Tsela E Nnoši E Išago Bophelong Bjo Bo Sa Felego
“Tsela ké Nna, le therešô, le bophelô.”—JOHANE 14:6.
1, 2. Jesu o ile a bapiša tsela e išago bophelong bjo bo sa felego le eng, gomme ke eng seo se bolelwago ke seswantšho sa gagwe?
THUTONG ya gagwe e tumilego ya Thabeng, Jesu o bapiša tsela e išago bophelong bjo bo sa felego le tsela yeo motho a tsenago go yona ka kgoro. Ela hloko gore Jesu o gatelela gore tsela ye yeo e išago bophelong ga se e bonolo, ge a re: “Tsênang ka kxôrô e pitlaxanexo; xobane kxôrô e išaxo tahlexong ké pêtlêkê, le tsela ye e yaxo xôna e phatlaletše; ’me ba ba tsênaxo ka yôna ké ba bantši. Xobane kxôrô e išaxo bophelong [bjo bo sa felego] e pitlaxane; le tsela ye e yaxo xôna ké e thsêsê; ’me ba ba e bônaxo xa ba nene.”—Mateo 7:13, 14.
2 Na o kwešiša seo se bolelwago ke seswantšho se? Na ga se utolle gore go na le tsela e tee feela yeo e išago bophelong le gore go tla nyakega gore re be šedi gore re pheme go aroga tseleng yeo e išago bophelong? Ka gona-ge, tsela ye e nnoši yeo e išago bophelong bjo bo sa felego ke efe?
Karolo ya Jesu Kriste
3, 4. (a) Beibele e bontšha bjang karolo ya Jesu e bohlokwa phološong ya rena? (b) Modimo o ile a utolla neng la pele gore batho ba be ba ka hwetša bophelo bjo bo sa felego?
3 Ka mo go kwagalago, Jesu o na le karolo e bohlokwa e tswalanago le tsela yeo, go etša ge moapostola wa gagwe Petro a boletše gore: “Xa xo phološô xo e mongwê; le xôna ka tlase xa lexodimo xa xo Leina le lengwê [ka ntle le la Jesu] le batho ba le neilwexo, le re kaxo phološwa ka lona.” (Ditiro 4:12) Ka mo go swanago, moapostola Paulo o boletše gore: “Neô ya kxauxêlô ya Modimo ké bophelô byo bo sa felexo ka Jesu Kriste Mong ’a rena.” (Ba-Roma 6:23) Jesu ka boyena o utolotše gore tsela e nnoši e išago bophelong bjo bo sa felego ke ka yena, ka gobane o boletše gore: “Tsela ké Nna, le therešô, le bophelô.”—Johane 14:6.
4 Ka gona, go bohlokwa gore re amogele karolo yeo Jesu a nago le yona go direng gore bophelo bjo bo sa felego bo kgonege. Ka gona, anke re hlahlobeng karolo ya gagwe ka kelohloko. Na o tseba gore ke neng, ka morago ga ge Adama a dirile sebe, mo Jehofa Modimo a ilego a tsebatša gore batho ba ka thabela bophelo bjo bo sa felego? E bile gatee-tee ka morago ga ge Adama a dirile sebe. Bjale anke re hlahlobeng kamoo tokišetšo ya Jesu Kriste e le Mophološi wa batho e ilego ya bolelwa e sa le pele ka gona.
Peu e Holofeditšwego
5. Re ka hlaola bjang noga yeo e gokeditšego Efa?
5 Jehofa Modimo o ile a hlaola Mophološi yo a holofeditšwego ka polelo ya seswantšhetšo. O dirile se ge a be a bolela kahlolo godimo ga “noxa” yeo e ilego ya bolela le Efa gomme ya mo leka gore a se kwe Modimo ka go ja seenywa se se ileditšwego. (Genesi 3:1-5) Ke therešo gore noga yeo e be e se noga ya kgonthe. E be e le sebopiwa se matla sa moya seo se hlaolwago ka Beibeleng e le “noga ya kgale, yeo e bitšwago Diabolo le Sathane.” (Kutollo 12:9, PK) Sathane o ile a diriša phoofolo ye ya tlasana e le seboleledi sa gagwe bakeng sa go goketša Efa. Ka gona ge a ahlolela Sathane, Modimo o ile a re go yena: “Ke bea lehlôyô xare xa xaxo le mosadi, le xare xa peu ya xaxo le peu ya xaxwe. Yôna [peu ya mosadi] e tlo Xo phšatla hlôxô; ’me wêna O tlo e loma serêthê.”—Genesi 3:15.
6, 7. (a) Mosadi yo a belegago “peu” ke mang? (b) Peu e holofeditšwego ke mang gomme ke eng seo a se phethago?
6 “Mosadi” yo yo Sathane e lego lenaba la gagwe goba a mo hloilego ke mang? Go fo swana le ge “noga ya kgale” e hlaolwa go Kutollo kgaolo 12, le mosadi yo yo Sathane a mo hloilego o hlaolwa gona. Ela hloko go temana ya pele gore go bolelwa ka yena e le yo a ‘kgabišitšwego ka letšatši, a eme kgweding gomme a rwele dinaledi tše lesome le metšo e mebedi hlogong ya gagwe.’ Mosadi yo o emela mokgatlo wa Modimo wa legodimong wa barongwa ba botegago, gomme “ngwana wa mošemane” yo a mmelegago o emela Mmušo wa Modimo woo Jesu Kriste a bušago e le Kgoši go wona.—Kutollo 12:1-5, The Jerusalem Bible.
7 Ka gona, ke mang yo e lego “peu” goba ngwana wa mosadi yo go bolelwago ka yena go Genesi 3:15 yo a tlago go pšhatla Sathane “hlôxô,” ka go rialo a mmolaya? Ke yo Modimo a mo rometšego a e-tšwa legodimong gore a belegwe ka mohlolo ke kgarebe, ee, motho yo e lego Jesu. (Mateo 1:18-23; Johane 6:38) Kgaolo ya 12 ya Kutollo e utolla gore bjalo ka Mmuši yo a tsošitšwego wa legodimong, Peu ye, yeo e lego Jesu Kriste, e tla etelela pele go fenyweng ga Sathane le go thea, bjalo ka ge Kutollo 12:10 e bolela, “boxoši bya Modimo wa rena, le xo kxôna xa Motlotšwa wa xaxwe.”
8. (a) Ke selo sefe se sefsa seo Modimo a ilego a se nea mabapi le morero wa gagwe wa mathomong? (b) Ke bomang bao ba bopago mmušo o mofsa wa Modimo?
8 Ka gona Mmušo wo ka diatleng tša Jesu Kriste ke selo se sefsa seo Modimo a se neilego mabapi le morero wa gagwe wa mathomong bakeng sa gore batho ba thabele bophelo bjo bo sa felego lefaseng. Ka morago ga go rabela ga Sathane, Jehofa kapejana o ile a gata mogato wa go dirolla ditla-morago ka moka tše mpe tša bokgopo ka go diriša pušo ye e mpsha ya Mmušo. Ge Jesu a be a le lefaseng, o ile a utolla gore o be a ka se be noši mmušong wo. (Luka 22:28-30) Go be go tla kgethwa ba bangwe gare ga batho, gomme ba ba be ba tla mo tlatša legodimong bakeng sa go ba le karolo go bušeng, gomme ka go rialo ba be ba tla bopa karolo ya bobedi ya peu ya mosadi. (Ba-Galatia 3:16, 29) Ka Beibeleng palo ya ba bao e lego babuši-gotee le Jesu—bao ka moka ba tšerwego go tšwa go batho ba nago le sebe ba lefaseng—e newa e le 144 000.—Kutollo 14:1-3.
9. (a) Ke ka baka la’ng Jesu a ile a swanelwa ke go tšwelela lefaseng e le motho? (b) Jesu o ile a dirolla mediro ya Diabolo bjang?
9 Lega go le bjalo, pele ga ge Mmušo woo o be o ka thoma go buša, go be go le bohlokwa gore karolo e kgolo ya Peu, e lego Jesu Kriste, e tšwelele lefaseng. Ka baka la’ng? Ka gobane o kgethilwe ke Jehofa Modimo e le Yena yo ‘a tlago go fediša [goba, go dirolla] mediro ya Diabolo.’ (1 Johane 3:8) Mediro ya Sathane e be e akaretša go gokeletša ga gagwe Adama sebeng, e lego seo se tlišitšego kotlo ya sebe le lehu godimo ga bana ba Adama ka moka. (Ba-Roma 5:12) Jesu o ile a dirolla modiro wo wa Diabolo ka go gafa bophelo bja Gagwe e le topollo. Ka go rialo o neile motheo wa go lokollwa ga batho kotlong ya sebe le lehu gomme a bula tsela e išago bophelong bjo bo sa felego.—Mateo 20:28; Ba-Roma 3:24; Ba-Efeso 1:7.
Seo Topollo e se Phethago
10. Jesu le Adama ba be ba swana bjang?
10 Ka ge bophelo bja Jesu bo ile bja fetišetšwa ka popelong ya mosadi go tšwa legodimong, o ile a belegwa e le motho yo a phethagetšego, yo a sego a šilafatšwa ke sebe se se tšwago go Adama. O be a ka kgona go phela ka mo go sa felego lefaseng. Ka mo go swanago, Adama o be a bopilwe e le motho yo a phethagetšego yo a bego a e-na le ditebelelo tša go thabela bophelo bjo bo sa felego lefaseng. Moapostola Paulo o be a nagana ka go swana ga banna ba ba babedi ge a be a ngwala gore: “Motho wa pele, Adama, a napa a ba môya o phelaxo, le Adama wa mafêlêlô [Jesu Kriste] Yêna ké môya wo o phedišaxo. Motho wa pele ó tšwa mmung; motho wa bobedi o tšwa lexodimong.”—1 Ba-Korinthe 15:45, 47.
11. (a) Ke mafelelo afe ao Adama le Jesu ba ilego ba ba le wona bathong? (b) Re swanetše go lebelela sehlabelo sa Jesu bjang?
11 Go swana ga banna ba ba babedi—e lego banna ba babedi feela ba ba phethagetšego bao ba kilego ba phela mo lefaseng—go gatelelwa ke polelo ya Beibele ya gore Jesu ‘o ikgafile ya ba selefa [“se se lekanego,” NW] sa go lefela bohle.’ (1 Timotheo 2:6) Jesu o be a lekana le mang? Ee, o be a lekana le Adama ge e be e sa le motho yo a phethagetšego! Sebe sa Adama wa pele se ile sa feleletša ka go otlwa ga lapa ka moka la motho ka lehu. Sehlabelo sa “Adama wa mafêlêlô” se nea motheo wa go phološwa sebeng le lehung, e le gore re ka phela ka mo go sa felego. Sehlabelo sa Jesu se bohlokwa gakaakang! Moapostola Petro o ile a bolela gore: “Xa La ka la hunollwa ka tše di fêlêlaxo bo-ka xauta le silifêra.” Go e na le moo, Petro o ile a hlalosa gore: “Le hunolotšwe ka madi a thêkô e kxolo a Kriste, a Yêna Kwana e se naxo senyalô le bosodi.”—1 Petro 1:18, 19.
12. Beibele e hlalosa bjang go dirollwa ga go ahlolelwa ga rena lehu?
12 Beibele e hlalosa ka mo go kgahlišago tsela yeo go ahlolelwa lehu ga lapa la motho go tlago go dirollwa ka gona, ge e re: “Batho ka moka ba išitšwe tahlexong ka karoxô ya motho o tee [ya Adama], byale batho ka moka ba tletšwe ke tokafalô e išaxo bophelong ka Yêna o tee [ka tsela ka moka ya Jesu ya potego, yeo e feleleditšego ka lehu la gagwe]. Xe ba bantši ba tlile ba ba badira-dibe ka xo se kwe xa motho [o] tee [Adama], byalo xo kwa xa Yêna o tee [Jesu] xo dira ba bantši baloki.”—Ba-Roma 5:18, 19.
Tebelelo ya Letago
13. Ke ka baka la’ng ba bantši ba ikwa ka tsela yeo ba ikwago ka yona mabapi le go phela ka mo go sa felego?
13 Tokišetšo ye yeo e dirilwego ke Modimo e swanetše go re thabiša gakaakang! Na ga o thabele gore go neilwe Mophološi? Ge ba be ba botšišwa gore, “Na tebelelo ya go phela ka mo go sa felego e a ipiletša go wena?” nyakišišong yeo e bego e dirwa ke ba kuranta motseng o mongwe o mogolo wa Amerika, palo e makatšago ya 67,4 lekgolong ya bao ba ilego ba arabela e arabile ka gore, “Aowa.” Ke ka baka la’ng ba itše ga ba rate go phela ka mo go sa felego? Go molaleng gore ke ka gobane bophelo lefaseng lehono bo sepedišana le mathata a mantši kudu. Motho yo mongwe o itše: “Ga ke rate kgopolo ya go bonala ke e-na le nywaga e 200.”
14. Ke ka baka la’ng go phela ka mo go sa felego e tla ba lethabo le le tletšego?
14 Lega go le bjalo, Beibele ga e bolele ka go phela ka mo go sa felego lefaseng leo go lona batho ba tlaišwago ke bolwetši, botšofadi le manyami a mangwe. Aowa, ka gobane bjalo ka Mmuši wa Mmušo wa Modimo, Jesu o tla dirolla mathata ka moka a bjalo ao a bakilwego ke Sathane. Go ya ka Beibele, Mmušo wa Modimo ‘o tlo pšhatla wa fediša mebušo ka moka’ e gatelelago ya lefase le. (Daniele 2:44) Ka nako yeo, e le go arabela thapelong yeo Jesu a e rutilego balatedi ba gagwe, “thatô” ya Modimo e tla “[dirwa] mono lefaseng byalo ka xe e dirwa lexodimong.” (Mateo 6:9, 10) Lefaseng le lefsa la Modimo, ka morago ga ge bobe ka moka bo hlwekišitšwe lefaseng, mehola ya topollo ya Jesu e tla dirišwa ka botlalo. Ee, bohle bao ba swanelegago ba tla bušetšwa bophelong bjo bobotse bjo bo phethagetšego!
15, 16. Ke maemo afe ao a tlago go ba gona lefaseng le lefsa la Modimo?
15 Mantšu a temana ye ya Beibele a tla šoma go batho bao ba phelago lefaseng la Modimo le lefsa: “Ya ba xôna nama y’axwe e tl’o xo boêla, ya mphsafala, a tlo etša mola à sa le yo mofsa.” (Jobo 33:25) Kholofetšo e nngwe ya Beibele le yona e tla phethagala: “Ké mo xo tl’o xo budollwa mahlô a difofu, xwa thibollwa ’tsêbê tša difoa. Ké mo dixôlê di tl’o xo taboxa bo-ka thsêpê, xwa tlo hlalala ’leme la semuma.”—Jesaya 35:5, 6.
16 Nagana feela: Go sa šetšwe nywaga ya rena ya kgonthe ka nako yeo, re ka ba re e-na le nywaga e 80, e 800 goba gaešita le go feta moo mebele ya rena e tla dula e le e phetšego gabotse kudu. Go tla ba bjalo ka ge Beibele e holofetša: “Mo xo ba ba axilexo fá xo ka se bê le e a rexo: Ke a babya!” Ka nako yeo kholofetšo ye le yona e tla phethagatšwa: “Modimo ó tlo phomola mexôkxô ka moka mahlong a bôná; le lehu le ka se hlwê le e-ba xôna; le xe e le manyami le dillô le bohloko, di ka se hlwê di e-ba xôna; xobane tša pele di fetile.”—Jesaya 33:24; Kutollo 21:3, 4.
17. Ke dilo dife tšeo re ka letelago gore di ka fihlelelwa lefaseng le lefsa la Modimo?
17 Lefaseng leo le lefsa, re tla kgona go diriša bjoko bja rena bjo bo kgahlišago ka tsela yeo Mmopi wa rena a bego a e rerile ge a be a bo hlama bo e-na le bokgoni bjo bo sa lekanyetšwago bja go ithuta. Ee, anke o nagane feela ka dilo tše di kgahlišago tšeo re ka di dirago! Gaešita le batho ba sa phethagalago ba tšweleditše go tšwa polokelong ya ditlabakelo tša lefase, selo se sengwe le se sengwe seo re se bonago go re dikologa—di-cellular phone, dimaekrofoune, dišupanako, di-pager, di-computer, difofane, ee, o ka di bala. Ga go le se tee sa tšona seo se dirilwego ka dilo tšeo ba di tšerego lefelong la kgole legohleng. Re e-na le tebelelo ya bophelo bjo bo sa felego lefaseng le le tlago la Paradeise ka pele ga rena, bokgoni bja go kgona go hlama dilo e tla ba bjo bo sa lekanyetšwago!—Jesaya 65:21-25.
18. Ke ka baka la’ng bophelo e ka se be bjo bo lešago bodutu le ka mohla lefaseng le lefsa la Modimo?
18 Le gona bophelo e ka se be bjo bo lešago bodutu. Gaešita le gona bjale re lebelela pele dijong tša rena tše di latelago, gaešita le ge re ka ba re ile ra ja tše masome a dikete tša tšona. Phethegong ya motho, re tla thabela ka tekanyo e kgolo kudu ditšweletšwa tše bose tša lefase la Paradeise. (Jesaya 25:6) Le gona, re tla ba le boipshino bja ka mo go sa felego bja go hlokomela diphoofolo tše dintši-ntši tša lefase le go bogela go sobela ga letšatši mo go kgahlišago, dithaba, dinoka le meedi. Ka kgonthe bophelo e ka se be bjo bo tenago lefaseng le lefsa la Modimo!—Psalme 145:16.
Go Fihlelela Tšeo Modimo a di Nyakago
19. Ke ka baka la’ng e le mo go kwagalago go dumela gore go na le dinyakwa tšeo di swanetšego go fihlelelwa bakeng sa go amogela mpho ya Modimo ya bophelo?
19 Na o ka letela go hwetša mpho ya Modimo e bohlokwa ya bophelo bjo bo sa felego Paradeiseng ka ntle le gore o dire boiteko le ge e le bofe? Na ga se mo go kwagalago gore Modimo o be a tla nyaka se itšego? Ka kgonthe ke mo go kwagalago. Ge e le gabotse, Modimo ga a fo re fošetša mpho. O e bea ka pele ga rena, eupša re swanetše go obelela gomme re e tšee. Ee, go nyakega boiteko. O ka botšiša yona potšišo yeo lesogana la mohumi le ilego la e botšiša Jesu: “Se se botse se nkaxo se dira ké eng, xore ke bê le bophelô byo bo sa felexo?” Goba mo gongwe o ka botšiša potšišo ka tsela yeo mohlapetši wa kgolego wa Filipi a ilego a e botšiša moapostola Paulo ka gona: “E ka kxôna ke dirê bya’ng xore ke phološwê?”—Mateo 19:16; Ditiro 16:30.
20. Senyakwa sa bohlokwa bakeng sa bophelo bjo bo sa felego ke eng?
20 Bošegong bja pele ga lehu la gagwe, Jesu o boletše senyakwa sa motheo ge a be a rapela Tatagwe wa legodimong ka gore: “Bophelô byo bo sa felexo ké xe ba Xo tseba, Wene Modimo-dimo Ò le nnoši. Ba tsebê le Moromiwa wa xaxo Jesu Kriste.” (Johane 17:3) Na ga se senyakwa se se kwagalago gore re monye tsebo ka Jehofa, yo a dirilego gore bophelo bjo bo sa felego bo kgonege le ka go monya tsebo ka yo a re hwetšego, e lego Jesu Kriste? Lega go le bjalo, go nyakega mo gontši go feta go fo monya tsebo e bjalo.
21. Re bontšha bjang gore re fihlelela senyakwa sa go bontšha tumelo?
21 Beibele gape e re: “E a dumêlaxo Morwa, ó na le bophelô byo bo sa felexo.” Ke moka e oketša ka gore: “E a sa mo dumelexo, a ka se kê a bá a bo bôna; se se tl’o xo dula sè mo okametše ké boxale bya Modimo.” (Johane 3:36) O ka bontšha gore o dumela go Morwa ka go dira diphetogo bophelong bja gago le ka go bo dumelelanya le thato ya Modimo. O swanetše go gana tsela le ge e le efe e fošagetšego yeo mo gongwe o ka bago o be o e latela, ke moka o gate mogato bakeng sa go dira seo se kgahlišago Modimo. O swanetše go dira seo moapostola Petro a se laetšego: “Ké xôna ithsoleng-xê, Le sokoloxê, xore Le phomolwê dibe tša lena. Xore xo tlê mabaka a tapoloxô e tšwaxo xo Morêna.”—Ditiro 3:19, 20.
22. Ke megato efe e akaretšwago go lateleng mehlala ya Jesu?
22 Eka le ka mohla re ka se ke ra lebala gore ke feela ka go bontšha tumelo go Jesu moo re ka kgonago go thabela bophelo bjo bo sa felego. (Johane 6:40; 14:6) Re bontšha gore re bontšha tumelo go Jesu ka go ‘latela mehlala ya gagwe kgaufsi.’ (1 Petro 2:21, bapiša le NW.) Ke eng seo se akaretšwago go direng seo? Ee, ge a rapela Modimo, Jesu o ile a re: “Ké Nna é, ke a tla, Modimo; ke dira tše di Xo kxahlaxo.” (Ba-Hebere 10:7) Go bohlokwa gore o ekiše Jesu ka go dumela go dira thato ya Modimo gomme o neele bophelo bja gago go Jehofa. Ka morago ga moo, o swanetše go bontšha boineelo bjoo ka kolobetšo ya meetseng; Jesu le yena o ile a itliša gore a kolobetšwe. (Luka 3:21, 22) Go tšea megato e bjalo ke mo go kwagalago ka mo go feletšego. Moapostola Paulo o ile a bolela gore “re xapeletšwa ke leratô la Kriste.” (2 Ba-Korinthe 5:14, 15) Ka tsela efe? Ee, lerato le ile la tutuetša Jesu gore a nee bophelo bja gagwe legatong la rena. Na seo ga se sa swanela go re gapeletša gore re arabele ka go bontšha tumelo go yena? Ee, le swanetše go re gapeletša gore re latele mohlala wa gagwe o lerato wa go ineela bakeng sa go thuša ba bangwe. Kriste o ile a phelela go dira thato ya Modimo; re swanetše go dira ka mo go swanago gomme re se ke ra hlwa re sa iphelela.
23. (a) Bao ba hwetšago bophelo ba swanetše go amogelwa go eng? (b) Ke eng seo se nyakegago go bao ba lego ka phuthegong ya Bokriste?
23 Seo ga se mafelelo a ditaba. Beibele e bolela gore ge ba 3 000 ba be ba kolobetšwa ka Pentekoste ya 33 C.E., ba ile ba “amoxêlwa.” Ba amogelwa go eng? Luka o hlalosa ka gore: “Ba dula è le ba xo rutwa ke baapostola, ba dula è le ba xo kwana, ba xo ngwatha senkxwa bà le dithapelong.” (Ditiro 2:41, 42) Ee, ba be ba bokana gotee bakeng sa thuto ya Beibele le bogwera gomme ka go rialo ba ile ba amogelwa phuthegong goba ba ba karolo ya phuthego ya Bokriste. Bakriste ba pele ba be ba e-ba gona dibokeng ka mehla bakeng sa thuto ya dilo tša moya. (Ba-Hebere 10:25) Dihlatse tša Jehofa lehono le tšona di dira bjalo, gomme di rata go go kgothaletša gore o be gona dibokeng tše gotee le tšona.
24. “Bophelô bya ruri” ke bofe gomme bo tla bonwa bjang gona neng?
24 Ba dimilione gona bjale ba latela tsela e pitlaganego e išago bophelong. Go dula mo tseleng ye e pitlaganego go tloga go nyaka maiteko e le ka kgonthe! (Mateo 7:13, 14) Paulo o ile a bontšha se kgopelong ya gagwe e borutho: “Hlabana thlabanô e botse ya tumêlô, O thopê bophelô byo bo sa felexo, byo O bileditšwexo byôna.” Go lwa ntwa ye go a nyakega gore re “fihlêlê byo e lexo bophelô bya ruri.” (1 Timotheo 6:12, 19) Bophelo bjoo ga se bophelo bjo bja mahlaba le mahloko le go tlaišega, tšeo re di tlišeditšwego ke sebe sa Adama. Go e na le moo, ke bophelo lefaseng le lefsa la Modimo, bjo bo tlago go fihlelelwa go se go ye kae ge sehlabelo sa Kriste sa topollo se tla be se dirišwa bakeng sa barati ka moka ba Jehofa Modimo le Morwa wa gagwe ka morago ga ge tshepedišo ye ya dilo e tlošitšwe. Eka ka moka ga rena re ka kgetha bophelo—“bophelô bya ruri”—e lego bophelo bjo bo sa felego lefaseng le lefsa la Modimo la letago.
O be o tla Araba Bjang?
◻ Noga, mosadi le peu tša Genesi 3:15 ke bomang?
◻ Jesu o be a lekana le Adama bjang, gomme ke eng seo topollo e ilego ya dira gore se kgonege?
◻ Ke eng seo o ka se lebelelago ka tlhologelo seo se tlago go dira gore lefase le lefsa la Modimo e be le le thabišago kudu go wena?
◻ Ke dinyakwa dife tšeo re swanetšego go di fihlelela gore re phele lefaseng le lefsa la Modimo?
[Seswantšho go letlakala 10]
Jesu ke tsela e nnoši e išago bophelong bjo bo sa felego bakeng sa ba banyenyane le ba bagolo
[Seswantšho go letlakala 11]
Ka nako ya Modimo e swanetšego, batšofadi ba tla boela matleng a bona a bofsa