Kgaolo ya Lesome-hlano
Theetša Keletšo o Amogele Tayo
1. (a) Ke ka baka la’ng ka moka ga rena re nyaka keletšo le tayo? (b) Ke potšišo efe yeo re swanetšego go naganišiša ka yona?
BEIBELE go Jakobo 3:2 e re: “Re ba xo foša xa-ntši ka moka xa rena.” Re ka nagana ka maemo a mantši ao go ona re ilego ra hlaelelwa tabeng ya go ba mohuta wa motho yoo Lentšu la Modimo le re opeletšago go ba yena. Ka gona re a dumela gore Beibele e nepile ge e re: “Kwaa keletšô, O êlêtšêxê; O hlalefêlê tša ka mosô.” (Diema 19:20) Ga go pelaelo gore re šetše re dirile diphetogo maphelong a rena gore re a dumelelanye le dithuto tša Beibele. Eupša re itshwara bjang ge e ba Mokriste-gotee le rena a re eletša tabeng e itšego?
2. Ke eng seo re swanetšego go se dira ge re amogela keletšo?
2 Ba bangwe ba arabela ka go leka go itokafatša, ba nyenyefatša bogolo bja taba goba go phara ba bangwe ka melato ya bona. Eupša go kaone go theetša keletšo le go e diriša. (Ba-Hebere 12:11) Go ba gona, ga go motho yo a swanetšego go lebelela go phethagala go ba bangwe, le gona ga se a swanela go dula a nea keletšo ka dilo tše di sa rego selo goba ka dilo tšeo Beibele e tlogelelago motho gore a itirele kgetho go tšona. Le gona, mohlomongwe motho yo a neago keletšo ga se a naganišiša ka mabaka ka moka, gomme mohlomongwe a ka hlokomedišwa ka ona ka tlhompho. Eupša poledišanong e latelago, a re tšeeng gore keletšo goba tayo yeo e newago ke e swanetšego le e theilwego Beibeleng. Motho o swanetše go arabela bjang?
Mehlala ya Temošo go Rena
3, 4. (a) Ke eng seo Beibele e se huperego seo se ka re thušago go hlagolela pono e botse mabapi le keletšo le tayo? (b) Kgoši Saulo o ile a arabela bjang keletšong, gomme ka mafelelo afe?
3 Lentšu la Modimo le na le diphihlelo tša kgonthe tša batho bao ba ilego ba newa keletšo e nyakegago. Ka dinako tše dingwe keletšo e be e sepedišana le tayo. Yo mongwe wa batho ba bjalo e be e le Kgoši Saulo wa Isiraele. O ile a palelwa ke go kwa Jehofa mabapi le setšhaba sa ba-Amaleke. Ba-Amaleke ba be ba ile ba ganetša bahlanka ba Modimo, gomme kahlolo ya Jehofa e be e le gore ba-Amaleke gotee le diruiwa tša bona ba be ba swanetše go fedišwa. Eupša Kgoši Saulo o ile a tlogela go fediša kgoši ya bona le diphoofolo tša bona tše kaone-kaone.— 1 Samuele 15:1-11.
4 Jehofa o ile a romela moporofeta Samuele gore a eletše Saulo. Saulo o ile a arabela bjang? O ile a bolela gore o fentše ba-Amaleke eupša a kgetha feela go se fediše kgoši ya bona. Lega go le bjalo, seo se be se sa dumelelane le taelo ya Jehofa. (1 Samuele 15:20) Saulo o ile a leka go phara batho ba bangwe ka molato wa gagwe bakeng sa go se fediše diruiwa ka go bolela gore: “Ke boifile batho, ka dira se bôná ba bexo ba se bolêla.” (1 Samuele 15:24) O be a bonala a tshwenyegile ka seriti sa gagwe a ba a kgopela Samuele gore a mo godiše ka pele ga batho. (1 Samuele 15:30) Mafelelong Jehofa o ile a se sa amogela Saulo e le kgoši.— 1 Samuele 16:1.
5. Go ile gwa direga’ng ka Kgoši Usia ge a be a gana keletšo?
5 Kgoši Usia wa Juda o ile a “hlanoxela Morena Modimo wa xaxwe; a bá a tsena Ngwakong wa Morena, a re ke thunthša diôrêlô.” (2 Koronika 26:16) Eupša ke feela baperisita bao go ya ka molao ba bego ba swanetše go thuntšha diorelo. Ge moperisita yo mogolo a be a leka go thibela Usia, kgoši e ile ya arabela ka pefelo. Ke eng seo se ilego sa direga? Beibele e re: “Lephêra lè mo tšwile phatleng; . . . ka xobane Morêna a mo otlile. Xomme Usia, yêna kxoši, a dula è le wa lephêra, a bá a hwa à na nalô’.”— 2 Koronika 26:19-21.
6. (a) Ke ka baka la’ng Saulo le Usia ba ile ba gana keletšo? (b) Ke ka baka la’ng go gana keletšo e le bothata bjo bogolo lehono?
6 Ke ka baka la’ng Saulo le Usia ba ile ba hwetša go le thata go amogela keletšo? Bothata bjo bogolo e be e le boikgogomošo, yo mongwe le yo mongwe wa bona a ikgopola kudu. Ba bantši ba ipaketše manyami ka baka la mokgwa wo. Go bonagala ba nagana gore go amogela keletšo go bolela gore ba a hlaelelwa goba gore go senya botumo bja bona. Eupša boikgogomošo ke bofokodi. Boikgogomošo bo tswalela motho kgopolo mo e lego gore o ba le tshekamelo ya go gana thušo yeo Jehofa a e neago ka Lentšu la gagwe le ka mokgatlo wa gagwe. Ka gona, Jehofa o lemoša ka gore: “Boikgogomošo bo eta thobego pele; gomme go wa go etwa pele ke go ikgantšha.”— Diema 16:18, PK; Ba-Roma 12:3.
Amogela Keletšo
7. Ke dithuto dife tše holago tšeo di ka ithutwago tseleng yeo Moše a ilego a arabela ka yona keletšong?
7 Mangwalo gape a na le mehlala e mebotse ya batho bao ba ilego ba amogela keletšo, gomme re ka ithuta go bona. Nagana ka mohlala wa Moše yo ratswala’gwe a ilego a mo nea keletšo ya kamoo a ka swaraganago le boikarabelo bja gagwe bjo boima ka gona. Moše o ile a mo theetša gomme kapejana a e diriša. (Ekisodo 18:13-24) Gaešita le ge Moše a be a e-na le matla a taolo, ke ka baka la’ng a ile a amogela keletšo? Ka gobane e be e le yo a ikokobeditšego. “Mošê e be e le monna yo bolêta ruri xo fetiša batho ka moka ba lefase.” (Numeri 12:3) Boleta ke bja bohlokwa gakaaka’ng? Tsefanya 2:3 e bontšha gore bo bolela bophelo go rena.
8. (a) Ke dibe dife tšeo Dafida a ilego a di dira? (b) Dafida o ile a arabela bjang ge Nathane a be a mo kgalemela? (c) Ditla-morago tša dibe tša Dafida e bile dife?
8 Kgoši Dafida o ile a dira bohlotlolo le Batseba gomme a leka go bo fihla ka go dira gore monna wa gagwe Uria a bolawe. Jehofa o ile a roma moporofeta Nathane gore a yo kgalema Dafida. O ile a itshola gomme a dumela gatee-tee gore: “Ke senyetše Morêna!” (2 Samuele 12:13) Le ge Modimo a ile a amogela go itshola ga Dafida, fela o be a tla tlaišwa ke ditla-morago tša bobe bja gagwe. Jehofa o ile a mmotša gore “ngwakô wa xaxo o ka se kê wa tloxwa” ke lerumo le gore basadi ba gagwe ba be ba tla gafelwa ‘motho wa gabo’ le gore morwa wa gagwe yo a belegwego ka bohlotlolo bja gagwe o be a tla “hwa.”—2 Samuele 12:10, 11, 14.
9. Ke eng seo re sa swanelago go se lebala ge e ba re eletšwa goba re laiwa?
9 Kgoši Dafida o be a tseba mohola wa go kwa keletšo e kwalago. Lebakeng le lengwe o ile a leboga Modimo bakeng sa yo e tlilego ka yena. (1 Samuele 25:32-35) Na re bjalo? Ge e ba go le bjalo, gona re tla šireletšwa malebana le go bolela le go dira dilo tše dintši tšeo di ka dirago gore re itshole. Eupša go thwe’ng ge e ba re tsena maemong ao a lebišago tabeng ya gore re eletšwe goba gaešita le go laiwa? Anke re se lebaleng gore se ke bohlatse bja lerato la Jehofa leo morero wa lona e lego boiketlo bja rena bja ka mo go sa felego.—Diema 3:11, 12; 4:13.
Dika tše Bohlokwa Tšeo di Swanetšego go Hlagolelwa
10. Ke seka sefe seo Jesu a ilego a bontšha gore se bohlokwa bakeng sa bao ba tlago go tsena Mmušong?
10 Gore re be le tswalano e botse le Jehofa le bana babo rena ba Bakriste, re swanetše go hlagolela dika tše itšego. Jesu o ile a bolela se sengwe sa tšona ge a be a bea ngwana pele ga barutiwa ba gagwe gomme a bolela gore: “Xe Le sa fetoxe la ba byalo ka bana, Le ka se kê la tsêna mmušong wa lexodimo. Xomme e moxolo mmušong wa maxodimo ké mang le mang e a ikokobetšaxo a ba byalo ka ngwana yó.” (Mateo 18:3, 4) Barutiwa ba Jesu ba be ba swanetše go hlagolela boikokobetšo ka ge ba ile ba ngangišana ka gore ke mang e lego yo mogolo gare ga bona.—Luka 22:24-27.
11. (a) Ke bomang bao re swanetšego go ikokobeletša bona, gomme ka baka la’ng? (b) Ge e ba re ikokobeditše re tla arabela bjang keletšong?
11 Moapostola Petro o ngwadile gore: “Seng sa lena Le phedišanê Lè n’e boikokobetšô; xobane Modimo ó lwa le baikxoxomoši; ba ba ikokobetšaxo ó ba sétša ka kxauxêlô.” (1 Petro 5:5) Re tseba gore re swanetše go ikokobetša pele ga Modimo, eupša lengwalo le le bontšha gore re bile re swanetše go ikokobeletša badumedi-gotee le rena. Ge e ba re le bjalo re ka se ke ra gana ditšhišinyo tšeo ba bangwe ba re neago tšona eupša re tla ithuta go bona.—Diema 12:15.
12. (a) Ke seka sefe se bohlokwa seo se tswalanego kgaufsi le boikokobetšo? (b) Ke ka baka la’ng re swanetše go tshwenyega ka mafelelo ao boitshwaro bja rena bo nago le ona go ba bangwe?
12 Seo se tswalanago le boikokobetšo ke go kgomega ka boiketlo bja ba bangwe. Moapostola Paulo o ngwadile gore: “A motho a se kê a inyakêla tša xaxwe; a a nyakê sa xo hola ba bangwê. . . . Ké xôna xe Le e-ja, xe Le e-nwa, tšohle tše Le di diraxo Le di dirê xore Modimo a rêtwê ka tšôna. Le se kê la ba ba xo kxopiša Ba-Juda le xe e le Ba-Gerika le xe e le phuthêxô ya Modimo.” (1 Ba-Korinthe 10:24-33) Paulo ga se a bolela gore re swanetše go phaela ka thoko dilo ka moka tšeo re di ratago, eupša o ile a re opeletša go se dire selo le ge e le sefe seo se ka neago motho sebete sa gore a dire selo seo letswalo la gagwe le mmotšago gore se fošagetše.
13. Ke mohlala ofe wo o ka bontšhago ge e ba re itlwaetša go diriša keletšo ya Mangwalo?
13 Na o etiša boiketlo bja batho ba bangwe pele ga dilo tšeo o di ratago? Ka moka ga rena re swanetše go ithuta go dira bjalo. Go na le ditsela tše dintši tšeo go ka dirwago se ka tšona. Ka mohlala, nagana ka moaparo le go itokiša. Tše ke ditaba tša boikgethelo bja motho ka noši ka go latela tlhahlo ya Mangwalo ya go ba yo a ipoeditšego, sethakga le yo a hlwekilego. Eupša ge e ba o be o tla ithuta seo ka baka la setlogo sa batho ba tikologong ya geno gomme mokgwa wa gago wa go apara goba wa go itokiša o šitišitše ba bangwe go theetša molaetša wa Mmušo, na o be o tla dira diphetogo? Ka kgonthe, go thuša motho yo mongwe go hwetša bophelo bjo bo sa felego go bohlokwa kudu go feta go ikgahliša.
14. Ke ka baka la’ng go le bohlokwa go hlagolela boikokobetšo le go kgomega ka ba bangwe?
14 Jesu o beile mohlala tabeng ya go ikokobeletša ba bangwe le go kgomega ka bona a ba a hlapiša barutiwa ba gagwe maoto. (Johane 13:12-15) Lentšu la Modimo ge le bolela ka yena le re: “Kxopolô ye e swanetšexo xo ba mo xo lena, ké yeo e bexo e le xo Kriste Jesu, Eo, à le ka lebopô le Modimo a lexo ka lôna, a se re: xo swana le Modimo xo mo ana hlôxô, A upya a ithlakola, a tšea lebopô la mohlanka, a ba e a swanaxo le batho, a hwetšwa è le motho ka sebele, A ikokobetša a ba e a kwaxo le xo iša lehung.”—Ba-Filipi 2:5-8; Ba-Roma 15:2, 3.
O se ke wa Gana Tayo ya Jehofa
15. (a) Ke diphetogo dife tšeo re swanetšego go di dira gore re be le semelo seo se kgahlišago Modimo? (b) Jehofa o diriša eng go re nea keletšo le tayo ka moka ga rena?
15 Ka ge ka moka re le badiradibe, go nyakega diphetogo boemong bja rena bja kgopolo le boitshwarong ge e ba re tla bonagatša semelo sa Modimo wa rena. Re swanetše go apara “motho e mofsa.” (Ba-Kolose 3:5-14) Keletšo le tayo di re thuša go bona mafelo ao go ona go nyakegago dipeakanyo ke moka re bone kamoo re ka di dirago ka gona. Mothopo wa motheo wa tlhahlo yeo re e nyakago ke Beibele ka boyona. (2 Timotheo 3:16, 17) Dipuku tša Beibele le diboka tšeo di lokišetšwago ke mokgatlo wa Jehofa di re thuša go diriša Lentšu la Modimo. Gaešita le ge re ile ra kwa keletšo pele, na re tla lemoga go e nyaka ga rena gomme ra leka go kaonefatša?
16. Ke thušo efe yeo Jehofa a re neago yona re le batho ka o tee ka o tee?
16 Jehofa o re thuša mathateng a rena ka go kgomega mo go lerato. Ba dimilione ba thušitšwe ka dithuto tša magae tša Beibele. Batswadi ba eletša le go laya bana ba bona bakeng sa go ba šireletša malebana le boitshwaro bjo bo ka ba bakelago manyami. (Diema 6:20-23) Gantši ba bangwe ka phuthegong ba kgopela keletšo le ditšhišinyo go badiredi ba ba nago le phihlelo e le gore ba kaonefatše maiteko a bona modirong wa tšhemo. Ka dinako tše dingwe bagolo ba ka kgopelana keletšo goba ba e kgopela go ba bangwe bao ba nago le phihlelo bodireding. Bao ba nago le ditshwanelego tša moya ba diriša Beibele go nea thušo go bao ba e nyakago, ba dira bjalo ka moya wa boleta. Ge e ba o nea keletšo, gopola gore ‘o itote gore o se wele molekong.’ (Ba-Galatia 6:1, 2) Ee, ka moka ga rena re nyaka keletšo le tayo gore re rapele Modimo a nnoši wa therešo re le batee.
Poledišano ya Tlhahlobo
• Jehofa o re thuša bjang ka lerato gore re bone moo re swanetšego go dira dipeakanyo gona?
• Ke ka baka la’ng ba bantši ba e-na le bothata bja go amogela keletšo e nyakegago, gomme se se kotsi gakaaka’ng?
• Ke dika dife tše bohlokwa tšeo di tlago go re thuša go amogela keletšo, gomme Jesu o beile bjang mohlala go se?
[Seswantšho go letlakala 142]
Usia o ile a gana keletšo gomme a otlwa ka lephera
[Seswantšho go letlakala 142]
Moše o ile a holwa ke go amogela keletšo e tšwago go Jethero