Jehofa o tlo go Homotša

1. Bajuda ba be ba phela bjang kua Babilona?

NAGANA ka tsela yeo Bajuda bao ba bego ba le bothopša Babilona ba ka bago ba ile ba ikwa ka yona. Ba bone naga ya bona e senywa. Ba ile ba tšewa magaeng a bona ba išwa nageng e šele ka baka la dibe tšeo bona le borakgolokhukhu ba bona ba ilego ba di dira. (2 Dikor. 36:​15, 16, 20, 21) Le ge ba be ba le kua Babilona ba be ba kgona go dira dilo tše itšego tša letšatši le letšatši. (Jer. 29:​4-7) Eupša dilo di be di se bonolo, ba be ba sa thabele bophelo bja moo. Ba be ba ikwa bjang ka boemo bjoo? Ekwa seo yo mongwe wa bona a ilego a se bolela, o itše: “Re ile ra dula dinokeng tša Babilona. Ra lla ge re gopola Tsione.” (Ps. 137:1) Bajuda bao ba bego ba nyamile ba be ba hloka go homotšwa, bjale ba be ba tla homotšwa ke mang?

2-3. (a) Jehofa o diretše’ng Bajuda bao ba bego ba le bothopša? (b) Re tlo boledišana ka’ng sehlogong se?

² Jehofa ke “Modimo wa khomotšo yohle.” (2 Bakor. 1:3) Ka ge e le Modimo yo lerato o homotša bao ba gweranago le yena. Jehofa o be a tseba gore Bajuda ba bangwe ba tlo itshola gomme ba boela go yena. (Jes. 59:20) Mengwaga e ka bago e lekgolo pele ba ka ya bothopša, Jehofa o ile a budulela moporofeta Jesaya gore a ngwale puku yeo e bego e bitšwa ka leina la gagwe. Ka baka la’ng? Jesaya o itše: “‘Homotšang batho ba ka, ba homotšeng,’ go bolela Modimo wa lena.” (Jes. 40:1) Jehofa o ile a diriša puku ya moporofeta Jesaya go homotša Bajuda bao ba bego ba le bothopša.

³ Nako le nako le rena re hloka go homotšwa go swana le Bajuda bao ba bego ba le bothopša. Sehlogong se re tlo kwa ka ditsela tše tharo tšeo Jehofa a ilego a homotša Bajuda bao ka tšona: (1) O ile a tshepiša go lebalela bao ba bego ba itshola, (2) a nea batho ba gagwe kholofelo, a ba a (3) ba thuša gore ba se ke ba tšhoga. Re tlo kwa le kamoo Jehofa a re homotšago ka gona lehono.

JEHOFA O A RE LEBALELA

4. Jehofa o bontšhitše bjang gore ke Modimo wa kgaugelo? (Jesaya 55:7)

⁴ Jehofa ke “Tate wa dikgaugelo.” (2 Bakor. 1:3) O bontšhitše seka se ge a be a tshepiša go lebalela Bajuda bao ba bego ba itshola. (Bala Jesaya 55:7.) O itše: “Ke tla go gaugela ka botho go iša mehleng ya neng le neng.” (Jes. 54:8) Jehofa o bontšha bjang kgaugelo? Le ge Bajuda ba ile ba swanelwa ke go lebeletšana le ditlamorago tša dilo tšeo ba di dirilego, Jehofa o ba tshepišitše gore ba ka se dule Babilona go ya go ile. Ba be ba tlo ba bothopša ka nakwana. (Jes. 40:2) Mantšu a a ka ba a ile a kgothatša bao ba bego ba itshola.

5. Ke ka baka la’ng re ka kgodišega go feta le Bajuda gore Jehofa o a re lebalela?

⁵ Seo re ithutago sona. Jehofa o ikemišeditše go lebalela bahlanka ba gagwe. Re ka kgodišega go feta Bajuda bao ba bego ba le bothopša gore Jehofa o a re lebalela. Ka baka la’ng? Re a tseba gore Jehofa o dirile’ng go re a kgone gore lebalela. Mengwaga e mentšhi ka morago ga gore Jesaya a bolele ka boporofeta bjoo, Jehofa o ile a romela Morwa wa gagwe yo a mo ratago gore e tle e be topollo bakeng sa badiradibe bao ba itsholago. Sehlabelo seo se dira gore dibe di phumolwe. (Dit. 3:19; Jes. 1:18; Baef. 1:7) Ruri re hlankela Modimo yo a nago le kgaugelo.

6. Ke ka baka la’ng go homotša go nagana ka tsela yeo Jehofa a re lebalelago ka yona? (Bona le seswantšho.)

⁶ Mantšu a Jehofa ao a buduletšwego ao re a hwetšago go Jesaya 55:7 a ka re homotša ge re ikwa re imelwa ke dibe tšeo re di dirilego. Ba bangwe ba rena re ka dula re ikwa molato ka baka la diphošo tšeo re di dirilego le ka morago ga gore re itshole. Seo se direga kudu ge re lebeletšane le ditlamorago tša diphošo tšeo. Ge e ba re ipobotše dibe tša rena gomme ra lokiša, re ka kgodišega gore Jehofa o re lebaletše. Le gona ge Jehofa a re lebalela ga a sa gopola dibe tša rena. (Bapetša le Jeremia 31:34.) Ka gona, ge e ba Jehofa a lebetše dibe tša rena le rena ga re sa swanela go dula re di gopola. Sa bohlokwa go Jehofa ke seo re mo direlago sona gona bjale e sego diphošo tšeo re ilego ra di dira nakong e fetilego. (Hesek. 33:​14-16) E se kgale Tatago rena wa dikgaugelo o tlo tloša ditlamorago tša diphošo tšeo re di dirilego.

7. Ke’ng seo se ka dirago gore re nyake thušo ge e ba go na le sebe seo re se utilego?

⁷ Re swanetše go dira eng ge letswalo la rena le re tshwenya ka baka la ge re sa bolele ka sebe se segolo seo re se dirilego? Beibele e re kgothaletša gore re kgopele bagolo gore ba re thuše. (Jak. 5:​14, 15) Ga se ka mehla go lego bonolo go amogela diphošo tšeo re di dirilego. Eupša re tlo kgona go batamela banna bao ba botegago ge e ba re itshola ebile re gopola gore Jehofa gotee le banna bao a ba kgethilego ba tlo re thuša ka lerato le go re bontšha kgaugelo. Ekwa ka moo kgaugelo ya Jehofa e ilego ya homotša ngwanabo rena Arthur,a yo a bego a jewa ke letswalo. O re: “Ke ile ka fetša mo e ka bago ngwaga ke bogela diswantšho le dibidio tša batho bao ba sa aparago. Ka morago ga gore ke kwe polelo yeo e bego e bolela ka letswalo, ke ile ka botša bagolo le mosadi wa ka ka seo ke se dirilego. Ka morago ga moo ke ile ka ikwa ke imologile, eupša ke be ke dula ke nyamile. Bagolo ba ile ba nkgopotša gore Jehofa ga se a ntahla. O a re phošolla ka gobane a re rata. Mantšu ao a bona a botho a ile a nkgoma pelo a ba a nthuša le gore ke nagane gabotse.” Lehono Arthur o hlankela e le mmulamadibogo ebile ke mohlanka wa bodiredi. Ruri go a kgothatša go tseba gore Jehofa o re bontšha kwelobohloko ge e ba re itshola.

JEHOFA O RE NEA KHOLOFELO

8. (a) Jehofa o be a tshepišitše eng Bajuda bao ba lego bothopša? (b) Bajuda bao ba itsholago ba be ba ka ikwa bjang ka baka la kholofelo yeo ba bego ba na le yona? (Jesaya 40:​29-31)

⁸ Go be go bonagala eka Bajuda ba ka se tsoge ba boetše ga gabo bona. Mmušo wa Babilona o Matla o be o tsebja ka go se lokolle mathopša a ona. (Jes. 14:17) Eupša Jehofa o ile a nea batho ba gagwe kholofelo. O ile a tshepiša go lokolla batho ba gagwe, le gona go be go se na selo seo se ka mo thibelago. (Jes. 44:26; 55:12) Go Jehofa Babilona e be e swana le lerole le lenyenyane leo le ka tlošwago feela le ke moya o monyenyane. (Jes. 40:15) Kholofelo yeo e be e tlo thuša bjang Bajuda? E be e tlo ba homotša, goba e be e ka dira go feta moo. Jesaya o ngwadile gore: “Bao ba tshepilego Jehofa ba tla hwetša matla gape.” (Bala Jesaya 40:​29-31.) Kholofelo yeo e be e tlo ba nea matla, ba be “ba tla hlatlogela godimo ka diphego go etša dintšhu.”

9. Ke’ng seo se bego se ka dira gore Bajuda ba tshepe dilo tšeo Jehofa a ba holofeditšego tšona?

⁹ Jehofa o ile a thuša Bajuda bao gore ba tshepe dilo tšeo a rego o tlo ba direla tšona. O dirile seo bjang? Nagana ka diporofeto tšeo ba ilego ba di bona di phethagala. Ba be ba tseba gore Asiria e fentše meloko e lesome ya mmušo wa Isiraele gomme ya iša batho ba yona bothopša. (Jes. 8:4) Ba bone ge Bababilona ba senya Jerusalema gomme e iša badudi ba yona bothopša. (Jes. 39:​5-7) Ba be ba le gona ge Kgoši Tsedekia a be a foufatšwa gomme a išwa Babilona. (Jer. 39:7; Hesek. 12:​12, 13) Dilo ka moka tšeo Jehofa a di boletšego di ile tša phethagala. (Jes. 42:9; 46:10) Dilo tše ka moka di ka ba di ile tša dira gore ba kgone go tshepa gore Jehofa o tlo ba thuša gore ba lokollwe bothopša.

10. Ke’ng seo se ka dirago gore re dule re na le kholofelo mehleng ye ya bofelo?

¹⁰ Seo re ithutago sona. Go ba le kholofelo go ka re thuša gore re boele re be le matla ge re ikwa re nyamile. Re phela dinakong tšeo go nago le mathata e bile go na le manaba a mantšhi a Modimo ao a re ganetšago. Eupša ga se ra swanela go fela matla. Jehofa o re tshepiša gore re tlo phela ka mo go sa felego paradeiseng, moo go tla bego go na le khutšo ebile re bolokegile. Go dula re nagana ka seo go ka re thuša. Ge re ka se dire bjalo, kholofelo yeo re nago le yona e ka swantšhwa le go lebelela naga e botse eupša re sa bone bobotse bja yona ka ge re e lebeletše ka lefasetere leo le nago le ditšhila. Re ka dira’ng gore kholofelo ya rena e dule e tiile? Re ka dula re nagana gore bophelo bo tlo ba bjang lefaseng le leswa. Re ka bala dikgatišo tša rena, ra bogela dibidio le go theetša dikoša tšeo di bolelago ka kholofelo yeo re nago le yona. Le gona re ka rapela Jehofa ra mmotša ka dilo tšeo re felago pelo ya go di bona di phethega lefaseng le leswa.

11. Ke’ng seo se thušitšego kgaetšedi yo a babjago gore a boele a be le matla?

¹¹ Ekwa gore go ba le kholofelo go homoditše bjang le go tiiša kgaetšedi Joy, yo a nago le bolwetši bja go se fole. O re: “Ge ke imelwa ke botša Jehofa gore ke ikwa bjang ka gobane o a nkwešiša. Jehofa o nkaraba ka go nnea ‘matla a fetago a tlwaelegilego.’”(2 Bakor. 4:7) Joy o ipona a le lefaseng le leswa moo go tla bego go se na “motho yo a dulago moo yo a tla rego: ‘Ke a babja.’” (Jes. 33:24) Le rena ge re ka tšhollela Jehofa sa mafahleng le go dula re na le kholofelo, re tlo kgona go kgotlelela mathata.

12. Ke’ng seo se dirago gore re tshepe dilo tšeo Jehofa a di holofeditšego? (Bona le seswantšho.)

¹² Go swana le ge Jehofa a ile a thuša Bajuda bao ba bego ba le bothopša, le lehono o sa re nea mabaka a gore re tshepe dilo tšeo a re holofeditšego tšona. Nagana ka boporofeta bjo re bo bonago bo phethagala. Ka mohlala, re bona mmušo o matla wa lefase woo karolo ya wona e nngwe e lego ‘e tiilego gomme e nngwe e le e fokolago.’ (Dan. 2:​42, 43) Re kwa le ka “ditšhišinyego tša lefase lefelong le lengwe ka morago ga le lengwe,” ebile re bolela ditaba tše dibotse “go ditšhaba tšohle.” (Mat. 24:​7, 14) Diporofeto tše le tše dingwe tše dintši di dira gore re be le tumelo go dilo tšeo Jehofa a re tshepišitšego tšona.

JEHOFA O RE THUŠA GORE RE SE KE RA TŠHOGA

13. (a) Bajuda ba be ba tlo lebeletšana le mathata afe pele ba lokollwa? (b) Jehofa o ile a homotša bjang Bajuda bao ba bego ba le bothopša? (Jesaya 41:​10-13)

¹³ Le ge Jehofa a ile a homotša Bajuda bao ba bego ba le bothopša ka go ba nea kholofelo e kgahlišago o be a tseba gore ba be ba tlo kopana le mathata pele ba lokollwa. O ile a bolela e sa le pele gore go be go tla ba le kgoši e matla yeo e bego e tlo fenya dinaga tšeo di lego kgauswi le Babilona ke moka ka morago ya hlasela Babilona. (Jes. 41:​2-5) Na Bajuda ba be ba swanetše go tšhoga? Jehofa o ile a homotša batho ba gagwe e sa le pele ka go bolela gore: “O se ke wa tšhoga, ka gobane ke na le wena. O se ke wa tshwenyega, ka gobane ke Modimo wa gago.” (Bala Jesaya 41:​10-13.) Jehofa o be a e ra go re‘ng ge a re “ke Modimo wa gago”? O be a sa gopotše Bajuda gore ba swanetše go mo hlankela ka gobane ba be ba tseba gore ba swanetše go dira bjalo. Go e na le moo, o be a ba gopotša gore o sa dutše a le ka lehlakoreng la bona.—Ps. 118:6.

14. Jehofa o thušitše bjang Bajuda bao ba bego ba le bothopša gore ba se ke ba tšhoga?

¹⁴ Jehofa o ile a thuša Bajuda bao gore ba se ke ba tšhoga ka go ba gopotša ka matla a gagwe a magolo le gore o tseba dilo ka moka. O ile a ba laela gore ba lebelele dinaledi tšeo di lego magodimong. O ile a ba botša gore ga se a dira dinaledi tšeo feela eupša o tseba e nngwe le e nngwe ka leina. (Jes. 40:​25-28) Go molaleng gore ge e ba Jehofa a tseba naledi e nngwe le e nngwe ka leina, gona go ra gore le bahlanka ba gagwe o ba tseba ka moka ka maina. Le gona ge eba Jehofa a bile le matla a go dira dinaledi gona go ra gore o na le matla a go thuša batho ba gagwe. Ruri Bajuda bao ba bego ba le bothopša ba be ba se na lebaka la go boifa goba go tšhoga.

15. Jehofa o ile a thuša bjang Bajuda bao ba bego ba le bothopša gore ba tle ba kgone go lebeletšana le dilo tšeo di bego di tlo direga?

¹⁵ Jehofa o ile a botša batho ba gagwe ka dilo tšeo ba swanetšego go tlo di dira ge ba tlo lokollwa. Karolo ya mathomong ya puku ya Jesaya, Modimo o botša bahlanka ba gagwe gore: “Le tsene diphapošing tša lena tša ka gare le mabati a lena. Le khuteng ka nakwana, go fihla bogale bja ka bo fetile.” (Jes. 26:20) Karolo ye e ka ba e ile ya phethagala nakong ya ge Korese a fenya Babilona. Radihistori yo mongwe wa kgale wa Mogerika o re ge Korese a tsena Babilona, o “ile a laela [mašole a gagwe] gore a bolaye batho ka moka bao a ba hwetšago ba le ka ntle.” Nagana gore batho bao ba bego ba dula Babilona ba ka ba ba ile ba tšhoga bjang. Eupša Bajuda bao ba bego ba le bothopša ba ka ba ba ile ba phologa ka ge ba ile ba latela ditaelo tša Jehofa.

16. Ke ka baka la’ng re sa swanela go tshwenyega kudu ka dilo tšeo di tlago go direga nakong e tlago? (Bona le seswantšho.)

¹⁶ Seo re ithutago sona. E se kgale go tlo ba le masetlapelo a magolo ao a sa kago a ba gona mo lefaseng. Ge a thoma batho ba tla be ba gakanegile ebile ba tšhogile. Eupša batho ba Jehofa bona ba tla be ba kwešiša gore go direga eng. Re a tseba gore Jehofa ke Modimo wa rena. Re tla be re se ra tšhoga ka gobane re tla be re tseba gore “topollo ya [rena] e a batamela.” (Luka 21:28) Le ge Gogo e lego ditšhaba tše ipopilego ngatana e tee a re hlasela, re tlo dula re tshepile Jehofa. (Hesek. 38:18) Jehofa o tlo re šireletša a diriša barongwa ebile o tlo re nea ditaelo tšeo di tlo re phološago. Eupša ditaelo tšeo re tlo di hwetša bjang? Ga bjale ga go yo a tsebago. Go ka direga gore ditaelo tšeo re tlo di hwetša ka diphuthegong tša rena. Ka mantšu a mangwe diphuthego tšeo di tlo swana le ‘diphapoši tša rena tša ka gare,’ tšeo di tlago go re thuša gore re šireletšege. Re ka itokišeletša bjang dilo tšeo di tlago go direga? Re swanetše go gwerana le bana babo rena le dikgaetšedi, re ikemišetše go kwa ditaelo tšeo di tšwago ka mokgatlong wa Jehofa le go kgodišega gore ke yena a etelelago mokgatlo woo pele.—Baheb. 10:​24, 25; 13:17.

17. Re ka dira’ng gore re holwe ke khomotšo yeo Jehofa a re neago yona?

¹⁷ Jehofa o ile a homotša Bajuda ge dilo di be di sa ba sepelele gabotse kua Babilona. Le rena o tlo re direla se se swanago. Le ge ditlalemeso di sa tsebje, re ka kgodišega gore Jehofa o tlo dula a re homotša. Tshepa gore Jehofa o lebalela bahlanka ba gagwe bao ba botegago ebile o na le taba le wena. Dula o na le kholofelo. O se ke wa boifa selo ka ge Jehofa e le Modimo wa gago.