Ekiša Mohlala o Mobotse wa Barongwa

1-2. (a) Re fapana bjang le barongwa? (b) Rena le barongwa re swana ka’ng?

KA GE re le bahlanka ba Jehofa re karolo ya lapa la gagwe le legolo la batho bao ba mo hlankelago, lapa le le akaretša bana babo rena ba go tšwa lefaseng ka moka le barongwa ba dimilione. (Dan. 7:​9, 10) Ge re nagana ka barongwa, re ka bona tsela yeo ba fapanago le rena ka yona. Ka mohlala, ke kgale barongwa ba le gona go feta nako yeo rena re e phetšego. (Jobo 38:​4, 7) Ba na le matla a go feta ao rena re nago le ona. Ke ba bakgethwa ebile ba lokile go feta kamoo rena batho bao ba sa phethagalago re lego ka gona.—Luka 9:26.

² Le ge re ka se swane le barongwa ka dilo tšeo itšego, eupša go na le tšeo re swanago le bona ka tšona. Ka mohlala, go swana le barongwa, re ka kgona go ekiša dika tša Jehofa tše dibotse. Le rena re kgona go itirela diphetho go swana le bona. Re na le maina le dilo tšeo di re hlaolago, ebile re na le maikarabelo a fapafapanego go swana le barongwa. Le rena re nyaka go tumiša Mmopi wa rena go swana le bona.—1 Pet. 1:12.

3. Ke’ng seo re ka ithutago sona go barongwa bao ba botegago?

³ Ka ge go na le dilo tšeo re swanago le barongwa ka tšona, mohlala wa bona o ka re kgothatša le go re ruta. Ge e le gabotse re ka ithuta dilo tše dintšhi go bona. Sehlogong se re tlo ithuta kamoo re ka ekišago barongwa ka go ba le boikokobetšo, go rata batho, go kgotlelela le go kgonthišetša gore phuthego e dula e hlwekile.

BARONGWA BA IKOKOBEDITŠE

4. (a) Barongwa ba bontšha bjang gore ba ikokobeditše? (b) Ke ka baka la’ng barongwa ba ikokobeditše? (Psalme 89:7)

⁴ Barongwa bao ba botegago ba ikokobeditše. Le ge barongwa ba na le phihlelo, ba na le matla ebile ba le bohlale, ba kwa ditaelo tša Jehofa. (Ps. 103:20) Ga ba ikgantšhe ka dilo tšeo ba di dirago goba matla ao ba nago le ona ge ba phetha dikabelo tša bona. Ba thabela go dira thato ya Jehofa le ge ba sa retwe ka maina.a (Gen. 32:​24, 29; 2 Dikg. 19:35) Ba gana go amogela theto yeo e swanetšego go lebišwa go Jehofa. Ke ka lebaka la eng barongwa ba ikokobeditše ka tsela ye? Ba rata Jehofa ebile ba mo hlompha kudu.—Bala Psalme 89:7.

5. Morongwa yo mongwe o ile a bontšha bjang gore o ikokobeditše ge a be a phošolla moapostola Johane? (Bona le seswantšho.)

⁵ Nagana ka mohlala o mongwe wo o bontšhago gore barongwa ba ikokobeditše. Mo eka bago ka 96 C.E., morongwa yo a sa bitšwego ka leina o ile a nea moapostola Johane pono e makatšago. (Kut. 1:1) Johane o ile a arabela bjang? O ile a leka go tumiša morongwa yoo. Eupša morongwa yoo o ile a mo thibela gomme a re go yena: “O se ke wa dira bjalo! Nna ke upša ke le feela mohlankagotee le wena le bana beno. . . Rapela Modimo!” (Kut. 19:10) Yeo e tloga e bile karabo e bontšhago gore morongwa o ikokobeditše! Morongwa yoo o be a sa nyake go newa letago goba go tumišwa. Ka ponyo ya leihlo o ile a thuša Johane gore a rete Jehofa Modimo. Ebile ge a dira bjalo ga se a ka a nyatša Johane. Le ge morongwa yo e be e le kgale a hlankela Jehofa go feta Johane ebile a na le matla go mo feta, ka boikokobetšo o ile a re ke yena mohlankagotee le Johane. Le ge morongwa a ile a swanelwa ke go phošolla mokgalabje Johane, ga se a ka a mo omanya. Go ena le moo o ile a bolela le yena ka botho. Go ka direga gore o bone gore Johane o be a maketše.

6. Re ka ekiša bjang barongwa ka go ikokobetša?

⁶ Re ka ekiša bjang barongwa ka go ikokobetša? Le rena re ka kgona go phetha dikabelo tšeo re di neilwego ntle le go ikgantšha. (1 Bakor. 4:7) Le gona ga se ra swanela go ikwa re na le matla go feta batho ba bangwe ge e ba re na le nako e teletšana re hlankela Jehofa goba re na le ditokelo tše itšego. Ge e le gabotse re swanetše go itebelela re le ba tlasana le ge re na le maikarabelo a mantšhi. (Luka 9:48) Go swana le barongwa, le rena re nyaka go hlankela bana babo rena. Ga re nyake go ikgantšha.

7. Re ka bontšha bjang gore re ikokobeditše ge re ka swanelwa ke go phošolla goba go eletša motho yo mongwe?

⁷ Re ikokobetša ge e ba re ka swanelwa ke go phošolla modumedigotee le rena goba ngwana wa rena. Ka dinako tše dingwe re ka swanelwa ke go tiiša letsogo ge re nea keletšo. Eupša go swana le morongwa yo a ilego a phošolla moapostola Johane ka botho, re ka tiiša letsogo ntle le go dira gore motho yo re mo neago keletšo a ikwe a se na mohola. Ge e ba re ka se ipone re na le matla go feta batho ba bangwe, re tlo ba nea keletšo yeo e theilwego Beibeleng ka tsela e nago le tlhompho le yeo e bontšhago kwelobohloko.—Bakol. 4:6.

BARONGWA BA RATA BATHO

8. (a) Go ya ka Luka 15:​10, barongwa ba bontšha bjang gore ba rata batho? (b) Barongwa ba re thuša bjang go bolela ditaba tše dibotse? (Bona le letlakala la ka ntle.)

⁸ Barongwa ba na le taba le rena. Ba rata batho. Ba a thaba ge ba bona modiradibe a itshola gomme a boela go Jehofa goba ge motho yo a itšego a fetola tsela yeo a phelago ka yona gomme a thoma go hlankela Jehofa. (Bala Luka 15:10.) Le gona, barongwa ba a re thekga ge re bolela ka Mmušo wa Modimo. (Kut. 14:6) Le ge ba sa bolele le motho ka go lebanya, ba ka thuša mogoeledi gore a bolele le motho yo a nyakago go ithuta ka Jehofa. Re ka se bolele re kgodišegile gore barongwa ba dirile gore re ye go motho yo a itšego. Re a tseba gore Jehofa a ka diriša mekgwa e mengwe e bjalo ka moya wa gagwe o mokgethwa gore a hlahle bahlanka ba gagwe goba a ba thuše. (Dit. 16:​6, 7) Lega go le bjalo, o sa diriša barongwa ka botlalo. Re ka kgodišega gore ge re bolela ditaba tše dibotse, barongwa ba dula ba le gona gore ba re thekge.—Bona le lepokisi leo le rego “Dithapelo tša Bona di Ile tša Arabja.”b

9. Re ka ekiša bjang barongwa ka go rata batho?

⁹ Re ka ekiša bjang barongwa ka go rata batho ba bangwe? Ge re ekwa go tsebišwa gore motho yo a itšego o bušeditšwe ka phuthegong, re ka thaba go swana le barongwa. Re ka dira sohle seo re ka se kgonago gore re dire motho yoo gore a ikwe a amogelegile le go mmontšha gore re a mo rata. (Luka 15:​4-7; 2 Bakor. 2:​6-8) Le gona, re ka ekiša barongwa ka go šoma ka thata ge re bolela ditaba tše dibotse. (Mmo. 11:6) Go etša ge barongwa ba re thekga ge re bolela ditaba tše dibotse, le rena re ka nyaka ditsela tšeo re ka thekgago bana babo rena le dikgaetšedi ka tšona ge ba le tšhemong. Ka mohlala, re ka leka go šoma le bao ba sa tšwago go ba bagoeledi. Le gona re ka thekga bao ba godilego goba bao ba babjago ka go šoma tšhemo le bona.

10. Re ithuta’ng mohlaleng wa kgaetšedi Sara?

¹⁰ Re ka dira’ng ge maemo a rena a ka fetoga? Re ka hwetša ditsela tše dingwe tša go šoma le barongwa modirong wa go bolela ditaba tše dibotse. Ekwa ka mohlala wa kgaetšedi yo a bitšwago Sara,c wa kua India. Ka morago ga gore e be mmulamadibogo ka mengwaga e ka bago e 20, o ile a thoma go babja gomme a palelwa le ke go tšwa ka ntlong. O ile a gateletšega kudu. Eupša ka morago ga gore bana babo le dikgaetšedi ba mo thekge le gore a ithute Beibele ka mehla, o ile a kgona go boela a tšea karolo tšhemong. O ile a swanelwa ke go ithuta mekgwa e meswa ya go bolela ditaba tše dibotse. Ka ge a be a palelwa le ke go ngwala mangwalo, o ile a swanelwa ke go no bolela ditaba tše dibotse ka founo feela. O ile a founela batho bao a bego a ithuta le bona gomme ba mmotša le ka ba bangwe bao le bona ba bego ba nyaka go ithuta. Go bile le mafelelo afe? Ka morago ga dikgwedi tše sego kae feela, ke ge Sara a na le batho ba e ka bago ba 70 bao a ithutago Beibele le bona, ebile ba bangwe a palelwa ke go ithuta le bona! O ile a kgopela ba bangwe ka phuthegong gore ba mo thuše. Ba bangwe ba batho bao ba ba gona dibokeng. Ga go pelaelo gore barongwa ba thaba kudu ge ba šoma le bana babo rena le dikgaetšedi ba go swana le Sara bao ba šomago ka thata gore ba bolele ditaba tše dibotse!

BARONGWA BA A KGOTLELELA

11. Barongwa bao ba botegago ba bontšhitše bjang gore ba a kgotlelela?

¹¹ Barongwa bao ba botegago ba re beela mohlala o mobotse wa go kgotlelela. Ba ile ba kgotlelela go bona go hloka toka le go bona bokgopo ka mengwaga e mentšhi. Ba be ba le gona ge Sathane le barongwa ba bangwe ba bantšhi bao ba bego ba hlankela le bona ba hlanogela Jehofa. (Gen. 3:1; 6:​1, 2; Juda 6) Beibele e re botša ka morongwa yo mongwe yo a botegago yo a ilego a ganetšwa ke motemona yo matla. (Dan. 10:13) Go oketša moo, ge e sa le batho ba eba gona lefaseng, ba ile ba bona batho ba sego kae feela ba kgetha go hlankela Jehofa. Go sa šetšwe dilo tše ka moka, barongwa bao ba botegago ba tšwela pele ba hlankela Jehofa ba thabile le ka mafolofolo. Ba a tseba gore ka nako ya maleba Modimo o tlo tloša dilo tše mpe.

12. Ke’ng seo se ka re thušago go kgotlelela?

¹² Re ka ekiša bjang barongwa ka go kgotlelela? Go swana le barongwa, re ka swarwa ka go hloka toka goba ra ganetšwa. Eupša re kgodišegile gore ka nako ya maleba Modimo o tlo tloša bokgopo ka moka. Ka gona, go swana le barongwa bao ba botegago ‘ga re lape go dira botse.’ (Bagal. 6:9) Ebile Modimo o tshepiša gore o tlo re thuša go kgotlelela. (1 Bakor. 10:13) Re ka rapela Jehofa gore a re nee moya wa gagwe o mokgethwa wo o re thušago gore re se ke ra fela pelo ebile re dule re thabile. (Bagal. 5:22; Bakol. 1:11) O swanetše go dira eng ge e ba o ganetšwa? Tshepa Jehofa ka mo go feletšego ebile o se ke wa tšhoga. Jehofa o tlo go thekga le go go nea matla.—Baheb. 13:6.

BARONGWA BA THUŠA GORE PHUTHEGO E DULE E HLWEKILE

13. Ke mošomo ofe o bohlokwa wo barongwa ba nago le ona mehleng ye ya bofelo? (Mateo 13:​47-49)

¹³ Mehleng ye ya bofelo, Jehofa o neile barongwa mošomo wo o kgethegilego. (Bala Mateo 13:​47-49.) Modiro wa go bolela ditaba tše dibotse o fihlelela batho ba bantšhi bao ba fapafapanego. Ba bangwe ba batho bao e ba Bakriste ba nnete mola ba bangwe ba sa fetoge. Barongwa ba neilwe mošomo wa go “hlaola ba kgopo go ba lokilego.” Se se ra gore ba neilwe mošomo wa go šireletša phuthego le go dira gore e dule e hlwekile. Eupša se ga se bolele gore motho yo mongwe le yo mongwe yo a tlogelago go hlankela Jehofa a ka se boe ka phuthegong goba go ra gore mathata a ka se be gona ka phuthegong. Re ka kgodišega gore barongwa ba šoma ka thata go kgonthišetša gore phuthego e dula e hlwekile.

14-15. Re ka ekiša bjang barongwa ka go dira gore phuthego e dule e hlwekile? (Bona le diswantšho.)

¹⁴ Re ka ekiša bjang mohlala wa barongwa wa go dira gore phuthego e dule e hlwekile? Ka go dira sohle seo re ka se kgonago gore re dule re itshwere gabotse. Gore re kgone go dira se, re swanetše go šoma ka thata gore re šireletše dipelo tša rena ka go kgetha bagwera ba babotse le go gana go dira dilo tšeo di sa kgahlego Jehofa. (Ps. 101:3) Re ka thuša le bana babo rena le dikgaetšedi gore ba dule ba botegela Jehofa. Ka mohlala, re ka dira eng ge re lemoga gore modumedigotee le rena o dirile sebe se segolo? Ka ge re rata motho yoo, re tlo mo kgothaletša gore a boledišane le bagolo. Ge e ba a palelwa ke go dira bjalo, rena re ka botša bagolo ka taba yeo. Re nyaka gore modumedigotee le rena yo a fokolago a hwetše thušo ka pela!—Jak. 5:​14, 15.

¹⁵ Ka maswabi, ba bangwe bao ba dirago dibe tše dikgolo ba tlošwa ka phuthegong. Ge seo se direga re tlogela go “gwerana” le bona.d (1 Bakor. 5:​9-13) Thulaganyo ye e dira gore phuthego e dule e hlwekile. Ge e le gabotse, go se gwerane le batho bao ba tlošitšwego ka phuthegong ke go ba bontšha botho. Seo se ka ba thuša gore ba boele go Jehofa. Ge ba dira bjalo re a thaba, Jehofa le barongwa le bona ba a thaba.—Luka 15:7.

16. Ke ditsela dife tšeo o ka bontšhago ka tšona gore o nyaka go ekiša barongwa?

¹⁶ Ke tokelo e kgolo gore Jehofa o re dumeletše gore re ithute ka barongwa le go šoma gotee le bona! Eka re ka ekiša dika tša bona tše dibotse e lego: boikokobetšo, go rata batho, go kgotlelela le go thuša gore phuthego e dule e hlwekile. Ge e ba re ka ekiša dika tša barongwa bao ba botegago, le rena re ka dula re le karolo ya lapa le legolo la Jehofa le go mo hlankela ka mo go sa felego.