Na o Swanetše go bo Dumela?

NA O dumela Boraro botee? Batho ba bantši Bojakaneng ba a bo dumela. Ge e le gabotse, bo bile thuto ya motheo ya dikereke ka makgolo a nywaga.

Ka baka la se, mo gongwe o tla nagana gore ga go na seo se ka belaelwago ka bjona. Eupja se gona, gomme mo nakong ye gaešita le ba bangwe ba bathekgi ba bjona ba bešeleditše dikgong tabeng.

Ke ka baka la’ng taba e swanago le ye e ka se ke ya tšeišwa phefo feela? Ke ka gobane Jesu ka noši o itše: “Bophelo bjo bo sa felego ke bjo: Go tseba wena Modimo o nnoši wa therešo gotee le go tseba Jesu Kriste yo o mo romilego.” Ka gona bokamoso bja rena ka moka bo ithekgile ka go tseba ga rena seo Modimo wa therešo a lego sona, gomme se se bolela go tseba seo kgang ya Boraro botee e lego sona. Ka gona, ke ka baka la’ng o sa itlhahlobele yona?—Johane 17:3, Jerusalem Bible (JB) ya Katholika.

Go na le dikgopolo tše di sa swanego tša Boraro botee. Eupja gantši thuto ya Boraro botee ke ya gore go Modimo go na le batho ba bararo, e lego Tate, Morwa le Moya o Mokgethwa; fela ba ka moka ke Modimo o tee. Thuto ye e bolela gore ba bararo ba a lekana, ba na le matla ohle gomme ga se ba bopja ka ge e le ba ba bilego gona ka mo go sa felego go Modimo.

Lega go le bjalo, ba bangwe ba bolela gore thuto ya Boraro botee ke ya maaka, gore Modimo Ra-matla-ohle o eme a nnoši e le motho yo a arogilego, wa ka mo go sa felego le yo matla ka moka. Ba bolela gore Jesu nakong ya ge a be a le gona pele ga ge e ka ba motho o be a swana le barongwa, e le motho wa moya yo a arogilego yo a bopilwego ke Modimo, gomme ka lona lebaka le o swanetše go ba a bile le mathomo. Ba ruta gore Jesu le ka mohla ga se a ka a lekana ka tsela lege e le efe le Modimo Ra-matla-ohle; ka mehla o ikokobeditše go Modimo gomme o sa dutše a dira bjalo. Le gona ba dumela gore moya o mokgethwa ga se motho eupja ke moya wa Modimo, e lego matla a gagwe a dirago.

Bathekgi ba Boraro botee ba bolela gore ga se bja thewa feela mokgweng wa bodumedi, eupja bo theilwe le Beibeleng. Bao ba bo solago ba bolela gore ga se thuto ya Beibele, mo e nngwe ya dipuku tša histori e bilego e bolela ka gore: “Mathomo a [Boraro botee] ke a boheitene e le ka kgonthe.”—The Paganism in Our Christianity.

Ge e ba Boraro botee e le therešo, gona ke mo go hlomphollago Jesu go bolela gore le ka mohla ga se a ka a lekana le Modimo e le karolo ya Modimo. Eupja ge e ba Boraro botee e le maaka, gona ke mo go hlomphollago Modimo Ra-matla-ohle go bolela motho o mongwe e le yo a lekanago le yena gomme se sebe go feta mo, go bolela Maria e le “Mmago Modimo.” Ge e ba Boraro botee e le maaka, gona ke mo go hlomphollago Modimo go bolela go etša ge go boletšwe pukung ya Catholicism gore: “Ka ntle ga ge [batho] ba ka boloka tumelo ye ka botlalo e bile e sa šilafatšwa, gona ka ntle le pelaelo ba tla fedišetšwa ruri. Tumelo ya Katholika ke ye: re rapela Modimo o tee go Boraro botee.”

Ka gona go na le mabaka a mabotse a lebaka leo ka lona o swanetšego go rata go tseba therešo ka Boraro botee. Eupja pele ga ge o ka hlahloba setlogo sa thuto ye le boipolelo bja yona bja go ba ya therešo, ruri e tla ba mo go holago go e hlalosa ka mo go nepagetšego kudu. Boraro botee ge e le gabotse ke’ng? Bathekgi ba bjona ba bo hlalosa bjang?

[Pictures on page 2]

Ka go le letshadi: Seswantšho sa ba-Egipita sa Boraro botee bja sekete sa ngwaga sa bobedi (B.C.E.) sa Amon-Ra, Ramses II le Mut.Ka go le letona: Seswantšho sa go betlwa ka lebje sa Boraro botee bja lekgolong la lesome-nne (C.E.) sa Jesu Kriste, Tate le moya o mokgethwa. Hlokomela gore ke batho ba bararo, eupja maoto ke a mane feela.