Go Thoma Dithuto ka Poroutšha ya Seo Modimo a se Nyakago

¹ Dipego tšeo di tšwago go dikologa lefase di bontšha gore poroutšha ya Ke Eng Seo Modimo a se Nyakago go Rena? ke sedirišwa se matla sa go ruta batho therešo. Dithuto tša Beibele tše dikete di ile tša thongwa beke e nngwe le e nngwe ka poroutšha ye. Na o kile wa atlega go thoma le go swara thuto ya Beibele ka poroutšha ya Seo Modimo a se Nyakago?

² Le ge ba bantši ba hwetša go le bonolo go sepediša poroutšha, ba bangwe ba hwetša go le thata go tseba seo ba tlago go se bolela gore ba thome thuto. Ke mekgwa efe yeo ba bangwe ba ilego ba hwetša e le e atlegago go thomeng dithuto tša Beibele ka go diriša poroutšha ya Seo Modimo a se Nyakago? Ditšhišinyo tše di latelago e swanetše go ba tše holago.

³ Ithapele go Bontšha Kamoo Thuto e Swarwago ka Gona: Ge re dira ketelo ya pele goba leeto la go boela, go e na le gore re fo ithapela go swara thuto ya Beibele le mong wa ntlo, re ka mmontšha kamoo thuto ya Beibele e tlago go swarwa ka gona. Se go bonagala se tla tloša sephiri le dipelaelo tše di latelelanago tšeo beng ba dintlo ba di tswalanyago le lentšu “thuto.” Gatee feela ge re tseba go e bontšha, re tla hwetša gore ka thuto e bonolo, re ka tsena thwii thutong.

⁴ Go Lokišetša ke Senotlelo: Go fišegela ga rena go thoma dithuto tša Beibele go tswalanywa ka go lebanya le kamoo re lokišeditšego ka gona. Go lokišetša e sa le pele go tla re thuša gore re fenye go dika-dika le ge e le gofe moo re ka bago re e-na le gona modirong wa thuto ya Beibele. Ka go itlwaetša dithero tša rena ka makga a mantšinyana, re tla ba ba kgonago go bolela kudu, ra kgona go itlhalosa ka mokgwa wa tlhago le ka mantšu a rena ka noši. Se se ka se re thuše feela gore re iketle eupša se tla dira gore le mong wa ntlo a lokologe.

⁵ Ge o boeletša, ke mo go thušago go lekanyetša nako ya thero ya gago e le gore o ka kgona go tsebiša mong wa ntlo nako yeo o tlago go e tšea go mmontšha kamoo thuto e swarwago ka gona. Ngwanabo rena yo mongwe, ka morago ga gore a itsebiše o ile a re: “Ke fapogetše mo gore ke go bontšhe lenaneo la thuto ya rena e sa lefelelwego ya Beibele. Go tšea metsotso e ka bago e mehlano go go bontšha kamoo e swarwago ka gona. Na o na le metsotso e mehlano?” Thuto 1 ya poroutšha ya Seo Modimo a se Nyakago e ka bontšhwa ka metsotso e ka bago e mehlano. Ee, ke feela mangwalo a kgethilwego ao a ka balwago ka tekanyo ye ya nako, eupša go fetša thuto ya pele ka metsotso e sego kae, mong wa ntlo o swanetše go ela hloko thuto ya gagwe ya pele. Ke moka o mo tsebiše gore ge o boa go tlo ithuta Thuto 2, o tla tšea metsotso e 15 feela.

⁶ Thero e latelago e ile ya itlhatsela e le e atlegago: “Ke rata go go bontšha thuto ya legae ya Beibele e bonolo kudu, eupša e le e tšwelago pele ka lebelo ke diriša poroutšha ya Ke Eng Seo Modimo a se Nyakago go Rena? Ba bantši ba ile ba hwetša gore ka metsotso e 15 feela ka beke bakeng sa dibeke tše 16, ba ka hwetša dikarabo tša Mangwalo tše kgotsofatšago dipotšišong tše tša bohlokwa tša Beibele.” Bontšha dikagare ka boripana. Ge o phetla go Thuto 1, e re: “Ge o ka re nea metsotso e ka bago e mehlano, re be re ka rata go go bontšha kamoo se se šomago ka gona. Thuto 1 e na le sehlogo se se rego, ‘Kamoo o ka Tsebago ka Gona Seo Modimo a se Nyakago.’” Se se latelago bala dipotšišo tše tharo gomme o hlalose dinomoro tšeo di lego ka gare ga mašakanabora. Bala serapa 1 gomme o bontšhe mong wa ntlo kamoo a ka hwetšago karabo ka gona. Mohlomongwe mong wa ntlo a ka kgopelwa gore a bale serapa 2. Ke moka o re: “O ithekgile ka tsebišo ye, o tla araba potšišo ye bjang? [Bala potšišo gape gomme o dumelele mong wa ntlo gore a hlalose.] O tla lemoga gore go na le mangwalo ao a sepedišanago le serapa se sengwe le se sengwe. Mangwalo a a lebiša tlhokomelo ya rena karabong ya Beibele dipotšišong tše. Ka mohlala, anke re bale 2 Timotheo 3:16, 17 gomme re bone ge e ba e thekga karabo yeo o e neilego mabapi le mongwadi wa Beibele.” Ka morago ga go bala serapa 3, go etšwe hloko potšišo le go bala Johane 17:3, lebiša tlhokomelo ya mong wa ntlo tsebong yeo a e hweditšego ka go boeletša Thuto 1. Mo lebakeng le o ka leba go Thuto 2 gomme o bale potšišo ya mafelelo e rego, “Ke ditsela dife tše pedi tšeo ka tšona re ka ithutago ka Modimo?” Ke moka botšiša gore: “Ke neng o tla bago le metsotso e ka bago e 15 e le gore re ka dira Thuto 2 gomme ra hwetša karabo?”

⁷ Ke gabohlokwa go boloka poledišano e le bonolo gomme o rete mong wa ntlo ge go kgonega. Ge o rulaganya ketelo e nngwe, go e na le go botšiša ge e ba a rata go tšwela pele, e fo mo kgothaletša gore a latele mokgwa o swanago bakeng sa thuto e latelago. Dira gore a tsebe gore o lebeletše pele go boa gape. Bagoeledi ba bangwe ba ile ba ithapela go swara thuto ka mogala ge e ba thulaganyo e e-ba e thata. Gape o ka kgothaletša morutwana gore a bee poroutšha lefelong le le bolokegilego le le le swanetšego e le gore e ka hwetšagala kgaufsi ketelong ya gago e latelago.

⁸ E-ba yo a Ikemišeditšego: Gaešita le ge senotlelo se se lebišago katlegong e le go lokišetša, re swanetše go ikemišetša go latelela. Go ruta thuto ka metsotso e sego kae e ka ba tlhohlo, ka gona ikemišetše go itlwaetša thero ka makga a mantši ka mo go nyakegago e le gore o se bontšhe go se kgodišege ge o bontšha thuto. Leka go bontšha thuto go yo mongwe le yo mongwe yo o gahlanago le yena ntlong, o sa rulaganyetša le ka go nea bohlatse ka mogala. Ge e ba o e-na le bothata bja go thoma thuto ya Beibele, o se ke wa nyema moko. Go atlega go thomeng dithuto tša Beibele go nyaka boikemišetšo le kganyogo e tšwago pelong gore o abelane le ba bangwe therešo.—Ba-Gal. 6:9.

⁹ Ka go diriša ditšhišinyo tše, le wena o ka ba le tokelo ya go thuša motho yo mongwe tseleng e išago bophelong, ka go thoma le go swara thuto ya Beibele ka poroutšha ya Seo Modimo a se Nyakago.—Mat. 7:14.