Sekolo Seo se re Hlamelago Modiro wa Bohlokwa Kudu

¹ Batho ba tsena sekolo e le gore ba hwetše tlhahlo yeo e tla ba thušago go fihlelela dipakane tša bona bophelong. Lega go le bjalo, ke pakane efe e lego bohlokwa kudu go feta ya go tumiša yena Monei wa bophelo le go thuša ba bangwe go ithuta ka merero le ditsela tša gagwe? Ga e gona. Morero wa Sekolo sa Bodiredi sa Pušo ya Modimo ke go re lokišeletša go ruta ba bangwe tumelo ya rena. Ka gona, ge re e-ba gona sekolong bekeng e nngwe le e nngwe, re hwetša bokgoni bjo bo re hlamelago mediro ya bohlokwa kudu bophelong.

² “Lenaneo la Sekolo sa Bodiredi sa Pušo ya Modimo la 2003” le tsentšwe ka Tirelong ya Rena ya Mmušo ya kgweding e fetilego. Lenaneo le akaretša ditaba tša mabapi le kamoo sekolo se tlago go swarwa ka gona. O ka hwetša e le mo go holago go boloka lenaneo la gago ka koping ya gago ya Holwa ke Thuto ya Sekolo sa Bodiredi sa Pušo ya Modimo, yeo o swanetšego go tla le yona Sekolong sa Bodiredi sa Pušo ya Modimo beke e nngwe le e nngwe. Ela hloko tše dingwe tša dibopego tša Sekolo sa Bodiredi sa Pušo ya Modimo sa 2003.

³ Seka sa Polelo: Go thoma ka January, seboka se sengwe le se sengwe se tla thoma ka polelo ya metsotso e mehlano ya mabapi le seka sa polelo goba karolo e itšego ya go bala, go ithuta goba go ruta. Molebeledi wa sekolo o tla nea polelo ye ya mathomo, goba a ka abela mogolo yo mongwe yo a swanelegago go nea polelo ye. Seboledi se ka ahla-ahla tlhaloso le bohlokwa bja seka se sa polelo. Ke moka se swanetše go godiša taba ka go ahla-ahla mehlala ya Mangwalo le go bontšha kamoo go ka dirišwago seka se, se lebiša tlhokomelo ka mo go kgethegilego kamoo go dira bjalo go ka kaonefatšago bodiredi bja rena bja tšhemo.

⁴ Kabelo No. 1: Bana babo rena bao ba abetšwego go nea polelo ya tayo ba eletšwa gape go “lebiša tlhokomelo moholeng o šomago wa tsebišo yeo e ahla-ahlwago.” Se se bolela go bontšha phuthego kamoo e ka dirišago tsebišo ka gona. Ge o hwetša kabelo ye, bala matlakala 48-9 a puku ya go ithuta ya Sekolo sa Bodiredi bakeng sa ditšhišinyo tša kamoo o ka lokišetšago ka gona gomme o ithute ditšhupetšo tšeo di bontšhitšwego tlhatlamanong ya dihlogo ya puku ka tlase ga sehlogwana se se rego “Go bontšha go šoma ga kgonthe ga taba.”

⁵ Lenaneo la Mmalo wa Beibele: Ge e ba nakong e fetilego o be o sa kgone go sepedišana le mmalo wa Beibele wa beke le beke, ke ka baka la’ng ngwageng wo o sa ikemišetše go sepedišana le lenaneo? Bao ba dirago bjalo ba tla fetša Mangwalo a Bakriste a Segerika mafelelong a ngwaga. Mehola ya go thoma lenaneo la mmalo wa Beibele ka Mangwalo a Bakriste a Segerika e ahla-ahlilwe go letlakala 10, serapa 4 ka pukung ya Sekolo sa Bodiredi.

⁶ Dintlha tše Dikgolo tša Mmalo wa Beibele: Karolo ye e okeditšwe gore e be metsotso e lesome e le gore batheetši ba ka nea ditlhaloso tša mmalo wa beke yeo. Bao ba abetšwego ba swanetše go kgomarela ka go tia nakong yeo e abetšwego. Di tla newa bekeng e nngwe le e nngwe, go akaretša le beke ya poeletšo ya molomo. Ge o bala dikgaolo tše di abetšwego, lebelela dintlha tšeo di tlago go go hola thutong ya gago ya lapa, bodireding bja gago goba tseleng ya gago ya bophelo. Ke dika dife tša Jehofa tšeo di bontšhitšwego ditirišanong tša gagwe le batho le ditšhaba? O ithutile’ng seo se matlafaditšego tumelo ya gago le go aga tebogo ya gago ya go leboga Jehofa? Ikwe o lokologile go ka nea tlhaloso ka ntlha le ge e le efe dikgaolong tšeo di abetšwego, gaešita le ditemaneng tšeo di tla balwago go Kabelo No. 2, ka ge ngwanabo rena yo a tla balago a ka se nee ditlhaloso ka ditemana tšeo.

⁷ Kabelo No. 2: Bekeng e nngwe le e nngwe kabelo ya mathomo ya morutwana e tla ba go itlwaetša go bala phatlalatša. Mmalo ka moka o tla tšewa mmalong wa Beibele wa beke ka ntle le mmalo wa beke ya mafelelo ya kgwedi e nngwe le e nngwe. Mmalo wa beke ya mafelelo ya kgwedi o tla tšewa go Morokami. Morutwana o swanetše go bala taba e abetšwego ka ntle le go nea matseno goba phetho. Ka tsela ye, a ka lebiša tlhokomelo ya gagwe e kgolo bokgoning bja gagwe bja go bala.—1 Tim. 4:13.

⁸ Dikabelo No. 3 le No. 4: Tše dingwe tša dikabelo tše di na le mothopo o montši wa taba go tšwa ka pukung ya Go Boledišana go feta tše dingwe; tše dingwe di na le sehlogo feela. Bao ba neilwego dikabelo tše di nago le mothopo wa taba o lekanyeditšwego goba tše di nago le sehlogo feela ba tla ba le sebaka sa go godiša dipolelo tša bona ka go dira nyakišišo ka dikgatišong tša rena tša Bokriste. Se se ka dira gore go be bonolo go dikgaetšedi gore ba dumelelanye ditlhaloso tša bona le seo se bolelwago ke bathuši ba bona.

⁹ Dithulaganyo: Bjalo ka ge go bontšhitšwe go letlakala 45 la puku ya Sekolo sa Bodiredi, molebeledi wa sekolo a ka abela thulaganyo. Ge e ba a sa dire bjalo, gona dikgaetšedi di ka kgetha thulaganyo lelokelelong le le lego go letlakala 82. Ge e ba kgaetšedi a nea polelo gatee dikgweding tše pedi, dithulaganyo tše 30 tše di fapa-fapanego e tla ba tše di lekanego go ka tšea nywaga e mehlano. Dikgaetšedi tšeo di kgethago thulaganyo No. 30, e lego e rego “Dithulaganyo tše dingwe tšeo di swanelago lefelong la geno,” di swanetše go ngwala thulaganyo ka tlase goba ka morago ga fomo ya bona ya kabelo (S-89). Molebeledi wa sekolo o tla ngwala letšatši-kgwedi la polelo ya morutwana go letlakala 82 la puku ya morutwana kgaufsi le thulaganyo yeo a e dirišitšego. A ka dira se ka nako e tee le ge a swaya fomo ya keletšo ya morutwana.

¹⁰ Fomo ya Keletšo: Fomo ya gago ya keletšo e ka pukung ya gago. E tšwelela go matlakala 79-81. Ka go rialo, o tla swanela ke go tliša puku ya gago go molebeledi wa sekolo ka morago ga polelo e nngwe le e nngwe yeo o e neago. Molebeledi wa sekolo o tla swanela ke go boloka pego ya dintlha tša keletšo tšeo barutwana ba šomelago go tšona.

¹¹ Poeletšo ya Molomo: Poeletšo ya Sekolo sa Bodiredi sa Pušo ya Modimo e tla dirwa ka molomo. E tla dirwa gatee ka dikgwedi tše dingwe le tše dingwe tše pedi gomme e tla tšea metsotso e 30. Dipotšišo tšeo di tla ahla-ahlwago nakong ya tlhahlobo di tla tšwela pele di tšwelela ka go Tirelo ya Rena ya Mmušo. Ge e ba beke yeo e rulaganyeditšwego poeletšo ya molomo e thulana le beke ya kopano ya tikologo goba ketelo ya molebeledi wa tikologo, gona dipolelo tša bekeng e latelago di swanetše go newa beke pele gomme poeletšo ya molomo e swanetše go rulaganyetšwa lefsa bakeng sa beke e latelago.

¹² Diklase tša Tlaleletšo: Diphuthego tšeo di nago le barutwana ba ngwadišitšwego sekolong ba fetago 50, bagolo ba ka naganela go diriša diklase tša tlaleletšo. “Tokišetšo ye e ka dirišetšwa dipolelo ka moka tša barutwana goba dipolelo tše pedi feela tša mafelelo.” (Sekolo sa Bodiredi, letl. 285) Tšhišinyo ye ya mafelelo e diretšwe go thuša diphuthego tšeo go tšona go nago le dikgaetšedi tše dintši eupša go na le bana babo rena ba sego kae feela bao ba tla abelwago dikabelo tša go balwa. Bagolo ba swanetše go kgetha bana babo rena ba swanelegago go swara diklase tše.

¹³ Moeletši yo e Lego Mothuši: Ka ge go bontšhitšwe lenaneong la Sekolo sa Bodiredi sa Pušo ya Modimo, moeletši yo e lego mothuši o swanetše go kgethwa ke sehlopha sa bagolo go nea keletšo ya ka thoko go bagolo le bahlanka ba bodiredi bao ba neago dintlha tše dikgolo tša mmalo wa Beibele le go nea dipolelo tša tayo. Ngwanabo rena yo a abetšwego go dira se o swanetše go ba yo a nago le phihlelo, yoo keletšo ya gagwe e tla hlompšhago ke bagolo ba bangwe. Keletšo ya gagwe e swanetše go ba yeo e agago, a rete mekgwa ya go bolela gabotse le ya go ruta le go kgothaletša dintlha tše pedi tša kaonefatšo. Ga go nyakege gore a nee keletšo ka morago ga polelo e nngwe le e nngwe yeo e newago ke ngwanabo rena yo a hwetšago dikabelo ka mehla. Lega go le bjalo, ngwanabo rena yo a abetšwego go nea keletšo ye o swanetše go ba yo a nago le temogo le go kwešiša gore gaešita le bana babo rena bao ga bjale ba neago dipolelo tša phatlalatša ba ka thušwa go dira tšwelopele e oketšegilego.—1 Tim. 4:15.

¹⁴ Seo a Swanetšego go se Theetša: Ke’ng seo se ka thušago moeletši go hlahlobeng polelo? Lepokisi la boraro go dikgaolo tše 53 tšeo di ngwadilwego dinomoro tša puku ya Sekolo sa Bodiredi le na le kakaretšo e kopana ya seo o ka se theetšago. Molebeledi wa sekolo le yena o swanetše go ela hloko dikeletšo tše dingwe goba ditšhišinyo ka pukung tšeo di tla mo thušago go hlahloba kapejana go godiša polelo ka mo go lomaganego le ka mo go atlegago. Ka mohlala, ela hloko tatelano ya dipotšišo yeo e lego ka godimo go letlakala 55 le dikgopolo tše di lego go letlakala 163.

¹⁵ Tlatša Dikgoba: Go tlaleletša methalading ya yona e bulegilego, puku ya Sekolo sa Bodiredi e na le dikgoba tše mmalwa tšeo di diretšwego gore o ngwale dintlha nakong ya thuto ya motho ka noši le ge o le Sekolong sa Bodiredi sa Pušo ya Modimo. (Bona matlakala 77, 92, 165, 243, 246 le 250.) Kgonthišetša gore o tla le puku ya gago beke e nngwe le e nngwe. Sepedišana gotee le seboledi polelong ya mathomo. Dula o butše puku ya gago lenaneong ka moka la sekolo. Ngwala ditšhišinyo tšeo di bolelwago ke molebeledi wa sekolo. Ela hloko mekgwa ya go ruta, dipotšišo, mehlala, dika tša polelo, diswantšho, dithušo tša go bontšha taba le diphapano tše di dirišwago ke seboledi. Ka go ngwala dintlha tše di holago, o tla kgona go gopola le go diriša dintlha tše dintšhi tše dibotse tšeo o di kgobokeditšego sekolong.

¹⁶ Jesu Kriste o be a tseba gore go bolela ditaba tše dibotse tša Mmušo wa Modimo ke tokelo e kgolo kudu yeo e ka newago motho le ge e le ofe. E be e le taelo ya gagwe e kgolo. (Mar. 1:38) O itše: ‘Ke swanetše go bolela ditaba tše dibotse tša mmušo wa Modimo, ke sona se ke rometšwego sona.’ (Luka 4:43) Ka ge re amogetše taletšo ya go mo latela, le rena ka mo go swanago re swaregile kudu ka modiro wa go bolela ditaba tše dibotse, gomme ka mehla re katanela go kaonefatša boemo bja ‘sehlabelo sa rena sa tumišo.’ (Ba-Heb. 13:15, bapiša le NW.) E le gore re fihlelele seo, anke re ikemišetše go tšea karolo ka mehla Sekolong sa Bodiredi sa Pušo ya Modimo, sekolo seo se tlago go re thuša go re hlamela modiro wa bohlokwa kudu bophelong.