Mekgatlo e Mefsa e Hlomilwego

Kgatišo ya January 15, 2001 ya Morokami, e ile ya bega ka tsela e rulagantšwego yeo ka yona Dihlatse tša Jehofa di tšwelago pele go gatela pele ka modiro wa Mmušo lefaseng ka moka. Gape e ile ya hlalosa kamoo mekgatlo ya molao e fapa-fapanego e dirišwago ka gona bjalo ka didirišwa tša go nolofatša go phatlalatšwa ga ditaba tše dibotse. Go bohlokwa gore mekgatlo e bjalo e dumelelane le melao ya tikologong le ya setšhaba, bjalo ka ge e le seo se nyakwago ke Lentšu la Modimo. (Ba-Roma 13:1) Ka baka la go fapa-fapana le tekanyo ya modiro wa rena, Sehlopha se Bušago se dumeletše go hlongwa ga mekgatlo e oketšegilego bakeng sa go hlokomela dinyakwa tše itšego tša Dihlatse tša Jehofa United States le dikarolong tše dingwe tša lefase. Mo Afrika Borwa le dinageng tše dintši tša kgaufsi, re šetše re e-na le mekgatlo ya molao e šomago, e bjalo ka:

Jehovah’s Witnesses of South Africa

Jehovah’s Witnesses Botswana

Lesotho Association of Jehovah’s Witnesses

Jehovah’s Witnesses of Namibia

Swaziland Association of Jehovah’s Witnesses

Mekgatlo ye e šoma gotee le Watch Tower Bible and Tract Society of Pennsylvania. Nakong e tlago, bontši bja mangwalo ao a tlago go romelwa diphuthegong le go bagoeledi, a tla tla a ngwadilwe, “Jehovah’s Witnesses of South Africa.” Ge le leletša ofisi ya lekala ya lefelong, moamogedi wa megala o tla araba ka gore, “Jehovah’s Witnesses.” Se se tla re hlaola gabotse ka leina la rena le le swanetšego. Tirišano ya gago diphetogong tše tšeo di dirilwego ke Sehlopha se Bušago bakeng sa go phetha kabelo ya sona ya go hlokomela dilo ka moka tša Mong wa sona, e tla lebogwa kudu.—Mat. 24:45-47.