Bagoeledi ba Mmušo ba Bega

Go Boloka Tumelo Lapeng le Aroganego

MOAPOSTOLA Paulo o ile a eletša Bakriste ka gore: “O itote, o lote le thuto, gomme o tiiše fao, gobane ka go dira bjalo o tlo ipoloka, le go boloka ba ba go kwago.” (1 Timotheo 4:16, Phetolelo ya Kgale) Nageng e nngwe ya ka Bohlabatšatsi, ‘go tiiša’ dithutong tša Beibele go ile gwa feleletša ka ditšhegofatšo tse makatšago go Moh. L—— ka morago ga go ba o mongwe wa Dihlatse tša Jehofa.

Mohumagadi L—— gotee le monna wa gagwe ka bobedi ba be ba e-tšwa malapeng a ma-Hindu. o be a ile a etelwa ke Dihlatse tša Jehofa ka 1959, gomme ka morago ga go ithuta Beibele le bona o ile a amogela therešo ya Lentšu la Modimo. Ka morago o ile a nea bohlatse go monna wa gagwe gotee le metswalo e mengwe. (Bapiša le Johane 1:40, 41.) Monna wa gagwe ga se a bontšha kgahlego, eupja kgaetšedi’agwe wa nama e lego R—— o ile a kopanela thutong. Ka 1961 yena gotee le kgaetšedi’agwe ba ile ba kolobetšwa e le pontšho ya boineelo bja bona go Jehofa. Ge bana ba Kgaetšedi L—— ba dutše ba gola, o ile a ithuta le bona gomme a ya le bona dibokeng. Ge morwedi o mogolo e lego S—— a fetša sekolo, o ile a neela bophelo bja gagwe go Jehofa, a kolobetšwa, gomme a nyalana le Hlatse. Lega go le bjalo, ge nako e dutše e tšwela pele, yena le monna wa gagwe ba ile ba tapa. Morwa wa bona o mogolo o ile a phegelela thuto e phagamego gomme a ba le bagwera ba babe. Ka morago a nyalana le mosetsana wa Mokatholika, gomme a kgaotša go kopanela le batho ba Jehofa. Ka lehlakoreng le lengwe, morwedi o monyenyane ka morago ga go fetša sekolo, o ile a neela bophelo bja gagwe go Jehofa gomme a kolobetšwa.

Kgaetšedi L—— o ile a tšwela pele ka go nea bohlatse go metswalo ya gagwe. Kgaetšedi o mongwe gape wa nama o ile a ba le kgahlego, eupja monna wa gagwe o ile a mo ganetša ka matla gaešita le go kgeila Beibele ya gagwe le dipuku.O be a sa dumelelwa go ya dibokeng le bana ba gagwe ba bararo, eupja, o ile a ithuta le bona ka gae. Ge nako e dutše e tšwela pele, le yena o ile a ineela gomme a kolobetšwa go sa šetšwe kganetšo e matla e tšwago go monna wa gagwe. Mafelelong, bana ba gagwe ba bararo ka moka ba ile ba fetoga Dihlatse tše ineetšego le tše kolobeditšwego.

Ge go sa le bjalo, Kgaetšedi L—— o ile a tšwela pele a nea bohlatse go metswalo ya gagwe ya nama. Ge a bolela le kgaetšedi ya gagwe gotee le mosadi wa gagwe, ga se a ka a bontšha kgahlego eupja mosadi wa gagwe yena o ile a theetša. Ka morago ga go hwetša tsebo e lekanego ya Beibele, o ile a ineela go Modimo gomme a bontšha se ka go kolobetšwa meetseng.

Kgaetšedi L—— o ile a nea bohlatse gape go kgaetšedi o mongwe wa gagwe wa nama, yo a ilego a ganetša therešo. Eupja mosadi wa gagwe gotee le morwedi wa bona ba ile ba thoma go ithuta. Morwedi o ile a romelwa Canada bakeng sa go tšwetša pele dithuto tša gagwe tša sekolo eupja a tšwela pele ka thuto ya gagwe ya Beibele le go kopanela le Dihlatse lefelong leo. Mafelelong le yena o ile a emela therešo gomme a kolobetšwa. O ile a nyalana le ngwanabo rena yo e bego e le mmulamadibogo kua Canada gomme tatagwe le mmagwe ba ile ba ba gona lenyalong. Go kopana ga tatagwe le banababo rena kua Canada go ile gwa ba le mafelelo a mabotse kudu go yena.

Mafelelo a go Nea Bohlatse go Lapa la Gabo

Maiteko a botegago a Kgaetšedi L—— a ile a šegofatšwa ke Jehofa. Ge nako e dutše e tšwela pele morwedi wa gagwe wa mafelelo o ile a tlogela modiro wa gagwe o lefago kudu, a tšea modiro wa nakwana gomme a thoma go direla Jehofa e le modiredi wa nako e tletšego. Morwedi o mogolo le monna wa gagwe ba ile ba thoma go ithuta le go ba gona dibokeng ka mehla gomme ba ba mafolofolo bodireding. Morwa wa gagwe yo a bego a nyalane le mosetsana wa Mokatholika gomme a tlogela therešo le yena o ile a thoma go ithuta gape gomme mafelelong a neela bophelo bja gagwe go Jehofa gomme a kolobetšwa. Morwa o monyenyane le yena o ile a ineela le go kolobetšwa gomme a ema a tiile tabeng ya boema-gare. (Jesaya 2:4) o ile a lahlelwa kgolegong ya bohlabani ka nywaga e meraro eupja go tše ka moka o ile a nea bohlatse bjo matla pele ga kgoro ya baahlodi. Tatagwe, e lego monna wa Kgaetšedi L——, o ile a kgahlišwa kudu ke boemo bjo morwa wa gagwe a ilego a bo tšea mo a ilego a ba a bontšha le kgahlego gomme a thoma go ba gona dibokeng.

Ka kgonthe, nywaga e 29 ya tirelo e botegago ya kgaetšedi L—— lapeng le aroganego e bile e kgotsofatšago le e putsago gakaakang! Mo nakong ye o thabela go bona ditho tše 18 tša lapa gotee le metswalo ya nama tšeo di kolobeditšwego. Anke phihlelo ye e be e kgothatšago le e homotšago go banababo rena le dikgaetšedi ba bantši bao ka tlase ga maemo a swanago ba swanelwago ke go kgotlelela le go bontšha tumelo malapeng a aroganego.—1 Petro 2:19, 20; 1 Ba-Korinthe 7:12-16.