Dihlogo tša Malapa—Kgomarelang Lenaneo le Lebotse la Moya
1 Go sa šetšwe go phela ka nywaga-some gare ga Babele ya borapedi bja medimo ya diswantšho le e gobogilego, Daniele o be a tsebja ka go hlankela Jehofa “ka mehla.” (Dan. 6:17, 21) O ile a kgomarela bjang boemo bja gagwe bja moya? Pego ya Beibele e bontšha gore o be a na le lenaneo la go dira mediro yeo e tswalanago le borapedi bja therešo. Ka mohlala, o be a tlwaetše go rapela gararo ka letšatši a le ka ngwakong wa gagwe wa ka godimo. (Dan. 6:11) Ka ntle le pelaelo, o be a hlomile lenaneo la mediro e mengwe ya moya, e bjalo ka go bala Molao. Ka gona, ge a be a lebeletšane le teko yeo e beago bophelo kotsing, Daniele o be a sa šišinyege boineelong bja gagwe go Jehofa, gomme o ile a phološwa ka mohlolo.—Dan. 6:5-23.
2 Ka mo go swanago lehono, re swanetše go ineela go ‘phakgamela ka tiišo ka moka.’ (Ba-Ef. 6:18, PK) Lefase leo re phelago go lona le “rapaletše bobeng.” (1 Joh. 5:19) Kganetšo goba diteko di ka tšwelela kapejana gomme tša bea tumelo ya rena tekong. Nakong ya masetla-pelo a magolo, bahlanka ba Modimo e tla ba bahlaselwa ba tlhaselo e kgolo ya Gogo wa Magogo, yeo go yona go tla bonagalago go se na phologo. Se se tla nyaka gore re bote Jehofa ka mo go feletšego.—Hesek. 38:14-16.
3 “Tsela e nngwe ya bohlokwa ke go dira gore go bala, go ithuta le go ahla-ahla ga lapa Beibele e be tsela ya bophelo.” Se ke seo se boletšwego matsenong a terama ya kopano ya selete ya 1998 yeo e nago le sehlogo se se rego “Malapa—Dirang go Bala Beibele Letšatši le Letšatši Tsela ya Lena ya Bophelo!” E tšwetše pele ka gore: “Ge malapa a latela lenaneo le bjalo ka mehla le ka tsela yeo e dirago gore Beibele e phele, mokgwa wo o sekametšego Beibeleng o ka ba le mafelelo a mabotse kudu lapeng. E oketša tsebo ya rena. E matlafatša tumelo ya rena. Gape e re nea mehlala ya go ekišwa—kudu-kudu ya banna le basadi ba botegago ba mehleng ya bogologolo—yeo e ka re tutuetšago, ya re hlohleletša go emela therešo ka go tia.” Ge re dutše re hlahloba dibopego tše fapa-fapanego tša lenaneo le lebotse la moya, dihlogo tša malapa di swanetše go lebelela tsela e tee goba tše pedi tša go kaonefatša lenaneo la malapa a tšona a moya.
4 Hlahlobang Lentšu la Modimo Letšatši le Letšatši: “Ge Mmušo wa Modimo o buša ka mo go sa ganetšwego gomme thato ya gagwe e dirwa lefaseng bjalo ka ge e dirwa legodimong, ga go na batho ba šoro—gaešita le diphoofolo—bao ba tlago ‘dira tše mpe goba go senya.’ (Jes. 11:9, PK; Mat. 6:9, 10)” Mantšu ao a tšweletše ka pukwaneng ya Go Hlahloba Mangwalo ka Mehla—2001 ditlhalosong tša temana ya lengwalo leo le bego le ahla-ahlwa ka September 11. Kgopotšo ye e itlhatsetše e le ye e kgothatšago gakaakang! Ka ge o le hlogo ya lapa, na o na le mokgwa wa ka mehla wa go ahla-ahla temana ya Beibele le ditlhaloso le lapa la gago? Se ke seo se holago kudu. Ge e ba go sa kgonege go bokana gotee mesong, mohlomongwe le ka dira bjalo mantšiboa. Tate yo mongwe o itše: “Dijo tša mantšiboa e bile nako e botse go rena bakeng sa go ahla-ahla temana ya letšatši le letšatši ya Beibele.”
5 Ge e ba le šetše le na le lenaneo le lebotse la go ahla-ahla temana ya letšatši le le lapa, le a retwa ka seo. Mohlomongwe le ka holega ka mo go oketšegilego ka go bala karolo ya Beibele ka nako e swanago. Ba bangwe ba na le mokgwa wa go bala kgaolo ka moka yeo temana ya letšatši e tšerwego go yona. Ba bangwe ba dira mmalo wo o tšwelago pele, ba bala ka go tšwela pele ka pukung e itšego ya Beibele. Go bala Beibele ka mehla go tla thuša lapa la gago go hlagolela poifo e swanetšego ya go boifa go nyamiša Jehofa gomme se se tla nweletša kganyogo ya bona ya go dira thato ya gagwe.—Doit. 17:18-20.
6 Lenaneo la lapa la gago la go bala Beibele le go ahla-ahla temana ya letšatši e tla ba le le holago kudu ge e ba le ka tšea metsotso e sego kae ya go ahla-ahla mohola wa kgonthe wa tsebišo. Puku ya go ithuta ya Sekolo sa Bodiredi, letlakala 60, e nea tšhišinyo ye: “Le ka kgetha ditemana tše sego kae thulaganyong ya mmalo wa Beibele wa beke yeo, la hlalosa seo di se bolelago, ke moka la botšiša dipotšišo tše bjalo ka tše: ‘Se se re nea tlhahlo bjang? Ditemana tše re ka di diriša bjang bodireding? Di utolla’ng ka Jehofa le tsela ya gagwe ya go dira dilo, gomme se se aga bjang tebogo ya rena ya go mo leboga?’” Dipoledišano tše bjalo tša moya di tla hola bohle ka lapeng go “hlatha se Modimo a se rataxo.”—Ba-Ef. 5:17.
7 Thuto ya Lapa: Go swara thuto ya lapa ka mehla beke e nngwe le e nngwe ke tsela e botse go dihlogo tša malapa go bontšha bana ba bona gore dilo tša moya di tla pele. Lesogana le lengwe le gopola gore: “Ka dinako tše dingwe tate o be a boa a lapile kudu ge a e-tšwa modirong moo a bego a sa kgone go phakgama, eupša go sa šetšwe seo thuto e be e swarwa, gomme se se ile sa re thuša go lemoga bohlokwa bja yona.” Bana le bona ba ka tlaleletša go atlegeng ga tokišetšo ye. Lapa le lengwe la bana ba senyane ka mehla le be le tsoga ka iri ya bohlano bakeng sa thuto ya lona ya lapa ka gobane go be go se na nako e nngwe yeo e bego e kgonega.
8 E le gore thuto ya lapa e atlege, hlogo ya lapa e swanetše go ‘itlhokomela le go hlokomela go ruta ga yona.’ (1 Tim. 4:16, bapiša le NW.) Puku ya go ithuta ya Sekolo sa Bodiredi, letlakala 32, e re: “Go ka bolelwa gabotse gore thuto e atlegago ya lapa e thoma ka go hlahloba lapa la gago ka bolona. Ditho tša lapa la gago di tšwela pele bjang moyeng? . . . Ge o le bodireding bja tšhemo le bana ba gago, na ba ikwa ba lokologile go itsebiša pele ga dithaka tša bona e le Dihlatse tša Jehofa? Na ba thabela lenaneo la gago la go bala le go ithuta Beibele le le lapa? Na ba dira tsela ya Jehofa tsela ya bona ya go phela e le ka kgonthe? Go lekola ka kelohloko go tla utolla seo wena bjalo ka hlogo ya lapa o swanetšego go se dira e le gore o thee le go aga dika tša moya go setho se sengwe le se sengwe sa lapa.”
9 Diboka tša Phuthego: Go lokišeletša le go ba gona dibokeng e swanetše go ba karolo e bohlokwa ya lenaneo la gago la beke le beke. (Ba-Heb. 10:24, 25) Ka dinako tše dingwe, le ka kgona go lokišeletša diboka tše dingwe le le lapa. Go e na le go leta go fihla ka motsotso wa mafelelo, na o ka rulaganya gore o lokišeletše gabotse nako e sa le gona? Lenaneo leo le rulagantšwego tabeng ye le ka kaonefatša bobedi boemo bja go lokišeletša ga gago le mehola yeo o e hwetšago dibokeng.—Die. 21:5.
10 Boemo bjo bobotse le go dira bjalo ka go se kgaotše ke maswao a lenaneo le le atlegago la moya. Go thwe’ng ge e ba maemo a dira gore go be thata go lokišeletša diboka ka moka? Puku ya go ithuta ya Sekolo sa Bodiredi, letlakala 31 e nea tšhišinyo ye: “Phema mereo ya go fo kga taba ka godimo feela gore o fete go yona goba se sebe le go feta, gore o se ithute taba le ge e le efe ka gobane o ka se kgone go ithuta yona ka moka. Go e na le moo, lekanya bogolo bja seo o ka kgonago go ithuta sona, gomme o ithute sona gabotse. Dira bjalo beke e nngwe le e nngwe. Ge nako e dutše e sepela, katanela go katološa gore o akaretše diboka tše dingwe.”
11 Ge malapa a fihla dibokeng ka nako, se se ba thuša go ba boemong bjo bobotse bja kgopolo bja go tumiša Jehofa le go holega tlhahlong yeo di e neago. Na lapa la gago le na le mokgwa wo? Go nyaka thulaganyo e botse le tirišano ya yo mongwe le yo mongwe ka lapeng. Ge e ba gantši o hwetša gore lapa la gago le a itlhaganela gomme le a gateletšega ka mašego a diboka, na go ka dirwa dikaonefatšo lenaneong la gago? Na go na le dilo tšeo di ka dirwago pele ga nako? Ge e ba setho se sengwe sa lapa se na le modiro o montši woo se swanetšego go o dira, na ba bangwe ba ka thuša? Na seo se tla fokotša kgateletšo ge e ba yo mongwe le yo mongwe a be a loketše go ya dibokeng metsotso e sego kae pejana? Thulaganyo e botse e tlaleletša moyeng wa khutšo bobedi ka lapeng le ka phuthegong.—1 Ba-Kor. 14:33, 40.
12 Tirelo ya Tšhemo: Go bea dinako tša go lebanya tša go tšea karolo bodireding ke karolo e nngwe ya lenaneo le lebotse la moya. Lesogana le le bitšwago Jayson le gopola gore: “Ka lapeng la gešo mesong ya Mekibelo e be e dula e neelwa bakeng sa tirelo ya tšhemo. Se se be se nthuša ka gobane ge ke dula ke e-ya bodireding, ke moo ke ilego ka bona botse bjoo bo bo dirago gomme ka bo thabela kudu.” Ba bantši bao ba godišeditšwego ka magaeng a Dihlatse ba lemogile se se swanago, gore go ba le nako ya go lebanya ya bodiredi beke e nngwe le e nngwe go ba thušitše go tšwela pele e le badiredi ba Bakriste.
13 Lenaneo le le beakantšwego gabotse le lona le ka thuša go dira gore nako yeo lapa la gago le e fetšago le le tirelong ya tšhemo e be yeo e thabišago kudu le yeo e nago le tšweletšo kudu. Se se ka fihlelelwa bjang? Morokami wa July 1, 1999, letlakala 21 o neile tšhišinyo ye e latelago: “Na o fela o ipha nako thutong ya lapa la gago bakeng sa go thuša ditho tša lapa la gago go lokišeletša tirelo ya tšhemo ya beke? Go dira bjalo e ka ba mo go holago kudu. (2 Timotheo 2:15) Go ka thuša go dira gore tirelo ya bona e be e nago le morero le e enywago dienywa. Nako le nako o ka beela ka thoko lenaneo ka moka la thuto bakeng sa tokišetšo e bjalo. Gantši o ka swaragana le dibopego tša bodiredi bja tšhemo dipoledišanong tše kopana mafelelong a thuto ya lapa goba ka nako e nngwe bekeng.” Na lapa la gago le lekile se?
14 Tšwelang Pele le Dira Tšwelopele: Tlhahlobong ye, na o lemogile dikarolo tšeo go tšona lapa la gago le dirago gabotse? Le nee theto, gomme o katanele go dira dikaonefatšo dikarolong tše. Ge e ba o bona dikarolo tše sego kae tšeo di nyakago kaonefatšo, kgetha e tee goba tše pedi tšeo le ka šomelago go tšona pele. Ge di šetše di fetogile karolo ya lenaneo la gago la moya, šomela go e tee goba tše pedi tše di oketšegilego. E ba le boemo bjo bo nepagetšego bja kgopolo le go ba yo a leka-lekanego. (Ba-Fil. 4:4, 5) Go hloma lenaneo le lebotse la moya bakeng sa lapa la gago go nyaka boiteko bja kgonthe, eupša seo se swanelwa ke boiteko, ka gobane Jehofa o re kgonthišetša gore: “Moloka-ka-tsela ke tlo mo thabiša ka phološô ya Modimo.”—Ps. 50:23.