E-ba Mohlala Go Boleleng Le Boitshwarong
1 Moapostola Paulo o ile a kgothaletša Timotheo gore e be mohlala go boleleng le boitshwarong. (1 Tim. 4:12) Gape re swanetše go bontšha polelo le boitshwaro tšeo e lego mohlala, kudu-kudu ge re le bodireding ka gobane go dira bjalo go tla laola ge e ba re tla fihlelela pelo ya bao re kopanago le bona goba go ka se be bjalo.
2 Re swanetše go bontšha dibopego ka moka tša mekgwa e mebotse, go akaretša le mekgwa ya setho, go naganela, botho, boleta le temogo. Ka go bonagatša dika tše, re bontšha gore re lemoga kamoo ditiro tša rena di kgomago maikwelo a ba bangwe ka gona. Mekgwa e mebotse bodireding e ka bapišwa le dinoko tšeo di dirišetšwago go oketša tatso ya dijo. Ka ntle le tšona, dijo tše di agago e ka ba tše di sa latswegego le tše sa rothišego mare. Go palelwa ke go bontšha mekgwa e mebotse ditirišanong tša rena le ba bangwe go ka ba le mafelelo a swanago.—Ba-Kol. 4:6.
3 E-ba Mohlala go Boleleng: Go nywanywa ga bogwera le tumedišo e borutho ke dikarolo tše bohlokwa tša go nea ga rena ditaba tše di lokilego. Ge re noka matseno a rena ka borutho le potego, re dira gore mong wa ntlo a tsebe gore re na le kgahlego go yena e le ka kgonthe. Ge a bolela, theetša ka kelohloko gomme o bontšhe tlhompho e swanetšego ya go hlompha pono ya gagwe. Ge o bolela, dira bjalo ka go bontšha temogo le botho.—Bapiša le Ditiro 6:8.
4 Ka dinako tše dingwe re ka kopana le motho yo mo gongwe a ka bago a se na bogwera e bile e le ntwa-dumela. Re swanetše go itshwara bjang? Petro o ile a re opeletša gore re bolele ka tsela yeo e bontšhago “bolêta le ka xo boifa.” (1 Pet. 3:16; Ba-Roma 12:17, 18) Jesu o boletše gore ge e ba mong wa ntlo ka go hloka mekgwa a gana molaetša wa Mmušo, re swanetše go fo ‘hlohlora lerole dinaong tša rena.’ (Mat. 10:14) Go bontšha ga rena mekgwa yeo e lego mohlala ka tlase ga maemo a bjalo mo gongwe mafelelong go ka nolofatša pelo ya moganetši.
5 E-ba Mohlala Boitshwarong: Go bolela ditaba tše di lokilego ditarateng tša leema-ema le mafelong a batho bohle go nyaka gore re be ba naganelago, le ka mohla re se ke ra ba bao ba hlabago lešata goba bao ba phegelelago le gore re se ke ra šitišana le mosepelo wa bafeta-ka-tsela. Ge re le ka magaeng a batho ba thabelago, re swanetše go boloka seriti se se swanetšego le boitshwaro re le baeng ba botho, re bontšhe tebogo bakeng sa go amogela baeng ga bona. Bana le ge e le bafe bao ba sepelago le rena ba swanetše go bontšha tlhompho go mong wa ntlo le thoto ya gagwe gomme e swanetše go ba ba nago le mekgwa gomme ba hlwaye tsebe ge re boledišana. Ge e ba bana e le ba ba sa kwego, se se tla tlogela molaetša o sa kgahlišego.—Die. 29:15.
6 Ponagalo ya rena ya motho ka noši e swanetše go dira gore go be molaleng go ba bangwe gore re badiredi ba Lentšu la Modimo. Moaparong le go itokišeng ga rena, ga se ra swanela go ba mašaedi goba bo-mpogeng. Ponagalo ya rena ka mehla e swanetše go ba e swanetšego ditaba tše di lokilego. (Bapiša le Ba-Filipi 1:27.) Ka go šetša ka kelohloko ponagalo ya rena le didirišwa tša rena, re ka se ke ra nea ba bangwe lebaka la go kgopišega goba go swaya bodiredi bja rena phošo. (2 Ba-Kor. 6:3, 4) Polelo ya rena e beago mohlala le boitshwaro di oketša boemo bja go ipiletša ga molaetša wa rena wa Mmušo, tša tliša kgodišo go Jehofa.—1 Pet. 2:12.