Ke ka Baka La’ng re Swanetše go Boifa Modimo?
“BOIFANG Modimo, gomme le mo nee letago gobane [nako] ya kahlolo ya gagwe a tlile.” (Kutollo 14:7, Phetolelo ya Kgale) Mantšu a a tutuetšago a ile a kwewa ka lekga la mathomo ponong ke moapostola Johane yo a tšofetšego. A be a bolelwa ke morongwa yo a bego a fofa bogareng bja legodimo, gomme a be a lebišitšwe kudu-kudu go batho ba phelago nakong ye ya bofelo, e lego lebaka la mathomo la “letšatši la Morena.”—Kutollo 1:10.
Eupja mantšu a a ka bonala a se a swanela gakaakang go ba bangwe! Ba bantši ba belaela gaešita le gore Modimo o gona, gomme ga ba mmoife. Go ba bantši bao ba ipolelago e le Bakriste, kgopolo ya go boifa Modimo e bonala e fetilwe ke nako. Ba ka amogela lerato la Modimo. Eupja go mmoifa go bonala go bolela kudu se se ilego sa direga Mehleng ya Magareng. Na ke kamoo o lebelelago taba ye ka gona?
Go Boifa ga Jesu Modimo
Ge e ba go le bjalo, gona ela hloko seo se bolelwago ke go ba Mokriste. Go ya ka Beibele go ba Mokriste go akaretša go latela kgaufsi-ufsi mehlala ya Jesu Kriste. (1 Petro 2:21) Gaešita lege mo nakong ye go se pelaelo ya gore Jesu o be a rata Modimo, eupja Beibele e go dira gore go be molaleng gore o be a bile a mmoifa. Jesaya ge a bolela ka mokgwa wa boporofeta ka Jesu o boletše gore o be a tla ba le “moya wa tsebo le wa xo šia Morena.” (Jesaya 11:2) Lega go le bjalo, ka mo go kgahlišago poifo ye a be a se morwalo go Jesu. Ga se ra swanela go nagana ka yona e le ka tsela yeo ngwana a boifago tate yo sehlogo goba setšhaba seo se boifago mmuši yo a gatelelago. Ge e le gabotse Jesaya o porofetile gape ka Jesu gore: “Xo šia Morena xo tlo mo kxahla.” (Jesaya 11:3) O ka thabišwa bjang ke go boifa motho o mongwe?
Therešo ke gore, ka Beibeleng lentšu “šia” le na le ditlhaloso tse dintšinyana. Go na le poifo ya kgonthe goba letšhogo leo re le kwago ge motho o mongwe a nyaka go re gobatša. Ka gona madira a ba-Isiraele ‘a be a šia Goliata kudu.’ (1 Samuele 17:23, 24) Go bile go na le poifo ya selo se makatšago seo se sa letelwago goba se sa tsebjego, go etša kamoo Sakaria a ilego a ikwa ka gona ge a be a boledišwa ke morongwa wa Jehofa tempeleng a sa letela. (Luka 1:11, 12) Lega go le bjalo, tsela yeo ka yona Jesu a bego a boifa Tatagwe e be e sa swane le e nngwe ya tše.
Go e na le moo mantšu a mathomo a Sehebere le a Segerika ao a dirišitšwego Beibeleng bakeng sa “šia” gantši a šupa tlhompho e kgolo le poifo ya go boifa Modimo. Ye a be e le poifo ya go boifa Modimo yeo Jesu a bego a e-na le yona yeo morongwa a bego a kgothaletša o mongwe le o mongwe lehono gore a e hlagolele. Poifo ye ya tlhompho a mela ka dipelong tša rena ge re naganišiša ka matla a Jehofa gomme re a bapiša le go se be selo ga rena. E a gola ge re hlahlobišiša mediro ya gagwe e matla le gona e gola ge re gopola ka thapelo therešo ya gore ke Moahlodi yo a Phagamego yo a nago le matla a go nea bophelo gotee le go otla ka lehu la ka mo go sa felego.
Poifo e bjalo e bohlokwa ka gobane e re thibela go dira se sebe le go nyenyefatša Modimo. E re thuša go široga kgopolo e bjalo ka: ‘Modimo o tla ntebalela. O a tseba gore ke a fokola,’ ge re lebane le moleko ka ge mo gongwe re ka ineela go a na le go o lwantšha. Go bjalo ka ge Diema 8:13 a re botša gore: “Xo boifa Morena ke xo hloya bobe.” Diema 16:6 a oketša ka gore: “Dibe motho o di lahla ka xo boifa Morena.” Adama le Efa ba ile ba palelwa ke go bontšha poifo ye e botse e swanetšego ya go boifa Jehofa ge ba be ba sa mo kwe. Mafelelo e bile afe? Ba ile ba boifa ka tsela a nngwe a fošagetšego gomme ba iphihlela sefahlogo sa gagwe. Adama o itše: “Ke kwele lentšu la xaxo mo thšemong, ’me ka boifa.”—Genesi 3:10.
Ka go se swane le Adama le Efa, Jobo a bile motho yo a ilego a dula a botegela Jehofa go sa šetšwe teko e šoro kudu. Ka baka la’ng? Jehofa ka noši o itše Jobo e be e le ‘motho yo a mmoifago gomme ka go rialo o be a tla furalela bobe.’ (Jobo 1:8; 2:3) Lehono re swanetše go kgonthišega gore Jehofa a ka bolela selo se se swanago ka rena! Go boifa Modimo ke mo go swanetšego, gomme a swanetše go ba karolo ya seo re se naganago.
Go Boifa Modimo le go Boifa Batho
Go boifa Modimo ke maikwelo a tlhago ao a re neago tšhireletšego a swanago le yeo tate yo a ikhweletšago tlhompho e kgolo a e neago bana ba gagwe. Poifo e bjalo le gona e thuša go fediša poifo a sa thabišego le a fošagetšego ya go boifa batho, yeo e lego moreo. (Diema 29:25) Motho yo a ilego a se ithute thuto ye e bile Uria morwa wa Semaya yo a ilego a bolela kua Jerusalema gotee le Jeremia pele ga 607 B.C.E. Ka go se swane le Jeremia, Uria o ile a dumelela go boifa kgoši go mo tanya. O ile a kgaotša go bolela gomme a tšhabela kabelo ya gagwe. Mafelelong kgoši e ile ya mo swara gomme ya mmolaya. (Jeremia 26:20-23) Uria o be a ka široga bjang mafelelo ao a nyamišago? Ka go hlagolela poifo ya go boifa Jehofa ye a bego a le a matla go feta poifo ya gagwe ya go boifa batho.
Jesu ka morago ga tsogo ya gagwe le go rotogela legodimong, o ile a eletša balatedi ba gagwe gore: “Se boife tše O tl’o xo hlokofatšwa ka tšona.” (Kutollo 2:10) Histori e bontšha go nyakega ga keletšo yeo, ka ge Bakriste go tloga mapatlelong a ntwa a Roma go fihla dikampeng tša tshwenyo tša Nazi ba ile ba lebeletšana le maemo a boifišago. Ba ile ba kgona bjang go fenya poifo yeo manaba a bona a bego a leka go a tsenya go bona? Ka go diriša mantšu a Jesu a rego: “Le se ke la boifa ba ba bolayaxo mmele, ba tloxa ba se be le se ba se kxonaxo. Ke tlo Le laetša yo Le swanetšexo xo mmoifa. Le boife Yo e rexo xe a bolaile, a ba le matla a xo lahlela motho moleteng.”—Luka 12:4, 5.
Go Psalme 19:10, Phetolelo ya Kgale re rutwa gore: “Poifo ya Jehofa e sekile e tiile go iša go sa felego; dikahlolo tša Jehofa ke therešo, di lokile ka moka ga tšona.” Ka gona ga go se se fošagetšego ka go boifa Modimo. Go sekile gomme go a šireletša e bile go matlafatša mohlanka wa Modimo go feta manaba a gagwe. Ka go swana le Jesu, Mokriste o hwetša kgotsofalo poifong ye ka tsela a swanago le yeo a thabelago ditšhegofatšo tse dingwe ka moka tše tšwago go Jehofa.—Jesaya 11:3.
Ka gona, ke mo go tlogago go swanetše gore morongwa a kgothaletše batho ka moka lehono gore ba boife Modimo. Ka ntle le poifo e swanetšego ya go boifa Modimo, go bonala re tla ineela maikwelong a fošagetšego goba ra ineela go boifeng batho. Ge a ba re hlagolela sebopego se se swanetšego sa poifo, re tla thušwa go dira ka bohlale. “Mathomo a bohlale ke xo boifa Morena.” (Diema 9:10; Psalme 111:10) Ke therešo gore re swanetše go rata Modimo ka pelo ya rena ka moka, moya, monagano le matla. (Mareka 12:30) Le gona re swanetše go mo hlompha, goba go ya ka mantšu a morongwa, re ‘boife Modimo, gomme re mo nee letago gobane nako ya kahlolo ya gagwe a tlile.’—Kutollo 14:7.
[Seswantšho go letlakala 30]
Ge nkabe Uria a bile le poifo e kgolo ya go boifa Jehofa, go boifa batho e be e ka se be moreo go yena