Go nea Jehofa Dihlabelo Tšeo Di Amogelegago

NAKONG e nngwe historing, tiragalo e makatšago e be e ka bonwa kgorong ya ka bohlabela ya serapa sa Edene.a Bakerubi ba dinatla ba be ba eme moo ba hlapeditše, go ba gona ga bona mo go emišago meriri ya hlogo go dira gore go be molaleng gore ga go na yo a swanetšego go leka mahlale a gore o a feta. Se sengwe gape se se bego se thibela ka mo go swanago e be e le bogale bja tšhoša yeo e bego e lauma kgabo ya mollo yeo e bego e dikologa yeo ka ntle le pelaelo e bego e lahlela seetša se se sa tlwaelegago sa go boifiša dihlareng tše di e dikologilego bošego. (Genesi 3:​24) Gaešita le ge se e be e ka ba selo se se bego se goga kgahlego, babogedi le ge e le bafe ba be ba emela kgojana.

Kaine le Abele mo gongwe ba ka ba ba ile ba etela lefelo leo gantši. Ka ge e be e le bana ba ba belegetšwego Adama le Efa ka ntle ga serapa, ba be ba ka fo akanya feela ka tsela yeo go phela Paradeiseng go bego go le ka gona, bjalo ka ge batswadi ba bona ba kile ba phela moo, mo go bego go na le dimela tše di nošetšwago gabotse, dihlare tše talana tše botse le dienywa le merogo e mentši. Bjale bonyenyane bjo bo bego bo ka bonwa Edene ka ntle le pelaelo bo be bo ka bonagala bo se bja lengwa le go tlala ka ngwang.

Ka ntle le pelaelo, Adama le Efa ba be ba hlaloseditše bana ba bona lebaka leo ka lona serapa se bego se sa hlokomelwe le lebaka leo ka lona ba bego ba rakilwe go sona. (Genesi 2:​17; 3:​6, 23) Kaine le Abele ba swanetše go ba ba ile ba ikwa ba gakanegile gakaakang! Ba be ba kgona go bona serapa eupša ba be ba ka se kgone go tsena go sona. Ba be ba le kgaufsi kudu le Paradeise eupša ba le kgole kudu le yona. Go se phethagale go be go ba šilafaditše gomme go be go se selo seo Kaine le Abele ba bego ba ka se dira ka gona.

Tswalano ya batswadi ba bona ka ntle le pelaelo e be e ka se lokiše ditaba. Ge Modimo a be a ahlola Efa o ile a re: “O tlo fêla o hloloxêlwa monna wa xaxo; ’me yêna ó tlo Xo buša.” (Genesi 3:​16) Ka go dumelelana le boporofeta bjoo, Adama o swanetše go ba a ile a buša mosadi wa gagwe, mohlomongwe a se sa mo swara bjalo ka mogwera le mothuši. Le gona go bonagala Efa a be a bontšha go ithekga ka mo go feteletšego ka monna yo. Puku ye nngwe ya ditlhaloso e bile e fihla bokgoleng bja gore e hlalose ‘tlhologelo’ ya gagwe e le “kganyogo yeo ekago ke bolwetši.”

Beibele ga e bolele tekanyo yeo ka yona boemo bjo bja lenyalo bo ilego bja kgoma tlhompho ya bašemane ya go hlompha batswadi ba bona. Lega go le bjalo, go molaleng gore Adama le Efa ba beetše bana ba bona mohlala o ferekanyago.

Go Kgetha Ditsela tše di Fapanego

Mafelelong Abele o ile a ba modiši, gomme Kaine a tšea bolemi. (Genesi 4:2) Ge a be a hlokometše mehlape ya gagwe, ka ntle le pelaelo Abele o be a na le nako e ntši ya go naganišiša ka boporofeta bjo bo makatšago bjo bo ilego bja bolelwa pele batswadi ba gagwe ba lelekwa Edene: “Ke bea lehlôyô xare xa xaxo le mosadi, le xare xa peu ya xaxo le peu ya xaxwe. Yôna e tlo Xo phšatla hlôxô; ’me wêna O tlo e loma serêthê.” (Genesi 3:​15) Abele o swanetše go ba a ile a ipotšiša gore, ‘Na kholofetšo ya Modimo mabapi le peu yeo e tlago go pšhatla noga hlogo e tla phethagatšwa bjang, le gona na peu ye e tla longwa seretheng bjang?’

Ka morago ga nako e itšego, mohlomongwe ge ba be ba šetše ba gotše, Kaine le Abele, yo mongwe le yo mongwe wa bona, o ile a direla Jehofa sehlabelo. Ka ge Abele e be e le modiši, ga go makatše ge a ile a nea “sa maitšibulô a dihuswane tša xaxwe, le tše di mahura tša tšôna.” Ka go fapana le seo, Kaine o ile a nea “dienywa tša thšemo.” Jehofa o ile a amogela sehlabelo sa Abele eupša “xa a ka a thabêla Kaine le sebexô sa xaxwe.” (Genesi 4:​3-5) Ke ka baka la’ng a sa ka a se thabela?

Ba bangwe ba šupa ntlheng ya gore sehlabelo sa Abele se be se e-tšwa go “maitšibulô a dihuswane tša xaxwe,” mola sa Kaine e be e fo ba “dienywa tša thšemo.” Eupša bothata e be e se boemo bja ditšweletšwa tšeo Kaine a ilego a di nea, ka gobane pego e bolela gore Jehofa o ile a thabela “Abele le sebexô sa xaxwe” gomme a se thabele “Kaine le sebexô sa xaxwe.” Ka gona kudu-kudu Jehofa o ile a lebelela boemo bja pelo bja morapedi. Ka go dira bjalo, o ile a bona’ng? Ba-Hebere 11:4 e re “tumêlô ké ka yôna” Abele a neilego sehlabelo sa gagwe. Ka gona, go bonagala Kaine a be a se na tumelo yeo e ilego ya dira gore sehlabelo sa Abele se amogelege.

Tabeng ye, ke mo go lemogegago gore sehlabelo sa Abele se be se akaretša go tšhollwa ga madi. Mo gongwe a ka ba a ile a phetha ka mo go swanetšego gore kholofetšo ya Modimo mabapi le peu yeo e bego e tla longwa serethe e be e tla akaretša go gafa bophelo. Ka gona sehlabelo sa Abele e be e tla ba kgopelo ya go kgopela poelano, gomme se be se bontšha tumelo ya go dumela gore Modimo o be a tla nea sehlabelo sa poelano bakeng sa dibe nakong e swanetšego.

Ka mo go fapanego, go bonagala Kaine a be a se a naganišiša gakaalo ka sehlabelo seo a ilego a se nea. Mohlalosi yo mongwe wa Beibele wa lekgolong la bo-19 la nywaga o ile a bolela gore, “sehlabelo sa gagwe e be e fo ba sa go bontšha go dumela gore Modimo ke monei wa dimpho. Se hlatsetše gabotse gore o be a sa bone sekgoba magareng ga gagwe le Mmopi wa gagwe, a bile a sa bone go nyakega le ge e le gofe ga go ipolela dibe goba go ithekga ka poelano.”

Go feta moo, bjalo ka leitšibulo, Kaine a ka ba a bile a ile a nagana ka boikgogomošo gore yena e be e le peu e holofeditšwego yeo e bego e tla senya Noga, e lego Sathane. Efa le yena a ka ba a be a e-na le ditlhologelo tše bjalo tša boikgogomošo bakeng sa morwa wa gagwe wa leitšibulo. (Genesi 4:1) Therešo ke gore ge e ba se e be e le seo Kaine le Efa ba bego ba se letetše, ba be ba fošitše o šoro.

Beibele ga e bolele tsela yeo ka yona Jehofa a bontšhitšego go amogela ga gagwe sehlabelo sa Abele. Ba bangwe ba nagana gore se ile sa lewa ke mollo o tšwago legodimong. Go sa šetšwe tsela yeo a bontšhitšego ka yona, ka go lemoga gore sehlabelo sa gagwe se be se gannwe, ‘Kaine o ile a befelwa gagolo, a inamiša sefahlogo.’ (Genesi 4:5) Kaine o be a lebile kotsing.

Keletšo ya Jehofa le Karabelo ya Kaine

Jehofa o ile a boledišana le Kaine. O ile a botšiša gore: “O befeletšwe’ng? O re’ng O inamiša sefahloxô?” Se se ile sa nea Kaine sebaka se se lekanego sa go ka hlahloba maikwelo a gagwe le maikemišetšo. Jehofa o ile a tšwela pele ka gore: “Xe Ò ka dira xa-botse, a xa se mó O tl’o xo inamoloxa! Fêla, xe O sa dire xa-botse, xôna sebe se laletše mojakô; se a Xo kxanyoxa; fêla, wêna O ka se buša [“gomme wena ka noši, a o ka se buša?” NW].”​—Genesi 4:​6, 7. (Bona lepokisi le le lego go letlakala 23.)

Kaine ga se a ka a theetša. Go e na le moo, o ile a iša Abele lešokeng ke moka a mmolaya. Ka morago, ge Jehofa a be a botšiša gore Abele o be a le kae, Kaine o ile a oketša sebe sa gagwe ka maaka. O ile a fetola ka gore: “Xa ke tsebe. A ke modiši wa ngwan’ešo?”​—Genesi 4:​8, 9.

Bobedi pele le ka morago ga polao ya Abele, Kaine o ile a gana go “dira xa-botse.” O ile a kgetha gore sebe se mo laole, gomme ka baka leo Kaine o ile a lelekwa lefelong leo lapa la batho le bego le dula go lona. “Seká,” seo mohlomongwe e be e fo ba taelo e tiilego, se ile sa thewa gore go se be le yo a lefeletšago lehu la Abele ka go bolaya Kaine.​—Genesi 4:15.

Ka morago Kaine o ile a aga motse, a o rea leina la morwa’gwe. Ka mo go sa makatšego, ditlogolo tša gagwe di ile tša tuma ka bošoro bja tšona. Mafelelong lešika la Kaine le ile la felela ge Meetse-fula a mehleng ya Noage a fsiela batho ba sa lokago ka moka.​—Genesi 4:​17-24; 7:​21-24.

Pego ya Beibele ya Kaine le Abele ga se ya bolokelwa feela go balela go itloša bodutu. Go e na le moo, e be e “ngwaletšwe xo ruta rena” gomme e “hola batho ka xo ruta, le ka xo [sola, NW].” (Ba-Roma 15:4; 2 Timotheo 3:​16) Re ka ithuta’ng go tšwa pegong ye?

Thuto go Rena

Go etša Kaine le Abele, lehono Bakriste ba laletšwa gore ba nee Modimo sehlabelo​—e sego sehlabelo sa kgonthe sa go fišwa eupša “[sehlabelo, NW] sa thêtô, e lexo sôna seenywa sa melomo ye e ipolêlaxo ka Leina la xaxwe.” (Ba-Hebere 13:​15) Se gabjale se phethwa tekanyong ya lefase ka bophara, ka ge Dihlatse tša Jehofa di bolela ditaba tše di lokilego tša Mmušo wa Modimo dinageng tše fetago 230. (Mateo 24:​14) Na o tšea karolo modirong woo? Gona o ka kgodišega gore “Modimo xa a bebe motho, xa a lebale medirô ya lena, le leratô le Le itapišitšexo ka lôna ’ineng la xaxwe.”​—Ba-Hebere 6:10.

Go swana le dihlabelo tša Kaine le Abele, sehlabelo sa gago ga se ahlolwe go ya ka ponagalo ya sona ya ka ntle​—ka mohlala, go ya ka palo ya diiri tšeo o di fetšago bodireding feela. Jehofa o lebelela ka mo go tseneletšego. Jeremia 17:​10 (PK) e bolela gore o ‘fetleka pelo’ gaešita le go ‘leka dipshio’​—e lego dikgopolo, maikwelo le ditutuetšo tša semelo sa motho tša ka gare-gare. Ka gona, taba-kgolo ke boikemišetšo, e sego tekanyo. Ka kgonthe, go sa šetšwe ge e ba e le se senyenyane goba se segolo, sehlabelo se bohlokwa go Modimo ge se newa go tšwa pelong yeo e tutuetšwago ke lerato.​—Bapiša Mareka 12:​41-44 le 14:​3-9.

Ka nako e swanago, re swanetše go lemoga gore Jehofa a ka se amogele dihlabelo tša go golofala go fo swana le ge a se a amogela sehlabelo sa Kaine seo e bego e se sa pelo ka moka. (Maleaki 1:​8, 13) Jehofa o nyaka gore o mo nee se sebotse kudu se o ka se kgonago, gore o mo hlankele ka pelo ka moka, ka moya ka moka, ka tlhaologanyo ka moka le matla a gago ka moka. (Mareka 12:​30) Na o dira seo? Gona o na le lebaka le lebotse la go lebelela sehlabelo sa gago ka kgotsofalo. Paulo o ngwadile gore: “Motho a a šetšê modirô wa xaxwe; ké mo a tl’o xo rêtwa ka tša xaxwe, e sexo ka tša e mongwê.”​—Ba-Galatia 6:4.

Kaine le Abele ba ile ba godišwa ka tsela e swanago. Eupša nako le maemo di ile tša nea yo mongwe le yo mongwe wa bona sebaka sa gore a hlagolele dika tše di sa swanego. Boemo bja Kaine bja kgopolo ka mehla bo ile bja tlala mona, phadišano le go befelwa.

Ka mo go fapanego, Abele o gopolwa ke Modimo e le moloki. (Mateo 23:​35) Boikemišetšo bja gagwe bja go kgahliša Modimo bjang goba bjang bo dirile Abele gore e be yo a fapanego ka mo go lapološago le batho bao ba hlokago tebogo ba lapeng labo​—e lego Adama, Efa le Kaine. Beibele e re botša gore gaešita le ge Abele a hwile, o “a bolêla.” Tirelo ya gagwe ya potego go Modimo ke karolo ya pego ya neng le neng ya histori yeo e lego ka Beibeleng. Eka re ka latela mohlala wa Abele ka go tšwela pele re nea dihlabelo tše di amogelegago go Modimo.​—Ba-Hebere 11:4.

[Mengwalo ya tlase]