuthegong, ka moka re ka thekga ka pelo ka moka bao ba kgonago go bula madibogo. Ka mohlala, na o ka dira boiteko bjo bo kgethegilego bja go šoma le mmulamadibogo bodireding, kudu-kudu ka dinako tša ge mmulamadibogo a ka ba a nnoši? Mo gongwe o ka hwetša gore go tla ba le go “kgothatšana.” (Ba-Roma 1:11, 12, NW) Ge e ba o le mogolo, o ka ba wa dira mo go oketšegilego kudu go kgothatša babulamadibogo. Ge sehlopha sa bagolo se kopane, se swanetše go ahla-ahla dinyakwa tša babulamadibogo ka mehla. Ge mmulamadibogo a nolegile moko goba a lebeletšane le mathata a itšego, o se ke wa akgofela go eletša gore a kgaotše go bula madibogo. Le ge go nea keletšo e bjalo e ka ba mo go nyakegago maemong a mangwe, o se ke wa lebala gore go bula madibogo ke tokelo e bohlokwa-hlokwa yeo mohlanka wa nako e tletšego a ka e ratago ka mo go tseneletšego. Kgothatšo e nyenyane le keletšo e itšego e šomago goba thušo e ka ba selo feela seo se nyakegago. Ofisi ya lekala ya Mokgatlo kua Sepania e ngwala gore: “Ge bagolo ba kgothaletša bobulamadibogo, ba thekga babulamadibogo bodireding bja tšhemo e bile ba ba diša ka mehla, babulamadibogo ba ba le lethabo le le oketšegilego, ba ikwa ba e-na le mohola gomme ba nyaka go tšwela pele go sa šetšwe mapheko a ka rotogago.”
22. Lebakeng le le le hlobaetšago la histori ya motho, re swanetše go ikemišetša go dira’ng?
22 Re phela lebakeng le le hlobaetšago la histori ya motho. Jehofa o re neile modiro wa go phološa bophelo gore re o phethe. (Ba-Roma 10:13, 14) Anke re bontšheng moya wa bobulamadibogo go sa šetšwe ge e ba re kgona go tšea karolo modirong wo ka nako e tletšego re le babulamadibogo goba go se bjalo. Anke re beng le maikwelo a go akgofa ga nako le moya wa boikgafo. Anke re ikemišetšeng go nea Jehofa seo a se kgopelago go rena—e lego tirelo ya moya ka moka. Le gona, anke re gopoleng gore ge re nea sohle seo re ka kgonago go se nea, go sa šetšwe ge e ba se swana le ditšheletiana tša mohlologadi goba makhura a Maria a theko e kgolo, tirelo ya rena ke ya moya ka moka le gore Jehofa o lebelela tirelo ya rena ya moya ka moka e le ya bohlokwa!
Na o a Gopola?
◻ Ke ka baka la’ng bodiredi bja nako e tletšego bo tliša maikwelo a kgotsofalo le lethabo?
◻ Babulamadibogo ba bantši ba tseba’ng go tšwa phihlelong ka bokgoni bja Jehofa bja go hlokomela bahlanka ba gagwe?
◻ Babulamadibogo ba kwa bodiredi bja bona bo e-na le mafelelo afe tswalanong ya bona le Jehofa?
◻ O ka bontšha bjang moya wa bobulamadibogo?
[Seswantšho go letlakala 23]
Babulamadibogo ba hwetša lethabo le legolo go direng barutiwa
[Seswantšho go letlakala 23]
Bana ba gago ba ka holwa ke go gwerana le bagoeledi ba nako e tletšego ba Mmušo
[Seswantšho go letlakala 23]
Bagolo ba ka kgothatša babulamadibogo bodireding bja tšhemo