Leru le Lekaakaa la Dihlatse!

“Ke gona ka fao le rena, ge re dikaneditše ke leru le lekao la dihlatse, a re. . . kitimeng ka tiišo tlhabanong ye re e laetšwego.”—BA-HEBERE 12:1, Phetolelo ya Kgale.

1, 2. (a) Ke boemo bofe bja seswantšhetšo bjo mo gongwe Paulo a bego a gopola ka gea ngwalela Bakriste ba ba-Hebere? (b) Keka baka la’ng badumedi-gotee le yena ba ba-Hebere ba be ba swanetše go ba le tumelo e tiilego?

ANKE o akanye o kitima lepatlelong. O tšwela pele, o nganga mešifa ka moka, gomme mahlo a gago a tsepeletše pakaneng. Eupja go thwe’ng ka babogi? Ee, ka moka ga bona e be e le bo-ramabelo bao ba thopago sefoka! E be e se babogedi feela eupja e be e le babogi ba mafolofolo ka mantšu le ka mediro.

² Moapostola Paulo mo gongwe a ka ba a be a gopotše ka boemo bjo bjalo bja seswantšhetšo ge a be a ngwalela Bakriste ba ba-Hebere (c. 61 C.E.). Ba be ba swanetše go ba le tumelo e tiilego. (Ba-Hebere 10:32-39) Ke feela ka tumelo moo ba bego ba ka ela hloko temošo ya Jesu ya gore ba tšhabe ge Jerusalema e be e dikaneditšwe ke makoko a madira (ka 66 Mehleng ya Rena) e lego nywaga e sego kae pele ga go senywa ga yona ke Roma (ka 70 Mehleng ya Rena). Le gona, tumelo e be e tla ba tiiša ge ba be ba ‘tlaišetšwa toko.’—Mateo 5:10; Luka 21:20-24.

3. ‘Sebe seo se re rarelago’ go Ba-Hebere 12:1 ke eng gomme Bakriste ba eletšwa gore ba kitime lebelo lefe ka kgotlelelo?

³ Paulo ka morago ga go boeletša mediro ya tumelo ya pele ga Bokriste (go Ba-Hebere, kgaolo 11), o ile a eletša ka gore: ‘Bjale le rena ge re na le leru le lekaakao la dihlatse tše di re ukametšego, a re apoleng tše di re imelago tšohle [tšeo di tlago go re tshwenya moyeng] le sebe [go hloka tumelo] se se re rarelago, ‘me re kitimeng ka go tiiša tlhabanong [ya bophelo bjo bo sa felego] ye re lego mo go yona.’ (Ba-Hebere 12:1) Kgopolo ya Paulo mabapi le go bontšha tumelo ka mediro e gatelela dibopego tše fapa-fapanego tša yona gomme e tla re thuša, go sa šetšwe ge e ba re le Bakriste ba tloditšwego bao ba lego lebelong la go hwetša bophelo bjo bo sa felego legodimong goba re le karolo ya “lešaba le lexolo” leo le nago le pakane ya bophelo bjo bo sa felego lefaseng la paradeise. (Kutollo 7:4-10; Luka 23:43; Ba-Roma 8:16, 17) Eupja ge e le gabotse tumelo ke eng? Dibopego tše dingwe tša selo se sa bohlokwa sa moya ke dife? Re tla itshwara bjang ge e ba re e-na le tumelo? Ge o dutše o tsoma dikarabo tša dipotšišo tše bjalo, hle bala ditemana tše boletšwego tša Ba-Hebere dikgaolo 11 le 12 nakong ya ge o ithuta o nnoši le thutong ya phuthego.

Seo Tumelo e Lego Sona

4. Tumelo ke eng?

⁴ Paulo la mathomo o ile a hlalosa tumelo. (Bala Ba-Hebere 11:1-3.) Ka boripana tumelo ke “kholofêlô ye e tiilexo ya xo holofêla tše di letetšwexo.” Motho yo a nago le tumelo o na le kholofelo e tiilego ya gore selo se sengwe le se sengwe seo Modimo a se holofetšago se tla phethagatšwa e le ka kgonthe. Le gona tumelo “ke xo bota tše di sa bonwexo ka mahlo.” Bohlatse bjo bo kgodišago bja dilo tša kgonthe tšeo di sa bonwego ke bjo matla kudu mo e lego gore tumelo e bolelwa e le e lekanago le bohlatse bjoo.

5. Ka tumelo re lemoga eng?

⁵ Ka tumelo “ba boxolo-xolo ba ithuetše bohlatse” bja gore ba be ba kgahliša Modimo. Le gona, “tumêlô re tseba ka yôna xe lexohle,” e lego lefase, letšatši, kgwedi le dinaledi di “hlodilwe ke Lentšu la Modimo; tše di bônwaxo tša tšwêlêla di e-tšwa xo tše di sa bonwexo.” Re kgodišegile gore Jehofa ke Mmopi wa dilo tše bjalo, gaešita lege re ka se kgone go mmona ka gobane e le Moya wo o sa bonagalego.—Genesi 1:1; Johane 4:24; Ba-Roma 1:20.

Tumelo le ‘Lefase la Kgale’

6. Ke ka baka la’ng Abele a be a e-na le “kholofêlô e tiilexo” ya gore mantšu a Jehofa a boporofeta ao a lego mabapi le ‘peu ya mosadi’ e tla ba a therešo?

⁶ Se sengwe sa dibopego tše dintši tša tumelo ke go lemoga go nyakega ga sehlabelo bakeng sa dibe. (Bala Ba-Hebere 11:4.) ‘Lefaseng la kgale,’ tumelo ya go dumela sehlabelong sa madi e ile ya bontšhwa ke Abele, morwa wa bobedi wa batho ba babedi ba pele, e lego Adama le Efa. (2 Petro 2:5) Ka ntle le pelaelo Abele o ile a lemoga mafelelo a bolayago ao a lego ka go yena a sebe sa leabela. (Genesi 2:16, 17; 3:6, 7; Ba-Roma 5:12) Le gona, go bonala a ile a lemoga go phethagatšwa ga molao wa Modimo woo o ilego wa tlišetša Adama tapišego ka go dira ka thata gotee le go kwiša Efa bohloko kudu nakong ya ge e le moimana. (Genesi 3:16-19) Ka gona Abele o be a e-na le “kholofêlô ye e tiilexo” ya gore dilo tše dingwe tšeo di boletšwego ke Jehofa di be di tla direga. Tše di be di akaretša mantšu a boporofeta ao a lebišitšwego go motimetši o mogolo Sathane ge Modimo a be a botša Noga gore: “Le xôna ke bea lehlôyô xare xa xaxo le mosadi, le xare xa peu ya xaxo le peu ya xaxwe. Yôna e tlo Xo phšatla hlôxô; ‘me wêna O tlo e loma serêthê.”—Genesi 3:15.

7. (a) Abele o ile a bontšha bjang go lemoga go nyakega ga sehlabelo sa dibe? (b) Ke ka tsela efe yeo ka yona Modimo a ilego a ‘hlatsela dibego tša Abele’?

⁷ Abele o ile a bontšha tumelo go Peu e holofeditšwego ka go tlišetša Modimo sehlabelo sa phoofolo seo ka tsela ya seswantšhetšo se bego se ka emela bophelo bja Abele. Eupja Kaine mogolo wa gagwe yo a se nago tumelo o ile a dira sehlabelo ka merogo yeo e se nago madi. Bjalo ka mmolai, ruri Kaine ka morago ga moo o ile a tšholla madi a Abele. (Genesi 4:1-8) Lega go le bjalo, Abele o hwile a tseba gore Jehofa o be a mo lebelela e le yo a lokilego, e lego gore “Modimo a hlatsêla dibexô tša xaxwe.” Bjang? Ka go amogela sehlabelo sa Abele seo se ilego sa newa ka tumelo. Ka baka la tumelo ya gagwe le go amogelwa ga gagwe ke Modimo, e lego tšeo Pego e Buduletšwego e tšwelago pele e nea bohlatse ka tšona, ruri, ‘Abele o sa dutše a bolela gaešita lege a hwile.’ O ile a bona go nyakega ga sehlabelo sa dibe. Na o dumela sehlabelong sa bohlokwa kudu sa topollo sa Jesu Kriste?—1 Johane 2:1, 2; 3:23.

8. (a) Re ithuta’ng ka tumelo mabapi le go nea bohlatse ga Henoge ka sebete? (b) Henoge o ile a ‘tlošwa bjang e le gore a se ke a bona lehu’?

⁸ Tumelo e tla re tutueletša gore re bolele molaetša wa Modimo ka sebete. (Bala Ba-He-bere 11:5, 6.) Hlatse ya pele ya Jehofa, e lego Henoge o ile a bolela e sa le pele ka sebete ka go tla ga kahlolo ya Modimo godimo ga lefase leo le sa boifego Modimo. (Juda 14,15) Ka ntle le pelaelo manaba a Henoge a be a tsoma go mmolaya, eupja Modimo ‘o ile a mo tloša’ e le gore a se ke a kwa bohloko bja lehu. (Genesi 5: 24) Lega go le bjalo, sa pele “ó hlatsetšwe xore ó be a kxahla Modimo.” Go bjalo bjang? “Tumêlô ké ka yôna xe Henoxe a tlošwa a se bonê lehu.” Ka mo go swanago, Paulo o ile a tlošwa goba “a rotošetšwa Paradeiseng,” e lego mo go bonalago a be a amogela pono ya paradeise ya moya ya nako e tlago ya phuthego ya Bokriste. (2 Ba-Korinthe 12:1-4) Ka gona, go bonala eka Henoge o be a thabela pono ya Paradeise e tlago ya lefase ge Jehofa a mo robatša lehung, a šireleditšwe diatleng tša manaba. Gore re kgahliše Modimo, le rena ka go swana le Henoge re swanetše go bolela molaetša wa Modimo ka sebete. (Ditiro 4:29-31) Le gona re swanetše go dumela gore Modimo o gona “le xore ba ba Mo nyakaxo ó a ba putsa.”

9. Tsela ya Noage e ile ya bontšha bjang gore go latela ditaelo tša Modimo ka kelohloko ke sebopego se sengwe sa tumelo?

⁹ Go latela ditaelo tša Modimo ka kelohloko ke sebopego se sengwe sa tumelo. (Bala Ba-Hebere 11:7.) Noage ka tumelo o ile a dira “ka mo Modimo a mo laetšexo ka xôna.” (Genesi 6:22; 7:16) Noage o ile a amogela temošo ya Modimo ya “tše di bexo di sešo tša bônwa” gomme o ile a dumela mantšu a Jehofa a gore meetse-fula a lefase ka bophara a be a tla tla. Noage ka tumelo le ka poifo ya tlhompho ya go boifa Modimo, ‘o ile a aga areka e le gore a phološe lapa la gagwe.’ Ka go kwa le ka mediro ya go loka, o ile a sola lefase leo le sa dumelego ka baka la mediro ya lona e kgopo gomme a bontšha gore le swanetšwe ke tshenyego.—Genesi 6:13-22.

10. Gaešita lege Noage a be a aga areka, fela o ile a ipha nako ya go dira modiro ofe o mongwe?

¹⁰ Le gona Noage e be e le e mongwe wa Dihlatse tša Jehofa ka gore e be e le “sexoeledi sa tokô.” (2 Petro 2:5) Gaešita lege a be a swaregile ka go aga areka, fela o ile a ipha nako ya go bolela, go etša ge Dihlatse tša Jehofa di dira lehono. Ka kgonthe, Noage o ile a bolela ka sebete e le segoeledi sa temošo ya Modimo go batho bao ba pele ga meetse-fula, eupja “ba be ba sa šetše selo; meetse-fula a bá a tla, a ba tšea ka moka.”—Mateo 24:36-39.

Tumelo ya Bapatriareka ba ka Morago ga Meetse-fula

11. (a) Aborahama o ile a bontšha bjang gore tumelo e akaretša go ba le kholofelo e tletšego dikholofetšong tša Jehofa? (b) Ka tumelo, Aborahama o ile a letela “motse” ofe?

¹¹ Tumelo e akaretša kholofelo e feletšego go dikholofetšo tša Jehofa. (Bala Ba-Hebere 11: 8-12.) Ka tumelo Aborahama (Aborama) o ile a kwa taelo ya Modimo gomme a tloga Uri ya ba-Kaladea, e lego motse woo o bego o tletše ka mahumo a dilo tše di bonagalago. O ile a dumela kholofetšo ya Jehofa ya gore “dithšaba ka moka tša lefase” di tla itšhegofatša ka yena le gore bana ba gagwe ba tla newa naga. (Genesi 12:1-9; 15:18-21) Isaka morwa wa Aborahama le setlogolwana sa gagwe Jakobo e be “e le bôna ba xo tlo ja bohwa byoo ba holofeditšwego byona.” Ke ka tumelo ge Aborahama “a diilêla naxeng yeo a e holofeditšwexo, ya ba byalo ka e ke xa se naxa ya xaxwe.” O be a letetše “motse wó o tlo xo thêwa wa tia, woo mothei le moaxi wa wona e lexo Modimo.” Ee, Aborahama o ile a letela Mmušo wa legodimo wa Modimo woo ka tlase ga wona a tlago go tsošetšwa bophelong mo lefaseng. Na Mmušo o na le karolo e bohlokwa kudu gakaakaa bophelong bja gago?—Mateo 6:33.

12. Ke’ng seo se ilego sa direga ka gobane Sara a be a e-na le tumelo dikholofetšong tša Jehofa?

¹² Basadi ba bapatriareka bao ba boifago Modimo le bona ba be ba dumela dikholofetšong tša Jehofa. Ka mohlala, ka tumelo Sara mosadi wa Aborahama, gaešita lege e be e le moopa go fihlela a e-na le nywaga e ka bago e 90 gomme “a fetilwe ke lebaka,” ruri o ile a newa matla a go “ba mmaxo sethšaba, . . . xobane o be a re: E [Modimo] a nkholofeditšexo o a botêxa.” Ge nako e dutše e tšwela pele, Sara o ile a belega Isaka. Ka gona, go Aborahama yo a nago le nywaga e 100, yo e bego “e le wa mmele o hwilexo” mabapi le pelego, ruri mafelelong go ile gwa tšwa ‘bontši bjo bo lekanago le dinaledi tša legodimo.’—Genesi 17:15-17; 18:11; 21:1-7.

13, 14. (a) Gaešita lege Aborahama, Isaka le Jakobo ‘ba se ba ka ba bona phethagatšo ya dikholofetšo,’ ba ile ba itshwara bjang? (b) Re ka holega bjang ka go ela hloko potego ya bapatriareka go Jehofa gaešita lege re sa bone phethagatšo ya kapejana ya dikholofetšo tša gagwe?

¹³ Tumelo e tla re dira gore re be bao ba botegago go Jehofa gaešita lege e ba re sa bone phethagatšo ya kapejana ya dikholofetšo tša gagwe. (Bala Ba-Hebere 11:13-16.) Bapatriareka ba botegago ka moka ba ile ba hwa ba sešo ba bona phethagatšo e tletšego ya dikholofetšo tša Modimo go bona. Eupja “ba di bônê [dilo tše holofeditšwego] di le kxôlê ba di thabêla, ba ipolêla ba re: Re baeng le ba ba diiletšexo lefaseng.” Ee, ba phetše maphelo a bona ka tumelo, ka gobane meloko e ile ya feta pele ga ge Naga ya Kholofetšo e e-ba bohwa bja ditlogolwana tša Aborahama.

¹⁴ Therešo ya gore ga se gwa ka gwa ba le phethagatšo ya dikholofetšo tša Modimo nakong ya ge ba be ba sa phela ga se ya ka ya befediša Aborahama, Isaka le Jakobo goba ya ba dira gore ba fetoge bahlanogi. Ga se ba ka ba lahla Jehofa gomme ba boela Uri le go ba bao ba nweletšego medirong ya lefase. (Bapiša le Johane 17:16; 2 Timotheo 4:10; Jakobo 1:27; 1 Johane 2:15-17.) Aowa, bapatriareka bao ba be ba ‘holofetše’ lefelo leo le lego kaone kudu go feta Uri, e lego ‘leo le lego kua legodimong.’ Ka gona, Jehofa ‘ga a itšimeletše go bitšwa Modimo wa bona.’ Ba ile ba tšwela pele ba dumela go Yo Godimo-dimo go fihlela lehung gomme go se go ye kae ba tla tsošetšwa bophelong mo lefaseng, go karolo ya pušo ya “motse,” e lego Mmušo wa Mesia woo Modimo a ba lokišeditšego wona. Eupja go thwe’ng ka wena? Gaešita lege o ile wa ‘tšea ka tsela ya therešo’ ka nywaga e mentši, gomme wa tšofalela tirelong ya Jehofa, ruri o swanetše go kgomarela kholofelo ya gago tshepedišong e mpsha ya gagwe e holofeditšwego. (3 Johane 4; 2 Petro 3:11-13) A moputso o mobotse gakaakang woo wena le bapatriareka bao ba botegago ba tumelo le tlago go o amogela bakeng sa tumelo e bjalo!

15. (a) Ke’ng seo kudu-kudu se ilego sa dira gore Aborahama a kgone go gafa Isaka e le sehlabelo? (b) Tumelo ya rena e swanetše go kgongwa bjang ke tiragalo yeo e akaretšago Aborahama le Isaka? (c) Keng seo se ilego sa swantšhetšwa ka tsela ya boporofeta ka tiragalo yeo?

¹⁵ Go kwa Modimo ka ntle le tika-tiko ke sebopego sa bohlokwa sa tumelo. (Bala Ba-He-bere 11:17-19.) Ka gobane Aborahama a be a e-kwa Jehofa ka ntle le go dika-dika, o ile “a tliša Isaka xore e be [sehlabelo],” “motswalwa-esi” wa gagwe, e lego yena a nnoši yo a bilego le yena ka Sara. Aborahama o be a ka dira se bjang? Ke ka gobane “mo pelong ya xaxwe a re: Modimo le xo tsoša mohu [Isaka] o a kxona,” ge e ba go nyakega gore a phethagatše kholofedišo ya peu ka yena. Thipa yeo Aborahama a bego a e swere e be e ka fediša bophelo bja Isaka gatee-tee, eupja lentšu la morongwa le ile la thibela se. Ka gona, Aborahama o ile a amogela Isaka a tsogile bahung ‘ka tsela ya seswantšhetšo.’ Le rena ka mo go swanago re swanetše go tutueletšwa go kwa Modimo ka tumelo gaešita lege bophelo bja rena goba bjoo bja bana ba rena bo le kotsing. (1 Johane 5:3) Le gona, ke gabohlokwa gore Aborahama le Isaka mo nakong yeo ba ile ba bontšha ka tsela ya boporofeta kamoo Jehofa Modimo a bego a tla gafa ka gona Morwa wa gagwe yo a tswetšwego a nnoši Jesu Kriste e le topollo gore bao ba bontšhago tumelo go yena ba ka ba le bophelo bjo bo sa felego.—Genesi 22:1-19; Johane 3:16.

16. Mabapi le bana ba rena le go dumela dikholofetšong tša Modimo, ke mohlala ofe woo bapatriareka ba ilego ba o nea?

¹⁶ Ge e ba re e-na le tumelo, gona re tla thuša bana ba rena gore ba holofele seo Modimo a se holofetšago bakeng sa nako e tlago. (Bala Ba-Hebere 11:20-22.) Tumelo ya bapatriareka e be e tiile kudu mo e lego gore gaešita lege dikholofetšo tša Jehofa go bona di se tša sa phethagatšwa ka botlalo nakong ya ge ba be ba sa phela, ba ile ba fetišetša dikholofetšo tše go bana ba bona e le bohwa bjo bo ratwago. Ka gona, ‘Isaka o ile a šegofatša Jakobo le Esau ka tša go tlo tla,’ gomme nakong ya ge Jakobo a e-hwa o ile a bolela ditšhegofatšo go barwa ba Josefa, e lego Efuraimi le Manase. Ka gobane Josefa ka noši a be a e-na le tumelo e tiilego ya gore ba-Isiraele ba be ba tla tloga Egipita go ya nageng e holofeditšwego, o ile a eniša banababo gore ba be ba tla rwala marapo a gagwe ge ba tloga. (Genesi 27:27-29, 38-40; 48:8-22; 50:24-26) Na o thuša lapa la gago gore le hlagolele tumelo e swanago go seo Jehofa a se holofeditšego?

Tumelo e re Dira Gore re Bee Modimo Pele

17. Batswadi ba Moše ba ile ba dira bjang ka tumelo?

¹⁷ Tumelo e re tutueletša gore re bee Jehofa le batho ba gagwe pele ga selo lege e le sefe seo lefase le le se neago. (Bala Ba-Hebere 11:23-26.) Ba-Isiraele e be e le mathopja ao a bego a nyaka go hunollwa bohlankeng bja Egipita nakong ya ge batswadi ba Moše ba ile dira ka tumelo. ‘Ga se ba ka ba boifa molao wa kgoši’ wa gore go bolawe bana ba bašemanyana ba ba-Hebere ge ba be ba belegwa. Go e na le moo, ba ile ba uta Moše ka dikgwedi tše tharo gomme mafelelong ba mo tsentšha ka gare ga sešegwana sa mahlaka gomme ba se bea lehlakanokeng leribeng la Noka ya Nile. Morwedi wa Farao o ile a mo hwetša, gomme ‘a godišwa e le morwa wa gagwe.’ Lega go le bjalo, mathomong Moše o ile a fepja le go tlwaetšwa moyeng ka lapeng la tatagwe le mmagwe, e lego Amorama le Jogebeda. Ka gona, e le setho sa lapa la Farao, o ile a “rutwa mabohlale ohle a Ba-Egipita” gomme a ba “yo matla xo direng le ditabeng,” a ba yo matla kgopolong le mmeleng.—Ditiro 7:20-22; Ekisodo 2:1-10; 6:20.

18. Ka baka la tumelo ya gagwe, ke boemo bofe bjoo Moše a ilego a bo tšea ge e le ka borapedi bja Jehofa?

¹⁸ Lega go le bjalo, thuto ya Egipita le botse bja mahumo a dilo tše bonagalago a ngwako wa bogoši ga se tša ka tša dira gore Moše a lahle borapedi bja Jehofa gomme a fetoga mohlanogi. Go e na le moo, e bile “ka tumêlô xe Mošê mola à xodile à xana xo bitšwa morwa wa morwedi wa Farao,” e lego tsela yeo a ilego a e diriša ge a be a namolela mo-Hebere wa gabo. (Ekisodo 2:11, 12) Moše o ile a kgetha “xo thatafalêlwa le sethšaba sa Modimo [barapedi-gotee le yena ba Jehofa ba ba-Isiraele], a nyatša maiphsinô a lebaka leno.” Ge e ba o le mohlanka yo a kolobeditšwego wa Jehofa yo a nago le motheo o tiilego wa tlwaetšo e botse ya moya, na o tla latela mohlala wa Moše gomme wa emela borapedi bja therešo ka go tia?

19. (a) Go bonagala bjang gore Moše o ile a bea Jehofa le batho ba Gagwe pele bophelong? (b) Mose o ile a lebelela pele go hwetša moputso wa eng?

¹⁹ Moše o ile a dira go gontši le batho ba Jehofa ka gobane “a bôna xo nyatšwa wa Kriste e le lehumô le le phalaxo matsaka a Egipita.” Ruri Moše ‘o ile a bona go nyatšwa ka go ba motho wa kgale wa go swana le Kriste goba Motlotšwa wa Modimo e le mahumo a magolo ao a fetago mahumo a Egipita.’ Ka ge e be e le setho sa lapa la bogoši, ruri a ka be a ile a ba le lehumo le botumo kua Egipita. Eupja o ile a bontšha tumelo gomme “a lebelela ka go phegelela moputsong,” e lego bophelo bjo bo sa felego ka go tsošetšwa mo lefaseng tshepedišong e mpsha ya Modimo e holofeditšwego.

20. Ke selo sefe seo se lego gona mabapi le phihlelo ya Moše seo se bontšhago gore tumelo e re dira gore re se boife re le bahlanka ba Jehofa?

²⁰ Tumelo e re dira gore re se boife ka gobane re holofela Jehofa e le monamoledi. (Bala Ba-Hebere 11:27-29.) Farao ka morago ga go kwa gore Moše o bolaile mo-Egipita, o ile a tsoma go mmolaya. “Xomme Mošê a thšaba Farao, a y’o dula naxeng ya Midiane.” (Ekisodo 2:11-15) Ka gona, Paulo go bonala a šupa taba ya go Khuduga ga ba-Hebere ka morago Egipita ge a re: “Ké ka tumêlô xe a [Moše] khuduxa Egipita a sa boife boxale bya kxoši [yo a ilego a mo holofetša go mmolaya ka baka la go ba moemedi wa Modimo legatong la ba-Isiraele], a xômarêla Eo a sa bonwexo byalo ka e ke ó a mmôna.” (Ekisodo 10:28, 29) Gaešita lege Moše le ka mohla a se a ka a bona Modimo e le ka kgonthe, fela go dirišana ga Jehofa le yena e be e le ga kgonthe mo e lego gore o ile a dira mo e ka rego o be a bona “Eo a sa bonwexo.” (Ekisodo 33:20) Na kwano ya gago le Jehofa ke e tiilego kudu ka tsela yeo?—Psalme 37:5; Diema 16:3.

21. Ge e le ka go khuduga ga ba-Isiraele Egipita, ke’ng seo se ilego sa direga “ka tumêlô”?

²¹ Pele ga ge ba-Isiraele ba ka tloga Egipita, e bile “ka tumêlô xe a [Moše] bea Paseka le xo fokêla madi, xore E a bolayaxo maitšibulô a se kê a ba [maitšibulo a ba-Isiraele] xobatša.” Ee, go ile gwa nyakega tumelo gore go swarwe Paseka ka kholofelo ya gore barwa ba maitšibulo ba Isiraele ba be ba tla šireletšwa ge bao ba ba-Egipita ba be ba tla hwa, gomme tumelo ye e ile ya putswa. (Ekisodo 12:1-39) Le gona “ké ka tumêlô xe [batho ba Isiraele ba] sela Lewatlê le lehubedu lè swana lè naxa ye e omilexo; Ba-Egipita ba leka ba betwa.” A monamoledi yo botse gakaakang yo Modimo a ipontšhitšego e le yena! Le gona, ka baka la go namolelwa mo, ba-Isiraele ba ile ba ‘thoma go boifa Jehofa, ba dumela yena le Moše mohlanka wa gagwe.’—Ekisodo 14: 21-31.

22. Ke dipotšišo dife tšeo di sa šaletšego gore di hlahlobje mabapi le tumelo?

²² Tumelo ya Moše le ya bapatriareka ke mohlala e le ka kgonthe go Dihlatse tša Jehofa lehono. Eupja go ile gwa direga’ng ge Modimo a be a dirišana ka go tšwela pele le ditlogolwana tša Aborahama e le setšhaba seo se rulagantšwego ka pušo ya legodimo? Re ka ithuta’ng medirong e oketšegilego ya tumelo mehleng ya kgale?

O tla Araba Bjang?

◻ Tumelo ke eng?

◻ Mohlala wa Henoge o re ruta eng mabapi le tumelo?

◻ Bapatriareka bao ba boifago Modimo ba ile ba bontšha bjang gore tumelo e akaretša go ba le kholofelo e feletšego dikholofetšong tša Jehofa?

◻ Ke mogato ofe ogatilwego ke Aborahama wo o bontšhago gore go kwa Modimo ka go se dika-dike ke sebopego sa bohlokwa sa tumelo?

◻ Ke ditiro dife tša Moše tšeo di bontšhago gore tumelo e bolela go bea Jehofa le batho ba Gagwe pele ga selo lege e le sefe seo lefase le se neago?