Kgaolo 16

Modimo wa Therešo le Bokamoso bja Gago

“Legohleng le le makatšago, go na le selo se sengwe seo Motho a ka ikwago a kgonthišega ka sona. Motho ka boyena e tloga e se sephedi se segolo kudu sa moya Legohleng. . . . Go na le sephedi Legohleng seo ka boemo bja moya se fetago Motho ka noši. . . . Pakane ya motho ke go tsoma go ba le tswalano ya kgaufsi le sephedi seo se hlotšego legohle, le go se tsoma ka boikemišetšo bja go dira gore yena ka noši a kwane le mo-ba-gona yo yo a phethagetšego wa moya.” —An Historian’s Approach to Religion, ka Arnold Toynbee.

1. (Akaretša matseno.) (a) Ke’ng seo ra-dihistori Toynbee a se lemogilego ka motho le legohle? (b) Beibele e hlaola bjang “mo-ba-gona yo a phethagetšego wa moya”?

NAKONG e ntši ya nywaga e dikete tše tshelelago e fetilego, batho ba ile ba tsoma ka phišego e kgolo goba e nyenyane, go hwetša “mo-ba-gona [yoo] yo a phethagetšego wa moya.” Bodumedi bjo bongwe le bjo bongwe bjo bogolo bo neile mo-ba-gona yoo leina le fapanego. Go ithekgile ka seo bodumedi bja gago e lego sona—Bohindu, Bomoseleme, Bobuddha, Boshinto, Boconfucius, Botao, Bokriste goba lege e le bofe bjo bongwe—o na le leina la “mo-ba-gona yo a phethagetšego wa moya.” Eupja Beibele e nea mo-ba-gona yo leina, bong le semelo—Jehofa, Modimo yo a phelago. Modimo yoo yo go se nago yo a swanago le yena o ile a botša Korese o Mogolo wa Peresia gore: “Ke nna Jehofa, ga go e mongwe, ka ntle ga-ka ga go Modimo; . . . Nna ke dirile lefase, ke bopile motho godimo ga lona.”—Jesaya 45:5, 12, 18, Phetolelo ya Kgale; Psalme 68:19, 20, Phetolelo ya Kgale.

Jehofa—Modimo wa Boporofeta bjo bo Botegago

2. Ge e ba re nyaka go hwetša bohlatse bjo botegago mabapi le bokamoso, re swanetše go retologela go mang, gomme ka baka la’ng?

² Jehofa ke pakane ya mafelelo ya go tsoma ga batho Modimo. Jehofa o ikutolotše e le Modimo wa boporofeta yo a ka bolelago mafelelo go tloga mathomong. O ile a bolela ka moporofeta Jesaya gore: “Xopolang tša kxalê tša boxolo-xolo, xe Modimo è le Nna, xò se yo mongwê. Xa xo sa n’e Modimo Mo-ka-Nna. Ké Nna ke kwaditšexo tša mafêlô mola di sa thôma, di sešo tša dirêxa. Ké Nna ke boletšexo ka re: Se ke se rerilexo xa se šuthe; ke dira tšohle tše ke di rataxo. . . . Ke boletše; ke tlo di tliša. Ke rerile; ke tlo dira.”—Jesaya 46:9-11; 55:10, 11.

3. (a) Ke ditiragalo dife tšeo re ka di bonago e sa le pele ka boporofeta bja Beibele? (b) Ke’ng seo Sathane a se dirilego go bao ba sa dumelego, gomme ka baka la’ng?

³ Ka go ba le Modimo yo bjalo yo a botegago wa boporofeta, re ka tseba seo se tlago go diragalela tshepedišo ya lefase ya madumedi ao a aroganyago. Le gona, re ka bolela e sa le pele seo se tlago go wela mekgatlo ya dipolitiki e matla yeo go bonalago e laola moo lefase le yago gona. Go feta moo, re ka bolela e sa le pele bofelo bjoo bo letetšego “modimo wa lefase le,” Sathane yo a “foufaditšego dikgopolo tša bona, ba sa dumelego” ka madumedi a mantši-ntši ao a fapošitšego batho go Modimo wa therešo, Jehofa. Ke ka baka la’ng Sathane a ile a dira modiro wo wa go foufatša? E le gore “ba se ke ba phadimelwa ke seetša se bonegago sa Ebangedi ya letago la Kriste eo e lego tshwano ya Modimo.”—2 Ba-Korinthe 4:3, 4, Phetolelo ya Kgale; 1 Johane 5:19.

4. Ke dipotšišo dife mabapi le lefase le bokamoso bja motho tšeo di swanetšego go arabja?

⁴ Le gona, re ka tseba seo se letšego ka morago ga ditiragalo tše. Lefase mafelelong le tla hwetšwa le le boemong bofe? Na le tla hwetšwa le šilafetše? Le sentšwe? Le fedišitšwe dithokgwa tša lona? Goba na go tla ba le tsošološo ya lefase le ya morafo wa batho? Bjalo ka ge re tla bona, Beibele e araba dipotšišo tše ka moka. Eupja sa pele anke re lebiše tlhokomelo ya rena ditiragalong tša bokamoso bjo bo lego kgaufsi.

“Babele o Moxolo” o a Hlaolwa

5. Ke’ng seo Johane a ilego a se bona ponong?

⁵ Puku ya Beibele ya Kutollo e ile ya utollelwa maopostola Johane sehlakahlakeng sa Patimo ngwageng wa 96 C.E. E bontšha diswantšho tše di bonagalago gabotse tša ditiragalo tše dikgolo tšeo di tlago go direga nakong ya bofelo, nako yeo go ya ka bohlatse bja Beibele batho ba phetšego go yona ga e sa le go tloga ka 1914.a Go diswantšho tšeo tša seswantšhetšo tšeo Johane a di bonego ponong, se sengwe ke sa seotswa seo se ikgabišitšego ka mo go sa kgahlišego seo se sa kgonego go itshwara se se bitšwago “Babele o Moxolo, Mma xo diotswa le makxapha a lefase.” O be a le boemong bofe? “Ka bôna mosadi eo à taxilwe ke madi a bakxêthwa le a dihlatse tša Jesu.”—Kutollo 17:5, 6.

6. Ke ka baka la’ng Babele o Mogolo a sa emele dikarolo tše bušago tša bopolitiki tša lefase?

⁶ Mosadi yo o emela mang? Ga re a tlogelwa gore re inaganele yo e lego yena. Ka mogato wa go hlahloba mabaka, a ka utollwa. Ponong yona yeo, Johane o kwa morongwa a re: “Tlaa ke Xo bontšhê xo lahlwa xa seotswa seo se sexolo se se dutšexo xodimo xa meetse a mantši. Ké sôna se maxoši a lefase a dirilexo bootswa le sôna, ’me ba ba axilexo lefaseng ba taxwa ke sebelá sa bootswa bya sôna.” Ge e ba dikgoši, goba babuši ba lefase ba otswa le yena, gona se se bolela gore seotswa se se ka se emele dikarolo tše bušago tša dipolitiki tša lefase.—Kutollo 17:1, 2, 18.

7. (a) Ke ka baka la’ng Babele o Mogolo a sa emele dikarolo tša kgwebo? (b) Babele o Mogolo o emela’ng?

⁷ Yona pego yeo e re botša gore “babapatši ba lefase ba humile ka boati bya maiphsino a wôna.” Ka gona, Babele o Mogolo a ka se emele dikaralo tša lefase tša kgwebo goba “babapatši.” Lega go le bjalo, temana e buduletšwego e re: “Meetse ao O a bonexo a seotswa seo se dutšexo xodimo xa ôna, ké merafô le mašaba a batho, le dithšaba le maleme.” Ke karolo efe e nngwe e kgolo ya tshepedišo ya lefase le yeo e šetšego yeo e swanelago tlhaloso ya seotswa sa seswantšhetšo seo se otswago le babuši ba dipolitiki, se gwebago le dikgahlego tša kgwebo, gomme se dutše ka letago godimo ga batho, mašaba, ditšhaba le maleme? Ke bodumedi bja maaka ka digakantšhi tša bjona ka moka tše di sa swanego!—Kutollo 17:15; 18:2, 3.

8. Ke ditherešo dife tše dingwe tšeo di kgonthišetšago go tsebja ga Babele o Mogolo?

⁸ Go hlaolwa mo ga Babele o Mogolo go kgonthišetšwa ke go solwa ga gagwe ke morongwa ka gobane a ‘timetša batho ka malea a gagwe.’ (Kutollo 18:23) Dibopego ka moka tša bonoge di hlohleletšwa ke bodumedi le batemona. (Doiteronomio 18:10-12) Ka gona, Babele o Mogolo o swanetše go swantšhetša karolo yeo e lego bodumedi. Bohlatse bja Beibele bo bontšha gore ke mmušo wa lefase ka moka wa bodumedi bja maaka bja Sathane, bjo bo hlohleleditšwego ke yena menaganong ya batho e le gore a fapoše tlhokomelo go Modimo wa therešo, Jehofa.—Johane 8:44-47; 2 Ba-Korinthe 11:13-15; Kutollo 21:8; 22:15.

9. Ke dikgokagano dife tše swanago tšeo di hwetšwago madumeding a mantši?

⁹ Bjalo ka ge re šetše re bone pukung ye ka moka, go na le dikgokagano tše di swanago tšeo di lego mologong o hlakahlakanego wa madumedi a lefase. Madumedi a mantši a thomile dinonwaneng. Mo e ka bago ka moka ga ona a gokagantšwe ke sebopego se itšego sa tumelo ya go dumela seo go thwego ke moya (soul) wa motho wo o sa hwego wo o šalago o phela ka morago ga lehu le wo o yago bophelong bja ka morago ga lehu goba wa fetela sebopiweng se sengwe. A mantši a na le mokgwa o swanago wa go dumela lefelo le boifišago la tlhokofatšo le le bitšwago dihele. A mangwe a gokagantšwe ke ditumelo tša bogologolo tša go dumela boraro, boraro botee, le modimogadi yo e lego mma. Ka gona, ke mo go swanetšego gore ka moka ga ona a bewe sehlopheng se tee ka tlase ga seka se tee se se bopaganego sa seotswa “Babele o Moxolo.”—Kutollo 17:5.

Nako ya go Tšhaba Bodumeding bja Maaka

10. Ke bofelo bofe bjo bo porofetilwego bakeng sa seotswa sa bodumedi?

¹⁰ Ke’ng seo Beibele e se bolelago e sa le pele gore e tla ba pheletšo ya seotswa se se apareditšego lefase? Ka leleme la seswantšhetšo, puku ya Kutollo e hlalosa phedišo ya sona diatleng tša dikarolo tša dipolitiki. Tše di swantšhetšwa ke “dinaka tše lesome” tšeo di thekgago Ditšhaba tše Kopanego, “sebata se sehubedu” seo e lego seswantšho sa tshepedišo ya bopolitiki ya Sathane yeo e kgamathetšego madi.—Kutollo 16:2; 17:3-16.b

11. (a) Ke ka baka la’ng bodumedi bja maaka bo nyatšwa ke Modimo? (b) Ke’ng seo se tlago go diragalela Babele o Mogolo?

¹¹ Go fedišwa mo ga mmušo wa lefase wa bodumedi bja maaka wa Sathane go tla bakwa ke kahlolo e šoro ya Modimo ya go ahlola madumedi a. A tla ba a ile a hwetšwa a e-na le molato wa bootswa bja moya ka baka la go kopanela ga ona tirong e fošagetšego le dinyatsi tša ona tše gatelelago tša bopolitiki le go di thekga. Bodumedi bja maaka bo kgamatheditše diaparo tša bjona ka madi a se nago molato ka gobane ka baka la borata-naga bo ile bja tšea karolo gotee le sehlopha se senyenyane se bušago sa setšhaba se sengwe le se sengwe dintweng tša sona. Ka gona, Jehofa o tsenya dipelong tša dikarolo tša bopolitiki gore di dire thato ya gagwe malebana le Babele o Mogolo gomme di mo fediše.—Kutollo 17:16-18.

12. (a) Ke’ng seo o swanetšego go se dira gore o phologe ge Babele e senywa? (b) Ke dithuto dife tšeo di hlaolago bodumedi bja therešo?

¹² Ka ge bokamoso bjo bo bjalo bo lebeletšane le madumedi a lefase, ke’ng seo o swanetšego go se dira? Karabo e hwetšwa go seo Johane a kwelego lentšu le tšwago legodimong le se bolela: “Khuduxang! lena ba sethšaba sa-ka, xore Le se tlo xwêrana le dibe tša motse woo, la tlo wêlwa ke ’kôtlô tša wôna. Xobane dibe tša wôna di fihla xodimong, ’me Modimo ó xopola makxôpô a wôna.” Ka gona, bjale ke nako ya go kwa temošo ya morongwa ya gore re tšwe mmušong wa Sathane wa bodumedi bja maaka gomme re tsene borapeding bja therešo bja Jehofa. (Bona lepokisi, letlakala 377.)—Kutollo 17:17; 18:4, 5; bapiša le Jeremia 2:34; 51:12, 13.

Haramagedone e Batametše

13. Ke ditiragalo dife tšeo di swanetšego go direga ka pela?

¹³ Kutollo e bolela gore “kôtlô di o tlêla ka ’tšatši le tee, è le dinkhu le thlokofalô le tlala, xe o thšungwa ka mollô.” Ka dipontšho ka moka tša boporofeta bja Beibele, ‘letšatši leo le tee,’ goba nako e kopana ya polao ya ka pela, bjale e batametše. Ge e le gabotse, phedišo ya Babele o Mogolo e tla tšwelela ka nako ya ‘masetla-pelo a magolo’ ao a fihlago seremong ka ‘ntwa ya mohla-mogolo wa Modimo Ra-matla-ohle ka Haramagedone.’ Ntwa yeo ya Haramagedone e tla lebiša go fenyweng ga tshepedišo ya Sathane ya bopolitiki le go lahlelweng ga gagwe sekoting. Ke moka go tla thoma lefase le lefsa la go loka!—Kutollo 16:14-16; 18:7, 8; 21:1-4; Mateo 24:20-22.

14, 15. Ke boporofeta bofe bja Beibele bjoo go bonalago bo batamela go phethagala?

¹⁴ Boporofeta bjo bongwe bjo bo kgethegilego bja Beibele bo šetše bo batamela phethagalo ya bjona pele ga mahlo a rena. Moapostola Paulo o ile a porofeta le go lemoša ka gore: “Xe e le tša mabaka ao le tša nakô ya xôna, Bana bešo, xa e sa le tše Le swanetšexo xo ngwalêlwa tšôna. Xobane lena beng Le tseba xabotse xore letšatši leo la Morêna le tlo tla bo-ka lehodu xe le tla bošexo. Xe xo tlo thwe: Xo khutšo! Xo iketlilwe! ké mo ba tl’o xo wêlwa xodimo ke thsenyêxô byalo ka moima xe a wêlwa ke lešôkô; ’me ba ka se kê ba phônyôkxa.”—1 Ba-Thesalonika 5:1-3.

¹⁵ Go tla bonala eka ditšhaba tšeo pele di bego di e-na le lehloyo e bile di belaelana mo nakong ye di leba ka tlhokomelo boemong bjoo go bjona di tlago go kgona go goeletša khutšo ya lefase le polokego. Ka gona, ka lehlakoreng le lengwe gape, re a tseba gore letšatši la kahlolo ya Jehofa godimo ga bodumedi bja maaka, ditšhaba le mmuši wa bona, Sathane, le kgaufsi.—Tsefanya 2:3; 3:8, 9; Kutollo 20:1-3.

16. Ke ka baka la’ng keletšo ya Johane e le ya bohlokwa kudu lehono?

¹⁶ Ba dimilione lehono ba phela maphelo a bona go etša ge e ka mahumo a bonagalago e be e le a ka mo go sa felego le a bohlokwa. Lega go le bjalo, seo lefase le le gobogilego le se neelago ke seo e sego sa bohlokwa le seo e lego sa nakwana. Ke ka baka leo keletšo ya Johane e lego ya bohlokwa kudu: “Le se kê la rata lefase le tše lefaseng; xe motho a rata lefase, leratô la Tata wešo xa le xôna mo xo Yêna. Xobane tšohle tše lefaseng, e lexo kxanyoxô ya nama, le kxanyoxô ya mahlô, le xo phela ka xo ikxoxomoša, xa di tšwe xo Tata wešo, di tšwa lefaseng. Xomme lefase le a feta, le yôna kxanyoxô ya lôna. E a tl’o xo dula à le xôna xo ya xo ile, ké eo a diraxo tše Modimo a di rataxo.” Na o ka se rate go dula o le gona go ya go ile?—1 Johane 2:15-17.

Lefase le Lefsa le le Holofeditšwego

17. Ke’ng seo bokamoso bo se swaretšego bao ba tsomago Modimo wa therešo?

¹⁷ Ka ge Modimo a tlile go ahlola lefase ka Kriste Jesu, ke’ng seo se tlago go latela? Kgale-kgale, ka Mangwalong a Sehebere, Modimo o ile a porofeta gore o tla phetha morero wa gagwe wa mathomo go batho mo lefaseng le, e lego gore lapa le kwago la motho le thabele bophelo bjo phethagetšego lefaseng la paradeise. Boiteko bja Sathane bja go phekgola morero woo ga bo a fediša kholofetšo ya Modimo. Ka baka leo, Kgoši Dafida o be a ka ngwala gore: “Xobane ba babe ba tlo lôba; ba-leta-Morêna e tlo ba beng ba naxa. Xo se xokae e mobe ó tlo ba a ile; . . . Baloki e ba beng ba naxa, ba dula mo xo yôna ka mehla le ka mehla.”—Psalme 37:9-11, 29; Johane 5:21-30.

18-20. Ke diphetogo dife tšeo di tlago go direga lefaseng le?

¹⁸ Lefase le tla ba boemong bofe ka morago ga moo? Na e tla ba leo le šilafetšego ka mo go feletšego? Leo le fselego? Leo le se nago dithokgwa? Le gatee! Jehofa mathomong o be a rerile gore lefase e be phaka ya paradeise e hlwekilego le e leka-lekanego. Kgonagalo ya seo e sa dutšego e le gona go sa šetšwe go diriša ga motho lefase gampe. Eupja Jehofa o holofeditše gore o tla “senya basenya-lefase.” Boemo bjoo bo batamelago go senywa ga lefase ka moka bo bile gona feela lekgolong la bo-20 la nywaga. Ka gona, le ke lebaka le lengwe gape la go dumela gore kapejana Jehofa o tla gata mogato bakeng sa go šireletša thoto ya gagwe, e lego tlholo ya gagwe.—Kutollo 11:18; Genesi 1:27, 28.

¹⁹ Phetogo ye e tla direga ka pela ka tlase ga thulaganyo ya Modimo ya “lexodimo le lefsa, le lefase le lefsa.” E ka se bolele leratadima le lefsa le polanete e mpsha, eupja go e na le moo e tla bolela pušo e mpsha ya moya godimo ga lefase le le mpshafaditšwego leo le dulwago ke lekoko la batho ba ba mpshafaditšwego. Lefaseng leo le lefsa, go ka se be le sebaka sa go dirišwa ka boithati ga magagabo rena goba diphoofolo. Go ka se be le bošoro goba tšhollo ya madi. Go ka se be le bao ba hlokago magae, go ka se be le tlala, go ka se be le kgatelelo.—Kutollo 21:1; 2 Petro 3:13.

²⁰ Lentšu la Modimo le re: “Nywakô ye ba e axaxo ba tlo dula mo xo yôna; dirapa tša merara, ba tlo lema ba ja kenyô tša tšôna. Ba ka se kê ba axa, xwa dula o šele; ba ka se kê ba lema xwa ja o šele; xobane matšatši a batho ba-ka a tlo lekana le matšatši a sehlare, ’me bahlaolwa ba-ka ba tlo phela ka tše ba itiretšexo tšôna, tša tlo bá tša ba ônalêla diatleng. . . . Phiri le kwana di tlo fula xotee; tau e tlo fula byang wa kxomo; noxa, dijô tša yôna e tlo ba lerole. Xo ka se hlwê xo senywa xo dirwa bošula thabeng e kxêthwa ya-ka yohle. Ó r’yalo Morêna.”—Jesaya 65:17-25.

Motheo wa Lefase le Lefsa

21. Ke ka baka la’ng lefase le lefsa e le selo sa kgonthe?

²¹ Mo gongwe o ka botšiša gore, ‘Tše ka moka di tla kgonega bjang?’ Ka gobane ‘Modimo yo a sa forego o holofeditše pele ga mehla ya bogologolo’ gore batho ba tla tsošološwa gomme ba hwetša bophelo bjo bo sa felego phethegong. Motheo wa kholofelo ye ke seo moapostola Petro a se boletšego lengwalong la gagwe la pele go Bakriste-gotee le yena ba tloditšwego: “A xo rêtwê Modimo Tata xo Mong wa rena Jesu Kriste, wa xo re tswala xapê ka kxauxêlô e kxolo ya xaxwe, ra tla ra ba ba kholofêlô ye e phelaxo ka xe Jesu Kriste a tsoxile bahung, xore re jê bohwa byo bo sa bolexo, byo bo se naxo senyalô, byo bo sa ônalexo.”—Tito 1:1, 2; 1 Petro 1:3, 4.

22. Ke’ng seo e lego motheo kholofelong ya lefase le lefsa, gomme ka baka la’ng?

²² Tsogo ya Jesu Kriste ke ya motheo kholofelong ya lefase le lefsa la go loka ka gobane o ile a kgethwa ke Modimo gore a buše a le magodimong godimo ga lefase le hlwekišitšwego. Le gona, Paulo o ile a gatelela kamoo tsogo ya Kriste e lego ya bohlokwa ka gona ge a be a ngwala gore: “Byale xomme, Kriste ó tsoxile bahung a ba Yêna thakangwaxa ya ba ba ithôbaletšexo. Byale ka xe lehu le tlile ka motho, le tsoxô ya bahu e tlile ka motho. Byale ka xe bohle bà e-hwa ka Adama, ba tlo phedišwa bohle ka Kriste.”—1 Ba-Korinthe 15:20-22.

23. (a) Ke ka baka la’ng tsogo ya Kriste e le ya bohlokwa? (b) Ke taelo efe yeo Jesu yo a tsošitšwego a ilego a e nea balatedi ba gagwe?

²³ Lehu la sehlabelo la Kriste e le topollo e swanelago gotee le tsogo ya gagwe di theile motheo bakeng sa kholofelo ya “lexodimo le lefsa,” e lego pušo ya Mmušo le morafo wa batho wo o fetotšwego le wo o mpshafaditšwego, e lego lekoko la ‘lefase le lefsa.’ Tsogo ya gagwe gape e neile matla boboleding le go ruteng mo go bego go dirwa ke baapostola ba gagwe ba botegago. Pego e re botša gore: “Barutiwa ba lesome le motšô o tee ba ya Galilea, thabeng ye Jesu [yo a tsošitšwego] a ba laetšexo. Xe ba mmôna, ba mo khunamêla; ké xe ba bangwê bà sa belaêla. Jesu a batamêla a bolêla le bôná a re: Ke neilwe matla ka moka lexodimong le lefaseng. Ké xôna yang Le dirê dithšaba ka moka barutiwa ka xo ba kolobetša Leineng la Tate le la Morwa le la Môya o mokxêthwa, le ka xo ba ruta xo boloka tšohle tše ke Le laetšexo tšôna. Xomme tsebang, ke na le lena ka mehla xo fihla bofelong bya lefase.”—Mateo 19:28, 29; 28:16-20; 1 Timotheo 2:6.

24. Ke ditšhegofatšo dife tše dingwe tšeo tsogo ya Jesu e di kgonthišetšago?

²⁴ Tsogo ya Jesu gape e kgonthišetša tšhegofatšo e nngwe bakeng sa batho—tsogo ya bahu. Go tsoša ga Jesu Latsaro bahung e be e le seka sa tsogo e akaretšago ya nakong e tlago. (Bona matlakala 249-50.) Jesu o ile a re: “Di se kê tša Le tlaba; xobane xo tla lebaka leo bohle ba lexo mabitleng ba tl’o xo kwa Lentšu la Morwa-Modimo ka lôna. Xomme ba tlo tšwa; ba ba dirilexo tše botse ba tlo tsoxa ba phela; ba ba dirilexo tše mpe ba tlo tsoxa ba lahlwa.”—Johane 5:28, 29; 11:39-44; Ditiro 17:30, 31.

25. (a) Ke kgetho efe yeo e tlago go lebana le bohle lefaseng le lefsa? (b) Ke bodumedi bja mohuta ofe bjoo bo tlago go aparetša lefaseng le lefsa?

²⁵ E tla ba lethabo le legolo gakaakang go kgona go amogela baratiwa ba rena, e lego mo go bonalago moloko o mongwe le o mongwe o tla dira seo ka go latelelana! Moo lefaseng le lefsa, motho o mongwe le o mongwe bjale o tla kgona go dira phetho ka tlase ga maemo a phethagetšego ya ge e ba a tla rapela Modimo wa therešo, Jehofa, goba a lahlegelwa ke bophelo e le moganetši. Ee, lefaseng le lefsa, go tla ba le bodumedi bjo tee feela, e lego sebopego se tee sa borapedi. Tumišo ka moka e tla ya go Mmopi yo lerato, gomme motho o mongwe le o mongwe yo a kwago o tla boeletša mantšu a mopsalme: “Ke tlo Xo xodiša, Wene Modimo wa-ka, Wene O lexo Kxoši. Ke tlo rêta leina la xaxo ka mehla le neng le neng. . . . Morêna ké Yêna yo moxolo, Morêtwa wa paala, yo moxolo a se naxo mo-ka-Yêna.”—Psalme 145:1-3; Kutollo 20:7-10.

26. Ke ka baka la’ng o swanetše go hlahloba Lentšu la Modimo, Beibele?

²⁶ Bjale ka ge o šetše o bapišitše madumedi a magolo a lefase, re go laletša go hlahlobišiša ka mo go oketšegilego Lentšu la Modimo, e lego Beibele yeo ditumelo tša Dihlatse tša Jehofa di theilwego go yona. Iponele ka noši gore Modimo wa therešo a ka hwetšwa. Go sa šetšwe gore o mo-Hindu, mo-Moseleme, mo-Buddha, mo-Shinto, mo-Confucius, mo-Tao, mo-Juda, Mokriste goba wa tumelo lege e le efe e nngwe, bjale ke nako ya go hlahloba kwano ya gago le Modimo wa therešo le yo a phelago. Mohlomongwe o ile wa direlwa phetho ka bodumedi bja gago ke lefelo leo o belegetšwego go lona, e lego seo o se wa kgonago go se laola. Ka kgonthe, ga go na seo se lahlegago ka go hlahloba seo Beibele e se bolelago ka Modimo. Se e ka ba sebaka sa gago sa bophelo ka moka sa gore o tloge o tseba morero wa Morena yo a Phagamego Modimo bakeng sa lefase le batho ba lego godimo ga lona. Ee, go tsoma ga gago ka go botega Modimo wa therešo go ka kgotsofatšwa ka go ithuta Beibele le batseta ba Jehofa, e lego Dihlatse tša gagwe, bao ba go tlišeditšego puku ye.

27. (a) Ke taletšo efe yeo Jesu a e fetišetšago go wena? (b) Ka go dumelelana le sehlogo sa puku ye, ke’ng seo Jesaya a laleletšago o mongwe le o mongwe go se dira?

²⁷ E be e se ka lefela ge Jesu a be a bolela gore: “Kxopêlang; ké mo Le tl’o xo fiwa; Nyakang; ké mo Le tl’o xo bôna. Ôpaôpang; ké mo Le tl’o xo bulêlwa.” O ka ba gare ga bao ba ilego ba hwetša Modimo wa therešo ge e ba o ela hloko molaetša wa moporofeta Jesaya: “Nyakang Morêna è sa le lebaka la xo ka mmôna, Le mmitšeng à sa le kxaufsi. E mobe a a lahlê tsela y’axwe; motho yo kxôpô a lahlê dikêlêlô tš’axwe, a boêlê xo Morêna, a mo xauxêlê; a boêle xo Modimo wa rena, xobane ké wa tebalêlô e ntši.”—Mateo 7:7; Jesaya 55:6, 7.

28. Ke bomang bao ba ka go thušago go hwetša Modimo wa therešo?

²⁸ Ge e ba o tsoma Modimo wa therešo, ikwe o lokologile go ka ikopanya le Dihlatse tša Jehofa.c Ka ntle le tefo di tla thabela go go thuša gore o tsebe Tate ka mo go tseneletšego le thato ya gagwe ge go sa dutše go e-na le nako.—Tsefanya 2:3.

[Mongwalo wa tlase]

[Lepokisi/Seswantšho go letlakala 377]

Kamoo o ka Hlaolago Bodumedi bja Therešo ka Gona

1. Bodumedi bja therešo bo rapela Modimo a nnoši wa therešo, Jehofa.—Doiteronomio 6:4, 5; Psalme 146:5-10; Mateo 22:37, 38.

2. Bodumedi bja therešo bo nea tsela ya go ya go Modimo ka Kriste Jesu.—Johane 17:3, 6-8; 1 Timotheo 2:5, 6; 1 Johane 4:15.

3. Bodumedi bja therešo bo a ruta le go diriša lerato le e sego la boithati.—Johane 13:34, 35; 1 Ba-Korinthe 13:1-8; 1 Johane 3:10-12.

4. Bodumedi bja therešo bo dula bo sa šilafatšwa ke dipolitiki le diphapano tša lefase. Ga bo tšee lehlakore nakong ya ntwa.—Johane 18:36; Jakobo 1:27.

5. Bodumedi bja therešo bo dumelela Modimo gore e be wa therešo ka go amogela Beibele e le Lentšu la Modimo.—Ba-Roma 3:3, 4; 2 Timotheo 3:16, 17; 1 Ba-Thesalonika 2:13.

6. Bodumedi bja therešo ga bo hlohleletše ntwa goba bošoro bja batho.—Mika 4:2-4; Ba-Roma 12:17-21; Ba-Kolose 3:12-14.

7. Bodumedi bja therešo bo kopanya ka katlego batho ba morafo o mongwe le o mongwe, leleme le setšhaba. Ga bo rute botšhaba goba lehloyo, eupja bo ruta lerato.—Jesaya 2:2-4; Ba-Kolose 3:10, 11; Kutollo 7:9, 10.

8. Bodumedi bja therešo bo bolelela go direla Modimo, e sego bakeng sa mehola ya boithati goba tšhelete, eupja ka baka la lerato. Ga bo tumiše batho. Bo tumiša Modimo.—1 Petro 5:1-4; 1 Ba-Korinthe 9:18; Mateo 23:5-12.

9. Bodumedi bja therešo bo goeletša Mmušo wa Modimo e le kholofelo ya kgonthe ya motho, e sego filosofi ya dipolitiki goba ya tša leago.—Mareka 13:10; Ditiro 8:12; 28:23, 30, 31.

10. Bodumedi bja therešo bo ruta therešo mabapi le morero wa Modimo bakeng sa motho le lefase. Ga bo rute maaka a bodumedi a moya (soul) wo o sa hwego le tlhokofatšo ya ka mo go sa felego diheleng. Bo ruta gore Modimo ke lerato.—Baahlodi 16:30; Jesaya 45:12, 18; Mateo 5:5; 1 Johane 4:7-11; Kutollo 20:13, 14.

[Seswantšho]

Dihlatse ge di bolela kua Netherlands

[Diswantšho go letlakala 373]

Lefase le na le kgonagalo ya go ba paradeise—gore se se direge mmušo wa ka mo go sa felego wa go loka o a nyakega, gomme o holofeditšwe ke Modimo

[Seswantšho go letlakala 374]

Pele a boela legodimong, Jesu o ile a laela barutiwa ba gagwe gore ba bolele le go ruta ditaba tše di lokilego lefaseng ka moka

[Seswantšho go letlakala 379]

Tsogo ya bahu e tla tliša lethabo lapeng la motho lefaseng ka bophara