Kingdom News No. 36

Ngwaga-kete o Mofsa— Bokamoso bo go Swaretše Eng?

Ngwaga-kete o Mofsa—Na ke Mathomo a Mehla e Mefsa?

BOŠEGO-GARE ka December 31, 1999, ngwaga-kgolo wa bo-20 o ile wa fela.a E bile ngwaga-kgolo wo o bonego khuduego e kgolo. Eupša gape o bone le mathomo a thekinolotši e mpsha, tšwelopele e kgolo kudu ya tša kalafo, go tšwelela ka bontši ga ditaba le go ata mo go golago ka lebelo ga tša boiphedišo lefaseng ka moka. Ka gona, ngwaga-kete o mofsa o amogetšwe ke ba bantši e le seka sa kholofelo le phetogo. Na mohlomongwe o tla bona go fela ga ntwa, bodiidi, tšhilafatšo ya tikologo le go fela ga bolwetši?

Ba bantši ba holofela bjalo. Eupša go na le kgonagalo e kaaka’ng ya gore ngwaga-kete o mofsa o tla tšweletša diphetogo tšeo di tlago go go hola—diphetogo tšeo tlago go dira gore bophelo e be bjo bo bolokegilego le bjo bo šireletšegilego bakeng sa gago le lapa la gago? Ela hloko karolo ya mathata a magolo a sego kae ao re lebeletšanego le wona.

Tšhilafalo

Dinaga tša diintaseteri di “baka tshenyo ya tikologo tekanyong ya lefase ka moka le tšhilafalo yeo e apareditšego ka gohle le go šitišana le ditshepedišo tša go tlolana ga dilo le tikologo ya tšona.” Ge e ba mekgwa ya gona bjale e tšwela pele “tikologo ya tlhago e tla gateletšega ka mo go oketšegago.”—“Global Environment Outlook—2000,” United Nations Environment Programme.

Bolwetši

“Ka ngwaga wa 2020, go letetšwe gore malwetši ao a sa fetelego e be ona ao a bakago mahu a šupago go mahu a mangwe le a mangwe a lesome mafelong ao a sa hlabologago, ge go bapišwa le palo ya ka tlase ga seripa lehono.”—“The Global Burden of Disease,” Harvard University Press, 1996.

Ditsebi tše dingwe di bolela gore “ka 2010, batho ba fokotšegilego ka dimilione tše 66 [ba tla ba ba phela] dinageng tše 23 tšeo di nago le leuba le le šoro la [AIDS].”—“Confronting AIDS: Evidence From the Developing World,” a report of the European Commission and the World Bank.

Bodiidi

“Mo e ka bago batho ba dimilione tše dikete tše 1,3 ba phela ka tšhelete ya ka fase ga diranta tše tshela ka letšatši, gomme mo e ka bago ba milione o tee ga ba kgone go fihlelela dinyakwa tša motheo tša dijo.”—“Human Development Report 1999,” United Nations Development Programme.

Ntwa

“Bošoro [dinageng tše fapa-fapanego] bo ka fihlelela maemo a sa tlwaelegago. Bo tutuetšwa ke semorafo, botšhaba le [dikarogano tša] bodumedi . . . bošoro bjo bo bjalo bo tla baka . . . mohuta o tlwaelegilego kudu wa ntwa kotareng e latelago ya ngwaga-kgolo . . . , bo bolaya batho ba makgolo a dikete ngwaga o mongwe le o mongwe.”—“New World Coming: American Security in the 21st Century,” U.S. Commission on National Security/21st Century.

Ka gona go hlabja ga mekgoši le go hlalala ka baka la ngwaga-kete o mofsa go uta taba ya gore tšhilafalo, bolwetši, bodiidi le ntwa ke tšeo di tšweletšego ka bogolo bjo bogolo le go feta pele. Modung wa mathata a go na le megabaru, go se botane le boithati—mekgwa yeo e ka se kego ya fedišwa feela ka nyakišišo ya tša thutamahlale, thekinolotši goba dipolitiki.

Ngwaga-kete wo o Tlago go Šegofatša Batho

MONGWADI wa bogologolo o ile a ngwala gore: “Tsela ya motho ga e matleng a gagwe, gomme motho e a sepelago ga a tsebe go tsebiša dikgato tša gagwe mo a yago ntshe.” (Jeremia 10:23, Phetolelo ya Kgale) Motho ga a hloke feela bokgoni bja go buša lefase eupša gape ga a na tshwanelo ya go dira bjalo. Ke Modiri wa rena, Jehofa Modimo a nnoši yo a nago le tshwanelo le tsebo ya go rarolla mathata a batho.—Ba-Roma 11:33-36; Kutollo 4:11.

Eupša neng? Bjang? Bohlatse bja gore re kgaufsi le bofelo bja ‘mehla ya bofelo’ ke bjo bogolo kudu. Hle phetla Beibele ya gago gomme o bale 2 Timotheo 3:1-5. E hlalosa ka mo go kwagalago dika tša dimelo tšeo batho ba tlago go di bontšha “mehleng [ye] e hlobaetšago.” (New World Translation) Mateo 24:3-14 le Luka 21:10, 11 le tšona di hlalosa ‘mehla ya bofelo.’ Moo tlhokomelo e lebišitšwe go ditiragalo tša kgonthe tšeo di diragetšego ga e sa le go tloga ka 1914, tše bjalo ka ntwa ya lefase ka moka, mauba a malwetši le go ata ga go hlokega ga dijo.

Kgaufsinyane ‘mehla ya bofelo’ e tla fela. Daniele 2:44 e re: ‘Modimo o tlo tsoša mmušo wo o ka se kego wa šwalalanywa neng le neng . . . O tlo pšhatla mebušo e mengwe ka moka [ya lefase] wa e fediša, ge e le wona, o tlo ema go ya go ile.’ Ka tsela yeo go ile gwa bolelwa e sa le pele gore Modimo o tlo hloma Mmušo goba pušo bakeng sa gore a buše lefase. Go ya ka Kutollo 20:4, pušo ye e tlo buša nywaga e sekete! Ela hloko tše dingwe tša ditsela tše sego kae tšeo ka tšona maemo a bophelo a tlago go kaonefala bakeng sa batho ka moka nakong ya Ngwaga-kete wo wa letago:

Tša Boiphedišo. “Nywakô ye ba e axaxo ba tlo dula xo yôna; dirapa tša merara, ba tlo lema ba ja kenyô tša tšôna. Ba ka se kê ba axa, xwa dula o šele; ba ka se kê ba lema xwa ja o šele.”—Jesaya 65:21, 22.

Tša Maphelo. “Ké mo xo tl’o xo budollwa mahlô a difofu, xwa thibollwa ’tsêbê tša difoa. Ké mo dixôlê di tl’o xo taboxa bo-ka thsêpê, xwa tlo hlalala ’leme la semuma.” “Mo xo ba ba axilexo fá xo ka se bê le e a rexo: Ke a babya!”—Jesaya 33:24; 35:5, 6.

Tikologo. Modimo o tla “senya basenya-lefase.”—Kutollo 11:18.

Ditswalano tša Batho. “Xo ka se hlwê xo dirwa dibe, xo ka se hlwê xo senywa mo xo fela dithabeng tše kxêthwa tša-ka, xobane xo tseba Morêna xo tlo tlala ’fase lohle.”—Jesaya 11:9.

Ba dimilione ba dumela dikholofetšong tše tša Beibele gomme ka go rialo ba ile ba hwetša pono e nago le kholofelo le e tsepamego ka bokamoso. Ka baka leo, ba kgona go lebeletšana kaone le dikgateletšo tša bophelo le mathata. Beibele e ka ba bjang matla a hlahlago bophelong bja gago?

Tsebo e Išago Bophelong!

THUTAMAHLALE le thekinolotši ka dinako tše dingwe e ka ba tšeo di kgahlišago kudu! Lega go le bjalo, tsebo ya motho ga se ya dira gore bophelo e be bjo bo bolokegilego le bjo bo thabišago bakeng sa batho ba bantši. Tsebo e nnoši yeo e ka phethago se e hlalositšwe ka Beibeleng go Johane 17:3, yeo e rego: “Bophelô byo bo sa felexo ké xe ba Xo tseba, Wene Modimo-dimo Ò le nnoši. Ba tsebê le Moromiwa wa xaxo Jesu Kriste.”

Tsebo e bjalo e hwetšagala matlakaleng a Beibele. Gaešita le ge ba bantši ba bolela dikgopolo tše matla mabapi le puku yeo e kgethwa, ke ba sego kae bao ba kilego ba e hlahloba bona ka bobona. Go thwe’ng ka wena? Ke therešo, go bala Beibele go nyaka boiteko bjo bogolo. Eupša seo se swanelwa ke boiteko. Beibele ke puku e nnoši yeo e ‘buduletšwego ke Modimo, le e holago ka go ruta, go sola, go lokiša dilo le go laya ka go loka.’—2 Timotheo 3:16, NW.

Ka gona, o ka thoma bjang go itlwaelanya le Beibele? Ke ka baka la’ng o sa amogele thušo ya Dihlatse tša Jehofa? Di nea batho ba dimilione thuto magaeng a bona ka noši ka ntle le tefo. Bakeng sa go go thuša tabeng ye, di diriša dikgatišo tše fapa-fapanego tšeo di theilwego Beibeleng, tše bjalo ka poroutšha ya Ke Eng Seo Modimo a se Nyakago go Rena? E nea dikarabo tše kopana dipotšišong tše dintši tšeo o ka bago le tšona mabapi le Beibele, tše bjalo ka: Modimo ke Mang? Morero wa Modimo ka lefase ke ofe? Mmušo wa Modimo ke eng? Beibele e ka kaonefatša bjang bophelo bja lapa la gago?

Ge e ba o tla rata gore yo mongwe wa Dihlatse tša Jehofa a go etele lapeng la gago, hle tlatša setlankana se se lego ka mo tlase. Ba tla thabela go go nea tsebišo e oketšegilego ka Pušo ya Nywaga e Sekete ya letago ya Mmušo wa Modimo!

□ Ke tla rata go amogela poroutšha ya Ke Eng Seo Modimo a se Nyakago go Rena?

Bontšha leleme leo o le ratago

□ Hle ikgokaganyeng le nna mabapi le thuto e sa lefelelwego ya legae ya Beibele

[Mongwalo wa ka tlase]