Lefase (World)
Tlhaloso: “Lefase” ge le fetolelwa go tšwa lentšung la Segerika la koʹsmos, le ka bolela (1) batho ka kakaretšo go sa balwe boemo goba tsela ya bona ya boitshwaro ya bophelo, (2) maemo a rulagantšwego a motho ao motho a belegelwago go ona le go phela go ona goba (3) lešaba le lentši la batho bao e sego bahlanka ba Jehofa ba amogelwago. Bafetoledi ba bangwe ba Beibele ba tšweleditše dipolelo tšeo e sego tše di nepagetšego ka go diriša “lefase” e bile e le leo le swanago le mantšu a Segerika ao a bolelago “lefase le le agilwego” le “tshepedišo ya dilo.” Poledišano e latelago e bolela kudu ka tlhaloso ya bobedi ya ditlhaloso tšeo di bolelwago tša “lefase” go etša ge e neilwe ka mo godimo.
Na lefase le tla senywa ka mollo?
2 Pet. 3:7: “Maxodimo a mehla yeno le lefase la mehla yeno di thekxilwe ke lôna Lentšu leo [la Modimo], di sa lôtôlwa xwa tlo bá xwa tla mollô wa letšatši la kahlôlô la xo tlo lôba xa batho ba banyatši.” (Hlokomela gore ke “batho ba banyatši” e sego batho ka kakaretšo, bao ba tlago go senywa. Ka mokgwa o swanago, 2Pe 3 temana ya 6 e bolela ka tshenyego ya “lefase” la mehleng ya Noage. Batho ba babe ba ile ba senywa, eupja lefase gotee le Noage yo a bego a boifa Modimo le lapa la gagwe ba ile ba šala. Na “mollo” wa letšatši le le tlago la kahlolo e tla ba mollo wa kgonthe goba na ke o swantšhetšago tshenyego e feleletšego? Ke matla afe ao mollo wa kgonthe o tlago go ba le wona mebeleng ya kgonthe ya legodimo tšeo e lego letšatši le dinaledi tšeo di šetšego e le tše di fišago kudu? Bakeng sa poledišano e tšwelago pele ya temana ye, hle bona matlakala 233-235, tlase ga “Lefase (Earth).”)
Die. 2:21, 22: “Ba ba tl’o xo dula mo naxeng, ké baloki; ba ba tl’o xo šala bà le xôna ke bôná ba-ila-bokxôpô. Ba babe ba tlo fedišwa naxeng; bakxeloxi ba tlo rakwa mo xo yôna.”
Ke mang yo a bušago lefase le, ruri na ke Modimo goba Sathane?
Dan. 4:35: “Mašaba a lexodimong le baaxi ba lefase [Modimo Yo Godimo-dimo, Jehofa] ó ba buša ka mo a rataxo; xa xo e a kaxo phêma letsôxô la xaxwe, le a kaxo mo re: O dira’ng?” (Jeremia 10:6, 7 e bolela ka mokgwa o swanago ge e bolela ka Jehofa e le “Kxoši ya dithšaba” ka gobane e le Kgoši e Kgolo Kudu, yena yo a kgonago gomme a tlago go sekiša dikgoši ka moka tša batho gotee le ditšhaba tšeo di di bušago. Jehofa ka ge e le Mmuši wa lefase, ruri ke Mmopi wa lona wa tshwanelo; le ka mohla ga se a ka a tlogela boemo bjoo.)
Joh. 14:30: “[Jesu o itše:] Mmuši wa lefase ó e-tla; xomme xa a na se a tl’o xo ntira sôna.” (Ruri mmuši yo ga se Jehofa Modimo, yo Jesu ka mehla a dirago thato ya gagwe ka go botega. “Mmuši wa lefase” e swanetše go ba ‘e mobe,’ e lego Sathane Diabolo yo matleng a gagwe go ‘rapaletšego lefase ka moka,’ go etša ge go bolelwa go 1 Johane 5:19. Gaešita lege batho ba phela kgokolong yeo e lego ya Modimo, fela lefase leo le dirilwego ka batho bao e sego bahlanka ba kwago ba Jehofa ruri le laolwa ke Sathane ka gobane batho ba bjalo ba kwa yena. Batho bao ba ikokobetšago ka pelo yohle pušong ya Jehofa, ga se karolo ya lefase leo. Bapiša le 2 Ba-Korinthe 4:4.)
Kut. 13:2: “’Me Nôxa [Sathane Diabolo] ya se [sebata] fa matla a yôna, le sedulô sa boxoši bya yôna, le boxoši byo boxolo.” (Go bapišwa ga tlhaloso ya “sebata” le Daniele 7 go bontšha gore se emela mebušo ya batho, e sego feela mmušo ka o tee o bjalo, eupja tshepedišo ya lefase ya pušo ya bopolitiki. Gore Sathane ke mmuši wa yona ruri go dumelelana le Luka 4:5-7 gotee le Kutollo 16:14, 16, yeo e bolelago ka meoya ya batemona yeo e rapago babuši ba lefase ka moka go ba iša ntweng ya go lwa le Modimo ka Haramagedone. Pušo ya Sathane ya lefase ke yeo e kgotleletšwego feela ke Modimo go fihlela nako ya Gagwe e beilwego e fihla ya gore a lokiše kgang ya bogoši bja legohle.)
Kut. 11:15: “Maxodimong xwa kwala mantšu a maxolo, a re: Mebušô ya lefase e tlile ya ba Mmušô wa Mong wa rena [Jehofa] le wa Motlotšwa [Kriste] wa xaxwe.” (Ge se se direga ka 1914, ruri ‘mehla ya bofelo’ ya tshepedišo ya mehleng yeno e mpe e ile ya thoma. Go bonagatšwa ga bogoši bja Jehofa go ile gwa tšwelela gomme nakong ye e le ka Morwa wa gagwe e le Mmuši wa Mesia. Lefase le lebe le tla senywa gatee-tee gomme Sathane mmuši wa lona o mobe wa moya, o tla tswalelelwa sekoting gomme a ka se ke a kgona go tutuetša batho.)
Kgopolo ya Bakriste ba therešo ke efe malebana le lefase le malebana le batho bao e lego karolo ya lefase?
Joh. 15:19, PK: “Ga le [balatedi ba Jesu] ba lefase, eupja ke le kgethile lefaseng.” (Ka gona, Bakriste ba therešo ga se karolo ya lešaba le lentši la lekoko la batho leo le furaletšego Modimo. Ba hlokomela mediro ya tlhago ya batho, eupja ba gana maikwelo, polelo le boitshwaro tšeo di bontšhago mekgwa ya lefase le tšeo di ganetšanago le ditsela tše di lokilego tša Jehofa.) (Bona matlakala 73-80, gotee le 349-353.)
Jak. 4:4: “Lena diotswa-tenang! A xa Le tsebe xore leratô la lefase ké xo dirêla Modimo bonaba? E a rataxo xo xwêrana le lefase, ó itira lenaba la Modimo.” (Ka gobane Bakriste ba se ba phethega, mo gongwe ka dinako tše dingwe ba ka šilafatšwa ke go kgomana ga bona le lefase. Eupja ge ba eletšwa ke Lentšu la Modimo, ruri ba a sokologa gomme ba retolla ditsela tša bona. Lega go le bjalo, ge e ba ba bangwe ka boithatelo ba ipapetša le lefase goba ba ekiša moya wa lona, ruri ba bontšha gore ga ba sa hlwa e le Bakriste ba therešo, eupja ba fetogile karolo ya lefase leo e lego lenaba la Modimo.)
Ba-Roma 13:1, PK: “A motho e mongwe le e mongwe a ipee ka tlase ga magoši a bušago, gobane ga go na bogoši ga e se bjo bo tšwago go Modimo, gomme magoši a a lego gona a beilwe ke Modimo.” (Bao ba kwago taelo ye ga se marabele ao a lekago go phekgola mebušo ya lefase. Ba ikokobetša bogošing bja babuši ba bopolitiki gomme ba ka kwa ge feela dilo tšeo di nyakwago ke babuši ba bjalo di sa ganetšane le melao ya Modimo. Mebušo e bjalo e ile ya bonwa e sa le pele le go bolelwa e sa le pele ke Modimo. E buša e sego ka gobane a e nea matla, eupja ka gobane a e dumeletše. Nakong ya gagwe e swanetšego o tla ba a e fediša.)
Ba-Gal. 6:10: “Xe re sa na le lebaka, a re direng botse; re bo dirêlê batho bohle, xa-xolo re bo dirêlê batho ba-bô-rena ba tumêlô.” (Ka gona, Bakriste ba therešo ga ba lese go dira botse go magagabo bona. Ba ekiša Modimo yo a dirago gore letšatši le hlabele batho ba babe le ba go loka.—Mat. 5:43-48.)
Mat. 5:14-16: “Lena Le seetša sa lefase. . . . Le sa lena seetša a se bônêxêlê batho ka mokxwa woo, xore ba bônê medirô e mebotse ya lena, ba tumišê Tata weno wa maxodimong.” (Gore batho ba bangwe ba tle ba rete Modimo ka baka la seo Bakriste ba se dirago, ruri go molaleng gore bao e lego Bakriste ba swanetše go ba dihlatse tše mafolofolo go lefase mabapi le leina la Modimo le morero wa gagwe. Ke modirong wo moo Bakriste ba therešo ba ikgafelago e le ka kgonthe.)
Maemo a mehleng yeno a lefase a bolela’ng?
Bona hlogo ya ditaba e kgolo ya ‘Mehla ya Bofelo.’