Kgaolo 14
Beibele le Wena
Baseka-seki ba mehleng yeno ba bolela gore Beibele ke yeo e sego ya thutamahlale le gore e a ikganetša, ke gore ke kgoboketšo feela ya dinonwane. Ka lehlakoreng le lengwe, Jesu o itše: “Lentšu la [Modimo] ké yôna therešô.” (Johane 17:17) Bohlatse bo thekga Jesu go e na le go thekga baseka-seki. Ditherešo di bontšha gore Beibele ke e nepagetšego ka mokgwa wa histori. Go feta moo, go dumelelana ga yona mo go lemogegago, diporofeto tša yona tša therešo, bohlale bja yona bjo bo tseneletšego le matla a yona a go tutueletša go dira botse maphelong a batho, ka moka di bontšha gore Beibele ke Lentšu le le ngwadilwego la Modimo. Go etša ge moapostola Paulo a ngwadile: “Mangwalô ka moka ké ma-hebetšwa-ke-Modimo, le xôna a hola batho.”—2 Timotheo 3:16.
1. (Akaretša matseno.) (a) Ditherešo di hlatsela’ng ka Beibele? (b) Ke eng tšeo di bolelwago ke therešo ya gore Beibele ke Lentšu la Modimo le le buduletšwego?
THEREŠO ya gore Beibele ke lentšu la Modimo e sego la motho, e na le tšeo e di bolelago tše dikgolo kudu. E bolela gore Modimo ka kgonthe o ile a boledišana le batho. O arabile dipotšišo tše dintši tša rena gomme o re bontšhitše tharollo ya mathata a rena a mantši. Le gona e bolela gore dikholofetšo tša bokamoso tšeo di hlalositšwego ka Beibeleng ke tša kgonthe. Mmušo wa Modimo ka kgonthe o a buša gomme ge nako e dutše e e-ya o tla gata mogato wa go tloša go hloka toka ka moka, kgateletšo le tlaišego lefaseng le.
2. Tsebo ya gore Beibele ke Lentšu la Modimo e swanetše go re tutueletša go dira eng?
2 Bjale potšišo ke gore: O tla dira’ng ka tsebišo ye? Bonyenyane, tsebo ya gore Beibele ke Lentšu la Modimo e swanetše go go kgothaletša go lebelela ka gare ga yona. Mopsalme o holofeditše lethabo go bao ba dirago bjalo ge a be a ngwala gore: “Yo šexo ké monna eo a sa sepelexo à lailwe ke bakxôpô, . . . Sa xaxwe ya ba xo thabêla molaô wa Morêna, molaô woo a o akanya mosexare le bošexo.”—Psalme 1:1, 2.
Amogela Thušo
3, 4. (a) Go etša ge Beibele ka boyona e bontšha, re swanetše go dira’ng ge re hwetša dilo tšeo re sa di kwešišego ka Beibeleng? (b) Ke bomang bao ka mehla ba ikemišeditšego go thuša batho go kwešiša Beibele kaone?
3 Mohlomongwe ge o bala Beibele, o tla hwetša dilo tšeo o sa di kwešišego. (2 Petro 3:16) Tiragalo yeo e ngwadilwego pukung ya Beibele ya Ditiro e bontšha gore se se swanetše go letelwa. Mo-Ethiopia kapejana ka morago ga lehu la Jesu, o be a bala diporofeto tša puku ya Beibele ya Jesaya. Moebangedi wa Mokriste Filipi o ile a gahlana le monna yo gomme a mmotšiša: “Afa tše O di balaxo O a di kwa?” Mo-Ethiopia o be a sa kwešiše, ka gona o ile a kgopela Filipi gore a mo thuše go kwešiša.—Ditiro 8:30, 31.
4 Mosadi kua United States o be a le boemong bjo bo swanago. E be e le mmadi wa ka mehla wa Beibele, eupja go be go e-na le dithuto tše dintši tše bohlokwa tša Beibele tšeo a bego a sa di kwešiše ge a ipalela ka boyena. E bile feela ka morago ga ge a bile le dipoledišano le Dihlatse tša Jehofa moo a ilego a ithuta ka ditherešo tša motheo tša Beibele, go akaretša bohlokwa bja Mmušo wa Modimo le ditšhegofatšo tše dintši tšeo Mmušo o tlago go di tlišetša batho. Ge e ba o ba kgopela, Dihlatse tša Jehofa di tla thabela go go thuša le wena e le gore o ka kwešiša kaone seo o se balago ka Beibeleng.
Diriša Keletšo ya Beibele
5. Ke tsela efe e tlišago lethabo, go ya ka Beibele?
5 Re kgothaletšwa e sego feela go bala Beibele, eupja gape le go dira ka go dumelelana le seo re se balago. (Psalme 119:2) Go oketša go seo, Beibele e kgothatša ka gore: “Lekang Le bônê xobane Morêna ké yo boló; wa lehlôxônôlô ké monna e a mmotilexo.” (Psalme 34:8) Ge e le gabotse, e re laletša gore re leke Modimo. Leka go phela ka go dumelelana le melao ya motheo ya Modimo, le go bontšha gore o bota Modimo bjalo ka yo a tsebago seo e lego se se kaone bakeng sa gago. Ke feela ka go dira seo moo o tlago go bona gore ye ka kgonthe ke tsela e nepagetšego. Bao ba botago Modimo ka tsela e bjalo ke bao ba thabilego e le ka kgonthe.
6. Na go a kgonega go leka go phela ka go dumelelana le ditekanyetšo tša Beibele lehono? Hlalosa.
6 Ba bangwe ba bolela gore ga go motho yo a ka phelago ka melao ya motheo ya Beibele lefaseng le le sa botegego, la boitshwaro bjo bo gobogilego le la bošoro. Lega go le bjalo, therešo ke gore ba bantši ba dira bjalo. Ke bomang? Lesogana Afrika le ile la hwetša sehlopha sa batho ba bjalo. Le ngwadile ka gore: “Ke be ke dutše ke hlokometše ka nywaga e sego kae e fetilego gore mono Zimbabwe ke lena feela, Dihlatse tša Jehofa, bao ka kgonthe ba lekago go latela mohlala wa Kriste . . . Go fihlela ga bjale, le sehlopha se nnoši seo se kgonnego go nkgodiša ka lerato la Modimo le matla a ebangedi ya Gagwe ka tsela yeo le phelago ka yona, e sego feela ka dipolelo tša lena le dilo tšeo le di ngwadilego. Le phelela ebangedi, gaešita le go e bolela mola batho ba bantši ba bolela ebangedi fela ba sa e phelele.”
Amogela Taolo ya Yona
7. Ke mekgwa efe e tlwaetšwego lehono yeo e ganetšanago le seo Beibele e se bolelago?
7 Moapostola Paulo o boletše gore Beibele e “hola batho ka xo ruta, le ka xo kxodiša le xo sokolla, le ka xo iša tokong.” (2 Timotheo 3:16) Lega go le bjalo, ka dinako tše dingwe seo Beibele e se bolelago ke seo se sa ratwego. Ka mohlala, Beibele e nyatša ditiro tša bosodoma, eupja bosodoma ke bjoo bo lebelelwago ka bophara e le mokgwa wa bophelo o amogelwago. (Ba-Roma 1:24-27; 1 Ba-Korinthe 6:9-11; 1 Timotheo 1:9-11) Beibele gape e bolela gore bophelo bja lesea leo le se la hlwago le belegwa bo bohlokwa gomme ga se bja swanela go fedišwa ka boomo, eupja go ntšhwa ga dimpa tše ka bago tše dimilione tše 50 go a dirwa lefaseng ka bophara ngwaga o mongwe le o mongwe. (Ekisodo 21:22, 23; Psalme 36:9; 139:14-16; Jeremia 1:5) Go thwe’ng ge e ba rena ka noši re hwetša go le thata go amogela seo Beibele e se bolelago ditabeng tše bjalo?
8, 9. Re swanetše go gopola’ng ge la mathomo re hwetša go le thata go amogela ntlha e itšego ka Beibeleng, gomme ke ditekanyetšo tša mang tšeo ka mehla re swanetšego go di amogela?
8 Ee, Bakriste ba lemogile gore ka mehla ke bohlale go latela Lentšu la Modimo. Ka baka la’ng? Ka gobane go latela seo Beibele e se bolelago ka mehla go hola motho o mongwe le o mongwe mafelelong. (Diema 2:1-11) Therešo ke gore batho ke bao ba hlaelelwago kudu ke bohlale. Ke ka sewelo mo ba ka kgonago go bona e sa le pele mafelelo a makgaola-kgang a ditiro tša bona. Moporofeta Jeremia o boletše gore: “Morêna, ke a tseba; motho tsela y’axwe xa’ e buše; le monna mo a yaxo xa’ ikiše, le xe a xata a tiiša.”—Jeremia 10:23.
9 Re swanetšwe feela ke go lebelela go re dikologa gore re bone gore kgopolo ye ke e nepagetšego. Mathata a mantši ao a hlaselago lefase ke mafelelo a go lebanya a go se latele ga batho keletšo ya Lentšu la Modimo. Histori e telele e tletšego mathata ya batho e bontšhitše gore batho ba ka se kgone go itirela diphetho ka katlego bona ka noši ditabeng tša boitshwaro. Modimo ke wa bohlale bjo bo sa felego go feta kamoo rena re lego ka gona. Ke ka baka la’ng re sa amogele seo a se bolelago go e na le go ithekga ka bohlale bja rena ka noši?—Diema 28:26; Jeremia 17:9.
Ga go Motho yo a Phethagetšego
10, 11. (a) Ke ditherešo dife mabapi le tsela yeo re dirilwego ka yona le lefase leo re phelago go lona tšeo di tšweletšago bothata ge re leka go phela ka go dumelelana le ditekanyetšo tša Beibele? (b) Ke bogwera bja mohuta ofe bjoo Beibele e re kgothaletšago gore re bo tsome, gomme re ka hwetša kae bogwera bjo bo bjalo?
10 Beibele e re lemoša ka se sengwe seo go sona re nyakago thušo. Ka moka ga rena re abetše tshekamelo ya sebe. “Xobane diakanyô tša pelo ya motho [ke] tše mpe xo tloxa byaneng bya xaxwe.” (Genesi 8:21; Ba-Roma 7:21) Bothata bjo bo godišwa ke therešo ya gore re phela lefaseng leo le sa latelego melao ya motheo ya Beibele. Ka gona, re nyaka thušo e sego feela ya go kwešiša Beibele, eupja gape le go dira dilo tšeo re ithutago tšona. Ke ka baka leo Beibele e re kgothaletšago go gwerana le ba bangwe bao ba ratago go phela ka ditekanyetšo tša Modimo. Mopsalme o ngwadile: “Ke hloile pitšô ya ba babe; xa ke dule le bakxôpô. . . . Ke Xo rêtê, Morêna, kè le mo diphuthexong.” Le gona psalme e nngwe e re: “A botse le thatêxô! xe bana ba motho bà dula bà kwana!”—Psalme 26:5, 12; 133:1.
11 Go gwerana gotee ke karolo e bohlokwa ya borapedi go Dihlatse tša Jehofa. Ba na le diboka tše mmalwa beke e nngwe le e nngwe, gaešita le dikopano tša nako le nako moo ba ithutago Beibele ba le gotee gomme ba ahla-ahla kamoo melao ya yona ya motheo e ka dirago ka gona maphelong a bona. Ba bopa “mokgatlo wa barwarre” wa lefase ka bophara woo go wona o mongwe le o mongwe a kgothatšwago le go thušwa go kgomarela ditekanyetšo tše tše phagamego tša Beibele. (1 Petro 2:17, NW) Ke ka baka la’ng o sa ye go se tee sa diboka tša bona gomme o bone kamoo batho ba bjalo ba ka go thušago ka gona le wena?—Ba-Hebere 10:24, 25.
Phela ka Lentšu la Modimo
12. Ke ditšhegofatšo dife tše di tlišwago ke go tseba gore Beibele ke Lentšu la Modimo?
12 Ka gona, go tseba gore Beibele ke Lentšu la Modimo go tliša ditšhegofatšo le boikarabelo. Re šegofatšwa ka gobane re hwetša tlhahlo yeo e sa hwetšwego lefelong lege e ka ba lefe le lengwe bakeng sa boitshwaro bja rena bja letšatši le letšatši. Go feta moo, re ithuta ka lerato la Modimo tabeng ya go nea Morwa wa gagwe gore a re lopolle, e le gore re ka ba le kholofelo ya bophelo bjo bo sa felego. (Johane 3:16) Re lemoga gore Jesu mo nakong ye o buša e le Kgoši gomme kapejana o tla gata mogato gore a tloše bobe lefaseng. Le gona re letetše ka go kgodišega “maxodimo a mafsa le lefase le lefsa” tša go loka tšeo Modimo ka noši a di holofeditšego.—2 Petro 3:13.
13. Ke boikarabelo bofe bjo bo tlago godimo ga rena ge re amogela gore Beibele ke Lentšu la Modimo?
13 Lega go le bjalo, gopola gore re na le boikarabelo bja go ithuta Beibele le go nweletša pelong seo e se bolelago. Modimo ka noši o kgothatša ka gore: “Ngwan’a-ka! Se lebalê thutô ya-ka. Pelo ya xaxo a e lôtê ditaêlô tša-ka.” (Diema 3:1) Gaešita lege ba bantši ba lebelela Beibele e le feela lentšu la motho, ruri ka sebete re swanetše ‘go dira gore Modimo a hwetšwe e le morereši, ba maaka e le batho bohle.’ (Ba-Roma 3:4) Anke bohlale bja Modimo bo hlahle bophelo bja gago. “Bôʹta Modimo ka pelo ka moka . . . Ditseleng tša xaxo tšohle tseba Yêna.” (Diema 3:5, 6) Go ela hloko ka bohlale Lentšu la Modimo ka tsela ye go tla kgoma bophelo bja gago ka tsela e botse mo nakong ye gaešita le ka mo go sa felego.
[Seswantšho go letlakala 187]
Ga se ra swanela go bala Beibele feela, eupja gape re swanetše go dira ka go dumelelana le seo re se balago
[Seswantšho go letlakala 188]
Go latela seo Beibele e se bolelago ka mehla go a hola