Bagwera ba Rena ba Swanetše go Rata Modimo

BAGWERA ke batho bao re ratago go bolela le bona le go fetša nako re e-na le bona. Eupša ke ga bohlokwa go ba le mohuta wo o swanetšego wa bagwera. Ke mang yo o naganago gore ke mogwera yo a phalago bohle yo re ka bago le yena?— Ee ke Jehofa Modimo.

Na re ka ba bagwera ba Modimo e le ka kgonthe?— Ee, Beibele e bolela gore Aborahama, monna yo a phetšego mehleng ya bogologolo, e be e le ‘mogwera wa Jehofa.’ (Jakobo 2:23) Na o tseba lebaka leo ka lona e bego e le mogwera wa Jehofa?— Beibele e araba ka gore Aborahama o be a e-kwa Modimo. O ile a kwa gaešita le ge seo a bego a kgopelwa go se dira se be se le thata. Ka gona, gore re be bagwera ba Jehofa, re swanetše go dira seo se mo thabišago, go fo etša ge Aborahama a ile a dira le go fo etša ge Morutiši yo Mogolo a ile a dira bjalo ka mehla.—Genesi 22:1-14; Johane 8:28, 29; Ba-Hebere 11:8, 17-19.

Jesu o ile a botša baapostola ba gagwe gore: ‘Lena le bagwera ba-ka, ge le dira tšeo ke le laelago tšona.’ (Johane 15:14) Ka ge dilo tšohle tšeo Jesu a bego a di botša batho di be di e-tšwa go Jehofa, Jesu o be a bolela gore bagwera ba gagwe e be e le batho bao ba bego ba dira dilo tšeo Modimo a ba laetšego gore ba di dire. Ka kgonthe, bagwera ba gagwe ka moka ba be ba rata Modimo.

Ba bangwe ba bagwera ba kgaufsi ba Morutiši yo Mogolo e be e le baapostola ba gagwe, bao o ka ba bonago seswantšhong se se lego go letlakala 75 la puku ye. Ba be ba sepela le yena gomme ba mo thuša go dira modiro wa boboledi. Jesu o be a fetša nako ya gagwe e ntši a e-na le banna ba. Ba be ba e-ja gotee. Ba be ba boledišana ka Modimo. Le gona ba be ba dira dilo tše dingwe gotee. Eupša Jesu o be a e-na le bagwera ba bangwe ba bantši. Gantši o be a dula le bona, gomme ba be ba e-ba le dinako tše thabišago ba le gotee.

Lapa le lengwe leo Jesu a bego a le rata le be le dula torotswaneng ya Bethania, yeo e lego ka ntlenyana ga motse o mogolo wa Jerusalema. Na o a ba gopola?— E be e le Maria, Mareta le kgaetšedi ya bona, Latsaro. Jesu o be a bitša Latsaro gore ke mogwera wa gagwe. (Johane 11:1, 5, 11) Lebaka leo ka lona Jesu a bego a rata lapa le le go thabela go ba le lona e be e le gore ba be ba rata Jehofa e bile ba Mo hlankela.

Se ga se bolele gore Jesu o be a sa bontšhe botho bathong bao ba bego ba sa hlankele Modimo. Le bona o be a ba bontšha botho. O ile a ba a ya magaeng a bona le go ja le bona. Se se ile sa dira gore batho ba bangwe ba bolele gore Jesu e be e le ‘mogwera wa balekgetho le ba-dira-dibe.’ (Mateo 11:19) Therešo ke gore Jesu o be a sa ye magaeng a batho ba ka gobane a be a rata tsela ya bona ya go phela. O be a ba etela e le gore a ka boledišana le bona ka Jehofa. O ile a leka go ba thuša gore ba tlogele ditsela tša bona tše mpe gomme ba hlankele Modimo.

Se se ile sa direga ka letšatši le lengwe motseng wa Jeriko. Jesu o be a fo iphetela a le tseleng ya gagwe ya go ya Jerusalema. Go be go e-na le lešaba la batho, gomme gare ga lešaba leo go be go e-na le monna yo a bitšwago Sakeo. O be a nyaka go bona Jesu. Eupša Sakeo e be e le yo mokopana, ka gona o be a sa kgone go bona Jesu ka baka la lešaba. Ka gona o ile a kitimela pele gomme a namela sehlare e le gore a kgone go bona Jesu gabotse ge a feta.

Ge Jesu a fihla sehlareng seo, o ile a lebelela godimo gomme a re: ‘Akgofa o fologe, gobane lehono ke tla ngwakong wa gago.’ Eupša Sakeo e be e le monna yo a humilego yo a bego a dirile dilo tše mpe. Ke ka baka la’ng Jesu a be a nyaka go ya ngwakong wa monna yo bjalo?—

E be e se ka gobane Jesu a be a rata tsela yeo monna yoo a bego a phela ka yona. O ile a ya lapeng la Sakeo bakeng sa go yo boledišana le yena ka Modimo. O ile a bona kamoo monna yoo a ilego a dira maiteko a magolo gore a mmone. Ka gona o be a tseba gore mohlomongwe Sakeo o be a tla theetša. Se e be e le sebaka se sebotse sa go bolela le yena mabapi le tsela yeo Modimo a rego batho ba phele ka yona.

Ka gona, ke eng seo se diregago ka baka la seo?— Sakeo o rata dithuto tša Jesu. O ipona molato ka ge a ile a hlalefetša batho, gomme o holofetša gore o tla ba bušetša tšhelete ya bona yeo a bego a se na tshwanelo ya go e tšea. Ka morago o fetoga molatedi wa Jesu. E bile ka morago ga moo, moo Jesu le Sakeo ba ilego ba fetoga bagwera.—Luka 19:1-10.

Ge e ba re ithuta go Morutiši yo Mogolo, na le ka mohla re ka etela batho bao e sego bagwera ba rena?— Ee. Eupša re ka se ye magaeng a bona ka gobane re rata tsela ya bona ya go phela. Le gona re ka se ke ra dira dilo tše di fošagetšego le bona. Re tla ba etela e le gore re kgone go boledišana le bona mabapi le Modimo.

Eupša bagwera ba rena ba kgaufsi ke bao ka mo go kgethegilego re ratago go fetša nako re e-na le bona. E le gore e be bagwera ba ba swanetšego, ba swanetše gore e be mohuta woo Modimo a o ratago. Ba bangwe ba ka ba ba bile ba sa tsebe gore Jehofa ke mang. Eupša ge e ba ba nyaka go ithuta ka yena, re ka ba thuša. Ke moka ge ba šetše ba rata Jehofa ka tsela yeo re mo ratago ka yona, gona re ka fetoga bagwera ba bona ba kgaufsi.

Go na le tsela e nngwe yeo ka yona o ka lemogago ge e ba motho e tla ba mogwera yo a swanetšego. Hlokomela dilo tšeo a di dirago. Na o dira dilo tšeo di sa bontšhego botho go batho ba bangwe ke moka ka morago a sege ka seo? Seo ga se a swanela, na ga go bjalo?— Na o dula a le bothateng ka dinako tšohle? Re ka se nyake go ipakela mathata ka baka la gagwe, na ga go bjalo?— Goba na o dira dilo tše mpe ka morero ke moka a nagane gore o hlalefile ka gobane go se na motho yo a lemogilego seo a se dirilego? Gaešita le ge motho yoo a se a ka a lemogwa, Modimo o bone seo a se dirilego, na ga go bjalo?— Na o nagana gore e be e tla ba mo go swanetšego go ba le bagwera bao ba dirago dilo tše bjalo?—

Go ka ba bjang ge o ka tšea Beibele ya gago? Anke re bone seo e se bolelago mabapi le kamoo bagwera ba rena ba kgomago maphelo a rena ka gona. Ke lengwalo la 1 Ba-Korinthe 15, temana 33. Na o le hweditše?— Le balega ka gore: ‘Le se ke la forwa, ditlwaelano tše mpe di senya mekgwa e mebotse.’ Se se bolela gore ge e ba re fetša nako le batho ba babe, mo gongwe le rena re ka fetoga ba babe. Le gona ke therešo gore bagwera ba babotse ba re thuša go tšweletša mekgwa e mebotse.

Anke le ka mohla re se ke ra lebala gore Motho wa bohlokwa kudu maphelong a rena ke Jehofa. Ga re nyake go senya segwera sa rena le yena, na ga go bjalo?— Ka gona re swanetše go kgonthišetša gore re dira segwera le bao ba ratago Modimo feela.