Bolwetši Bja Mafahla Bo Hlasela Gape!

GA E sa le go tloga ka bo-1950, palo ya balwetši ba bolwetši bja mafahla (TB) e fokotšegile kua United States ka tekanyo ya 5 lekgolong ka ngwaga. Lega go le bjalo, ga e sa le go tloga ka 1985 go bile le koketšego ya 18 lekgolong balwetšing ba ba begilwego ba TB. Se se tshwenyago kudu le go feta ke go ba gona ga mohuta o mofsa wa bolwetši bjo bo sa kgonwego ke kalafo ya dihlare-tagi. Gona bjale TB e bolaya batho ba ba akanyetšwago go ba dimilione tše tharo ngwaga o mongwe le o mongwe. Ke ka baka la’ng ntwa ya go lwantšha TB e fetoga ntwa yeo e sa fenyegego?

Lebaka le lengwe ke gore balwetši ba bantši ba fo palelwa ke go nwa dihlare tša bona ka nako e nyakegago—yeo gantši e bago dikgwedi tše tshela go ya go tše senyane. Ka mohlala, kua New York City nyakišišo e nngwe e utolotše gore 89 lekgolong ya sehlopha sa balwetši ba ka bago 200 bao ba nago le TB e matla ga se ba fetša dihlare tša bona tša tša kalafo. Dr. Lee Reichman yo e lego mopresidente wa American Lung Association o re: “Seo ke se se boifišago ka gore batho bao (a) ba ka se fole gomme (b) go bonala ba tlo ba le TB yeo e palelago dihlare-tagi tše di tlwaetšwego go dirišwa.” Eupša barwadi ba bolwetši ba ka kgoma e sego feela bophelo bja bona bjo bobotse. Dr. Reichman o oketša ka gore: “Ka go se nwe dihlare tša bona, ba ka fetetša batho ba bangwe.” Se ka ntle le pelaelo ke lebaka le le tlaleletšago balwetšing ba bafsa bao ba akanyetšwago go ba ba dimilione tše seswai bao ba lemogwago ba e-na le bolwetši lefaseng ka bophara ngwaga o mongwe le o mongwe.

Barutwana ba Beibele ba a tseba gore ‘malwetši kua le kua’ ke karolo ya pontšho ya gore re phela “mehleng ya bofêlô” ya tshepedišo ye ya dilo. (Luka 21:11, NW; 2 Timotheo 3:1) Go tla latela’ng? Lefase le lefsa, leo go lona “[xo ka se [bego] le e a rexo: Ke a babya.” (Jesaya 33:24) Ee, Jehofa Modimo o holofetša e sego kimollo ya nakwana eupša tokologo ya sa ruri bolwetšing le lehung.—Kutollo 21:1-4.