Kamoo re ka Dirago Gore Bao re ba Sepedišeditšego Dimakasine e be Dithuto tša Beibele
1. Pakane ya rena ke efe ge re sepediša dimakasine?
1 Ka tlwaelo re sepediša dimakasine tša Morokami le Phafoga! bodireding ka Mekibelo. Lega go le bjalo, wo ke feela mogato wa mathomo wa go fihlelela pakane ya rena ya go ruta ba nago le dipelo tše di botegago therešo. Ka mo tlase go na le ditšhišinyo tše dingwe tša kamoo re ka sepedišago puku ya Seo Beibele e se Rutago ge re dira maeto a go boela gomme ra thoma thuto ya Beibele. O ka di dumelelanya le tšhemo ya gabo lena gomme wa di bea ka mantšu a gago. Ikwe o lokologile go diriša mokgwa o mongwe ge e ba o go šomela.
2. Re ka diriša bjang matlakala a matseno a puku ya Seo Beibele e se Rutago go thoma thuto ya Beibele?
2 Diriša Matlakala a Matseno: Ge o dira leeto la go boela, o ka re: “Dimakasine tšeo ke go tlogeletšego tšona di lebiša tlhokomelo Beibeleng. Ela hloko lebaka leo ka lona go bala Beibele go lego bohlokwa.” Bala Jesaya 48:17, 18; Johane 17:3; goba lengwalo le lengwe leo le swanetšego. Ke moka, ka morago ga go bontšha mong wa ntlo puku ya Seo Beibele e se Rutago le go mo nea kopi, o ka tšwela pele ka tsela e latelago:
◼ “Beibele e re nea kholofelo ya kgonthe ka bokamoso.” Bontšha mong wa ntlo matlakala 4-5 gomme o mmotšiše gore, “Ke kholofetšo efe go tše yeo o ka ratago go bona e phethagatšwa?” Mo lebiše kgaolong yeo e ahla-ahlago kholofetšo ya Mangwalo yeo a e kgethilego gomme ka boripana le bale serapa se tee goba tše pedi ge e ba a dumela.
◼ Goba o ka re, “Beibele e araba dipotšišo tša bohlokwa kudu tša bophelo.” Lebiša tlhokomelo ya gagwe go letlakala 6 gomme o mmotšiše ge e ba a kile a ipotšiša potšišo le ge e le efe go tšeo di lego botlaseng bja letlakala. Phetla kgaolo yeo e neago karabo gomme ka boripana le ahla-ahle serapa se tee goba tše pedi.
◼ Goba o ka mmontšha dihlogo tše dingwe tšeo di lego lenaneong la dikagare gomme wa mmotšiša gore ke sefe seo se mo kgahlago. Phetla kgaolo yeo gomme ka boripana o mmontšhe kamoo thuto ya Beibele e swarwago ka gona.
3. Re ka thoma thuto ya Beibele bjang ka morago ga go sepediša dimakasine tšeo di bolelago ka (a) maemo a mpefalago a lefase? (b) lapa? (c) go botega ga Beibele?
3 Botšiša Potšišo Leetong la Pele: Mokgwa o mongwe ke wa go thea motheo wa leeto la go boela leetong la pele. Ka morago ga ge mong wa ntlo a amogetše makasine, botšiša potšišo gomme o mo holofetše gore o tla e araba ge o boa. Katanela go dira dithulaganyo tše di kgonthišeditšwego tša go boela gomme o kgonthišetše gore o a boela. (Mat. 5:37) Ge o boela, gopotša mong wa ntlo potšišo gomme ka boripana le bale le go ahla-ahla karabo ya potšišo yeo pukung ya Seo Beibele e se Rutago. Mo nee kopi e le gore a kgone go sepedišana le wena. Mehlala e sego kae še:
◼ Ge e ba makasine woo o o sepedišitšego o bolela ka maemo a mpefalago a lefase, o ka re, “Nakong e tlago re tla ahla-ahla karabo ya Beibele potšišong ye, Ke diphetogo dife tšeo Modimo a tlago go di tliša lefaseng?” Diriša matlakala 4-5 ge o boela. Goba o ka botšiša potšišo ye, “Na masetla-pelo ke thato ya Modimo?” Leetong la go boela, bontšha mong wa ntlo dirapa 7-8 go kgaolo 1.
◼ Ge e ba makasine woo o o sepedišitšego o bolela ka lapa, pele o sepela o ka botšiša potšišo ye, “Ke’ng seo setho se sengwe le se sengwe sa lapa se ka se dirago go dira gore bophelo bja lapa e be bjo bo thabišago?” Ge o boela, ahla-ahlang serapa 4 go kgaolo 14.
◼ Ge e ba makasine woo o o sepedišitšego o bolela ka go botega ga Beibele, o ka botšiša potšišo ye yeo le tlago go boledišana ka yona nakong e tlago, “Na Beibele e nepagetše ka tša thutamahlale?” Leetong la go boela, ahla-ahlang serapa 8 go kgaolo 2.
4. Re swanetše go dira’ng ge mong wa ntlo a sa amogele puku ya Seo Beibele e se Rutago?
4 Mafelelong a poledišano e nngwe le e nngwe, botšiša potšišo yeo e tlago go arabja nakong e tlago. Ge le šetše le thomile thuto ya ka mehla, balang dikgaolo ka go latelelana go tloga mathomong go fihla mafelelong. Go thwe’ng ge e ba mong wa ntlo a sa amogele puku ya Seo Beibele e se Rutago? O sa dutše o ka tšwela pele go mo nea dimakasine le go ba le dipoledišano tše theilwego Mangwalong le yena. Ge o dutše o hlagolela kgahlego ya gagwe, a ka amogela thuto ya Beibele ge nako e dutše e e-ya.
5. Ke ka baka la’ng re swanetše go katanela go dira se se fetago go fo tlogelela batho dimakasine?
5 Morokami le Phafoga! di ka tsoša kganyogo ya motho yoo ya go nyaka go tseba seo ge e le gabotse Beibele e se rutago. Ka gona, dira maiteko a kgethegilego a go thoma dithuto tša Beibele le bao ba amogelago dimakasine. Ka go rialo, re tla kwa ditaelo tša Jesu tša go ‘dira barutiwa le go ba ruta.’—Mat. 28:19, 20.