Tšwela Pele o Etiša Mmušo Pele
1 Go etiša Mmušo wa Modimo pele bophelong le go tšwela pele re dira bjalo, ga go bonolo ge re lebeletšane le mathata a tša boiphedišo goba mathata a mangwe. Re ka tšwela pele bjang re etišitše Mmušo pele ge mathata a tšwelela? Go thwe’ng ge e ba re newa mošomo wo o tla nyakago gore re foše diboka goba wo o šitišanago le tirelo ya rena ya tšhemo? Na Mmušo bjale o swanetše go tšea boemo bja bobedi bophelong?
2 Go Nyakega Tumelo e Tiilego: Ge tumelo ya rena e lekwa ka tlase ga maemo a bjalo, ga se ra swanela go lebala kholofetšo ya Jehofa le kgonthišetšo ya Jesu ya go thekgwa ke Modimo ge e ba re tsoma Mmušo pele. (Ps. 37:25; Mat. 6:31-34) Ditutuetšo tša lefase le dikgateletšo di ka foufatša pono ya rena gomme tša re thibela go dira Mmušo selo sa bohlokwa kudu. Ba bangwe ba dumeletše ditebelelo tša go ba le maemo mošomong goba mehola ya tša ditšhelete gore e be selo se segolo bophelong. Lega go le bjalo, go swana le Paulo, re swanetše go lekanyetša ka nepo seo ge e le gabotse e lego sa bohlokwa bophelong.—Ba-Fil. 3:7, 8.
3 Na go Nyakega Dipeakanyo? Mogoeledi yo mongwe o boletše gore: “Pelo ya-ka e be e le kgwebong ya-ka—ke be ke e rata kudu. Ke ile ka kwa gore nka tšwela pele ke le Hlatse mola ke dutše ke neela bogolo bja nako ya-ka dikgahlegong tša kgwebo.” Eupša o be a e-na le maikwelo a phegelelago a gore a ka dira mo go oketšegilego go hlankeleng Jehofa. Ge nako e dutše e-ya, o ile a tlogela kgwebo yeo e bego e le lepheko tšwelopeleng ya gagwe ya moya. Ka morago ge a šetše a ineetše ka mo go feletšego modirong wa Mmušo, o be a ka kgona go bolela gore: “Ga bjale ke kwa bophelo bja-ka bo atlegile mahlong a Jehofa, e lego sona selo sa bohlokwa.”
4 Ka mo go thabišago, ba bantši ba ile ba tlogela mešomo ya bona ya boiphedišo le ditebelelo tša dipoelo tše dikgolo tša ditšhelete, ba nolofatša maphelo a bona, gomme ba tsenela tirelo ya nako e tletšego. Bafsa bao e lego bahlanka ba bodiredi le bagolo bao ba sego lenyalong, bao ba yago Sekolong sa Tlwaetšo sa Bodiredi ba dirile se gomme ba thabela tokelo e botse ya tirelo. Ka go ekiša mohlala wa Paulo o mobotse, ba kgotsofetše e le ka kgonthe ka ditokišetšo tša motheo tša dilo tše di bonagalago.—1 Ba-Kor. 11:1; 1 Tim. 6:6-8; Ba-Heb. 13:5.
5 Gaešita le ge pono ya rena ka bophelo e ka kwerwa ke lefase, re na le tšhegofatšo ya Jehofa. (1 Ba-Kor. 1:26-31) Na ga se mo go kgothatšago go tseba gore o tla re diriša ka mo go tletšego ka mo go ka kgonegago ka gona le gore o tla re thuša go phetha modiro wa gagwe? Tokelo ya rena ya mo nakong ye ya go phatlalatša Mmušo wa Modimo wo o hlomilwego, e ka se ke ya bušeletšwa le ka mohla. Ka gona, gona bjale ke nako ya go tšwela pele re etiša Mmušo pele maphelong a rena.