Ke ka Baka La’ng re Swanetše go Boifa Modimo, e Sego Batho?

“XO BOIFA batho xo wetša moreong; xo pholoxa e a bôtaxo Morêna.” (Diema 29:25) Ka mantšu a seema sa kgale se re phafošetša mohuta wa poifo yeo e tlogago e le mpholo wa kelello—go boifa batho. Go swantšhwa le moreo. Ka baka la’ng? Ka gobane phoofotšwana e nyenyane, go swana le mmutla, ga e na thušo ge e tantšwe moreong. E nyaka go tšhaba, eupja moreo o e swaretše ruri. Mafelelong, se se tantšwego se a khinega.

Ge e ba re swerwe ke poifo ya go boifa batho, gona re tloga re swana le mmutla woo. Re ka ba re tseba seo re swanetšego go se dira. Mo gongwe re bile re rata go se dira. Eupja poifo e re golegile. Re khinegile gomme ga re kgone go dira selo.

Moreo wa go Boifa Batho

Nagana ka mehlala e mengwe ya mehleng ya Beibele ya bao ba bego ba tantšwe ke moreo wa poifo. Mehleng ya Jošua, banna ba 12 ba ile ba rongwa go ya go hlola naga ya Kanana pejana ga tlhaselo e rulagantšwego ya ba-Isiraele. Dihlodi di ile tša boa gomme tša bega gore naga ke e nonnego le e humilego, go fo etša ge Modimo a be a boletše. Eupja tše lesome tša dihlodi di ile tša boifišwa ke go tia ga baagi. Ka gona, di swerwe ke poifo ya go boifa batho, di ile tša nea ba-Isiraele pego e okeditšwego mabapi le go tia moo gomme tša dira gore setšhaba ka moka se boife. Ba-Isiraele ba ile ba gana go kwa molao wa Modimo wa go tsena Kanana gomme ba tšee naga. Ka baka leo, baagi ka moka ba banna ba bagolo ba nakong yeo, ka ntle le ba sego kae ba ile ba hwela lešokeng lebakeng la nywaga e 40 e latetšego.—Numeri 13:21–14:38.

Jona e be e le o mongwe yo a bego a boifa batho. Ge a be a abetšwe go bolela motseng o mogolo wa Ninife, o ile “a tsoxa a thšaba a leba Tarasisi à thšaba Morêna.” (Jona 1:3) Ka baka la’ng? Ba-Ninife ba be ba tumile e le batho ba se nago kwelobohloko le ba šoro, gomme Jona mo gongwe o be a tseba seo. Go boifa batho go ile gwa mo dira gore a tšhabele lefelong leo le bego le le kgole le Ninife. Ke therešo gore, mafelelong o ile a amogela kabelo ya gagwe eupja e bile feela ka morago ga ge a amogetše tayo e sa tlwaelegago e tšwago go Jehofa.—Jona 1:4, 17.

Gaešita le magoši a ka boifa batho. Lebakeng le lengwe, Kgoši Saulo o ile a furalela ka go lebanya taelo e boletšwego e tšwago go Modimo. Lebaka la gagwe e bile lefe? “Ke sentše ka xo se dirê se Morêna a se laetšexo le se wêna O se boletšexo; xobane ke boifile batho, ka dira se bôná ba bexo ba se bolêla.” (1 Samuele 15:24) Nywageng e makgolo e fetilego, nakong ya ge Jerusalema e be e hlaselwa ke ba-Babele, moporofeta yo a botegago Jeremia o ile a eletša Kgoši Tsedekia gore a ineele e le go phološa Jerusalema go tšhollweng mo gogolo ga madi. Eupja Tsedekia o ile a gana. Ka baka la’ng? O ipobotše go Jeremia ka gore: “Nna ke boifa Ba-Juda ba ba šetšexo ba ineetše Ba-Kaladea, e se re mohlomongwê xe nka wêla matsoxong a bôná ba nkwêra.”—Jeremia 38:19.

La mafelelo, gaešita le moapostola o be a ka tšhoga. Letšatšing leo Jesu a bego a swanetše go hwa ka lona, o ile a lemoša balatedi ba gagwe gore ka moka ba be ba tla mo tlogela. Lega go le bjalo, Petro o ile a bolela ka sebete gore: “Morêna, nna ke itokišitše, xore le xe e le kxolexong, le xe e le lehung, ke yê naxô’.” (Luka 22:33; Mateo 26:31, 33) Mantšu ao a itlhatsetše e le a fošagetšego gakaakang! Diiri tše sego kae ka morago, Petro o ile a gana ka poifo gore o be a e-na le Jesu goba gaešita le gore o a mo tseba. O ile a fenywa ke go boifa batho! Ee, ka kgonthe go boifa batho ke mpholo wa kelello.

Re Swanetše go Boifa Mang?

Re ka fenya bjang poifo ya go boifa batho? Ka go bea poifo e matla ka mo go fetišišago sebakeng sa yona. Mohuta wo wa poifo o kgothaleditšwe ke moapostola Petro ge a be a re: “Boifang Modimo.” (1 Petro 2:17, Phetolelo ya Kgale) Morongwa yo a bonwego ke Johane go Kutollo o ile a goeletša bathong ka gore: “Boifang Modimo, gomme le mo nee letago.” (Kutollo 14:7, Phetolelo ya Kgale) Kgoši e bohlale Salomo le yena o ile a kgothaletša poifo e bjalo ge a be a re: “A re kweng phêthêxô ya ditaba tšohle: Boifa Modimo, O lôtê taêlô tša xaxwe. Ké se se swanetšexo batho bohle.” (Mmoledi 12:13) Ee, go boifa Modimo ke tlemo.

Go boifa Modimo go tliša mehola. Mopsalme wa bogologolo o opetše ka gore: “Ka kxonthe, phološô ya [Jehofa] e batametše ba ba mmoifaxo.” (Psalme 85:9) Seema sa Beibele le sona se a gatelela: “Xo boifa Morêna xo phediša xalelele.” (Diema 10:27) Ee, go boifa Jehofa ke selo se se swanetšego se holago. Mo gongwe o ka re, ‘Eupja Jehofa ruri ke Modimo yo lerato. Ke ka baka la’ng re swanetše go boifa Modimo yo lerato?’

Na re Swanetše go Boifa Modimo yo Lerato?

Ka ge poifo ya go boifa Modimo e se e šoro, e lego poifo e khinago e swarago batho ya ba kgwahliša maemong a mangwe. Ke mohuta wa poifo yeo ngwana a ka bago le yona go tatagwe, gaešita lege a rata tatagwe le go tseba gore tatagwe o a mo rata.

Go boifa Modimo ke tlhompho e tseneletšego e le ka kgonthe ya go hlompha Mmopi, ye e tšwago go go lemoga gore ke yena mothofatšo o feletšego wa toko, toka, bohlale le lerato. E akaretša poifo e matla ya go boifa go se kgahliše Modimo ka gobane ke yena Moahlodi yo a Phagamego yo a nago le matla a go putsa le go otla. Moapostola Paulo o ngwadile gore, “Xo wêla diatleng tša Modimo e a phelaxo xo a šiiša.” (Ba-Hebere 10:31) Lerato la Modimo ga se selo se se ka fogo letelwa go sa šetšwe maemo gaešita le gore kahlolo ya gagwe ke selo se ka tšewago gabohwefo. Ke ka baka leo Beibele e re gopotšago gore: “Mathômô a bohlale ké xo boifa Morêna.”—Diema 9:10.

Lega go le bjalo, re swanetše go gopola gore lege Modimo a e-na le matla a go otla bao ba sa mo kwego—e bile a dirile bjalo gantši—ga se yo a nyoretšwego madi goba yo sehlogo. E tloga e le Modimo yo lerato gaešita lege yena, go swana le motswadi yo a nago le lerato, ka dinako tše dingwe a befelwa ka mo go swanetšego. (1 Johane 4:8) Ke ka baka leo go mmoifa e lego mo go swanetšego. Go re lebiša go kweng melao ya gagwe, yeo e rulaganyeditšwego go re hola. Go kwa melao ya Modimo go tliša lethabo, mola go se e kwe go tliša mafelelo a mabe ka mehla. (Ba-Galatia 6:7, 8) Mopsalme o ile a budulelwa go bolela gore: “Boifang Morêna, lena bakxêthwa ba xaxwe, xobane ba ba mmoifaxo xa ba hlôke selô.”—Psalme 34:9.

O Boifa Mang?

Go boifa Modimo go re thuša bjang go fenya poifo ya go boifa batho? Ee, batho mo gongwe ba ka re kwera goba gaešita le go re tlaiša ka baka la go dira se se lokilego, e lego se se re gatelelago. Eupja poifo e hlomphegago ya go boifa Modimo e tla re gatelela gore re kgomarele tsela e lokilego, ka ge re sa nyake go mo nyamiša. Go feta moo, go rata Modimo go tla re kgothaletša go dira se se tlišago lethabo pelong ya gagwe. Go oketša moo, re gopola gore Modimo o re putsa ka mo go humišago ge re dira se se lokilego, e lego se se re dirago gore re mo rate ka mo go fetišišago le go re dira gore re rate go dira thato ya gagwe. Le gona, pono e leka-lekanego ya Modimo e re thuša go fenya poifo lege e le efe yeo re ka bago le yona ya go boifa batho.

Ka mohlala, ba bantši ba gateletšwa gore ba dire se se fošagetšego ka baka la go boifa seo dithaka tša bona di se naganago. Bafsa sekolong ba ka kgoga, ba diriša polelo e mpe, ba ikgantšha ka phihlelo ya botona le botshadi (e le ya kgonthe goba ya go inaganela), gaešita le go leka dino tše di tagago goba dihlare-tagi. Ka baka la’ng? E sego ka baka la gore ka mehla ba rata go dira seo, eupja e le ka baka la gore ba boifa seo dithaka tša bona di tlago go se bolela ge e ba ba dira se se fapanego. Go mofsa yo a lego nywageng ya bo-lesome, go kwerwa le go gobošwa mo gongwe e ka ba mo go thata go ka kgotlelelwa go fo swana le go tlaišwa mmeleng.

Motho yo mogolo le yena mo gongwe a ka ikwa a gateletšega gore a dire phošo. Mohlomongwe mong-modiro modirong a ka botša modiri gore a okeletše moreki molato goba a tlatše fomo ya motšhelo ya khamphani ka boradia e le gore go fokotšwe melato ya motšhelo. Mo gongwe Mokriste a ka nagana gore ge e ba a sa dire, o tla lahlegelwa ke modiro wa gagwe. Ka gona, go boifa batho go ka mo gateletša gore a dire se se fošagetšego.

Mabakeng ka bobedi, poifo e swanetšego ya go boifa Modimo gotee le go hlompha melao ya gagwe e tla šireletša Mokriste gore a se khinwe ke poifo ya go boifa batho. Lerato la go rata Modimo le tla mo thibela gore a se tsene medirong yeo Modimo a e thibetšego. (Diema 8:13) Go feta moo, tumelo ya gagwe go Modimo e tla mo kgonthišetša gore ge e ba a dirile ka go dumelelana le letswalo la gagwe leo le tlwaeditšwego ka Beibele, Modimo o tla mo thekga go sa šetšwe seo mafelelo a tlago go ba sona. Moapostola Paulo o boletše tumelo ya gagwe ka mantšu a: “Ke kxôna tšohle ka Eo a mphaxo matla.”—Ba-Filipi 4:13.

Beibele e nea mehlala e mentši ya banna le basadi bao ba ilego ba botegela Jehofa gaešita le tlase ga diteko tše šoro kudu. Ba “kxôtlêlêla kxobošô le dikôtlô, le ditlêmô, le kxôlêxô. Ba thumilwe ka mafsika, ba hlokofatšwa, ba sêxakanywa, ba bolawa ka dithšoša.” (Ba-Hebere 11:36, 37) Eupja ga se ba ka ba dumelela gore go boifa batho go laole menagano ya bona. Go e na le moo, ba ile ba phegelela tsela e bohlale yeo Jesu ka morago a ilego a e nea barutiwa ba gagwe: “Le se boifê ba ba bolayaxo mmele, bà sa kxone xo bolaya môya; xaxolo Le boifê [Modimo] Eo a kxônaxo xo senya mmele le môya moleteng wa mollô.”—Mateo 10:28.

Go latela keletšo ye ya Jesu ya go boifa Modimo go e na le batho go kgontšhitše le Bakriste ba pele go kgotlelela mehuta ka moka ya mathata, meleko le ditlaišo “ka ’baka la Ebangedi.” (Filimone 13) Moapostola Paulo ke mohlala o lemogegago wa se. Lengwalong la gagwe la bobedi le le yago go ba-Korinthe, o bontšha kamoo go boifa Modimo go mo neilego sebete ka gona gore a kgotlelele nako ya go ba kgolegong, go bethwa, go kgatlwa ka mafsika, go robegelwa ke sekepe, dikotsi tše fapa-fapanego ditseleng, go se robale bošego ka moka, tlala, lenyora, go tonya gotee le go hlobolela.—2 Ba-Korinthe 11:23-27.

Le gona go boifa Modimo go matlafaditše Bakriste bao ba pele gore ba emele tlaišo e šoro tlase ga Mmušo wa Roma, ge ba bangwe ba be ba bile ba lahletšwe dibata mabaleng a dipapadi. Mehleng ya Magareng, Bakriste ba mafolofolo ba ile ba fišwa phatlalatša go fihlela ba e-hwa ka ge ba be ba sa kwanantšhe tumelo ya bona. Nakong ya ntwa ya mafelelo ya lefase, Bakriste ba ile ba kgetha go tlaišwa le go hwela dikampeng tša tshwenyo go e na le go dira dilo tšeo di bego di sa kgahliše Modimo. Go boifa Modimo ke tšhušumetšo e matla gakaakang! Ka kgonthe, ge e ba e matlafaditše Bakriste gore ba fenye poifo ya go boifa batho tlase ga maemo a bjalo a lekago, ruri e ka re matlafatša boemong lege e le bofe bjo re ka ikhwetšago re le go bjona.

Lehono, Sathane Diabolo o dira sohle seo a ka se kgonago go re gatelela gore re nyamiše Modimo. Ka gona Bakriste ba therešo ba swanetše go ba le maikemišetšo a swanago le ao a boletšwego ke moapostola Paulo ge a be a ngwala gore: “Xomme rena xa re ba xo xomêla moraxo le xo y’o lahlwa; re ba tumêlô ya xo y’o rua bophelô.” (Ba-Hebere 10:39) Go boifa Jehofa ke mothopo wa kgonthe wa matla. Ka thušo ya gona, eka re ka ba ba “bolêlaxo re holofetše ra re: Morêna ké Molwedi wa-ka: xa ke boife selô; batho ba ka ntira’ng?”—Ba-Hebere 13:6.

[Seswantšho go letlakala 7]

Go boifa Modimo go neile Paulo sebete sa go kgotlelela dilo ka moka, go akaretša le go bethwa, go golegwa gaešita le go robegelwa ke sekepe.—2 Ba-Korinthe 11:23-27