‘Go Sepela Ka Tumelo, E Sego Ka Pono’

“Re sepela ka tumelo, e sego ka pono.”—2 BA-KORINTHE 5:7, NW.

1. ‘Go sepela ka tumelo’ go bolela’ng?

NAKO e nngwe le e nngwe re rapela ka go dumelelana le ditaelo tše di ngwadilwego Lentšung la Modimo, re bontšha gore bonyenyane re na le tekanyo e itšego ya tumelo. Ge re thoma go nea bohlatse go ba bangwe ka Mmušo wa Modimo, se le sona se bontšha tumelo. Le gona ge re neela maphelo a rena go Jehofa, re nea bohlatse bja gore re kganyoga go ‘sepela ka tumelo,’ ke gore, go phegelela tsela ya bophelo yeo e laolwago ke tumelo.—2 Ba-Korinthe 5:7; Ba-Kolose 1:9, 10.

2. Ke ka baka la’ng go tšea karolo medirong ya phuthego e sa tloge e le bohlatse bja gore motho o na le tumelo?

² Ge e ba ruri re tla phela ka mokgwa o bjalo, re nyaka tumelo e theilwego motheong o mobotse. (Ba-Hebere 11:1, 6) Batho ba bantši ba gogelwa go Dihlatse tša Jehofa ka baka la ditekanyetšo tše phagamego tša boitshwaro le lerato tšeo ba di bonago gare ga Dihlatse. Ao ke mathomo a mabotse, eupša ga go bolele gore batho ba bjalo ba na le tumelo. Ba bangwe ba ka ba le molekane wa lenyalo goba motswadi yo a tiilego tumelong, gomme ba ka kopanela medirong e mengwe yeo e dirwago ke yoo yo ba mo ratago. Go ba le tutuetšo e bjalo ka legaeng la motho ruri ke tšhegofatšo, eupša se le sona ga se seo se tšeago legato la lerato la motho ka noši go Modimo le go ba le tumelo ga motho ka noši.—Luka 10:27, 28.

3. (a) Gore re be le tumelo e theilwego motheong o mobotse, ke go kgodišega gofe moo re swanetšego go ba le gona re le motho ka noši mabapi le Beibele? (b) Ke ka baka la’ng batho ba bantši ba kgodišega ka go budulelwa ga Beibele gabonolo kudu go feta kamoo ba bangwe ba dirago ka gona?

³ Bao ba sepelago ka tumelo e le ka kgonthe ba kgodišega ka mo go feletšego gore Beibele ke Lentšu la Modimo. Go na le bohlatse bjo bontši kudu bja gore Mangwalo a Makgethwa ruri ke “ma-hebetšwa-ke-Modimo.”a (2 Timotheo 3:16) Ke bohlatse bjo bo kaaka’ng bja bjo bjo bo swanetšego go hlahlobja pele motho a ka kgodišega? Seo se ka ithekga ka setlogo sa gagwe. Seo se kgotsofatšago motho yo mongwe ka mo go tletšego mo gongwe se ka no se kgodiše yo mongwe. Mabakeng a mangwe gaešita le ge motho a bontšhitšwe bohlatse bjo bontši bjo bo sa ganetšegego, mo gongwe o sa dutše a ka gana phetho yeo bo lebišago go yona. Ka baka la’ng? Ka baka la dikganyogo tšeo di ikepetšego tlase pelong ya gagwe. (Jeremia 17:9) Ka go rialo, le ge motho a ka ipolela gore o kgahlegela morero wa Modimo, pelo ya gagwe e ka kganyoga go amogelwa ke lefase. Mo gongwe a ka no se rate go lahla mokgwa wa go phela wo o lwantšhanago le ditekanyetšo tša Beibele. Lega go le bjalo, ge e ba motho a swerwe ke tlala e le ka kgonthe bakeng sa therešo, ge e ba e le yo a tlogago a botega, le ge e ba e le yo a ikokobeditšego, ge nako e dutše e e-ya o tla lemoga gore Beibele ke Lentšu la Modimo.

4. Gore motho a be le tumelo, ke eng seo se nyakegago go yena?

⁴ Gantši ka lebakanyana la dikgwedi tše sego kae, batho bao ba thušwago go ithuta Beibele ba lemoga gore ba šetše ba bone bohlatse bjo bontši kudu bja gore ke Lentšu la Modimo. Ge e ba se se ba tutueletša go bula pelo ya bona gore ba rutwe ke Jehofa, gona dikgopolo tša bona tša ka gare-gare, dikganyogo tša bona le maikemišetšo a bona di tla tutuetšwa ke seo ba ithutago sona ganyenyane-ganyenyane. (Psalme 143:10) Ba-Roma 10:10 e bolela gore motho o bontšha tumelo “ka pelo.” Tumelo e bjalo e bontšha kamoo motho a tlogago a ikwa ka gona gomme e tla bonagatšwa tseleng ya gagwe ya go phela.

Noage o Gatile Mogato ka Tumelo e Theilwego Motheong o Mobotse

5, 6. Tumelo ya Noage e be e theilwe go eng?

⁵ Noage e be e le yo mongwe yo a bego a e-na le tumelo e theilwego motheong o mobotse. (Ba-Hebere 11:7) O be a e-na le lebaka lefe la go ba le yona? Noage o be a e-na le lentšu la Modimo, e sego ka sebopego se se ngwadilwego, eupša e le le boletšwego go yena. Genesi 6:13 e re: “Ké mo Modimo a boletšexo le Noaxe a re: Bofêlô bya nama ka moka bo tlile, ka xobane mo batho ba tlaxo xôna, lefase le tlala tša sehloxo.” (Mongwalo o sekamego ke wa rena.) Jehofa o ile a laela Noage gore a age areka gomme a mo nea ditaba ka botlalo mabapi le go agwa ga yona. Ke moka Modimo a oketša ka gore: “Xe e le Nna, O tsebê xore ke tlo tliša meetse-fula mo lefaseng, e bê a xo fetša nama ka moka e naxo le môya wa xo phela, e lexo ka tlase xa lexodimo; tšohle tše di lexo lefaseng di tlo lôba.”—Genesi 6:14-17.

⁶ Na go be go kile gwa ba le pula pele ga mo? Beibele ga e bolele ka seo. Genesi 2:5 (PK) e re: “Jehofa Modimo o be a sešo a neša pula.” Eupša ke kamoo Moše yo a phetšego nywaga-kgolo ka morago, a bolelago ditaba ka gona ge a ahla-ahla, e sego mehla ya Noage eupša nako e telele pele ga moo. Bjale ka ge go bontšhitšwe go Genesi 7:4, Jehofa o boletše ka pula ge a bolela le Noage gomme go bonala Noage a kwešišitše seo a bego a se bolela. Fela, tumelo ya Noage e be e se go seo a bego a ka kgona go se bona. Moapostola Paulo o ngwadile gore Noage o be “à laetšwe ke Modimo, a botšwa tše di bexo di sešo tša bônwa.” Modimo o boditše Noage gore O be a tlo tliša “meetse-fula” godimo ga lefase, goba “lewatle la legodimo” go etša ge mongwalo wa ka tlase wa New World Translation o bontšha se go Genesi 6:17. Go ba go fihla nakong yeo, selo se se bjalo le ka mohla se be se se sa ka sa direga. Eupša tlholo ka moka e bonagalago go Noage e dirile e le pontšho e lego molaleng ya gore Modimo ka kgonthe o be a ka tliša meetse-fula a bjalo a senyago. Noage ka go tutuetšwa ke tumelo o ile a aga areka.

7. (a) Ke eng seo Noage a bego a sa se nyake e le gore a dire seo Modimo a bego a mo laetše sona? (b) Re holwa bjang ke go naganišiša ka tumelo ya Noage, gomme tumelo ya rena e ka ba tšhegofatšo bjang go ba bangwe?

⁷ Modimo o be a se a nea Noage tšatši-kgwedi yeo Meetse-fula a bego a tla thoma ka yona. Eupša Noage ga se a ka a diriša seo e le lebaka la go itšhireletša bakeng sa go amogela boemo bja kgopolo bja gore leta o bone, a šuthišetša go aga areka le go dira boboledi lefelong la bobedi bophelong bja gagwe. Ka nako e lekanego, Modimo o ile a botša Noage nako yeo a swanetšego go tsena ka arekeng ka yona. Kgabagareng, “Noaxe a dira tšôna-tšeo tšohle, a di dira ka mo Modimo a mo laetšexo ka xôna.” (Genesi 6:22) Noage o ile a sepela ka tumelo, e sego ka pono. Re leboga gakaakang gore o ile a dira bjalo! Re a phela lehono ka baka la tumelo ya gagwe. Boemong bja rena le gona, tumelo yeo re e bontšhago e ka ba le mafelelo a magolo go seo bokamoso bo re swaretšego sona e sego rena feela eupša gape le bana ba rena le batho ba bangwe bao ba re dikologilego.

Tumelo ya Aborahama

8, 9. (a) Aborahama o be a theile tumelo ya gagwe go eng? (b) Jehofa “ó ipônaditše” go Aborahama ka tsela efe?

⁸ Ela hloko mohlala o mongwe—e lego wa Aborahama. (Ba-Hebere 11:8-10) Aborahama o be a theile tumelo ya gagwe go eng? Tikologo yeo a goletšego go yona kua Uri ya ba-Kaladea e be e le ya borapedi bja medimo ya diswantšho le ya go rata dilo tše di bonagalago. Eupša ditutuetšo tše dingwe di ile tša kgoma pono ya Aborahama. Ga go pelaelo gore o be a ka tlwaelana le morwa wa Noage e lego Seme, yoo nako ya go phela ga gagwe e bego e sepedišana le ya gagwe ka nywaga e 150. Aborahama o ile a kgodišega gore Jehofa ke “Modimo yo xodimo-dimo, Mohlodi wa lexodimo le lefase.”—Genesi 14:22.

⁹ Selo se sengwe gape se bile le tutuetšo e matla go Aborahama. Jehofa “ó ipônaditše xo Aborahama . . . mola à sa le kua Mesopotamia, à sešo a axa Harane. A mo laêla a re: Tloxêla lefase la xeno, le metswalô ya xaxo, O yê naxeng ye ke tl’o xo Xo laetša yôna.” (Ditiro 7:2, 3) Jehofa “ó ipônaditše” bjang go Aborahama? Aborahama ga se a ka a bona Modimo ka go lebanya. (Ekisodo 33:20) Lega go le bjalo, go ka direga gore Jehofa o iponaditše go Aborahama ka toro, ka pontšho ya letago yeo e phagametšego tlhago, goba ka motseta goba moemedi yo e lego morongwa. (Bapiša le Genesi 18:1-3; 28:10-15; Lefitiko 9:4, 6, 23, 24.) Go sa šetšwe tsela le ge e le efe yeo Jehofa a iponaditšego go Aborahama ka yona, monna yoo yo a botegago o be a kgodišegile gore Modimo o be a bea tokelo e bohlokwa ka pele ga gagwe. Aborahama o ile a arabela ka tumelo.

10. Jehofa o ile a tiiša tumelo ya Aborahama bjang?

¹⁰ Tumelo ya Aborahama e be e se ya ithekga ka go ba ga gagwe le ditaba ka botlalo mabapi le naga yeo Modimo a bego a mo laela go ya go yona. E be e se ya ithekga ka go tseba ga gagwe nako yeo ka yona a bego a tla newa naga yeo. O be a e-na le tumelo ka gobane a be a tseba Jehofa e le Modimo Ra-matla-ohle. (Ekisodo 6:3) Jehofa o ile a botša Aborahama gore o be a tla ba le bana, eupša ka dinako tše dingwe Aborahama o be a ipotšiša kamoo seo se bego se ka kgonega ka gona. O be a tšofala. (Genesi 15:3, 4) Jehofa o ile a tiiša tumelo ya Aborahama ka go mmotša gore a lebelele godimo dinaleding gomme a di bale ge e ba a be a ka kgona. Modimo o itše: “Bana ba xaxo ba tlo ata ba etša tšôna tšeo.” Aborahama o be a tutuetšegile kudu. Go be go le molaleng gore Mmopi wa makoko ao a boifišago a legodimo o be a ka phethagatša seo a bego a se holofeditše. Aborahama “a dumêla Morêna.” (Genesi 15:5, 6) Aborahama ga se a dumela feela ka gobane a be a rata seo a bego a se kwa; o be a e-na le tumelo e theilwego motheong o mobotse.

11. (a) Ge a be a obelela nywaga e 100, Aborahama o ile a arabela bjang kholofetšong ya Modimo ya gore Sara yo a tšofetšego o be a tla belega morwa? (b) Ke ka tumelo ya mohuta mang Aborahama a ilego a lebeletšana le teko yeo e bego e akaretšwa go išeng morwa wa gagwe Thabeng ya Moriya bakeng sa go mo gafa e le sehlabelo?

¹¹ Ge Aborahama a be a obelela nywaga e 100 gomme Sara mosadi wa gagwe a obelela nywaga e 90, Jehofa o ile a bolela kholofetšo ya gagwe gape ya gore Aborahama o be a tla ba le morwa ka Sara. Aborahama o ile a naganišiša ka mo go tseneletšego ka boemo bja bona. “Kholofedišô ya Modimo xa a ka a e belaêla ka xo se dumêle; sa xaxwe ya ba xo tiêla tumêlô le xo xodiša Modimo. À kxodilwe ruri xore Modimo ó na le matla a xo dira se a mo holofedišitšexo sôna.” (Ba-Roma 4:19-21) Aborahama o be a tseba gore kholofetšo ya Modimo e ka se ke ya palelwa. Ka baka la tumelo ya gagwe, ka morago Aborahama o ile a kwa ge Modimo a be a mmotša gore a iše morwa wa gagwe Isaka nageng ya Moriya gomme a mo gafe e le sehlabelo. (Genesi 22:1-12) Aborahama o be a e-na le kholofelo e tletšego ya gore Modimo yo a ilego a kgona go dira gore morwa yoo a belegwe ka mohlolo o be a ka kgona le go mmušetša bophelong e le gore a phethagatše dikholofetšo tše dingwe gape tšeo A di holofeditšego mabapi le yena.—Ba-Hebere 11:17-19.

12. Aborahama o ile a tšwela pele a sepela ka tumelo ka lebaka le le kaaka’ng, gomme ke moputso ofe o mo letetšego le ditho tša lapa la gagwe tše di bontšhitšego tumelo e tiilego?

¹² Aborahama o ile a bontšha gore o be a laolwa ke tumelo e sego feela maemong a itšego, eupša bophelong bja gagwe ka moka. Nakong ya go phela ga gagwe, Aborahama ga se a ka a amogela go tšwa go Modimo karolo le ge e le efe ya Naga ya Kholofetšo e le bohwa. (Ditiro 7:5) Lega go le bjalo, Aborahama ga se a ka a fela matla gomme a boela Uri ya ba-Kaladea. Ka nywaga e 100, go ba go fihla lehung la gagwe, o ile a dula ditenteng nageng yeo Modimo a bego a mo laetše gore a ye go yona. (Genesi 25:7) Mabapi le yena le mosadi wa gagwe Sara, morwa wa bona Isaka le setlogolo sa bona Jakobo, Ba-Hebere 11:16 e re: “Ké xôna Modimo a sa itšimeletšexo xo bitšwa Modimo wa bôná; xobane ó ba axetše motse.” Ee, Jehofa o na le lefelo la bona karolong ya lefase ya Mmušo wa gagwe wa Mesia.

13. Ke bomang gare ga bahlanka ba Jehofa lehono bao ba neago bohlatse bja go ba le tumelo yeo e swanago le ya Aborahama?

¹³ Lehono go na le bao gare ga batho ba Jehofa ba swanago le Aborahama. Ba ile ba sepela ka tumelo ka nywaga e mentši. Ka matla ao Modimo a a neago, ba ile ba fenya mapheko a swanago le dithaba. (Mateo 17:20) Ga ba tekeme tumelong ka gobane ba sa tsebe gabotse-botse gore ke neng moo Modimo a tlago go ba nea bohwa bjo a bo holofeditšego. Ba a tseba gore lentšu la Jehofa le ka se ke la palelwa, gomme ba go tšea e le tokelo e bohlokwa kudu go balelwa gare ga Dihlatse tša gagwe. Na ke kamoo o ikwago ka gona?

Tumelo Yeo e Tutueditšego Moše

14. Tumelo ya Moše e be e theetšwe motheo bjang?

¹⁴ Mohlala o mongwe wa tumelo ke Moše. Motheo wa tumelo ya gagwe e be e le eng? O be o theilwe boseeng. Gaešita le ge morwedi wa Farao a hweditše Moše ka lepokising la phaphirase leribeng la Noka ya Nile gomme a mo tšea bjalo ka morwa wa gagwe, mmago Moše ka noši wa mo-Hebere e lego Jogebede, o ile a amuša mošemane le go mo hlokomela nywageng ya gagwe ya ge e sa le yo monyenyane. Jogebede go bonala a ile a mo ruta gabotse, a mediša ka go yena lerato la go rata Jehofa le tebogo ya go leboga dikholofetšo tša Gagwe go Aborahama. Ka morago, bjalo ka setho sa lapa la Farao, Moše o ile “a rutwa mabohlale ohle a Ba-Egipita.” (Ditiro 7:20-22; Ekisodo 2:1-10; 6:20; Ba-Hebere 11:23) Lega go le bjalo, go sa šetšwe boemo bja gagwe bjo bo hlomphegago, pelo ya Moše e be e le go batho ba Modimo bao ba dirilwego makgoba.

15. Go itlhaola le batho ba Jehofa go be go bolela eng go Moše?

¹⁵ Ngwageng wa gagwe wa bo-40, Moše o ile a bolaya mo-Egipita e le gore a namolele mo-Isiraele yo a bego a swerwe ka go hloka toka. Tiragalo ye e bontšhitše kamoo Moše a bego a lebelela batho ba Modimo ka gona. Ka kgonthe, “ké ka tumêlô xe Mošê mola à xodile à xana xo bitšwa morwa wa morwedi wa Farao.” Go e na le go kgomarela “thabišo ya dibe ka lebakanyana” (PK) e le setho sa kgoro ya Egipita, o ile a tutuetšwa ke tumelo gore a itlhaole le batho ba Modimo bao ba bego ba swerwe gampe.—Ba-Hebere 11:24, 25; Ditiro 7:23-25.

16. (a) Ke thomo efe yeo Jehofa a ilego a e nea Moše, gomme Modimo o ile a mo thuša bjang? (b) Tabeng ya go phetha thomo ya gagwe, Moše o ile a bontšha tumelo bjang?

¹⁶ Moše o be a fišegela go gata mogato bakeng sa go imolla batho ba gabo, eupša nako ya Modimo ya go lopollwa ga bona e be e se ya hlwa e fihla. Moše o ile a swanelwa ke go tšhaba Egipita. E bile feela mo e ka bago nywaga e 40 ka morago moo Jehofa ka go diriša morongwa a ilego a laela Moše gore a boele Egipita go yo ntšha ba-Isiraele nageng yeo. (Ekisodo 3:2-10) Moše o ile a arabela bjang? Ga se a ka a bontšha pelaelo ge e le ka go kgona ga Jehofa go phološa Isiraele, eupša o ile a ikwa a sa swanelegele kabelo yeo Modimo a bego a e beile ka pele ga gagwe. Ka lerato, Jehofa o ile a nea kgothatšo yeo Moše a bego a e nyaka. (Ekisodo 3:11–4:17) Tumelo ya Moše e ile ya matlafala. O ile a boela Egipita gomme a lemoša Farao leboelela ba lebantše difahlego ka dikotlo tšeo di bego di tla tlela Egipita ka baka la go palelwa ga mmuši yoo ke go tlogela Isiraele e yo rapela Jehofa. Moše o be a se na matla ao e lego a gagwe a go tliša dikotlo tše bjalo. O be a sepela ka tumelo, e sego ka pono. Tumelo ya gagwe e be e le go Jehofa le lentšung la gagwe. Farao o ile a tšhošetša Moše. Eupša Moše o ile a kgotlelela. “Ké ka tumêlô xe a khuduxa Egipita à sa boife boxale bya kxoši, a xomarêla Eo a sa bonwexo byalo ka e ke ó a mmôna.” (Ba-Hebere 11:27) Moše o be a sa phethagala. O be a dira diphošo. (Numeri 20:7-12) Lega go le bjalo, ka morago ga go rongwa ke Modimo, tsela ya gagwe ya kakaretšo ya go phela e be e laolwa ke tumelo.

17. Go sepela ka tumelo go bile le mafelelo afe go Noage, Aborahama le Moše gaešita le ge ba se ba ka ba phela gore ba bone lefase le lefsa la Modimo?

¹⁷ Eka tumelo ya gago e ka itlhatsela e swana le ya Noage, Aborahama le Moše. Ke therešo gore ga se ba ka ba bona lefase le lefsa la Modimo mehleng ya bona. (Ba-Hebere 11:39) E be e se ya hlwa e e-ba nako ya Modimo e beilwego; go be go sa na le dibopego tše dingwe tša morero wa gagwe tšeo di bego di swanetše go phethagatšwa. Eupša tumelo ya bona lentšung la Modimo ga se ya ka ya tekema gomme maina a bona a pukung ya Modimo ya bophelo.

18. Go bao ba bileditšwego bophelo bja legodimong, ke ka baka la’ng go be go nyakega gore ba sepele ka tumelo?

¹⁸ Moapostola Paulo o ngwadile gore: ‘Modimo o be a re bonetše pele se sengwe se se fetišago.’ Ke gore, Modimo o ile a bonela pele selo se sengwe se sekaone bakeng sa bao ka go swana le Paulo ba bileditšwego bophelong bja legodimong le Kriste. (Ba-Hebere 11:40, PK) Ba e be e le bona bao Paulo a bego a nagana ka bona ka mo go kgethegilego ge a be a ngwala mantšu a begilwego go 2 Ba-Korinthe 5:7 (NW) gore: “Re sepela ka tumelo, e sego ka pono.” Nakong ya ge se se be se ngwalwa, ga go le o tee wa bona yo a bego a šetše a hweditše moputso wa gagwe wa legodimong. Ba be ba ka se kgone go o bona ka mahlo a bona a nama, eupša tumelo ya bona go wona e be e theilwe motheong o mobotse. Kriste o be a tsošitšwe bahung, e lego thaka-ngwaga ya bao ba tlago go šegofatšwa ka bophelo bja legodimong. Le gona dihlatse tša ka godimo ga tše 500 di be di ile tša mmona pele a rotogela legodimong. (1 Ba-Korinthe 15:3-8) Ba be ba e-na le mabaka a lekanego bakeng sa go laola tsela ya bona ka moka ya go phela ka tumelo yeo. Le rena ka mo go swanago re na le mabaka a kwagalago a go sepela ka tumelo.

19. Bjalo ka ge go bontšhitšwe go Ba-Hebere 1:1, 2, Modimo o bolela le rena ka go diriša mang?

¹⁹ Lehono, Jehofa ga a bolele le batho ba gagwe ka go diriša morongwa go etša ge a dirile go Moše sehlareng se se tukago. Modimo o boletše ka go diriša Morwa wa gagwe. (Ba-Hebere 1:1, 2) Seo Modimo a se boletšego ka yena O ile a dira gore se ngwalwe ka Beibeleng, e lego seo se fetoletšwego malemeng a batho go dikologa lefase.

20. Boemo bja rena ke bjo bo kgahlišago gakaaka’ng go feta bja Noage, Aborahama le Moše?

²⁰ Re na le go gontši kudu go feta seo Noage, Aborahama le Moše ba bego ba e-na le sona. Re na le Lentšu la Modimo le le feletšego—bogolo bja lona bo šetše bo phethagaditšwe. Ka baka la sohle seo Beibele e se bolelago ka banna le basadi ba tumelo bao ba ipontšhitšego e le dihlatse tše botegago tša Jehofa ba lebeletšane le diteko tša mehuta yohle, Ba-Hebere 12:1 (PK) e kgothatša ka gore: “A re apoleng boima ka moka, le sebe se se re pitlaganyago ka gohle, gomme re kitimeng ka tiišo tlhabanong yeo re e laetšwego.” Tumelo ya rena ga se selo seo se swanetšego go tšewa gabohwefo. “Sebe se se re pitlaganyago ka gohle” ke go hloka tumelo. Go nyakega go lwa ka matla ge e ba re tla tšwela pele re “sepela ka tumelo.”

[Mengwalo ya tlase]

O ka Hlalosa ka go Re’ng?

◻ ‘Go sepela ka tumelo’ go akaretša’ng?

◻ Re ka holwa bjang ke tsela yeo Noage a bontšhitšego tumelo ka yona?

◻ Tsela yeo Aborahama a bontšhitšego tumelo ka yona e re thuša bjang?

◻ Ke ka baka la’ng Beibele e šupa Moše e le mohlala wa tumelo?

[Seswantšho go letlakala 10]

Aborahama o ile a sepela ka tumelo

[Seswantšho go letlakala 10]

Moše le Arone ba ile ba bontšha tumelo ge ba be ba le pele ga Farao