Modimo o Rera Gore Batho ba Thabele Bophelo Paradeiseng

“Xomme Morêna Modimo a tšea motho a mmea thšemong ya Edene xore a e lemê, a e dišê.”—GENESI 2:15.

1. Morero wa Mmopi wa mathomo mabapi le batho ba kwago e be e le ofe?

E BE e le morero wa mathomo wa Mmopi gomme e sa dutše e le morero wa gagwe, gore batho ba kwago ba thabele bophelo bja go se tšofale, ba dule ba le mafolofolo ka matla a bofsa, ba sa tenege le gatee, ka mehla ba e-na le morero o swanetšego wo ba swanetšego go o phetha, e lego bophelo bja go rata le go ratwa ka tsela ya kgonthe yeo e sego ya boithati ba phethagetše—paradeiseng!—Genesi 2:8; bapiša le Luka 23:42, 43.

2. (a) Ke’ng seo se swanetšego go ba se ile sa direga ge motho wa pele a ikwa la mathomo? (b) Motho wa pele o ile a bopja neng, kae gomme ka nako efe ya ngwaga?

² Gore o kwešiše se, akanya ka Adama yo a sa tšwago go bopja nakong ya ge a be a ikwa la mathomo, ge a be a hlahloba mmele wa gagwe ka noši le tšohle tše a ilego a di bona le go di kwa gotee le go di kwa ka go di swara tše di bego di mo dikologile ge a be a lemoga di sa tloga fase gore o be a phela! Se se diragetše mo e ka bago nywaga e 6 000 e fetilego, ngwageng wa 4 026 pele ga Mehla e Tlwaetšwego ya rena, go ya ka go balwa ga dinako mo go neilwego ka Beibeleng e Kgethwa. Se se diragetše lefelong la naga yeo lehono e tsebjago e le Turkey, goba karolong ya ka borwa-bodikela ya naga yeo bjale e bitšwago Asia, felo-tsoko kgaufsi le Noka ya Eforate le Noka ya Tigris, e lego karolo ya seripa sa ka leboa ya kgokolo ya rena ya lefase. Nako e be e le mo e ka bago ka October 1 ka ge dialmanaka tša kgale kudu tša batho di thomile go bala nako kgaufsi le nako yeo.

3. (a) Motho wa pele o ile a thoma go phela a le boemong bofe? (b) Leina la motho wa pele e ile ya ba mang, gomme le be le bolela’ng?

³ Monna wa pele o ile a thoma go phela a ipheditše, a bopilwe ka mo go phethagetšego, a e-na le bophelo bjo bobotse ka mo go phethagetšego, a botega ka mo go phethagetšego. Leina leo a le neilwego leboelela pegong ya Beibele le lebiša tlhokomelo ya rena mothopong wo a bopilwego ka wona. Leina la gagwe e be e le ’A·dhamʹ.a Lefase goba mmu wo a bopilwego ka wona le be le bitšwa ’a·dha·mahʹ. Ka gona go ka bolelwa gabotse gore leina la gagwe le bolela gore “Motho wa Lefaseng.” Le e ile ya ba leina le le hlaolago la motho yo wa pele—Adama. Go swanetše go ba go ile gwa kgahliša gakaakang go Adama ge a be a thoma go phela, a e-ba motho yo bohlale yo a nago le dikwi!

4. Ke tsela efe e tlabago ya go phafogela bophelong yeo e sa kago ya direga mothong wa pele, ka gona e be e se morwa wa eng?

⁴ Nakong ya ge motho yo wa pele, Adama, a be a thoma go phela, a thoma go fahloga kgopolong, a bula mahlo a gagwe, ga a ka a ikhwetša a robetše kgareng e nago le maboya, a gokareditšwe ke matsogo a matelele a matla a sebopiwa sa tshadi se swanago le kgabo, a se gomaretše le go se lebelela ka mahlong gomme ka maikwelo a lerato a se bitša Mma. Motho wa pele Adama ga a ka a phafogela bophelong ka tsela e bjalo e tlabago. Ga a ka a ikwa a e-na le tswalano ya nama le kgabo, ga se gwa ka gwa ba bjalo gaešita le ka morago ga ge a e bone. Letšatšing la go bopja ga gagwe, go be go se selo seo se bego se bolela gore e be e le setlogolwana sa kgabo goba sebopiwa lege e le sefe sa mohuta woo. Eupja, na motho wa pele, Adama o be a tla dula a gakanegile ge e le ka tsela yeo a bilego gona ka yona? Aowa.

5. Ke’ng seo Adama a ilego a tloga a se tseba ka tšhemo ya gagwe yeo e swanago le phaka le ka yena ka noši?

⁵ Ka mo go kwagalago, mo gongwe o be a ka ba a ile a makala ka mo go swanetšego ge e le mabapi le kamoo dilo ka moka tše dibotse tšeo a bego a di lebeletše di bilego gona ka gona. O ikhweditše a le tšhemong e swanago le phaka, e lego paradeise yeo a bego a se a e beakanya, a e dira le go e rulaganya. Se se diregile bjang? Ka ge e be e le motho yo bohlale yo a naganago ka mo go phethagetšego, o be a ka rata go tseba. O be a se a ka a ba le phihlelo pele. O be a tseba gore ga se motho yo a itirilego le yo a ikgodišitšego. Ga a ka a fihla boemong bjo ka maiteko a gagwe ka noši.—Bapiša le Psalme 100:3; 139:14.

6. Adama o swanetše go ba a ile a itshwara bjang ka go ba ga gagwe yo a phelago legaeng le phethagetšego la lefaseng?

⁶ Mathomong motho wa pele Adama o swanetše go ba a ile a thabela kudu phihlelo ye e mpsha ya go phela ka lerato legaeng le phethagetšego la lefaseng ge a nagana ka moo a tšwago gona le lebaka leo a bilego gona ka lona. Go be go se seo a bego a ka se dira ge e se go hlalala ka lethabo. O ile a hwetša mantšu a e-tšwa molomong wa gagwe. A ikwa a bolela leleme la batho, a hlalosa ka dilo tše dibotse tšeo a di bonego le tšeo a di kwelego. E be e le mo gobotse gakaakang go phela tšhemong ye ya Paradeise! Eupja ge a dutše a itlatša ka lethabo ka tsebišo e tšwago go tšohle tše a di bonago, medumo, menko le go kgoma dilo, o be a tla tutueletšega go nagana. Go rena ge nkabe re ile ra bewa maemong a gagwe, go be go tla ba le sephiri mabapi le se ka moka, sephiri seo re bego re ka se ikutollele sona ka borena.

Ga go Sephiri ge e le ka go ba Gona ga Motho

7. Ke ka baka la’ng Adama a se a ka a gakanega ka nako e telele mabapi le go ikhwetša ga gagwe a phela e bile a le tšhemong ya paradeise?

⁷ Motho wa pele Adama ga a ka a gakanega ka nako e telele mabapi le boemo bjo a ilego a ikhwetša a phela go bjona a nnoši, go se motho o mongwe yo a swanago le yena yo a bonagalago tšhemong ya Paradeise. O ile a kwa lentšu la motho o mongwe le bolela. Motho o ile a le kwešiša. Eupja seboledi se be se le kae? Motho ga se a bona motho yo a bolelago. Lentšu le be le e-tšwa lefelong le le sa bonagalego le le sa bonwego, gomme le be le bolela le yena. E be e le lentšu la Modiri wa motho, Mmopi wa gagwe! Le gona motho o be a kgona go mo araba ka mokgwa o swanago wa go bolela. O ile a ikhwetša a bolela le Modimo, Mmopi. Motho o be a sa nyake se-amogela-modumo sa radio sa mehleng yeno sa thutamahlale gore a kwe lentšu la Modimo. Modimo o ile boledišana le yena ka go lebanya ka ge e le sebopiwa sa gagwe.

8, 9. (a) Ke dipotšišo dife tšeo Adama a bego a tla di arabelwa, gomme ke tlhokomelo efe le kgahlego tša tate tšeo a ilego a di bontšhwa? (b) Ke karabo efe yeo Adama a ilego a e hwetša go Tatagwe wa legodimong?

⁸ Bjale motho o be a tseba gore ga a noši, gomme o swanetše go ba a ile a ikwa gakaone ka baka la se. Monagano wa gagwe o be o tletše dipotšišo. O be a ka di botšiša Motho yo a sa bonagalego yo a bolelago le yena. Ke mang yo a mo dirilego gotee le tšhemo ye ya lethabo? Ke ka baka la’ng a ile a bewa moo, gomme ke’ng seo a bego a tla se dira ka bophelo bja gagwe? Na go be go e-na le morero lege e le ofe ka go phela? Motho yo wa pele Adama O ile a bontšhwa tlhokomelo le kgahlego ka gobane dipotšišo tša gagwe di ile tša arabja ka tsela yeo e kgotsofatšago monagano wa gagwe wo o nyakago go tseba. E swanetše go ba e bile lethabo le lekaakang go Modiri wa gagwe, Monei wa gagwe wa Bophelo, Tatagwe wa legodimong go kwa motho a thoma go bolela le go ntšha mantšu a gagwe a pele! A lethabo le lekaakang leo se se ilego sa le nea Tate wa legodimong ge a e-kwa morwa wa gagwe a bolela le yena! Potšišo e tlwaelegilego ya mathomo e be e tla ba e rego, “Ke bile gona bjang?” Tate wa legodimong o ile a thabela go e araba gomme ka tsela yeo a bontšha gore motho yo wa pele e be e le morwa wa Gagwe. E be e le “morwa wa Modimo.” (Luka 3:38) Jehofa o itsebišitše e le Tate wa motho yo wa pele, Adama. Moko wa karabo yeo Adama a e hweditšego go Tatagwe wa legodimong potšišong ya gagwe le yeo a e fetišeditšego go bana ba gagwe šo:

⁹ “Morêna Modimo a na a bopa motho, [ka] lerole la mmu; mo dinkong tša xaxwe a budulêla môya wa bophelô, motho a napa a ba môya o phelaxo. Byale Morêna Modimo a dira thšemo ya Edene thokô ya Bohlabêla, ’me motho yo a mmopilexo a mmea xôna-moo. Morêna Modimo a mediša dihlare tšohle tše di kxahlišaxo xe di bônwa, tše bose xe di lewa; a di mediša mo mmung. Mo xare xa thšemo a mediša sehlare sa bophelô, le sehlare sa xo tseba botse le bobe. Xôna-moo Edene xo be xo e-tšwa noka ya xo nošetša thšemo yeo; xôna-moo ya aroxana ya ba dinoka tše nnê.”—Genesi 2:7-10.b

10, 11. (a) Ke ditherešo dife tšeo Adama a ilego a ithuta tšona ka mo go kwagalago, eupja ke dipotšišo dife tše dingwe tšeo a ilego a nyaka gore di arabje? (b) Ke dikarabo dife tšeo Tate wa legodimong a ilego a di nea Adama?

¹⁰ Monagano o bohlale o mofsa wa Adama o ile wa amogela ka phišego tsebišo ye e kgotsofatšago. Bjale o be a tseba gore o be a sa tšwe lefelong leo le sa bonagalego leo Modiri wa gagwe le Mohlodi a bego a bolela a le go lona. Go e na le moo, o be a bopilwe ka lefase leo a bego a dula go lona gomme ka go rialo e be e le wa lefaseng. Monei wa ga gagwe wa Bophelo le Tate e be e le Jehofa Modimo. E be e le “môya o phelaxo.” Ka ge a be a amogetše bophelo bja gagwe go Jehofa Modimo, gona e be le “morwa wa Modimo.” Dihlare tše di mo dikologilego tšhemong ya Edene di ile tša tšweletša dienywa tšeo e bego e le dijo tše bose, e le gore a di je gomme a tšwele pele a phela e le moya o phelago. Eupja ke ka baka la’ng a be a swanetše go tšwela pele a phela, le gona ke ka baka la’ng a be a beilwe lefaseng tšhemong ye ya Edene? E be e le motho yo a bopilwego ka botlalo yo bohlale le yo a nago le matla a mmele, gomme o be a swanetše go tseba. Go sego bjalo, o be a ka kgona bjang go phetha morero wa gagwe bophelong gomme ka go rialo a thabiša Modiri wa gagwe le Tate ka go dira thato ya Modimo? Dikarabo tša dipotšišo tše tše swanetšego di ile tša newa tsebišong e latelago:

¹¹ “Xomme Morêna Modimo a tšea motho a mmea thšemong ya Edene xore a e lemê, a e dišê. Morena a laela motho a re: Dihlare ka moka tša thšemo yé O ka di ja. Fêla, sehlare sa xo tseba botse le bobe sôna O se kê wa se ja; ka xobane mohla ò tl’o xo se ja O tlo hwa lehu.”—Genesi 2:15-17.

12. Adama o swanetše go ba a ile a leboga Mmopi wa gagwe bakeng sa eng, gomme ka go rialo ke bjang motho a bego a ka reta Modimo?

¹² Adama o swanetše go ba a ile a leboga Mmopi wa gagwe ka ge a be a neilwe selo se sengwe sa go mo dira gore a dule a swaregile ka mo go holago tšhemong ye e botse ya Edene. Bjale o be a tseba thato ya Mmopi wa gagwe, gomme o be a ka Mo direla se sengwe mo lefaseng. Bjale o be a e-na le boikarabelo bjo a bego a swanetše go bo rwala, e lego bja go lema tšhemo ya Edene le go e hlokomela, eupja seo e be e tla ba selo se se thabišago go ka se dira. Ka go dira se, o be a tla dira gore tšhemo ya Edene e dule e bogega ka tsela yeo e bego e tla tliša letago le theto go Modiri wa yona, Jehofa Modimo. Nako le nako ge Adama a be a swarwa ke tlala ka baka la modiro, o be a ka ja dienywa tša dihlare tša tšhemo ka go mo kgotsofatšago. Ka tsela yeo o be a tla tsošološa matla a gagwe gomme a dula a e-na le bophelo bja gagwe bja lethabo le sa felego—ka mo go sa felego.—Bapiša le Mmoledi 3:10-13.

Tebelelo ya Bophelo Bjo bo sa Felego

13. Ke tebelelo efe yeo motho wa pele a bego a e-na le yona, gomme ke ka baka la’ng go le bjalo?

¹³ Ka mo go sa felego? A kgopolo yeo go bonalago e sa kgodiše yeo ye e swanetšego go ba e bile yona go motho yo a phethagetšego! Eupja ke ka baka la’ng go se bjalo? Mmopi wa gagwe o be a se na kgopolo goba morero wa go senya tšhemo ye e dirilwego ka bothakga ya Edene. Ke ka baka la’ng a be a swanetše go senya modiro wa gagwe, mola e be e le o botse gakaalo le o bontšhago bokgabo bja gagwe bja go bopa? Ka mo go kwagalago, o be a ka se rere go dira bjalo. (Jesaya 45:18) Le gona, ka ge tšhemo ye yeo go sego ye e swanago le yona e be e tla dula e lengwa, ruri e be e tla nyaka molemi le mohlokomedi yo a swanago le motho yo a phethagetšego, Adama. Ka gona ge nkabe motho yo e lego mohlokomedi a se je seenywa se se ileditšwego sa “sehlare sa xo tseba botse le bobe,” le ka mohla o be a ka se hwe. Motho yo a phethagetšego o be a ka phela ka mo go sa felego!

14. Ke bjang Adama a bego a ka ba le bophelo bjo sa felego Paradeiseng?

¹⁴ Bophelo bjo sa felego tšhemong ya Paradeise ya Edene bo be bo beilwe pele ga Adama! Bo be bo ka thabelwa ka mo go sa felego ge feela a be a ka dula e le yo a kwago Mmopi wa gagwe ka mo go phethagetšego, a se je seenywa seo se bego se ileditšwe ke Mmopi wa motho. E be e le kganyogo ya Gagwe gore motho yo a phethagetšego a dule a e-kwa gomme a tšwele pele a phela ka mo go sa felego. Go iletšwa ga seenywa sa “sehlare sa xo tseba botse le bobe” e be e se selo se se bolayago. E be e fo ba go lekwa ga go kwa mo go phethagetšego ga motho go Tatagwe. Go neile motho sebaka sa go hlatsela lerato la gagwe la go rata Modimo, Mmopi wa gagwe.

15. Ke ka baka la’ng Adama a be a ka lebelela pele bokamosong bjo phadimago bjo bo nago le tše botse tšeo Mmopi wa gagwe a mo swaretšego tšona?

¹⁵ Motho yo a phethagetšego o ile a lebelela pele bokamosong bjo phadimago, ka kgotsofalo ya pelo ya gore e be e se feela kotsi yeo e tlilego e sa rerwa eupja o be a e-na le Tate wa legodimong, a e-na le monagano o edišeditšwego ka kwešišo ya morero wa gagwe bophelong, gomme a lebeletše go phela ka mo go sa felego Paradeiseng. O ile a ja dihlare tšeo e bego e le dijo tše botse, a phema “sehlare sa xo tseba botse le bobe.” A rata go tseba tše botse tšeo Mmopi wa gagwe a mo swaretšego tšona. Modiro, e sego o senyago eupja wa go lema tšhemo ya Edene e be e le o botse, gomme motho yo a phethagetšego o o dirile.

O be a sa Ikwe a Gapeletšega go Hlalosa Ditaba

16-18. Ke dilo dife tšeo di bitšwago diphiri tšeo Adama a sa kago a ikwa a gapeletšega go di utolla, gomme ka baka la’ng?

¹⁶ Seetša sa letšatši se se bonagetšego e le seetša se segolo sa mosegare, seo a bego a ka se bona mosepelong wa sona go phatša leratadima, se a sobela. Lefsifsi la swara, ya ba bošego gomme a thoma go bona ngwedi. Ga se bja ka bja mo tlatša maikwelo a poifo; e be e le seetša se senyenyane seo se bego se apareditše bošego. (Genesi 1:14-18) Mo gongwe, dinakangwedi di be di fofa-fofa tšhemong, dietša tša tšona tše fokolago di thumaša le go tima go swana le mabone a manyenyane.

¹⁷ Ge e e-ba bošego gomme lefsifsi le mo aparetša, o ile a ikwa a nyaka go robala go swana le diphoofolo tše di mo dikologilego. Ge a tsoga a thoma go ikwa a swerwe ke tlala, gomme a ja dihlareng tše di dumeletšwego ka kganyogo e botse ya dijo, e le gore a hwetše seo se ka bitšwago sefihlolo.

¹⁸ O ile a lebiša tlhokomelo ya gagwe modirong wa letšatši a e-na le matla a mpshafaditšwego a bile a lapološitšwe gabotse ke go ikhutša ga bošego. Ge a dutše a lebeletše dihlare tše tala tše di mo dikologilego, ga a ka a ikwa a swanetšwe ke go nyakišiša sephiri sa seo batho nywageng e dikete-kete ka morago ba bego ba tla se bitša photosynthesis, mogato wo wa sephiri woo ka wona karolwana yeo e bopago mmala o motala wa dihlare, e lego chlorophyll ya tšona e dirišago matla a seetša sa letšatši go tšweletša dijo gore di lewe ke batho le diphoofolo, ka nako e swanago di heme carbon dioxide yeo motho le phoofolo ba e hemelago ka ntle gomme ya ntšha oxygen gore ba e heme. Motho mo gongwe a ka o bitša sephiri, eupja go be go sa nyekege gore Adama a se utolle. E be e le mohlolo wa Mmopi wa motho. O be a o kwešiša gomme a dirile gore o šome bakeng sa go hola bophelo bja dibopiwa lefaseng. Ka gona, go be go lekane bakeng sa matla a go nagana a phethagetšego a motho wa pele gore Modimo, e lego Mmopi o medišitše dilo gomme modiro wo motho a o neilwego ke Modimo e be e le go hlokomela dimela tšeo di melago tšhemong ya Edene.—Bona Genesi 1:12.

O be a Nnoši Eupja a Thabile

19. Ke’ng seo Adama a sa kago a se dira gaešita lege a be a lemoga gore o be a nnoši, go se motho o mongwe yo a swanago le yena lefaseng?

¹⁹ Thuto ya motho yeo a e rutwago ke Tatagwe wa legodimong e be e se ya fela. Motho o ile a hlokomela tšhemo ya Edene go se o mongwe yo a swanago le yena lefaseng yo a ka mo tlatšago goba go mo thuša. Ge re bolela ka ba mohuta wa gagwe, e lego mohuta wa batho, o be a nnoši. Ga se a ka a tšwa lesolo la go nyaka motho yo a swanago le yena yo a bego a ka thabela bogwera bja lefaseng le yena. Ga a ka a kgopela Modimo, e lego Tatagwe wa legodimong gore a mo nee ngwanabo goba kgaetšedi. Go ba ga gagwe a nnoši e le motho ga se gwa feleletša ka go mo gafiša gomme gwa mo tšeela lethabo bophelong le modirong. O be a gwerane le Modimo.—Bapiša le Psalme 27:4.

20. (a) Selo se segolo seo se ilego sa thabiša Adama ke’ng? (b) Ke ka baka la’ng go tšwela pele tseleng ye ya bophelo e be e ka se be bothata bjo bošoro go Adama? (c) Sehlogo se e latelago se tla bolela ka eng?

²⁰ Adama o be a tseba gore yena le modiro wa gagwe ba be ba hlahlobja ke Tatagwe wa legodimong. Selo se segolo seo se bego se mo thabiša e be e le go kgahla Modimo wa gagwe le Mmopi, yoo bogolo bja gagwe bo ilego bja utollwa ke mediro ka moka e mebotse ya tlholo yeo e dikologilego motho. (Bapiša le Kutollo 15:3.) Go tšwela pele ka tsela ye ya bophelo e be e ka se be bothata bjo bošoro goba modiro o tenago go motho yo a leka-lekanego ka mo go phethagetšego yo a bego a ka kgona go boledišana le Modimo wa gagwe. Le gona Modimo o be a neile Adama modiro o kgahlišago, modiro o thabišago, wo o bego o ka mo tlišetša kgotsofalo e kgolo le lethabo. Sehlogo se se latelago se tla bolela ka mo go oketšegilego ka ditšhegofatšo le ditebelelo tša Paradeise tšeo Adama a ilego a di thabela di e-tšwa go Mmopi yo lerato.

[Mengwalo ya tlase]

“Leina la ya pele ké Pisone; ké yôna e rarêlaxo le naxa ya Hafila ka moka, mo xo naxo le xauta. Xe e le xauta ya naxa yeo ké e botse. Le sehlare sa Bedola se xôna-moo, le lebyê la Šohama. Leina la noka ya bobedi ké Gihone; ké yôna e rarêlaxo le naxa ya Kuše. Leina la noka ya boraro ké Hidekele; ké ye e tlaxo ka thokô ya Bohlabêla ya naxa ya Asuri. Noka ya bonê ké Forate.”—Genesi 2:11-14.

Dikarabo tša Gago ke Dife?

◻ Ke ka baka la’ng Adama a se a ka gakanega ka nako e telele mabapi le go ba gona ga gagwe?

◻ Ke modiro ofe wo Modimo a ilego a o nea Adama, gomme o swanetše go ba a ile a arabela bjang?

◻ Ke tebelelo efe yeo motho yo a phethagetšego a ilego a e thabela, gomme ka baka la’ng?

◻ Ke ka baka la’ng Adama a sa ka a dira go utolla diphiri modiro wa bophelo bja gagwe?

◻ Ke ka baka la’ng go ba noši ga Adama e le motho go sa ka gwa mo amoga lethabo bophelong?

[Picture Credit Line on page 10]

Seswantšho sa NASA