Go Ithuta go Thabela go Boifa Jehofa

“Tlang lena Bana Le nkweng, ke Le rutê xo boifa Morêna.”—PSALME 34:11.

1. Poifo e ka fedišwa bjang ke Mmušo wa Modimo, eupša na seo se šupa poifo ka moka?

KAE le kae, batho ba hlologetše go lokologa poifong—go boifa bosenyi le bošoro, go boifa go hloka mošomo, go boifa bolwetši bjo bošoro. E tla ba letšatši le le thabišago gakaakang ge go e-ba le tokologo yeo ka tlase ga Mmušo wa Modimo! (Jesaya 33:24; 65:21-23; Mika 4:4) Lega go le bjalo, ga se poifo ka moka yeo e tlago go fedišwa ka nako yeo, le gona ga se ra swanela go nyaka go tloša poifo ka moka maphelong a rena gona bjale. Go na le poifo e botse le poifo e mpe.

2. (a) Ke poifo ya mohuta mang yeo e lego e mpe, gona ke ya mohuta mang e rategago? (b) Go boifa Modimo ke eng, gomme mangwalo a bontšhitšwego a bontšha bjang seo?

² Poifo e ka ba mpholo monaganong, ya šitiša matla a motho a go nagana. E ka fokodiša sebete gomme ya senya kholofelo. Poifo e bjalo e ka wela motho yo a tšhošetšwago mmeleng ke lenaba. (Jeremia 51:30) E ka wela yo a lebelelago go amogelwa ke batho ba itšego ba ba nago le tutuetšo e le gabohlokwa kudu. (Diema 29:25) Eupša go bile go na le poifo e agago, mohuta o re thibelago go dira selo le ge e le sefe ka go se šetše, o re thibelago go ikgobatša. Go boifa Modimo go akaretša le se se fetago seo. Ke go šia Jehofa, go mo hlompha ka mo go tseneletšego mo go sepedišanago le poifo e agago ya go boifa go se mo kgahliše. (Psalme 89:7) Poifo ye ya go boifa go tsoša go se thabe ga Modimo e tlišwa ke tebogo ya go leboga botho bja gagwe bjo lerato le go loka. (Psalme 5:7; Hosea 3:5) Gape e akaretša go lemoga gore Jehofa ke Moahlodi yo a Phagamego le Yo Matla-ohle, yo a nago le matla a go otla gaešita le go bolaya ba ba ganago go mo kwa.—Ba-Roma 14:10-12.

3. Poifo ya go boifa Jehofa e fapane bjang le yeo e tswalanago le medingwana ya boheitene?

³ Go boifa Modimo ke mo go agago, ga se mo go nyamišago. Go tutuetša motho gore a emele ka go tia se se lokilego, e sego go kwanantšha ka go dira se se fošagetšego. Ga go swane le poifo e tswalanywago le modingwana wa Gerika ya kgale e lego Phobos, yo a hlaloswago e le modingwana yo a tšhošago yo a tutuetšago poifo. Le gona ga go swane le poifo e tswalanywago le modimogadi wa ma-Hindu e lego Kali, yoo ka dinako tše dingwe a bontšhwago e le yo a nyoretšwego madi, yo a dirišago ditopo, dinoga le magata e le dikgabiši. Go boifa Modimo go a gogela; ga go leleke. Go kopane le lerato le tebogo. Ka gona, go boifa Modimo go re gogela go Jehofa.—Doiteronomio 10:12, 13; Psalme 2:11.

Lebaka Leo ka Lona ba Bangwe ba go Bontšhago Mola ba Bangwe ba sa go Bontšhe

4. Go etša ge moapostola Paulo a bontšhitše, batho ba tsene boemong bofe gomme ke eng se se bakilego se?

⁴ Batho ka kakaretšo ga ba tutuetšwe ke seka sa go boifa Modimo. Go Ba-Roma 3:9-18, moapostola Paulo o hlalosa bokgole bjoo batho ba aroganego le phethego ya mathomong ka bjona. Ka morago ga go bolela gore bohle ba ka tlase ga sebe, Paulo o tsopola Dipsalme ka gore: “Xa xo e a diraxo tše botse, le xe e le o tee.” (Bona Psalme 14:1.) Ka gona o nea ditaba ka botlalo ka go bontšha dilo tše di swanago le go hlokomologa ga batho go tsoma Modimo, go hloka botho ga bona, polelo ya bona ya bofora, go rogana le go tšholla madi. Seo se hlalosa lefase ka mo go nepagetšego gakaakang lehono! Bontši bja batho ga ba kgahlegele Modimo le merero ya gagwe. Gantši kudu, pontšho le ge e le efe ya botho e bolokelwa dinako tšeo ka tšona go nago le selo se se ka hwetšwago ka yona. Go bolela maaka le polelo e gobogilego ke dilo tše di tlwaelegilego. Tšhollo ya madi e bontšhwa e sego ditabeng feela, eupša gape le boithabišong. Ke eng se se bakago boemo bjo bo bjalo? Ke therešo gore ka moka ga rena re ditlogolo tša Adama wa modira-dibe, eupša ge batho ba amogela dilo tše di hlalositšwego ke moapostola Paulo e le tsela ya bona ya go phela, gona go akaretšwa se se fetago seo. Temana 18 e hlalosa seo se e lego sona ka gore: “Xo šia Modimo xo bôná xa di’o.”—Bona Psalme 36:1.

5. Ke ka baka la’ng batho ba bangwe ba e-na le poifo ya go boifa Modimo mola ba bangwe ba se na yona?

⁵ Ka gona, ke ka baka la’ng batho ba bangwe ba e-na le poifo ya go boifa Modimo mola ba bangwe ba se na yona? Ge go bolelwa ka tsela e bonolo, ke ka gobane batho ba bangwe ba a e hlagolela mola ba bangwe ba sa e hlagolele. Ga go le o tee wa rena yo a belegwago a e-na le yona, eupša ka moka ga rena re na le matla a go ba le yona. Go boifa Modimo ke selo seo re swanelwago ke go ithuta sona. Ka gona, gore e be matla a magolo a tutuetšago maphelong a rena re swanetše go go hlagolela.

Taletšo e Ipiletšago

6. Ke mang yo a fetišetšago taletšo e begilwego go Psalme 34:11 go rena, gona temana ye e bontšha bjang gore go swanetšwe go ithutwa go boifa Modimo?

⁶ Taletšo e ipiletšago ya go ithuta go boifa Jehofa e fetišetšwa go rena go Psalme 34. Ye ke psalme ya Dafida. Dafida o swantšheditše mang? Ga go na yo mongwe ge e se Morena Jesu Kriste. Boporofeta bjo moapostola Johane a bo dirišitšego ka go lebanya go Jesu bo begilwe go temana 20 ya psalme ye. (Johane 19:36) Mehleng ya rena, Jesu ke yena a fetišago taletšo e bjalo go temana 11: “Tlang lena Bana Le nkweng, ke Le rutê xo boifa Morêna.” Se se bontšha gabotse gore go boifa Modimo ke selo seo se ka ithutwago, gomme Jesu Kriste o swanelega ka mo go feletšego kudu go re ruta. Ke ka baka la’ng seo se le bjalo?

7. Ke ka baka la’ng Jesu e le yo re ithutago go boifa Modimo go yena ka mo go kgethegilego?

⁷ Jesu Kriste o tseba bohlokwa bja go boifa Modimo. Ba-Hebere 5:7 (NW) e bolela mabapi le yena gore: “Mehleng ya ge a le nameng, Kriste o ile a neela dithapelo gotee le ditopo go Yo a bego a kgona go mo phološa lehung, ka dillo tše thata le ka megokgo, gomme o ile a kwewa ka kamogelo ka baka la go boifa ga gagwe Modimo.” Go boifa Modimo mo go bjalo e be e le seka seo Jesu Kriste a ilego a se bontšha gaešita le pele ga ge a lebana le lehu koteng ya tlhokofatšo. Gopola gore go Diema kgaolo 8, Morwa wa Modimo o hlaloswa e le mothofatšo wa bohlale. Le gona re botšwa go Diema 9:10 gore: “Mathômô a bohlale ké xo boifa Morêna.” Ka gona go boifa Modimo mo e bile karolo ya motheo ya semelo sa Morwa wa Modimo nako e telele pele ga ge a e-tla lefaseng.

8. Go Jesaya 11:2, 3, re ithuta’ng mabapi le go boifa Jehofa?

⁸ Go feta moo, Jesaya 11:2, 3 e boletše mabapi le Jesu e le Kgoši ya Mesia gore: “Môya wa Morêna ó tlo dula mo xo yêna, e lexo môya wa bohlale, le wa thlaloxanyô, môya wa keletšo le wa matla, môya wa tsebô le wa xo šia Morêna. Xo šia Morêna xo tlo mo kxahla.” Seo se bontšhitšwe gabotse gakaakang! Go boifa Jehofa ga se selo se se sa thabišego. Ke mo go holago le mo go agago. Ke seka se se tlago go aparela tikologo ka moka yeo Kriste a bušago go yona e le Kgoši. Bjale o a buša, gomme o nea bohle ba ba kgoboketšwago e le balata ba gagwe thuto mabapi le go boifa Jehofa. Bjang?

9. Jesu Kriste o re ruta bjang go boifa Jehofa, gona o nyaka gore re ithute eng ka gona?

⁹ Jesu, e le Hlogo e kgethilwego ya phuthego le Kgoši ya Mesia o re thuša ka diboka tša rena tša phuthego, dikopano tše dinyenyane le dikopano tše dikgolo go kwešiša gabotse seo go boifa Modimo go lego sona le lebaka leo e lego mo go holago gakaakaa. Ka gona o katanela go godiša temogo ya rena ya go go lemoga e le gore re tle re ithute go thabela go boifa Jehofa bjalo ka ge a dira.

Na o tla Dira Boiteko?

10. Ge re le dibokeng tša Bokriste, re swanetše go dira’ng ge e ba re tla kwešiša go boifa Jehofa?

¹⁰ Ee, go fo bala ga rena Beibele goba go ya dibokeng Holong ya Mmušo go ka se ke gwa kgonthišetša gore re tla boifa Modimo. Ela hloko seo re swanetšego go se dira ge e ba ka kgonthe re tla kwešiša go boifa Jehofa. Diema 2:1-5 e re: “Ngwan’a-ka! Xe O ka dumêla dikeletšô tša-ka, ’me wa hlôkômêla ditaelô tša-ka, Xe bohlale O bo sêkêxêla tsêbê wa lebiša pelo y’axo mo xo lexo thlaloxanyô, Xe O ka bitša temoxô wa hlabošetša thlaloxanyô ’ntšu la xaxo, Xe O ka e tsoma byalo ka leruô wa e nyakišiša bo-ka ’humô le le fihlilwexo, ké mo O tl’o xo tseba xo boifa Morêna, wa fihlêla xo tseba Modimo.” Ka gona ge re le dibokeng, re swanetše go theetša ka kelohloko se se bolelwago, re dire boiteko bjo mafolofolo bja go tsepamiša kgopolo le go gopola dikgopolo tša motheo, re naganišiše kamoo tsela yeo re ikwago ka yona ka Jehofa e swanetšego go tutuetša dikgopolo tša rena ka gona mabapi le keletšo e newago—ee, re bule dipelo tša rena. Ka gona re tla kwešiša go boifa Jehofa.

11. Gore re hlagolele go boifa Modimo, ke eng seo re swanetšego go se dira ka go tšwa pelong le ka mehla?

¹¹ Psalme 86:11 e gogela tlhokomelo lebakeng le lengwe le bohlokwa, e lego la thapelo. Mopsalme o rapetše ka gore: “Morêna, nthutê tsela ya xaxo, ke sepelê kè Xo botexetše; pelo ya-ka O e tlêmaxanyê le xo boifa leina la xaxo.” Jehofa o ile a amogela thapelo yeo ka gobane o ile a dira gore e ngwalwe ka Beibeleng. Gore re hlagolele go boifa Modimo, le rena re swanetše go rapela Jehofa gore a re thuše gomme re tla holwa ke go rapela ka go tšwa pelong le ka mehla.—Luka 18:1-8.

Pelo ya Gago e a Akaretšwa

12. Ke ka baka la’ng pelo e swanetše go elwa hloko ka mo go kgethegilego, gona seo se akaretša’ng?

¹² Go na le selo se sengwe seo re swanetšego go se ela hloko go Psalme 86:11. Mopsalme o be a sa kgopele feela kwešišo e bohlale ya go boifa Modimo. O bolela ka pelo ya gagwe. Go hlagolela go boifa Modimo go akaretša pelo ya seswantšhetšo yeo e nyakago tlhokomelo e kgethegilego ka gobane ke motho wa ka gare, go etša ge a bontšhwa medirong ya rena ka moka ya bophelo gomme o akaretša dikgopolo tša rena, ditshekamelo tša rena, dikganyogo tša rena, maikemišetšo a rena le dipakane tša rena.

13. (a) Ke eng se se ka bontšhago gore pelo ya motho e arogane? (b) Re swanetše go katanela pakane efe ge re dutše re hlagolela go boifa Modimo?

¹³ Beibele e re lemoša gore pelo ya motho e ka ba e aroganego. E ka ba maano-mabe. (Psalme 12:2; Jeremia 17:9) E ka re tutueletša go tšea karolo medirong e agago—go ya dibokeng tša phuthego le go ya bodireding bja tšhemo—eupša e ka rata le dibopego tše itšego tša tsela ya lefase ya go phela. Se se ka re thibela go ba ka pelo ka moka e le ka kgonthe go godišeng dikgahlego tša Mmušo. Ka gona pelo ya maano-mabe e ka leka go re kgodiša gore ge e le gabotse re dira go swana le ba bangwe ba bantši. Goba mohlomongwe sekolong goba lefelong la modiro wa boiphedišo, pelo e ka tutuetšwa ke go boifa motho. Ka baka leo, maemong ao mo gongwe re ka dika-dika go itsebiša re le Dihlatse tša Jehofa gomme ra ba ra dira dilo tše di sa swanelego Bakriste. Lega go le bjalo, ka morago ga moo letswalo la rena la re ja. Seo ga se mohuta wa motho yo re nyakago go ba yena. Ka gona, re rapela Jehofa gotee le mopsalme ka gore: “Pelo ya-ka O e tlêmaxanyê le xo boifa leina la xaxo.” Re nyaka gore motho wa ka gare ka moka go etša ge a bontšhwa medirong ya rena ka moka ya bophelo, a nee bohlatse bja gore re “boifa Modimo wa therešo le go boloka melao ya gagwe.”—Mmoledi 12:13, NW.

14, 15. (a) Ge a be a bolela e sa le pele ka go buša Isiraele bothopša kua Babele, Jehofa o ile a holofetša go nea batho ba gagwe eng? (b) Jehofa o ile a dira’ng mabapi le go bjala go boifa Modimo ka dipelong tša batho ba gagwe? (c) Ke ka baka la’ng Isiraele e ile ya hlanogela ditsela tša Jehofa?

¹⁴ Jehofa o holofeditše gore o tla nea batho ba gagwe pelo e bjalo ya go boifa Modimo. O boletše e sa le pele ka go tsošološwa ga Isiraele gomme a bolela go etša ge re bala go Jeremia 32:37-39 gore: “Ke tlo ba bušetša mono mó, ba tlo axa ba iketla. E tlo ba sethšaba sa-ka, ’me Nna ke tlo ba Modimo wa bôná. Ke tlo ba nea pelo e tee le tsela e tee ya xo boifa Nna ka mehla, tsela e tl’o xo ba iša mahlatseng, bôná le bana ba bôná, ba ba tl’o ba xôna mehleng e tlaxo.” Kholofetšo ya Modimo e tiišwa go temana 40 e rego: “Dipelong tša bôná ke tlo bea boi bya xo boifa Nna, ba se sa tlo nthlanoxêla.” Ka 537 B.C.E., Jehofa o ile a ba bušetša Jerusalema bjalo ka ge a be a holofeditše. Eupša go thwe’ng ka kholofetšo yeo ka moka—ya gore o be a tla ba nea ‘pelo e tee e le gore ba boife yena ka mehla’? Ke ka baka la’ng setšhaba sa kgale sa Isiraele se ile sa hlanogela Jehofa ka morago ga ge a se bušitše Babele, mo e lego gore tempele ya sona e ile ya senywa ka 70 C.E. gomme ya se sa hlwa e agwa gape?

¹⁵ Se se be se sa bakwa ke go palelwa le ge e le gofe ga Jehofa. Ka kgonthe Jehofa o ile a gata megato ya go tsenya go boifa Modimo ka dipelong tša batho ba gagwe. O ba neile mabaka ka moka a go mo lebelela ka tlhompho e tseneletšego ka kgaugelo yeo a e bontšhitšego ge a be a ba lopolla Babele gomme a ba bušetša nageng ya gabo bona. Modimo o ile a tiiša seo ka moka ka dikgopotšo, keletšo le kgalemelo ka baporofeta Hagai, Sakaria le Maleaki; ka Esera yo a ilego a romelwa go bona e le morutiši; ka Mmuši Nehemia; le ka Morwa wa Modimo ka noši. Ka dinako tše dingwe batho ba ile ba theetša. Ba ile ba dira bjalo ge ba be ba aga tempele ya Jehofa lefsa ka tutuetšo ya Hagai le Sakaria, le ge ba be ba leleka basadi bašele mehleng ya Esera. (Esera 5:1, 2; 10:1-4) Eupša gantši kudu ba be ba sa theetše. Ba be ba sa hlwaye tsebe ka mehla; ga se ba tšwela pele go ba ba ba amogelago keletšo; ga se ba boloka dipelo tša bona di bulegile. Ba-Isiraele ba be ba sa hlagolele go boifa Modimo, ka baka leo e be e se matla a magolo a tutuetšago maphelong a bona.—Maleaki 1:6; Mateo 15:7, 8.

16. Jehofa o bjetše go boifa Modimo ka dipelong tša bomang?

¹⁶ Lega go le bjalo, kholofetšo ya Jehofa ya go tsenya go boifa Modimo ka dipelong tša batho ba gagwe ga se ya folotša. O ile a dira kgwerano e mpsha le Isiraele ya moya, e lego Bakriste bao a beilego kholofelo ya legodimong pele ga bona. (Jeremia 31:33; Ba-Galatia 6:16) Ka 1919 Modimo o ile a ba ntšha bothopšeng bja Babele o Mogolo, e lego mmušo wa lefase wa bodumedi bja maaka. O bjetše ka go tia go mmoifa ka dipelong tša bona. Se se ba tlišeditše mehola e humilego, gotee le “lešaba le lexolo” le le nago le kholofelo ya bophelo e le balata ba Mmušo ba lefaseng. (Jeremia 32:39; Kutollo 7:9) Go boifa Jehofa go tsene le ka dipelong tša lona.

Kamoo go Boifa Modimo go Bjalwago ka Gona ka Dipelong tša Rena

17. Jehofa o tsentšhitše bjang go boifa Modimo ka dipelong tša rena?

¹⁷ Jehofa o bjetše bjang poifo ye ya go boifa Modimo ka dipelong tša rena? Ka go šoma ga moya wa gagwe. Ke eng se re nago le sona seo e lego setšweletšwa sa moya o mokgethwa? Re na le Beibele, e lego Lentšu la Modimo le le buduletšwego. (2 Timotheo 3:16, 17, PK) Ka seo a se dirilego nakong e fetilego, ka ditirišano tša gagwe le bahlanka ba gagwe mo nakong ye e le go phethagatša Lentšu la gagwe la boporofeta le ka diporofeto tša dilo tše di tlago go tla, Jehofa o nea rena ka moka motheo o kwalago wa go hlagolela go boifa Modimo.—Jošua 24:2-15; Ba-Hebere 10:30, 31.

18, 19. Dikopano tše dikgolo, dikopano tše dinyenyane le diboka tša phuthego di re thuša bjang go ba le poifo ya go boifa Modimo?

¹⁸ Ke mo go lemogegago gore go etša ge go begilwe go Doiteronomio 4:10, Jehofa o itše go Moše: “Nkxobêlêlê sethšaba, ke ba kwišê mantšu a-ka xore ba ithutê xo mpoifa ka mehla ka moka ya xo phela xa bôná lefaseng, ba bê ba a rutê le bana ba bôná.” Ka mo go swanago le lehono, Jehofa o dirile ditokišetšo tše dintši go thuša batho ba gagwe gore ba ithute go mmoifa. Dikopanong tše dikgolo, dikopanong tše dinyenyane le dibokeng tša phuthego re anega bohlatse bja botho bja Jehofa bjo lerato le go loka ga gagwe. Ke sona seo re bego re se dira ge re be re ithuta puku ya Motho yo a Phagamego Kudu yo a Kilego a Phela. Thuto yeo e ile ya go kgoma bjang gotee le kgopolo ya gago ka Jehofa? Ge o be o dutše o bona dibopego tša semelo se sebotse kudu sa Tatago rena wa legodimong di bonagatšwa go Morwa wa gagwe, na se ga se sa matlafatša kganyogo ya gago ya gore le ka mohla o se be yo a sa kgahlišego Modimo?—Ba-Kolose 1:15.

¹⁹ Dibokeng tša rena re ithuta le ka dipego tša go lopolla ga Jehofa batho ba gagwe mehleng e fetilego. (2 Samuele 7:23) Ge re dutše re ithuta puku ya Beibele ya Kutollo ka thušo ya puku ya Seremo se Segolo sa Kutollo se Batametše!, re ithuta ka dipono tša boporofeta tšeo di šetšego di phethagaditšwe lekgolong le la bo-20 la nywaga le ka ditiragalo tše dingwe tše di boifišago tše di sa dutšego di tla direga. Mabapi le ditiro tše bjalo ka moka tša Modimo, Psalme 66:5 e re: “Tlang Le bônê ’tirô tša Modimo; ó a šiiša ka tše a di diraxo xo bana ba batho.” Ee, ditiro tše tša Modimo ge di lebelelwa ka mo go swanetšego di bjala go boifa Jehofa ka dipelong tša rena, e lego tlhompho e tseneletšego. Ka gona re ka bona kamoo Jehofa Modimo a phethagatšago kholofetšo ya gagwe e rego: “Dipelong tša bôná ke tlo bea boi bya xo boifa Nna, ba se sa tlo nthlanoxêla.”—Jeremia 32:40.

20. Go nyakega’ng go rena e le gore go boifa Modimo go bjalwe ka mo go tseneletšego ka dipelong tša rena?

²⁰ Lega go le bjalo, go molaleng gore go boifa Modimo ga go be gona ka dipelong tša rena ka ntle le gore re dire boiteko. Mafelelo ga a itlele feela. Jehofa o phetha karolo ya gagwe. Re swanetše go phetha ya rena ka go hlagolela go boifa Modimo. (Doiteronomio 5:29) Isiraele ya tlhago e paletšwe ke go dira seo. Eupša ka go ithekga ka Jehofa, ba-Isiraele ba moya le bagwera ba bona ba šetše ba hwetša mehola e mentši e tlelago ba ba boifago Modimo. Re tla ahla-ahla e mengwe ya mehola ye sehlogong se se latelago.

O be o tla Araba Bjang?

◻ Go boifa Modimo ke eng?

◻ Re rutwa bjang go thabela go boifa Jehofa?

◻ Go nyakega boiteko bofe go rena gore re be le poifo ya go boifa Modimo?

◻ Ke ka baka la’ng go ba le poifo ya go boifa Modimo go akaretša dibopego ka moka tša pelo ya rena ya seswantšhetšo?

[Pictures on page 12, 13]

Go nyakega go ithuta ka mafolofolo gore re kwešiše go boifa Jehofa