Tharollo Ya Lefase Ka Bophara —Na E A Kgonega?

DITSEBI di dumela gore bolwetši bja mafahla (TB) ke bothata bja lefase ka bophara bjoo bo nyakago tharollo ya lefase ka bophara. Ga go naga yeo e ka kgonago go laola TB e noši ka ge dimilione tša batho di tshela mellwane ya dinaga tša ka ntle beke e nngwe le e nngwe.

Ba bantši ba dumela gore tirišano ya ditšhaba-tšhaba e nyaka gore ditšhaba tše di humilego di thuše ditšhaba tše di diilago, tšeo di hlaselwago o šoro ke TB. Bjalo ka ge Dr. Arata Kochi a bolela, “dinaga tše di humilego di kgahlegela go thuša dinaga tše di sa hlabologago go lwantšha bolwetši bja mafahla pele tšona ka botšona e e-ba lepatlelo la ntwa.”

Eupša ditšhaba tše di humilego ga se tša akgofela go thuša ka ge di swaregile ka tšeo di di bonago e le dilo tše di tlago pele le mathata. Dinaga tše dingwe tše di diilago ka botšona gantši di hlokomologa tlhokomelo ya tša maphelo, go e na le mo di tšhollela tšhelete dibetšeng tša tšona. Bogareng bja 1996, ke feela 10 lekgolong ya balwetši ba TB ba lefase bao ba bego ba alafša ka tsela e rulagantšwego ya DOTS, e lego palo e nyenyane kudu ya go ka thibela go mpefala ga leuba.

WHO e re: “Tsebo le dihlare-tagi tše di sa bitšego tša go alafa TB di be di dutše di le gona nywaga-someng. Seo lefase le se nyakago ga bjale ke kgapeletšo ya batho ba nago le matla, tutuetšo le kwelobohloko bao ba tla kgonthišetšago gore dihlare tše di dirišwa ka mo go atlegago lefaseng ka moka.”

Phenyo Yeo e Tlago

Na re ka lebelela ka kholofelo go batho bao ba nago le matla le tutuetšo gore ba rarolle bothata? Mopsalme yo a buduletšwego wa Beibele o ngwadile gore: “Se boteng maxoši e lexo bana ba batho, bao xo sexo phološô xo bôná.” Ka gona, ke mang yo re ka mmotago? Lengwalo le tšwela pele ka gore: “Wa lehlôxônôlô ké eo phološô ya xaxwe e lexo Modimo wa Jakobo, pôtô ya xaxwe a re ké Morêna Modimo wa xaxwe. E a dirilexo maxodimo le mafase le mawatlê, le tšohle tše di lexo mo xo ôna.”—Psalme 146:3, 5, 6.

Ka ge e le Mohlami le Mmopi wa lefase, Jehofa Modimo o na le matla gotee le bohlale bakeng sa go fediša bolwetši. Na o na le kwelobohloko? Jehofa o holofetša ka moporofeta wa gagwe yo a buduletšwego gore: “Ke tlo [batho ba-ka] setša bo-ka motho xe a setša morwa w’axwe a mo dirêlaxo.”—Maleaki 3:17.

Kgaolo ya mafelelo ya Beibele e hlalosa pono yeo e ilego ya bontšhwa moapostola Johane. O bone “sehlare sa bophelô sa xo enywa dienywa tše lesome la metšô e mebedi; se enywa dienywa ka kxwedi e nngwê le e nngwê.” Dihlare tše tša seswantšhetšo le dienywa tše di di enywago di swantšhetša ditokišetšo tša Modimo tšeo di tlago go kgontšha batho ba ba kwago gore ba phele ka mo go sa felego lefaseng.—Kutollo 22:2.

Ge a tšwela pele, Johane o ngwadile gore: “Matlakala a sehlare seo ké a xo fodiša dithšaba.” Matlakala a seswantšhetšo a swantšhetša ditšhegofatšo tšeo di tšwago go Modimo tšeo di tlago go feleletša ka go fodiša batho, moyeng gotee le nameng. Ka gona, re ka kgodišega gore lefaseng le lefsa la go loka ka tlase ga pušo ya Modimo, TB e tla fenywa ka mo go feletšego le sa ruri.—Kutollo 21:3, 4.

[Seswantšho go letlakala 8]

Modimo o holofetša phodišo ya ka mo go sa felego bakeng sa batho