“Ruri o ka ba Mmulamadibogo yo Mobotse!”
1. Kgaetšedi yo mongwe o ile a ikwa bjang ka bodiredi bja gagwe bja bobulamadibogo?
1 Kathe B. Palm o itše: “Ga go na mošomo wo ke bego nka o hwetša wo o bego o ka ntlišetša kgotsofalo e kaakaa goba wa mputsa moyeng ka tsela ye.” O feditše nywaga-some e le mmulamadibogo yo a sa ipabalelego yo a bego a nea bohlatse metsaneng ka moka ya kua Chile, Amerika Borwa. Ge yo mongwe a nagana ka ditšhegofatšo tšeo di thabelwago ke bao ba lego tirelong ya nako e tletšego, mohlomongwe a ka ba a go boditše gore: “Ruri o ka ba mmulamadibogo yo mobotse!”
2. Hlalosa gore ke ka baka la eng kgotsofalo e hwetšwa dilong tša moya.
2 Tsela e Kgotsofatšago ya Bophelo: Mohlala wa rena, Jesu, o ile a lapološwa e le ka kgonthe ke go dira thato ya Tatagwe. (Joh. 4:34) Ka gona, Jesu o ile a ruta balatedi ba gagwe go tšwa pelong gore kgotsofalo ya kgonthe e tlišwa ke go tšea karolo medirong yeo e sepedišanago le borapedi bja Jehofa. Re a kgotsofala ge re swaregile ka mediro yeo e dirago gore re amogelwe ke Jehofa maphelong a rena. Go oketša moo, ge re diriša nako e oketšegilego, matla le dilo tše re nago le tšona go thuša ba bangwe, re oketša lethabo la rena.—Dit. 20:31, 35.
3. Re hwetša lethabo lefe ge re fetša nako e oketšegilego bodireding?
3 Ge re fetša nako ya rena e ntši re le bodireding, re tla ba le dibaka tše dintši tša go hwetša lethabo leo le tlišwago ke go thoma le go swara dithuto tša Beibele. Gaešita le moo beng ba dintlo ba bonagalago ba sa thabele, re ka hwetša gore tšhemo ya rena e tšweletša kudu go feta mathomong ge re dutše re oketša phihlelo le bokgoni bja rena bodireding. Babulamadibogo ba ka diriša thuto yeo ba e hwetšago Sekolong sa Tirelo ya Bobulamadibogo seo ba yago go sona ka morago ga ge ba feditše ngwaga e le babulamadibogo. (2 Tim. 2:15) Ge re dutše re phegelela, re ka ba re bjala dipeu tša therešo tšeo ka morago di tlago go tšweletša dienywa.—Mmo. 11:6.
4. Bafsa bao ba lego kgaufsi le go aloga sekolong se se phagamego ba swanetše go naganišiša ka’ng?
4 Bafsa: Ge e ba o le kgaufsi le go aloga sekolong se se phagamego, na o ile wa naganišiša ka bokamoso bja gago? Ga bjale modiro wa sekolo o ka ba o e-tla pele thulaganyong ya gago. Ge o feditše sekolo, o tla diriša bjang nako yeo ga bjale o e dirišetšago modiro wa sekolo? Go e na le gore o phegelele mešomo ya boiphedišo, ke ka baka la’ng o sa naganišiše ka pakane ya go tšea bobulamadibogo bja ka mehla? Bokgoni bjo o tla ithutago bjona—go nea bohlatse bathong ba ditlogo tše di sa swanego, go fenya mapheko a gago, go hlagolela boitayo le go hlagolela bokgoni bja go ruta—bo tla go thuša bophelong bja gago ka moka.
5. Batswadi le ba bangwe ka phuthegong ba ka kgothaletša ba bangwe bjang go tsenela tirelo ya bobulamadibogo?
5 Batswadi, na le kgatha tema ya lena go thušeng bana go kgetha tirelo ya nako e tletšego? Mantšu le mehlala ya lena e mebotse di ka ba thuša kudu go etiša dikgahlego tša Mmušo pele? (Mat. 6:33) Ray, yo a thomilego go bula madibogo ka morago ga go aloga sekolong se se phagamego, o gopola ka gore: “Ka mehla mma o be a bolela gore go bula madibogo go kgotsofatša kudu bophelong.” Bohle ka phuthegong ba ka kgothaletša ba bangwe go tsenela tirelo ya bobulamadibogo ka mantšu le thekgo ya bona. Jose yo a tšwago Sepania, o itše: “Phuthego ya gešo e be e lebelela tirelo ya bobulamadibogo e le modiro o mobotse kudu bakeng sa bafsa. Mantšu le ditebogo tša bona bakeng sa tirelo ya bobulamadibogo gotee le thušo ya bona di ile tša nnolofaletša go thoma go bula madibogo.”
6. Ke’ng seo re ka se dirago ge e ba ga bjale re sa kganyoge go bula madibogo?
6 Go Fenya Mapheko: Eupša go thwe’ng ge e ba o re, ‘Ga ke kganyoge go bula madibogo.’ Ge e ba e le tsela yeo mathomong o ilego wa ikwa ka yona, botša Jehofa tsela yeo o ikwago ka yona gomme o mmotše gore, ‘Ga ke tsebe ge e ba ruri nka kgona go bula madibogo, eupša ke nyaka go dira selo seo se go thabišago.’ (Ps. 62:8; Die. 23:26) Ke moka tsoma tlhahlo ya gagwe ka Lentšung la gagwe le mokgatlong wa gagwe. Babulamadibogo ba ka mehla ba bantši ba ile ba ‘leka’ bobulamadibogo ka go tsenela bja go thuša gomme lethabo leo ba le hweditšego le ba tutueleditše go katanela tirelo ya nako e tletšego.—Ps. 34:8.
7. Re ka fenya bjang dipelaelo tša gore re ka se fihlelele pakane ya kgwedi le kgwedi ya diiri tše 70?
7 Go thwe’ng ge e ba o sa kgonthišege gore o ka kgona go fihlelela pakane ya kgwedi le kgwedi ya diiri tše 70? Ke ka baka la’ng o sa bolele le babulamadibogo bao maemo a bona a swanago le a gago? (Die. 15:22) Ke moka ngwala mananeo a mmalwa ao o ka a dirišago. O ka hwetša gore go ithekela nako bakeng sa bodiredi ka go tlogela dilo tšeo di se nago mohola gakaalo go bonolo go feta kamoo o bego o nagana ka gona.—Baef. 5:15, 16.
8. Ke ka baka la’ng re swanetše go hlahlobišiša maemo a rena nako le nako?
8 Hlahlobišiša Maemo a Gago: Gantši maemo a motho a a fetoga. Ke mo gobotse go hlahlobišiša maemo a gago nako le nako. Ka mohlala, na o kgaufsi le go rola modiro? Randy, yo a rotšego modiro e sa le ka pela, o re: “Phetho ye e ile ya dira gore ke thome go ba mmulamadibogo wa ka mehla gotee le mosadi wa-ka gomme e re neile sebaka sa go hudugela moo go nago le tlhokagalo e kgolo ya bagoeledi. Ke hweditše ditšhegofatšo tše dintši ka baka la phetho ye, eupša tšhegofatšo e kgolo go di feta ke go ba le letswalo le lebotse.”
9. Ke’ng seo banyalani ba swanetšego go naganišiša ka sona?
9 Ka morago ga gore banyalani ba bangwe ba hlahlobišiše maemo a bona, ba ile ba lemoga gore ga go nape go nyakega gore bobedi bja bona ba šome ka nako e tletšego. Ke therešo gore se se ka nyaka gore lapa le nolofatše bophelo bja lona, eupša seo se nyaka boikgafo. John, yoo mosadi wa gagwe a sa tšwago go rola modiro gore a katološe bodiredi bja gagwe, o re: “Ga go na selo seo se nthabišago go feta go tseba gore mosadi wa-ka o tšea karolo dilong tša moya letšatši ka moka.”
10. Ke’ng seo se tutueletšago Bakriste gore ba nagane ka go tsenela bobulamadibogo?
10 Pontšho ya Lerato le Tumelo: Jehofa o dirile gore boboledi e be modiro o bohlokwa woo yo mongwe le yo mongwe wa rena a ka o dirago. Tshepedišo ye ya kgale e kgaufsi le go fela gomme go tla phološwa feela bao ba bitšago leina la Jehofa. (Baroma 10:13) Go mo rata go tšwa pelong le go leboga seo a re diretšego sona go tla re tutueletša go kwa thomo e tšwago go Morwa wa gagwe ya gore re dire boboledi ka mafolofolo. (Mat. 28:19, 20; 1 Joh. 5:3) Go oketša moo, go ba le tumelo ya gore ruri re phela mehleng ya bofelo go tla re tutueletša go dira sohle seo re ka se kgonago bodireding ge go sa dutše go e-na le nako, go e na le gore re diriše lefase ka botlalo.—1 Bakor. 7:29-31.
11. Ge yo mongwe a re botša gore re ka ba babulamadibogo ba babotse, re swanetše go lebelela seo bjang?
11 Go tšea bobulamadibogo bja ka mehla ga se go fo arabela thulaganyong ya mokgatlo; ke pontšho ya gore re ineetše go Modimo. Ka gona, ge yo mongwe a ka go botša gore ruri o ka ba mmulamadibogo yo mobotse, tšea seo e le theto. Le gona, naganišiša ka thapelo gore o tlatše bao ba tšeago karolo mohuteng wo o kgotsofatšago wa tirelo.
[Seswantšho go letlakala 4]
Batswadi, na le kgatha tema ya lena go thušeng bana go kgetha tirelo ya nako e tletšego?
[Seswantšho go letlakala 5]
Jehofa o dirile gore boboledi e be modiro o bohlokwa woo yo mongwe le yo mongwe wa rena a ka o dirago.