Na O Lebelela Dipuku Tša Rena E Le Tša Bohlokwa?

1 Ditaamane le mafsika a mangwe a bohlokwa di lebelelwa e le tše bohlokwa e sego feela ka baka la botse bja tšona eupja gape ka baka la go ba ga tšona tšeo di hwetšagalago le go epja ka bothata. Tsebo ya go tseba Jehofa le Jesu Kriste ke ya bohlokwa bjo bo fetišago, gomme dipuku tša rena ke tšona di nnoši lefaseng tšeo di hlalosago mahumo a a moya ka mo go tseneletšego le ka bohlale bja Modimo. (Ba-Roma 11:33; Ba-Fil. 3:8) Re ka bontšha bjang tebogo ya kgonthe bakeng sa dipuku tša rena?

2 Tsela e nngwe ya go bontšha tebogo ke go sepediša dipuku tša rena ka bolokologi go batho bao re gahlanago le bona tirelong ya tšhemo. Batho ba bantši ba ka thaba ge motho o mongwe a ka ba nea taamane goba lefsika la bohlokwa. Ee, mathomong ba ka fo se lebelele dipuku tša rena ka leihlo le le swanago le leo ba bego ba tla lebelela taamane ka lona, eupja bao ba lemogago senyakwa sa bona sa moya ba tla lemoga bohlokwa bja tšona bja kgonthe go se go ye kae. Ge re swara dithuto ka dipuku tša rena, batho ba thušwa go lemoga seo Beibele e se rutago gomme ba bulelwa tsela ya go aga tswalano le Jehofa. Mohola wa kgonthe wo o ka hwetšwago dipukung tša rena o ithekgile ka tsela yeo di dirišwago ka yona.

3 Gape re swanetše go phafogela dibaka tše dintši tšeo re ka di hwetšago tša go neela dipuku ge re nea bohlatse bjo bo sa rulaganyetšwago. Nagana ka ditsela tša go nea bohlatse go baeng, meloko, bašomi-gotee le rena, bao re tsenago le bona sekolo, batho bao re gahlanago le bona ge re ile mabenkeleng le bao re gahlanago le bona tseleng ya go tloga ntlong e nngwe go ya go e nngwe ge re le tirelong ya tšhemo. Rulaganyetša nako e tlago, o e-na le dipuku tše o tlago go di neela mabakeng ao. Gantši ga go thata go sepela le e tee goba go feta moo tša dipuku tše nyenyane. Go ka dirwa mo gobotse kudu ka go nea bohlatse bjo bo sa rulaganyetšwago.—1 Pet. 3:15.

4 Gaešita lege re sepediša kudu-kudu mpho ya gona bjale, ka dinako tše dingwe re ka kgetha go diriša puku e fapanego. Ge re phetha bodiredi bja rena, re nyaka go thuša batho bao ba swanago le dinku go tsena tseleng e išago bophelong. Dipuku di ka re thuša go dira seo. Ge re boledišana le motho yo a thabelago ka Mangwalo, re ka hwetša gore o kgahlišwa ke taba e itšego. Ge e ba re tlwaelane gabotse le tsebišo e bohlokwa e lego ka dipukung tše di fapa-fapanego, gona re tla kgona go beakanya thero ya rena gomme ra neela puku yeo e sepedišanago ka go lebanya le dikgahlego tša motho yo re bolelago le yena. Se se ka nyaka gore re boele re e-na le puku e swanetšego.

5 Dipuku tšeo di tlogetšwego šelofong Holong ya Mmušo goba legaeng la rena ga di phethe morero wa tšona, gomme bohlokwa bja tšona ga bo lemogwe. Gaešita le dikgatišo tša kgale tša dimakasine, dipukwana, dipuku tše di tlemilwego le dipampišana di swanetše go dirišwa ka mo go holago. Ke neng la mafelelo mo re ilego ra hlahloba dipuku tšeo re nago le tšona? Re tla makatšwa ke go lemoga bontši bja tšeo re nago le tšona. Na dipuku tšeo re nago le tšona di sa le boemong bjo bobotse—ga se tša fetoga mmala ka baka la ge e le tša kgale, ga se tša kgeiga goba go šilafala? Ge e ba go le bjalo, gona re swanetše go leka ka gohle gore re di sepediše bodireding bja tšhemo. Dipuku tšeo di senyegilego di ka bolokwa bakeng sa go di diriša ka noši goba tša lahlwa ka mo go swanetšego.

6 Ka mehla naganišišang ka kelohloko ka dipuku tšeo le tlago go di nyaka tšhemong. Ka dinako tše dingwe re ka fo hlokomologa go reka mpho ya gona bjale ka nako e swanetšego khaonthareng ya dipuku. Go nyakega go lokišetša le go rulaganya gabotse ge e ba re rata go kgonthišetša gore re na le sesola se se lekanego sa mpho ya gona bjale le dipuku tše dingwe tšeo di nyakegago tšhemong ya rena. Se ke sa therešo kudu-kudu ge e ba o šoma bjalo ka mmulamadibogo wa go thuša goba wa ka mehla ka phuthegong.

7 Dipuku tša rena ke tša bohlokwa kudu ge di tlogetšwe ka diatleng tša batho bao ba lebogago Lentšu la Modimo la therešo. Eka ka moka ga rena re ka bontšha gore re lebelela dipuku tša rena e le tša bohlokwa kudu.