Go Hlagolela Kgahlego Yeo e Tutueleditšwego ke Kingdom News No. 36
1 Na o feditše go aba sesola sa gago sa pampišana ya Kingdom News No. 36? E botšiša potšišo yeo e lego nakong yeo bohle ba swanetšego go naganišiša ka yona: “Ngwaga-kete o Mofsa—Bokamoso bo go Swaretše Eng?” Ge ngwaga wa 2000 o be o dutše o batamela, ditebelelo tša seo ngwaga-kete o mofsa o bego o tla se tliša e be e le tše fapanego kudu. Kingdom News No. 36 e ela hloko tše dingwe tša ditebelelo tšeo le go re gopotša gore maemo a lefase ga a nee motheo bakeng sa kholofelo. Ngwaga-kete feela wo o tla tlišago khutšo le polokego yeo batho ba bantši ba e nyakago ke Pušo ya Nywaga e Sekete ya Kriste Jesu. Kholofelo ya rena ka go ba ga kgonthe ga Mmušo wa gagwe e re tutueleditše go aba Kingdom News No. 36 go bohle bao re ka kgonago go ba fihlelela.
2 Dikarabelo go Kingdom News: Kabo ya nakong e fetilego ya Kingdom News e ipontšhitše e le kgothatšo e botse go rena modirong wa rena. Lekala la Canada le ngwadile mabapi le Kingdom News No. 35 gore: “Lesolo le le kgethegilego le be le thekgilwe ka mafolofolo ke bagoeledi le babulamadibogo tšhemong, e bile go ile gwa thabelwa le diphihlelo tše dintši tše kgothatšago.” Ka ntle le pelaelo o bontšhitše mafolofolo a swanago kabong ya Kingdom News No. 36.
3 Lesolo la gona bjale la Kingdom News le rulaganyeditšwe gore le fele ka November 17, 2000. Na tšhemo ka moka yeo e abetšwego phuthego ya lena e akareditšwe ka moka? Ge e ba go se bjalo, bagolo ba ka le kgopela go tšwetša pele lesolo go fihla mafelelong a November.
4 Go fihla gona bjale karabelo e bile efe lefelong la geno kabong ya Kingdom News No. 36? Batho ba sego kae ba tla tlatša setlankana ba kgopela kopi ya Seo Modimo a se Nyakago le/goba thuto ya legae ya Beibele. Lega go le bjalo, bontši bja bao ba bontšhago kgahlego tabeng ya ngwaga-kete ga se gantši ba ka tšeago mogato go ba go fihla ge o mongwe wa Dihlatse tša Jehofa a boela. Bohle bao ba bontšhitšego kgahlego ba swanetše go etelwa gape. Nako e botse ya go dira se e tla ba neng? Go boela go swanetše go dirwa ka pela ka mo go ka kgonegago.
5 Ela hloko diphihlelo tše tšeo di bilego gona ka morago ga go boela mo go sepedišitšwego Kingdom News No. 35. Mmulamadibogo kua Ireland o ile a tlogelela mong wa lebenkele la go jela Kingdom News. Mosadi o be a kgahlilwe ke molaetša gomme a laletša kgaetšedi gore a boe gape. Kgaetšedi o ile a boela ka morago ga matšatši a mabedi, gomme go ile gwa thongwa thuto ya Beibele. Kua Denmark, go ile gwa tlogelwa kopi ya Kingdom News ntlong yeo go bego go se na motho go yona. Letšatšing lona leo mosadi yo a bego a dula moo o ile a romela setlankana ofising ya lekala, yeo e ilego ya se fetišetša phuthegong ya lefelong leo. Pele beke e fela, dikgaetšedi tše pedi di ile tša etela, gwa rulaganywa thuto, gomme mosadi a ba gona dibokeng tša gagwe tša mathomo Holong ya Mmušo!
6 Seo o Swanetšego go se Bolela ge o Boela: Go dira maeto a go boela mo re sepedišitšego Kingdom News go tloga go le bonolo gomme ke karolo e thabelwago bakeng sa bodiredi bja rena. Ge o dira bjalo e tla ba gabohlale gore o tšee kopi ya Kingdom News No. 36 ge o e-ya, ka ge mong wa ntlo mohlomongwe a ka ba a se na kopi ya gagwe. O ka leka ditšhišinyo tše.
7 Ka morago ga ge o gopoditše mong wa ntlo gore o mang, o ka re:
◼ “Ke tlogetše pampišana yeo e nago le sehlogo se se rego ‘Ngwaga-kete o Mofsa—Bokamoso bo go Swaretše Eng?’ Na e be e se mo go kgothatšago go bala gore kgaufsinyane Pušo ya Nywaga e Sekete ya Kriste Jesu e tla thoma, e tliše maemo a Paradeise lefaseng? [Bontšha diswantšho tša Paradeise go Kingdom News No. 36.] Ka letlakaleng la ka morago, o laletšwa go kgopela kopi ya poroutšha ya Ke Eng Seo Modimo a se Nyakago go Rena?” Bontšha poroutšha, phetla go thuto 5, bala potšišo ya mathomo le dirapa 1 le 2, gomme o kgopele mong wa ntlo gore a hlalose. Bala le go hlalosa lengwalo goba a mabedi. Ge e ba go kgonega, ela hloko potšišo e nngwe le serapa, gomme o rulaganye go boa gomme o tšwetše poledišano pele.
8 Ka ge mpho ya leeto la go boela bakeng sa November e tla ba poroutšha ya “Seo Modimo a se Nyakago” goba puku ya “Tsebo”, o ka re:
◼ “Nakong ya ge ke be ke go etetše morago bjale, ke tlogetše kopi ya ‘Ngwaga-kete o Mofsa—Bokamoso bo go Swaretše Eng?’ E na le mpho ya thuto ya legae ya Beibele e sa lefelelwego. Ke boile go tlo go bontšha thušo ya go ithuta yeo re e dirišago. [Bontšha poroutšha ya Seo Modimo a se Nyakago, gomme o phetle letlakaleng la ka morago; goba bontšha puku ya Tsebo, o phetle go matlakala 188-9.] Ngwaga-kete wo go bolelwago ka wona ka Beibeleng o tla tliša maemo a swanago le ao o a bonago seswantšhong se. Bakeng sa go swanelega go phela Paradeiseng, re swanetše go hwetša tsebo e nepagetšego ya Modimo. Hle ntumelele ke go bontšhe ka boripana kamoo re ithutago Beibele ka gona.”
9 Kabo ya Kingdom News No. 36 e re tutueleditše go matlafatša go tšea karolo ga rena bodireding, re tšweletša bohlatse bjo bobotse. Mohlomongwe se se tutueditše kgahlego ya batho ba bantši tšhemong. Ka thušo ya Jehofa, boiteko bja rena bjo bo kopanetšwego bja go hlagolela kgahlego ye bo tla feleletša ka lethabo la gore re hwetše bao ba swanago le dinku.—Mat. 10:11; Dit. 13:48, 49, 52.