Go Hwa Lehlakore!

SEBAKI se segolo sa lehu le bogole bjo šoro dinageng tša diintaseteri tša ka Bodikela ke go hwa lehlakore. Lentšu la Seisemane “stroke [go hwa lehlakore]” le bolela lebelo leo “tlhaselo ya bjoko” e diregago ka lona. Ka motsotso o ka ikwa o phetše gabotse gomme motsotsong o latelago wa ikwa bjalo ka ge eka o rathilwe ke tladi—go hwa lehlakore go ka fetoša bophelo bja gago ka mo go sa letelwago le ka tekanyo e kgolo kudu. Go ka go golofatša o šoro, go ka go dira semuma, gwa baka pherekano maikwelong a gago, gwa fetola semelo sa gago le matla a temogo gomme gwa go gapeletša go lwa ntwa yeo e bonalago e sa fele ya go lwela go bušetša bophelo bja gago sekeng bjo lapa leno le go tsebago ka bjona.

Nagana ka Ellen Morgan.a Ka Laboraro, Ellen e be e le motho yo a phetšego gabotse yo mafolofolo wa nywaga e 64. Ka Labone ge a be a ile go reka a e-na le monna wa gagwe, gatee-tee Ellen o ile a se sa kgona go bolela gomme sefahlego sa gagwe se ile sa šošobana. Mmele wa gagwe o ile wa ngenega gomme a thekesela bjalo ka ge eka o tagilwe. Ellen o be a swerwe ke go hwa lehlakore!

Ka morago ga go hwa lehlakore, Ellen o be a golofetše kudu mo e lego gore o be a ka se kgone go dira dilo tše bonolo kudu, bjalo ka go hlapa goba go ikapeša. Ka baka la go se kgone go ngwala, go loga goba go roka, o ile a thoma go tlaišwa ke go phulega ga go lla mo go sa laolegego le go lapa mo go nolago moko. Nakong ye ka moka, megato ya Ellen ya monagano e be e se ya šitišwa; lega go le bjalo, maikwelo a dihlong a be a tsoga ge a be a nagana gore mohlomongwe ba bangwe ba mo tšea e le lešilo. Ka morago, Ellen o ile a hlalosa gore: “Ke ba sego kae bao ba lemogago kamoo letšhogo la phetogo ye e sa letelwago le kgomago motho ka gona maikwelong le monaganong. Ke ile ka nyaka ke nagana bjalo ka ge eka e be e le bofelo bja go ba gona ga-ka ke le motho.”

Go hwa lehlakore go bakwa ke’ng? Na yo mongwe le yo mongwe yo a bilego le go hwa lehlakore o kgomegile ka tsela e swanago? Bao ba phonyokgilego ba ile ba lebeletšana bjang le bolwetši bjo? Malapa a bao ba phonyokgilego go hwa lehlakore ba lebeletšana bjang le boemo? Ke’ng seo ka moka ga rena re ka se dirago bakeng sa go nea thekgo? Phafoga! e hlahloba dipotšišo tše bjalo gomme e go bea seetšeng ka maphelo a bao ba hwilego lehlakore le a malapa a bona ao a tlaišegago le bona.

[Mengwalo ya tlase]