Sepela Ka Tumelo
1 Dimilione tša batho di thea maphelo a tšona go dikologa dilo tše di bonagalago tšeo ba nago le tšona, ka bošilo ba bota matla a forago a mahumo. (Mat. 13:22) Ba ithuta thuto e bohloko ge mahumo a bona a timela goba a utswiwa goba a ipontšha e le ao a sa holego. Re opeletšwa gore re phegelele tsela e bohlale, re katanele matlotlo a moya. (Mat. 6:19, 20) Se se akaretša go “sepela ka tumelo.”—2 Ba-Kor. 5:7, PK.
2 Lentšu “tumelo” le fetoletšwe go tšwa lentšung la Segerika leo le fetišetšago kgopolo ya kholofelo, go bota le kgodišego e tiilego. Go sepela ka tumelo go bolela go lebeletšana le maemo a thata ka kholofelo go Modimo, re bota bokgoni bja gagwe bja go hlahla dikgato tša rena le go ikemišetša ga gagwe go hlokomela dinyakwa tša rena. Jesu o beile mohlala o phethagetšego; o ile a dula a lebišitše tlhokomelo go seo se bego se le bohlokwa e le ka kgonthe. (Ba-Heb. 12:2) Ka mo go swanago, re swanetše go dira gore dipelo tša rena di dule di tsepamišitšwe dilong tša moya tše di sa bonwego. (2 Ba-Kor. 4:18) Ka mehla re swanetše go dula re gopola ka go se kgonthišege ga bophelo bja rena bja gona bjale gomme re lemoge go ithekga ga rena ka mo go feletšego ka Jehofa.
3 Gape re swanetše go kgodišega ka mo go tiilego gore Jehofa o re hlahla ka mokgatlo wa gagwe o bonagalago ka tlase ga tlhahlo ya “molaki e a bôtêxaxo yo bohlale.” (Mat. 24:45-47) Re bontšha tumelo ya rena ge re ‘e-kwa bao ba re etelelago pele’ ka phuthegong. (Ba-Heb. 13:17, NW) Go dirišana ka boikokobetšo le thulaganyo ya pušo ya Modimo go bontšha go bota ga rena Jehofa. (1 Pet. 5:6) Re swanetše go tutueletšega go thekga ka pelo ka moka modiro woo mokgatlo o o neilwego gore o o dire. Se se tla re batametša kgaufsi le banababo rena tlemong e tiilego ya lerato le botee.—1 Ba-Kor. 1:10.
4 Kamoo go ka Matlafatšwago Tumelo ka Gona: Ga se ra swanela go dumelela tumelo ya rena gore e eme felo gotee. Re swanetše go katana ka matla gore re e oketše. Go ithuta ka mehla, go rapela ka mehla le go ba gona dibokeng ka mehla go tla re thuša go matlafatša tumelo ya rena e le gore ka thušo ya Jehofa, e tle e kgone go emelana le teko le ge e le efe. (Ba-Ef. 6:16) Na o hlomile mokgwa o mobotse wa ka mehla wa go bala Beibele letšatši le letšatši le go lokišetša diboka? Na ka mehla o naganišiša ka seo o ithutago sona, gomme na o ya go Jehofa ka thapelo? Na go ba gona dibokeng ka moka le go tšea karolo go tšona kamoo maemo a dumelago ka gona ke setlwaedi sa gago?—Ba-Heb. 10:23-25.
5 Tumelo e tiilego e bontšhwa ka mediro e mebotse. (Jak. 2:26) E nngwe ya ditsela tše phalago tšohle ya go bontšha tumelo ya rena ke ka go tsebatša kholofelo ya rena go ba bangwe. Na o tsoma dibaka tša go abelana le ba bangwe ditaba tše di lokilego? Na maemo a gago a ka beakanywa bakeng sa go go dira gore o kgone go dira mo go oketšegilego bodireding? Na o diriša ditšhišinyo tšeo re di hwetšago bakeng sa go kaonefatša boemo bja bodiredi bja rena le katlego ya bjona? Na o ipeela dipakane tša moya gomme wa katanela go di fihlelela?
6 Jesu o lemošitše mabapi le go nwelela ka mo go feteletšego ditabeng tša letšatši le letšatši tša bophelo le go dumelela dikgahlego tša go rata dilo tše di bonagalago goba tša boithati di fsifatša pono ya rena ya moya. (Luka 21:34-36) Re swanetše go tšwela pele re phafogela ka go tia tsela yeo re sepelago ka yona bakeng sa go phema go robegelwa ke sekepe mabapi le tumelo ya rena. (Ba-Ef. 5:15; 1 Tim. 1:19, NW) Ka moka ga rena re holofela gore mafelelong re tla kgona go bolela gore re ‘hlabane tlhabano e botse; re feditše go šiana; tumelo re e swere.’—2 Tim. 4:7.