Bontšhang Tebogo Bakeng sa Matlotlo a Pušo ya Modimo
1 Ge a dira dithulaganyo tša go lokiša tempele, Kgoši Josia o ile a reta bao ba abetšwego go dira modiro, a re: “Fêla, dithšêlêtê tše ba neêlwaxo diatleng, di se kê tša balwa; ba dirê ka xo ba bôta.” (2 Dikx. 22:3-7) Tebogo yeo banna bao ba bego ba na le yona ka dilo tše kgethwa e be e bontšhwa ke ka tsela yeo ba bego ba swara ka gona ditšhelete tšeo di beilwego tlhokomelong ya bona. Lehono, ge re dutše re swaregile mošomong o mokgethwa wa ditaba tše dibotse tša Modimo, re swanetše gore ka mo go swanago re bontšhe potego go swareng matlotlo ao re a neilwego.
2 Bodireding bja Tšhemo: Go bontšha tebogo bakeng sa molaetša wa bohlokwa wo o lego ka dikgatišong tša rena le go lemoga ditshenyagalelo tšeo di akaretšwago go di tšweletšeng go re dira gore re di tšeele godimo. Bao ba sa bontšhego tebogo ya kgonthe bakeng sa molaetša wa Beibele, ga se ra swanela go ba abela dipuku tša rena ntle le go diriša temogo. Ge e ba motho a sa bontšhe go kgahlegela molaetša wa ditaba tše dibotse, re ka no mo nea pampišana go e na le go mo nea puku.
3 Aba dipuku ka tsela yeo e bontšhago go tšeela godimo bohlokwa bja tšona. Phema go di tlogela mafelong a batho bohle moo di tlago go gašaganywa gohle. E le gore o se ke wa senya, bala dipuku tšeo o nago le tšona ka gae pele o ka hwetša dipuku tše dingwe tše di oketšegilego. Ge e ba ka mehla o e-ba le dimakasine tše di šalago tša tokollo e nngwe le e nngwe, naganela taba ya go fokotša otara ya gago.
4 Dikgatišo tša Motho ka Noši: Re swanetše go otara feela dikgatišo tšeo re tlogago re di nyaka. Re swanetše go lekanyetša ge re dira kgopelo ya Dibeibele tša deluxe le tša Reference le dikgatišo tše dingwe tše dikgolo tše bjalo ka Concordance, Index, dibolumo tša Insight le puku ya Bagoeledi, e lego tšeo ka moka di tšweletšwago ka ditshenyagalelo tša godimo.
5 Na o kgonthišetša gore o ngwala leina le aterese ya gago dikoping tša dikgatišo tša gago tša motho ka noši? Se se thuša go fokotša go nyakega ga gore re hwetše dikgatišo tše dingwe legatong la tšeo di timetšego. Ge e ba o timelelwa ke puku ya dikopelo, Beibele goba kgatišo ya go ithuta, mohlomongwe o tla e hwetša gare ga dilo tše di timetšego gomme tša kgoboketšwa Holong ya Mmušo goba lefelong la kopano.—Luka 15:8, 9.
6 A re lekeng ka matla go diriša dipuku tša rena ka bohlale. Ye ke tsela ya go bontšha potego ya rena go swareng matlotlo a Mmušo ao Jehofa a a beilego tlhokomelong ya rena.—Luka 16:10.