Balebeledi ba Basepedi ke Badiri-Gotee Therešong

Phuthegong ya Bokriste ya lekgolo la pele la nywaga go be go e-na le balebeledi ba basepedi bao ba bego ba etela diphuthego gore ba di matlafatše. Ba ile ba ineela, e sego ka go nyaka go ikhola, eupja e le gore ba thuše bao ba lego diphuthegong gore ba tšwele pele ba sepela ka mo go swanetšego Modimo.—Ditiro 11:23, 24; 14:21, 22; 15:32; 20:2, 31-35; Ba-Filipi 2:20-22, 29; 1 Ba-Thesalonika 2:5-12.

Lehono diphuthego tša Dihlatse tša Jehofa le tšona di hwetša mehola ya balebeledi ba basepedi. Banna ba ba na le nywaga e mentši ya phihlelo medirong ya boboledi ya Dihlatse tša Jehofa gotee le go dira e le balebeledi. Ba ile ba tlogela modiro wa boiphedišo le boikarabelo bja malapa e le gore ba ineele bodireding bja nako e tletšego. Go bao ba nyetšego, gantši basadi le bona ba ile ba ba le karolo bodireding ka nako e tletšego gotee le banna ba bona.

Molebeledi wa tikologo o abelwa gore a hlokomele tikologo ya diphuthego tše ka bago 18 go ya go tše 25. O etela phuthego e nngwe le e nngwe yeo e lego tikologong mo e ka bago gabedi ka ngwaga gomme ka morago ga nywaga e mebedi goba e meraro o abelwa tikologo e nngwe. Ka tsela ye diphuthego di ka holwa ke diphihlelo tšeo di sa swanego le go kgona ga balebeledi ba tikologo bao ba sa swanego.

Molebeledi wa tikologo o hlahloba boemo bja moya bja phuthego gotee le modiro wa yona. O nea dipolelo tše dintšinyana phuthegong gomme o bile o ba le seboka le bagolo gotee le bahlanka ba bodiredi go hlokomela kamoo ba ka kaonefatšago ka gona tirelo ya bona phuthegong.

Mo bekeng yena gotee le mosadi wa gagwe ge e ba a nyetše ba sepela le Dihlatse tša lefelong leo, gomme ba ba thuša go kaonefatša bodireding bja bona bja ntlo le ntlo. Yena gotee le mosadi wa gagwe ba bile ba etela batho bao ba sa tšwago go thabela gore ba ba kgothatše tumelong. O ka kgopela ketelo e bjalo.

Molebeledi wa selete o na le ditshwanelo tšona tšeo tša moya le phihlelo. O sepela go tloga tikologong e nngwe go ya go e nngwe gomme bekeng e nngwe le e nngwe a dira tirelo yeo e lego mabapi le dikopano tša tikologo. Yena gotee le mosadi wa gagwe ba bile ba dira bodireding bja tšhemo le Dihlatse go e nngwe ya diphuthego tšeo di lego tikologong yeo a e etelago. O hlokomela ditokišetšo tša mafelelo tša lenaneo la kopano ya tikologo gomme o nea dipolelo tše dintšinyana nakong ya kopano go akaretša le polelo ya phatlalatša.

Ge balebeledi ba basepedi ba feditše ketelo ya bona phuthegong goba tikologong ba tšwela pele go etela tše dingwe gomme ba latela thulaganyo yeo e swanago go fihlela ge diphuthego ka moka goba ditikologo di etetšwe mo e ka bago ka dikgwedi tše tshelelago; gomme ba thoma gape.

Dinageng tše dintši balebeledi ba basepedi ba sepela ka koloi goba ba diriša dinamelwa tša batho bohle. Dinageng tše dingwe mo gongwe ba ka diriša paesekele goba ba sepela ka maoto. Mokgatlo o lefelela ditshenyagalelo tša dinamelwa tša molebeledi wa mosepedi gomme o bile o nea yena le mosadi wa gagwe tšhelete e nyenyane ya thušo bakeng sa tšeo ba di nyakago. Gantši molebeledi wa mosepedi gotee le mosadi wa gagwe ba lokišetšwa lefelo la marobalo le dijo ke ditho tša phuthego e nngwe le e nngwe.

Tirelo ye e nyaka moya wa boikgafo. Balebeledi ba basepedi le basadi ba bona ba ikemišeditše go dira tirelo ya bona diphuthegong ka ntle le go di rweša morwalo o boima.—1 Ba-Thesalonika 2:9.

• Morero wa balebeledi ba basepedi phuthegong ya Bokriste lekgolong la pele la nywaga e be e le ofe?

• Balebeledi ba basepedi lehono ba swanelegela bjang le go hwetšwa bakeng sa bodiredi bjo?

• Hlalosa tirelo ya balebeledi ba tikologo le ba selete le mokgwa wo ba phelago ka wona.

[Seswantšho go letlakala 20]

Molebeledi wa selete o bolela kopanong ya tikologo

[Pictures on page 21]

Balebeledi ba tikologo ba nea tlwaetšo ya go bolela ka ntlo le ntlo, ba boledišana le bagolo ba phuthego, ba etela dithuto tša Beibele gotee le batho bao ba sa tšwago go thabela, gomme ba nea dipolelo diphuthegong