O Lote Thuto ya Gago ka Mehla
“Itôtê [ka mehla] O lôtê le thutô. Xe O dira byalo O tlo iphološa, wa phološa le bao ba Xo kwaxo.”—1 TIMOTHEO 4:16.
1. Ke ka baka la’ng ye e se nako ya gore re nyefiše modirong wa rena wa go bolela ka Mmušo?
JEHOFA bjale o akgofiša go kgoboketšwa ga batho bao ba swanago le dinku. Ka gona, ka kgonthe ye ga se nako ya gore batho ba gagwe ba nyefiše modirong wa bona wa go bolela ka Mmušo le go dira barutiwa. (Jesaya 60:8, 22; Mateo 24:14; 28:19, 20) Re swanetše go dira ka go dumelelana le moya wa seo Modimo a se dirago mehleng ya rena. Ge bofelo bo dutše bo batamela kudu, re tla ya go magagabo rena leboelela. Ka kgonthe modiro o oketšegilego wa go nea bohlatse wo o dirwago ke bagoeledi ba bantši gakaakaa le babulamadibogo mo nakong ye o tutuetša tšhemo ya lefase. Le gona lebelo la go kgoboketša mo ga lethabo le sa tlile go gola.—Jesaya 60:11; bapiša le Psalme 126:5, 6.
2. (a) Go ya ka Jesaya 40:28-31, ke mothopo ofe wa matla wo re ka ithekgago ka wona bakeng sa matla a nyakegago go fetša modiro wa go bolela ka Mmušo? (b) Lebaka le lebotse la go ela hloko ka mo go oketšegilego boemo bja bodiredi bja rena mo nakong ye ke lefe?
2 Go e na le go ineela go maikwelo lege e le afe a go ba ‘ba lapilego’ ka gobane tšhemo e itšego e akaretšwa gantši, re swanetše go lemoga gore ye ke nako ya gore re rapele Jehofa bakeng sa ‘matla a magolo’ ao a nyakegago bakeng sa go fetša modiro. (Jesaya 40:28-31; 1 Johane 5:14) Ke therešo gore ba dimilione ba “lešaba le lexolo” la “dinku tše dingwê” ba šetše ba kgobokeditšwe. Eupja seo se bego se atlega tabeng ya go thuša batho ba itšego mo gongwe e ka ba seo se sa hlwego se hola tabeng ya go thuša ba bangwe gape ditšhemong tša rena. (Kutollo 7:9, 10; Johane 10:16) Ka gona boemo bja bodiredi bja rena bo nyaka tlhokomelo e oketšegilego.
3. Phišego e mpsha e ka tsenywa bjang bodireding bja rena bja tšhemo?
3 Ka boikemišetšo bjo mpshafaditšwego, re ka swarega tabeng ya go kaonefatša go tšweletša ga rena dienywa bodireding. Se se ka tsenya phišego e mpshafaditšwego tirelong ya rena ya tšhemo. Eupja se se ka dirwa bjang? Ka ‘go itota ka mehla le go lota thuto ya rena,’ e sego go fo dira bodiredi bja rena ka mokgwa wa tlwaelo. (1 Timotheo 4:16) Melomo ya rena e swanetše go nea se se fetišago ‘sehlabelo sa theto’ sa go ithola kgwara. (Ba-Hebere 13:15) Re swanetše go ba le bokgoni modirong wa rena. (Diema 22:29) Ka gona, seo re se nyakago ke go dira tšhemong ya rena ka bokgoni. Tše ke tše dingwe tša dibopego tša bodiredi bja rena tšeo re swanetšego go ‘di ela hloko ka mehla.’
Kamoo go ka Tšweletšwago Tšhemo “e Mpsha”
4. Re ka tšweletša bjang tšhemo “e mpsha” kabelong ya rena ya phuthego?
4 Anke re lebelele boemo ka tsela e nago le tlhaloganyo. Mafelong a mantši, ga go tšhemo e mpsha goba yeo e dirwago ka sewelo. Ka gona ke ka baka la’ng le sa tšweletše tšhemo “e mpsha” kabelong ya phuthego? Bjang? Ee, ge e ba re etela ka mehla, re ka se ke ra itshwara bjalo ka ge eka le ka mohla ga se ra ka ra etela legae leo pele ka go bolela seo re tlwaetšego go se bolela malapeng. Go bonala lega go le bjalo mong wa ntlo a tla re lemoga ge e ba re ile ra akaretša tšhemo leboelela. Puku ya Go Boledišana ka Mangwalo e nea matseno a fetago 40 ao re ka a dirišago bodireding bja rena. Re swanetše go a lokišetša gabotse e le selo se sengwe se sefsa le se se kgahlišago ka go a tswalanya le ditaba tša lefelong leo tša morago bjale tšeo di kgahlišago. Go e na le go ikwa re itshola ka go etela gantši, re swanetše go ba le kgopolo e nepagetšego gomme re dire tšhemo ya rena gore e be “e mpsha” ka dithero tše botse. Eupja na se se tla thuša ge e ba beng ba dintlo ba se na bogwera?
5. (a) Re ka dira bjang gore kgopolo ya nakong e fetilego yeo e sego ya bogwera e re hole? (b) Ke’ng seo o hweditšego e le se se dirago gabotse lefelong la geno? (c) Ke ka baka la’ng go theetša le go reta ka potego e le mo go holago?
5 Go tseba kgopolo ya mong wa ntlo ya nakong e fetilego go ka feleletša ka maikwelo a fošagetšego mabapi le go etela gape. Eupja ke ka baka la’ng o sa dire gore tsebo yeo e go hole? Bjang? Mohlomongwe ka go bolela ka yona pele gomme ka morago wa thea taba go seo se ilego sa bolelwa ketelong ya nakong e fetilego. Mo gongwe o ka re: “Thobela, Mna. Legong!” Ge e ba go bonala go swanela, o ka oketša ka gore: “O ile wa šala bjang?” Ka morago mo gongwe o ka re: “Nakong ya ge ke be ke le mo bekeng e fetilego, o ile wa mpotša gore kereke ya gago e hlokomela tše o di nyakago tša moya ka moka le gore o setho se mafolofolo. Bjalo ka moagišani yo le yena a tšeelago bodumedi godimo, na nka botšiša seo kereke ya gago e se bolelago ka kholofelo ya go phologa ngwageng wa nuclear?” Anke o mo kgopele gore a go botše. Reta mong wa ntlo ge e ba o ka kgona e le ka kgonthe. Go mo theetša le go mo reta go ka fetola kgopolo ya gagwe. Gantši batho ba ka dumela go etelwa gape ge e ba bona ka noši ba ka bolela se sengwe. Ge e le gabotse o tla rata go dumelelanya molaetša wa gago le seo mong wa ntlo a se bolelago.
6. (a) Re ka tlwaetša beng ba dintlo bjang go letela gore re etele ka mehla? (b) Ke dipolelo dife tša motheo tšeo di ka re thušago go atlega? (c) Ke’ng seo se dirago gabotse tšhemong ya lefelong la geno?
6 Ka seo o se bolelago, o ka tlwaetša beng ba dintlo go letela gore re etele ka mehla. Leka gore: “Tama, Moh. Tsebe! O tsoga bjang lehono? Ketelong ye ya go etela magagabo rena, re boledišana ka . . . ” Goba mo gongwe o ka re: “Thobela! Re ketelong ya rena ya ka mehla ya beke le beke. Go a thabiša go boa gape. Baagišani ba gago ba thabetše taba e mpsha yeo re boledišanago ka yona ketelong ye.” Ka gona o tšwele pele. Se le sona se thuša go dira gore tšhemo e be “e mpsha” go wena. Tsela ya go bolela e ka fapana ka tsela e itšego nageng ya geno, eupja se se nea kgopolo-kakaretšo. Ke ka baka la’ng o sa e diriše ka mo go holago?
7. (a) Dihlatse tše dingwe ge di tloga, di lokišeletša bjang mong wa ntlo bakeng sa ketelo e nngwe? (b) Tabeng ye ke’ng seo se dirago gabotse tšhemong ya lefelong la geno?
7 E le gore ba lokišeletše mong a ntlo bakeng sa ketelo e latelago, Dihlatse tše dingwe di ile tša atlega ka go diriša phetho e swanago le ye: “Re lebeletše pele go go etela gape kgaufsinyana.” Go bao ba bego ba bonala ba tšwafa go bolela le wena pele, o ka re: “Ke thabetše poledišano ya rena. O tšweleditše dintlha tše botse. Se se tšere metsotswana e sego kae, lega go le bjalo ga re a ka ra bolela ka ditaba tše mpe tšeo re ka di kwago lege e le neng. E be e tloga e aga.” Ga go pelaelo gore o tla tšweletša ditsela tše dingwe tše swanetšego tša go bolela le beng ba dintlo. Nakong lege e le efe katanela go thuša batho gore ba se gane diketelo tša rena tša ka mehla ka dipolelo tše lokilego, dithero tše botse le go ba le bogwera.
Neela Bohlatse bjo bo Tletšego
8, 9. Ke dikeletšo dife tšeo di neilwego bakeng sa go tsoma ka botlalo bao ba swanelegago?
8 Selo se sengwe seo re ka se elago hloko seo se tlago go re dira gore re dule re fišega kudu ke go tsoma batho ba swanelegago ka mo go tletšego. (Ditiro 8:25; 20:24) Ka mohlala, ngwanabo rena a ka kgopela go bona monna wa ntlo ge e ba mosadi goba ngwana a ka tla mojako mafelo-bekeng goba mantšiboa. Mo gongwe ke mosadi yo re ilego ra bolela le yena ka makga a mantši. Ka gona re ka thoma ka bofsa le lapa leo ka go bolela le hlogo ya lapa. Re ka dumelelanya molaetša le yena ka go bolela dilo tše bjalo ka, “Ke’ng seo o naganago gore se tla kgonthišetša lapa la gago bokamoso bjo thabišago?” goba, “Ela hloko kamoo Beibele e hlohleletšago botee bja lapa.” Reta monna ka dikgopolo tše botse tšeo mo gongwe a ka di tšweletšago.
9 Tsela e nngwe ya go hwetša tšhemo “e mpsha” ke go tsoma ditho tše dingwe tša lapa tšeo di dulago ka ntlong yona yeo, e lego makgolo, motlogolo goba motswala yo a tsenago sekolo le mogadibo yo a dirago gare ga beke. Le gona e bile mo go holago go ela hloko palo ya didirišwa tša go ela mohlagase goba mapokisi a poso legaeng. Tše di ka bontšha moo batho ba mpshafaditšego diphapoši tša ka tlase, goba mafelo a mangwe bakeng sa go a hiriša. Leka go ikopanya le bao ba hirišitšego, e lego barutwana, badiri bao ba sego ba nyala, bahlologadi le ba bangwe. Se le sona se thuša go godiša tšhemo e lego gona.
10. Tsela e nngwe ya go godiša tšhemo ya rena ya ntlo le ntlo ke efe, gomme ke’ng seo ba bangwe ba ilego ba se dira go ikopanya le badiri ba bo-šego?
10 Tsela e nngwe gape ya go godiša tšhemo ya ntlo le ntlo ke go e khutšiša ka dinako tše dingwe ge re dira dibopego tše dingwe tša bodiredi. Bakeng sa dibopego tše fapa-fapanego, mo gongwe re ka dira tšhemo ka mpho e lebanyago ya thuto ya legae ya Beibele e sa lefelelwego. Batho ba bangwe bao ba sego gona gae ge re etela ba ka hwetšwa mafelong a bona a kgwebo goba a modiro. Ka gona go nea bohlatse mafelong a kgwebo e ka ba mo go tšweletšago dienywa kudu. Ba bangwe ba batho ba le bona ba ka fihlelelwa ge e ba re dira modiro wa go nea bohlatse setarateng ka dinako tše swanetšego le tše nago le mafelelo a mabotse. Kua Canada babulamadibogo ba bile le mafelelo a mabotse diketelong tša mantšiboa go bathwalwa diteišeneng tša peterolo tše go tšona modiro o dirwago bošego ka moka, mabenkeleng le dihoteleng moo bo-mapalane ba sego ba swarega kudu ka nako yeo gomme gantši ba thabela se sengwe seo ba ka se balago. Ee, dikgaetšedi kudu-kudu di tla swanelwa ke go phema mafelo a mangwe dinakong tša bošego.
11. (a) Dihlatse tše dingwe di dira’ng moo ba bantši ba sego gona gae ketelong ya mathomo? (b) Ke dienywa dife tšeo go ba mafolofolo tabeng ya go etela magaeng ao go bego go se na batho go ka di tšweletšago tšhemong ya rena gomme ka mafelelo afe bodireding?
11 Go thwe’ng ka bao ba sego gona gae ge re etela? Mo le gona re swanetše go dira modiro ka botlalo. Dihlatse tše dingwe di diriša dipego tša tšona tše di bolokilwego gabotse tša ntlo le ntlo ka tshwanelo ka morago ga modiro wa bona wa ntlo le ntlo gomme ba boela mafelong ao batho ba bego ba se gona gae pejana letšatšing leo. Gantši, beng ba dintlo ba boile gae, goba badiri ba bošego ba tsogile ka nako yeo. Mafelong a mantši ba 50 lekgolong goba ka godimo ga moo ga ba gona gae mosegare. Ka gona ge e le gabotse re ka oketša tšhemo yeo gabedi ka go etela bao ba bego ba se gona gae ka dinako tše fapanego go fihlela re hwetša motho o mongwe gae. Babulamadibogo le bagoeledi ba nago le phihlelo ba dumela gore go ba mafolofolo modirong ge go dirwa magaeng ao go bego go se na batho gantši go tšweletša mafelelo a mabotse go feta kamoo go akaretšwa ga mathomo ga tšhemo go dirago ka gona. Ka go ela hloko sebopego se sa bodiredi bja rena mo gongwe re tla buna ditšhegofatšo tše dintši.—Diema 10:22.
Bao ba Belaelago
12. Re swanetše go itshwara bjang ge batho ba belaela ka gore re etela gantši kudu? Ka baka la’ng?
12 Go ka thwe’ng go batho bao ba belaelago ka gore re ba etela gantši kudu? Godimo ga tšohle re swanetše go bontšha kwešišo. (Mateo 7:12) Go bona, go bonala ekare re boetše ka pela-pela. Eupja, ke mo gobotse go gopola gore gaešita le nywageng e fetilego batho ba be ba re, ‘Le be le le mo bekeng e fetilego,’ mola re tseba gabotse-botse gore e bile dikgweding tše fetilego tše tshelelago goba go feta moo ga e sa le re etela fao. Godimo ga moo, diketelo tša ka mehla di ka tsoša kgahlego. Kua Guadeloupe monna o ile a kitimela Hlatse a re go yona: “E šetše e le dibeke tše dintši ke dutše ke go šeditše. Gantši, ke be ke sa theetše Dihlatse, eupja ke swanetše go tseba lebaka leo ka lona le etelago batho gantši gakaakaa!” Go ile gwa feleletša ka thuto ya Beibele.
13, 14. Badumedi-gotee le rena ba bangwe ba lokiša ditaba bjang ge beng ba dintlo ba belaela?
13 Banababo rena ba bangwe ka botho ba ile ba botša babelaedi letšatši la kgonthe la nakong e fetilego leo ba ilego ba etela ka lona gomme ba sepediša dimakasine tša nakong yeo, ba dira gore se se kwagale ka gore dihlogo di fapana le tša dimakasine tšeo re bego re di swere nakong e fetilego ge re be re etela. Ge re boledišana le beng ba dintlo ba bjalo, re ka re mohlomongwe ba ile ba amogela dikuranta tše dintši le dimakasine ga e sa le go tloga ketelong ya rena ya mafelelo, eupja tše ga se ka mehla moo di bego di swere ditaba tše di lokilego. Re ka hlalosa gore re tliša ditaba tše di lokilego le gore diketelo tša rena ga se tše telele. Eupja ge e ba mong wa ntlo a swaregile kudu, re ka re: “Ge e ba ye e se nako e botse kudu bakeng sa go boledišana le wena, nka go bona gape ketelong e latelago mo e ka bago ka morago ga beke goba go feta moo.”
14 Ke’ng se sengwe gape seo se ka bolelwago? Se se ithekgile ka kgopolo ya mong wa ntlo le kamogelo e tlwaelegilego e letetšwego mo re dulago gona. Kgaetšedi o mongwe kua Japane o hlalosa diketelo tša rena tša ka mehla ka tsela ye: ‘Ditaba tša thelebišene di bega ka taba ya madimo gantši, ba bušeletša tsebišo leboelela bakeng sa go hola bao ba ka bago ba fetilwe ke dikgašo tše di fetilego. Se se dirwa ka gobane maphelo a batho a kotsing. Go begwa ga dipego leboelela go oketšega ge ledimo le dutše le batamela kudu. Ka gona ge ledimo la Haramagedone le dutše le batamela, molaetša wa temošo o swanetše go bolelwa gantši ka mo go ka kgonegago bakeng sa go phološa maphelo.’ Ge e le gabotse, re tla bolela mantšu a bjalo ka botho le ka go botega, re holofela gore re tla fihlelela pelo ya yo a theeditšego.
Go Lebana le Bothata bja go se Thabele
15. (a) Ke’ng seo e ka bago bothata bjo golago ge re dira tšhemong ya rena gantši? (b) Ke ka baka la’ng batho ba bangwe ba sa thabele?
15 Ge go etela ga rena leboelela go oketšega, bothata bjo bo golago ke go se thabele moo gantši re go hwetšago. Eupja go hlahloba tše dingwe tša dilo tšeo di bakelago go se thabele go ka re kgothatša gore re lemoge gore go sa dutše go ka kgonega go fihlelela dipelo tša batho ba bangwe. Go se thabele ga bona mo gongwe go ka bontšha go gakanega ga bona le go hloka kholofelo. Mo gongwe ba ka ba ba nagana gore ga go tsela ya go tšwa boemong bja gona bjale bja lefase, gomme ba bolela gore ba tla fo iphelela ka tsela e botse kudu yeo ba ka e kgonago. Ba bangwe ba tenwa ke gore baetapele ba bangwe ba bodumedi ba tsena dipolitiking, ba na le molato wa boitshwaro bjo bo gobogilego, goba ba palelwa ke go gata mogato o tiilego malebana le boitshwaro bjo bo gobogilego bja botona le botshadi. Ka gona beng ba ba dintlo ba feletšwe ke kholofelo gomme ba fo phelela lehono.
16. Pelo ya motho yo a sa thabelego e ka fihlelelwa bjang?
16 Re a tseba gore badiredi ba pele ba Bakriste ba ile ba lebeletšana le kgopolo e swanago ka katlego, ka gobane batho ba bangwe ka nako yeo ba ile ba re: “A re jeng! A re nweng! xobane ka moswana re y’o hwa!” (1 Ba-Korinthe 15:32) Ka gona re a tseba gore re swere sona seo batho ba bjalo ba nyakago go se kwa. Re ka fihlelela bjang pelo ya bona gape? Tsela e nngwe ke go beela ka thoko dipuku tša rena tša Beibele ka nakwana, re ba dire gore ba re bone ge re dira seo. Ka morago re ka ba botšiša dipotšišo tšeo di naganišišitšwego gabotse tše bjalo ka tše rego: “Na o nagana gore go na le tharollo mathateng a mehleng yeno? Na ke feela gore batho ba bantši ga se ba hlwa ba hwetša ditharollo? Na o nagana gore re swanetše go ba ba tsepamego gomme re tšwele pele re tsoma?” Go ba bangwe re ka re: “Ke kgonthišega gore o a dumela gore go kaone go phela ka kholofelo go e na le go phela ka ntle le tebelelo ya dilo tše dibotse. Ke’ng seo o holofelago go se bona?” Re ka botšiša ka gore: “Na wena ka noši o nagana gore ke lepheko lefe le legolo la lefase leo le šitišago botee le khutšo?” Ba bangwe gape ba ka botšišwa gore: “Na o nagana gore mehuta ka moka ya bodumedi e swana le kamoo o hlalositšego ka gona?” Gantši dipotšišo tše bjalo di tla dira gore beng ba dintlo ba bontšhe dikgopolo tša bona. Ka gona ge ba araba, kgonthišega gore o a theetša. Ee, ba dumelele gore ba tšhollele pelo ya bona go wena. Ba bantši ba bona ‘ba lla le go hlokofala ka baka la makgapha ka moka ao a dirwago mo nakong ye.’—Hesekiele 9:4.
17. Dipuku tša rena di ka dirišwa bjang go fihlelela ba bangwe gaešita lege ba thoma ka go gana ka gore ga ba thabele?
17 Tsela e nngwe ya go lebana le go se thabele ke go ngwala ntlha goba selo seo mong wa ntlo a belaelago ka sona gomme o tle le makasine goba puku e nngwe ya Watch Tower yeo e bolelago ka taba ye. Mathomong mo gongwe e ka ba taba yeo e sa bolelego ka bodumedi, bjalo ka sehlogo seo se lego mabapi le go hwa ka pela ga masea goba go hwelela ga dithokgwa. Hlalosa gore o be o dutše o nagana ka seo se thabišago mong wa ntlo gomme wa gopola sehlogo se. Šupa dikgopolo tša motheo tša taba yeo. Mosadi o mongwe yo a bego a sa tšwa go gana dipuku tša rena o ile a amogela makasine metsotswaneng e sego kae ka morago. Ka baka la’ng? Ka gobane Hlatse e ile ya botšiša mosadi ge e ba a be a tseba gore go ntšhwa dimpa tše dimilione tše 55 ngwaga le ngwaga. A tšhošitšwe ke go kwa se, o ile a kgopela makasine wo o nago le tsebišo yeo.
Go Dira Modiro go Fihlela o Phethwa
18, 19. (a) Ke dintlha dife tše oketšegilego tšeo re swanetšego ‘go di ela hloko’ ge re dira bodiredi bja rena? (b) Ke dikgopolo dife tša go beba sefahlego tšeo batho ba bangwe ba nago le tšona mabapi le ditumelo tša rena, gomme re ka ba araba bjang?
18 Godimo ga tšohle re swanetše go se felele batho pelo. Bolela ka go iketla le ka borutho. Bontšha lerato le botho. (Ba-Galatia 5:22, 23) Pele ga ge re e-ya ntlong e latelago, naganišiša ka seo se diregilego ntlong yeo re tšwago go yona go bona moo go nyakegago kaonefatšo. E-ba yo a kwešišago, ka gobane batho ba bantši ba na le dikgopolo tše fošagetšego mabapi le Dihlatse tša Jehofa. Mo gongwe ba ka re: ‘Le široga dipolitiki le mediro ya setšhaba,’ ‘Le gana tirelo ya bohlabani,’ goba ‘Le thuba malapa.’ Eupja kgopolo ye e swana le kgopolo ya lefase malebana le badumedi-gotee le rena ba lekgolong la pele la nywaga. Bontšha beng ba dintlo se, mo gongwe ka go diriša ditsopolo ka tlase ga sehlogo “Boema-gare” ka pukung ya Go Boledišana.
19 Ra-dihistori Will Durant o ngwadile mabapi le Bakriste ba pele gore: “Go Mokriste bodumedi bja gagwe e be e le selo se se arogilego le se se phagametšego lekoko la dipolitiki; o be a botegela Kriste kudu e sego Kesara . . . Go ikarola ga Mokriste ditabeng tša lefase go baheitene go be go bonala e le go tšhabela mediro ya setšhaba, go fokodiša matla a setšhaba le boikemišetšo. Tertullian o ile a eletša Bakriste go gana tirelo ya bohlabani; . . . Bakriste ba be ba kgothatšwa ke baetapele ba bona gore ba pheme bao e sego Bakriste, ba široge meletlo ya bona ya dipapadi bjalo ka selo se šoro, le dipontšho tša bona bjalo ka tše lešago dihlong. . . . Bokriste [ge bo be bo dira basokologi] bo be bo bewa molato wa go thuba malapa.”—Caesar and Christ, letlakala 647.
20, 21. (a) Re rata go kgonthišega ka eng ge batho ba sa arabele? (b) Ke ka baka la’ng re se ra swanela ‘go lapa’ eupja re swanetše go tšwetša pele modiro wa rena o mobotse wa go bolela ka Mmušo?
20 Batho ba bangwe ba ka se ke ba theetša go sa šetšwe seo re se bolelago. Eupja seo se swanetše go direga ka baka la go gana ga bona molaetša wa Mmušo, e sego ka baka la go palelwa ga rena ke go dira dithero tše botse bodireding. (Luka 10:8-11; Ditiro 17:32; Hesekiele 3:17-19) Re swanetše go dira sohle seo re ka se kgonago ka thušo ya Modimo, gomme Jehofa o tla hlokomela modiro go fihlela o phethega.—Bapiša le Ba-Filipi 1:6.
21 Ka gona ka kholofelo e tletšego tšwelang pele ka go ‘tielela modirong wa Morena mo go fela, le tseba gore go itapiša ga lena ga se ga lefela.’ (1 Ba-Korinthe 15:58) “Itôtê [ka mehla] O lôtê le thutô. Xe O dira byalo O tlo iphološa, wa phološa le bao ba Xo kwaxo.” (1 Timotheo 4:16) Ka godimo ga tšohle, “A re se kê ra lapa go dira botse; xobane xe re sa lesetše, re tlo buna ka lebaka la xôna.”—Ba-Galatia 6:9.
Na o ka Gopola?
◻ Ditsela tše dingwe tša go kgomarela kgopolo e nepagetšego tšhemong yeo go dirwago go yona ka mehla ke dife?
◻ Re ka tsoma bjang ka botlalo batho bao ba swanelegago?
◻ Re ka leka bjang go lebeletšana le bao ba belaelago ka gore re etela gantši?
◻ Re ka lebeletšana le bothata bja go se thabele ka ditsela dife?
◻ Ke’ng seo se tla kaonefatšago boemo bja bodiredi bja rena?
[Lepokisi go letlakala 20]
GE GO AKARETŠWA GA TŠHEMO GO OKETŠEGA,
“Tšwela pele o ela hloko”:
◻ Matseno a mabotse le dithero
◻ Go tsoma ka botlalo kudu batho bao ba swanelegago
◻ Go boledišana ka go se fele pelo le batho bao ba belaelago
◻ Go lebeletšana le bothata bja go se thabele le go se kwešiše