Go Sepediša Dikgatišo Tšhemong Yeo go Bolelwago Maleme a Mantši
1. Ke ka baka la’ng go nyakega dikgatišo tša leleme le šele diphuthegong tše dintši?
1 Mafelong a mantši tšhemo e thoma go ba le batho ba tšwago dinageng tše dingwe. Bontši bja batho ba ba ithuta therešo kapejana gomme ba kwešiša ka mo go tseneletšego ge ba rutwa ka leleme la gabo bona. Ke ditokišetšo dife tšeo di dirilwego bakeng sa go thuša batho ba thabelago gore ba hwetše dikgatišo tše di theilwego Beibeleng ka leleme leo ba le kwešišago gakaone?
2. Go nyakega tirišano efe ge diphuthego tše pedi goba tše fetago moo tšeo di bolelago maleme a fapanego di šoma tšhemo e tee?
2 Nako Yeo Dikgatišo di Swanetšego go Sepedišwa: Ge diphuthego tše pedi goba tše fetago moo tšeo di bolelago maleme a fapanego di šoma tšhemo e tee, dihlopha tša bagolo tšeo di lego diphuthegong tšeo di tla dirišana le balebeledi ba tirelo go hloma tshepedišo yeo e tlago go amogelwa ke diphuthego ka moka e le gore sehlopha se sengwe le se sengwe seo se bolelago leleme le itšego se newe bohlatse ka botlalo. Ge o dira boboledi ka ntlo le ntlo, ka go nea bohlatse bjo bo sa rulaganyetšwago goba mafelong a batho bohle, sepediša dikgatišo ka maleme ao a bolelwago tikologong yeo.
3. Ke neng moo phuthego e ka otarago dikgatišo tša leleme le šele?
3 Nako Yeo Dikgatišo di Swanetšego go Otarwa: Go ka dirwa’ng ge e ba go na le badudi ba bantši bao ba bolelago leleme le šele eupša go se na phuthego ye e dirišago leleme leo tikologong yeo? Maemong a bjalo, diphuthego di ka otara palo e nyenyane ya dikgatišo tša motheo tšeo di lego gona ka leleme leo tše bjalo ka dipampišana, diporoutšha tša Seo Modimo a se Nyakago le Mogwera wa Modimo le puku ya Tsebo. Bagoeledi ba ka sepediša dikgatišo tše le ge e le neng ge ba gahlana le batho bao ba kgonago go bala leleme leo.
4. Dikgatišo tša leleme le šele tšeo phuthego e sa di otarego di ka hwetšwa bjang?
4 Kamoo Dikgatišo di ka Otarwago ka Gona: Ge e ba phuthego e sa otare dikgatišo tša leleme leo le balwago ke motho yo a thabelago, dikgatišo tša leleme leo di ka hwetšwa bjang? Mogoeledi o swanetše go ikopanya le mohlanka wa dipuku go bona gore ke dikgatišo dife tšeo di lego gona tša leleme leo e le gore dikgatišo tšeo di ka otarwa kgopelong e latelago ya dipuku tša phuthego.
5. Go ka dirwa’ng ge e ba go nyakega dikgatišo pele ga ge go ka amogelwa dikgatišo tša nakong e latelago tše di kgopetšwego?
5 Ge e ba di nyakega kapejana, mogoeledi a ka botšiša setho se sengwe sa Komiti ya Tirelo ya Phuthego ge e ba kgopelo e ka romelwa pele ga kgopelo ya dipuku yeo e rulaganyeditšwego nakong e latelago. Ge e ba se se dumelelwa, molomaganyi wa dipuku goba motho yo a kgethilwego ke yena a ka romela kgopelo e akgofilego ka poso goba ka go leletša ofisi ya lekala mogala. Dikgatišo di tla romelwa atereseng ya ka mehla ya phuthego goba atereseng ya nakwana ge e ba go nyakega.
6. Morero wa rena wa go dira gore dikgatišo tša Bokriste di hwetšagale ke ofe?
6 Eka re ka diriša dikgatišo tša Bokriste gabotse bakeng sa go thuša “batho bohle” go sa šetšwe gore ba bolela leleme lefe, gore ba ‘fihlelele tsebo ya therešo gomme ba phološwe.’—1 Tim. 2:3, 4.