O Ile a Galefa Gomme a Bolaya Motho

Ka morago ga gore Modimo a rake Adama le Efa serapeng sa Edene, ba ile ba ba le bana ba bantši. Morwa wa bona wa mathomo e lego Kaine o be a lema dibjalo. Morwa wa bona wa bobedi e lego Abele, o be a diša diruiwa.

Ka letšatši le lengwe, Kaine le Abele ba ile ba direla Jehofa dihlabelo. Sehlabelo ke eng? Ke mpho e botse kudu yeo re ka e neago Jehofa. Jehofa o ile a amogela sehlabelo sa Abele, eupša a se amogele sa Kaine. Seo se ile sa galefiša Kaine. Jehofa o ile a botša Kaine gore ge a ka tšwela pele a galefile, o tlo senya. Eupša Kaine o ile a se theetše Jehofa.

Ka morago, Kaine o ile a re go Abele: “A re ye kua nageng.” Ge ba le nnoši kua nageng, Kaine o ile a hlasela ngwana wa gabo e lego Abele gomme a mmolaya. Jehofa o be a tla dira eng ka Kaine? O ile a otla Kaine ka go dira gore a tšhabele kgole le gae. Modimo o be a ka se sa dumelela Kaine go boela gae.

Re ithuta eng tabeng ye? Re ithuta gore le rena re ka galefa ge dilo di sa direge ka tsela yeo re nyakago. Eupša ge re thoma go galefa, re swanetše go itshwara. Le gona ge motho yo mongwe a re botša gore re se ke ra galefa, re swanetše go mo kwa.

Ka ge Abele a be a rata Jehofa e bile a lokile, Jehofa a ka se mo lebale. Jehofa o tlo mo tsoša bahung ge a tla be a dira gore lefase e be paradeise.