Go sa Šetšwe Gore o Dirilwe ka Lerole, Gatela Pele!

“Yêna ó tseba lebopô le re lexo ka lôna, xa a lebale xe re le lerole.”—PSALME 103:14.

1. Na Beibele e nepile ka tsela ya thutamahlale ka go bolela gore batho ba dirilwe ka lerole? Hlalosa.

KA TSELA ya nama re lerole. “Morêna Modimo a na a bopa motho, [ka] lerole la mmu; mo dinkong tša xaxwe a budulêla môya wa bophelô, motho a napa a ba môya o phelaxo.” (Genesi 2:7) Tlhaloso ye e bonolo ya kamoo motho a bopilwego ka gona e dumelelana le therešo ya thutamahlale. Dielemente ka moka tšeo mmele wa motho o bopilwego ka tšona di ka hwetšwa ‘leroleng la mmu.’ Rakhemisi yo mongwe o kile a bolela gore mmele wa motho yo mogolo o na le 65 lekgolong ya okisitšene, 18 lekgolong ya carbon, 10 lekgolong ya hydrogen, 3 lekgolong ya nitrogen, 1,5 lekgolong ya calcium le 1 lekgolong ya phosphorus gomme karolo ka moka ye e šetšego e bopja ke dielemente tše dingwe. Gore ditekanyetšo tše di nepagetše ka mo go feletšego ga go bohlokwa. Therešo ye e šalago ke gore: “Re lerole”!

2. Ke karabelo efe yeo tsela yeo Modimo a bopilego batho ka yona e e tšweletšago ka go wena, gomme ka baka la’ng?

² Ke mang ka ntle le Jehofa yo a ka bopago dibopiwa tše raraganego gakaalo ka lerole feela? Mediro ya Modimo ke ye e phethagetšego le ye e se nago bosodi, ka gona go kgetha ga gagwe go bopa motho ka tsela ye ruri ga go nee lebaka la go belaela. Ka kgonthe, taba ya gore Mmopi yo Mogolo o ile a kgona go bopa motho ka lerole la mmu ka tsela ye e šiišago le ye e tlabago go oketša tebogo ya rena bakeng sa matla a Gagwe ao a se nago mellwane, bokgoni le bohlale bjo bo šomago.—Doiteronomio 32:4, mongwalo wa ka tlase wa NW; Psalme 139:14.

Phetogo ya Maemo

3, 4. (a) Ka go bopa motho ka lerole, ke’ng seo Modimo a bego a se a ikemišetša go se dira? (b) Dafida o be a šupa go eng go Psalme 103:14, gomme taba ye e dikologilego e re thuša bjang go fihlelela phetho ye?

³ Dibopiwa tša lerole di na le mo di palelwago gona. Lega go le bjalo, Modimo le ka mohla o be a se a rera gore go palelwa moo e be mo go boima goba mo go thibelago kudu. Go be go se gwa rerelwa go nola moko goba go feleletša ka manyami. Lega go le bjalo, bjalo ka ge taba ye e dikologilego mantšu a Dafida go Psalme 103:14 e bontšha, go palelwa mo batho ba nago le gona go ka baka go nolega moko gomme gwa feleletša ka manyami. Ka baka la’ng? Ge Adama le Efa ba be ba sa kwe Modimo, ba ile ba tšweletša boemo bjo bo fetogilego bakeng sa lapa la bona la ka moso. Go ba bao ba bopilwego ka lerole go ile gwa ba le kwešišo e mpsha.a

⁴ Ka baka leo, Dafida o be a sa bolele ka go palelwa ga tlhago moo gaešita le batho ba ba phethagetšego bao ba dirilwego ka lerole ba bego ba tla ba le gona, eupja o be a bolela ka mafokodi a batho ao a bakilwego ke go se phethagale ga leabela. Go sego bjalo nkabe a se a bolela ka Jehofa gore: “E a go lebalelago makgopo a gago ka moka, a fodišago malwetši a gago ka moka, a hlakodišago bophelo bja gago tshenyegong [“moleteng,” NW]. Ga se a dire ka dibe tša rena, gomme ga a re bošološetše makgopo a rena.” (Psalme 103:2-4, 10, PK) Go sa šetšwe gore ba dirilwe ka lerole, ge nkabe batho ba phethagetšego ba ile ba dula ba botega le ka mohla ba ka be ba se ba foša, ba dira sebe mo e lego gore ba be ba tla nyaka tebalelo; le gona ba be ba ka se be le malwetši ao a nyakago go fodišwa. Godimo ga tšohle, le ka mohla ba be ba ka se swanelwe ke go theogela moleteng wa lehu woo go wona ba bego ba tla ntšhwa feela ka tsogo.

5. Ke ka baka la’ng go se thata go rena go kwešiša mantšu a Dafida?

⁵ Ka ge re se ra phethagala, ka moka ga rena re latswitše dilo tšeo Dafida a boletšego ka tšona. Ka mehla re lemoga go palelwa ga rena ka baka la go se phethagale. Re a nyama ge ka dinako tše dingwe go bonala go šitiša tswalano ya rena le Jehofa goba le banababo rena ba Bakriste. Re swabišwa ke gore go se phethagale ga rena le dikgateletšo tša lefase la Sathane ka dinako tše dingwe di re kgoromeletša manyaming. Ka ge pušo ya Sathane e batamela bofelong ka lebelo, lefase la gagwe le baka kgateletšo e kgolo kudu godimo ga batho ka kakaretšo le godimo ga Bakriste ka mo go kgethegilego.—Kutollo 12:12.

6. Ke ka baka la’ng Bakriste ba bangwe ba ka ikwa ba nolegile moko, gomme Sathane a ka diriša maikwelo a mohuta woo bjang ka mo go holago?

⁶ Na o ikwa gore go phela bophelo bja Bokriste go ba thata kudu? Bakriste ba bangwe ba ile ba kwewa ba bolela gore ge ba dutše ba e-ba le nako e telele therešong ke mo go bonagalago ba bonala kudu e le ba ba sa phethagalago. Lega go le bjalo, mohlomongwe ke feela ka baka la gore e-ba ba ba lemogago kudu go se phethagale ga bona le go se kgone ga bona go dumelelana le ditekanyetšo tše di phethagetšego tša Jehofa ka tsela yeo ba bego ba ka rata ka yona. Lega go le bjalo, ge e le gabotse a e ka no ba e le mafelelo a go tšwela pele ka go gola tsebong le tebogong ya go leboga ditaelo tša go loka tša Jehofa. Go bohlokwa gore le ka mohla re se ke ra dumelela go lemoga lege e le gofe mo go bjalo go re nola moko go fihla boemong bja go bapalela ka diatleng tša Diabolo. Go theoša le nywaga-kgolo o ile a leka leboelela go diriša ka mo go holago go nolega moko e le gore a dire gore bahlanka ba Jehofa ba lahle borapedi bja therešo. Lega go le bjalo, lerato la kgonthe la go rata Modimo gotee le “lehloyo la ruri” (PK) la go hloya Diabolo, le ile la thibela ba bantši ba bona go dira bjalo.—Psalme 139:21, 22; Diema 27:11.

7. Ke boemong bofe bjo go bjona re ka bago bjalo ka Jobo ka dinako tše dingwe?

⁷ Lega go le bjalo, bahlanka ba Jehofa ba ka ikwa ba nolegile moko ka dinako tše dingwe. Go se kgotsofalele dilo tšeo rena ka noši re di fihleletšego le gona e ka ba lebaka la seo. Maemo a mmele goba ditswalano tše di senyegilego le ditho tša lapa, bagwera goba badiri-gotee di ka ba di akaretšwa. Jobo yo a botegago o ile a nolega moko kudu kudu mo a ilego a lopa Modimo ka gore: “A mola O kabe O nkuta kwa bo-dula-bahu, boxale bya xaxo bya phôhla Ò sa mphihlile, Ò mpeetše ’baka sa xo tlo nkxopola!” Ka gona, ge maemo a thata a be a ka gapeletša Jobo ‘motho wa bothakga le go loka le go boifa Modimo le e a ilago bobe’ gore a fele a hlaselwa ke manyami, ga go makatše gore selo se se swanago se ka re diragalela.—Jobo 1:8, 13-19; 2:7-9, 11-13; 14:13.

8. Ke ka baka la’ng go nolega moko ka dinako tše dingwe e ka bago pontšho e nepagetšego?

⁸ Go homotša gakaakang go tseba gore Jehofa o lebelela dipelong gomme ga a hlokomologe maikemišetšo a mabotse! Le ka mohla a ka se ke a lahla bao ba katanago ka potego ka moka gore ba mo kgahliše. Ge e le gabotse, go nolega moko ga dinako tše itšego e ka no ba e le pontšho ye e tiilego ya go bontšha gore ga re tšee tirelo ya rena go Jehofa gabohwefo. Ge go lebelelwa go tšwa boemong bjo, motho yo le ka mohla a sa tshwenywego ke go nolega moko a ka no ba a se a phafogela mafokodi a gagwe a moya go etša kamoo ba bangwe ba phafogetšego a bona. Gopola: “E a rexo ke eme, a bônê xore a se kê a wa.”—1 Ba-Korinthe 10:12; 1 Samuele 16:7; 1 Dikxoši 8:39; 1 Koronika 28:9.

Le Bona ba be ba Dirilwe ka Lerole

9, 10. (a) Ke tumelo ya bomang yeo Bakriste ba dirago gabotse ka go e ekiša? (b) Moše o ile a arabela bjang kabelong ya gagwe?

⁹ Ba-Hebere kgaolo 11 e lokeletša dihlatse tša Jehofa tše dintšinyana tša pele ga Bokriste tšeo di ilego tša bontšha tumelo e tiilego. Bakriste ba lekgolong la pele la nywaga le ba mehleng yeno ba dirile ka mo go swanago. Dithuto tšeo di ka ithutwago go bona ke tše bohlokwa kudu. (Bapiša le Ba-Hebere 13:7.) Ka mohlala, ke tumelo ya mang yeo Bakriste ba ka e ekišago gakaone go feta ya Moše? O ile a laelwa gore a tsebagatše melaetša ya kahlolo go mmuši yo matla kudu wa lefase wa mehleng yeo, e lego Farao wa Egipita. Lehono, Dihlatse tša Jehofa di swanetše go bolela melaetša e swanago ya kahlolo malebana le bodumedi bja maaka le mekgatlo e mengwe yeo e ganetšago Mmušo wo o hlomilwego wa Kriste.—Kutollo 16:1-15.

¹⁰ Bjalo ka ge Moše a ile a bontšha, go phethagatša thomo ye ga se kabelo e bonolo. O ile a botšiša gore: “Ké Nna mang nka yaxo xo Farao ka nthša Ba-Isiraele naxeng ya Egipita?” Re ka kwešiša maikwelo a gagwe a go ikwa a sa swanelege. O ile a belaela gape mabapi le kamoo ba-Isiraele ba gabo ba bego ba tla arabela ka gona: “A k’O bônê hlê! Ba ka se ntumele; ba ka se theetšê xe ke bolêla.” Ke moka Jehofa o ile a mo hlalosetša kamoo a bego a ka hlatsela mothopo wa thomo ya gagwe, eupja Moše o be a e-na le bothata bjo bongwe. O itše: “Hlê Morêna! Xa ke motho e a tsebaxo xo bolêla xo tloxa la bô-maabana le la bô-malôba; le byalo xe O sa thôma xo bolêla le nna mohlanka wa xaxo, ke wa molomo o sa kwalexo, ke wa leleme le lethata.”—Ekisodo 3:11; 4:1, 10.

11. Ka go swana le Moše, re ka arabela bjang boikarabelong bja pušo ya Modimo, eupja ka go bontšha tumelo re ka kgodišega ka eng?

¹¹ Nako le nako re ka ikwa kamoo Moše a ilego a ikwa ka gona. Gaešita lege re lemoga boikarabelo bja rena bja pušo ya Modimo, re ka ipotšiša kamoo re ka kgonago go bo phetha ka gona. ‘Ke nna mang gore ke ye go batho, ba bangwe ba maemo a godimo a tša leago, a tša boiphedišo goba a tša thuto, gomme ka ba le sebete sa go ba ruta ditsela tša Modimo? Banabešo ba moya ba tla arabela bjang ge ke nea ditlhaloso dibokeng tša Bokriste goba ke nea dithero ke le sethaleng Sekolong sa Bodiredi sa Pušo ya Modimo? Na ba ka se bone go palelwa ga-ka?’ Eupja gopola gore Jehofa o be a e-na le Moše gomme o ile a mo hlamela kabelo ya gagwe ka gobane Moše o ile a bontšha tumelo. (Ekisodo 3:12; 4:2-5, 11, 12) Ge e ba re ekiša tumelo ya Moše, Jehofa o tla ba le rena gomme le rena a re hlamela modiro wa rena.

12. Tumelo ya Dafida e ka re kgothatša bjang ge re lebeletšane le go nolwa moko ke dibe le diphošo?

¹² Motho lege e le ofe yo a ikwago a ferekane goba a nolegile moko ka baka la dibe goba mafokodi ruri a ka ipea boemong bja Dafida ge a be a bolela gore: “Xobane nna, bosenyi bya-ka ke a bo tseba, ’me sebe sa-ka xa se tloxe pele xa-ka.” Ge a lopa Jehofa, Dafida gape o itše: “Dibe tša-ka O se kê wa hlwa Ò di bôna; makxôpô a-ka a phomolê ka moka.” Lega go le bjalo, le ka mohla ga se a ka a dumelela go nolega moko go mo amoga kganyogo ya gagwe ya go hlankela Jehofa. “Se nthakê pele xa xaxo; ’me O se tloše môya-mokxêthwa wa xaxo xo nna.” Dafida e be e tloga e le “lerole,” eupja Jehofa ga se a ka a mo furalela ka gobane Dafida o ile a bontšha tumelo kholofetšong ya Jehofa ya go se nyatše ‘pelo e robegilego.’—Psalme 38:1-9; 51:3, 9, 11, 17.

13, 14. (a) Ke ka baka la’ng re sa swanela go ba balatedi ba batho? (b) Mehlala ya Paulo le Petro e bontšha bjang gore gaešita le bona ba be ba dirilwe ka lerole?

¹³ Lega go le bjalo, ela hloko gore gaešita lege re swanetše go lebelela ‘leru le le legolo la dihlatse’ e le kgothatšo bakeng sa go ‘kgotlelela tlhabanong [“lebelong,” NW] ye re lego go yona,’ ga re botšwe gore re be balatedi ba bona. Re botšwa gore re latele megato ya “Moemedi yo Mogolo le Mophethi wa tumelo ya rena, Jesu,” (NW) e sego batho ba ba sa phethagalago—e sego le ka baapostola ba ba botegago ba lekgolong la pele la nywaga.—Ba-Hebere 12:1, 2; 1 Petro 2:21.

¹⁴ Moapostola Paulo le moapostola Petro, bao e bego e le dikokwane ka phuthegong ya Bokriste ba ile ba kgopja ka dinako tše dingwe. Paulo o ngwadile gore: “Xa ke dire botse byo ke bo rataxo; ke dira bobe byo ke sa bo ratexo. Joo, nna motho wa madi-mabe!” (Ba-Roma 7:19, 24) Le gona, Petro lebakeng la ge a be a ikholofela go feta tekano o ile a botša Jesu gore: “Le xe bohle ba ka xakanêxa ka tše O tl’o xo di dirwa, nna nka se kê ka bá ka xakanêxa.” Ge Jesu a be a lemoša Petro gore o be a tla Mo latola gararo, Petro ka boikgogomošo o ile a ganetša Mong wa gagwe, a ikgantšha ka gore: “Le xe nka thwe ke hwê naxô’, nka se latole ka r’yalo.” Lega go le bjalo o ile a latola Jesu, e lego phošo yeo e ilego ya mo dira gore a lle gabohloko. Ee, Paulo le Petro ba be ba dirilwe ka lerole.—Mateo 26:33-35.

15. Go sa šetšwe therešo ya gore re dirilwe ka lerole, ke tlhohleletšo efe yeo re nago le yona ya gore re gatele pele?

¹⁵ Lega go le bjalo, go sa šetšwe mafokodi a bona, Moše, Dafida, Paulo, Petro le ba bangwe ba go swana le bona ba ile ba tšwa e le bafenyi. Ka baka la’ng? Ka gobane ba ile ba bontšha tumelo e tiilego go Jehofa, ba mmota ka mo go feletšego, gomme ba mo kgomarela kgaufsi go sa šetšwe ditšhitišo. Ba ile ba ithekga ka yena gore a nee “matla a fetago a tlwaetšwego.” (NW) O ile a dira seo, le ka mohla a sa ba dumelele gore ba we gore ba palelwe ke go tsoga. Ge e ba re tšwela pele re bontšha tumelo, re ka kgodišega gore ge kahlolo e newa mabapi le rena, e tla ba ka go dumelelana le mantšu a rego: “Modimo ga se e a sa lokago, a ka lebalago modiro wa lena, le go lapišega ga lerato la lena, le le le bontšhitšego go leina la gagwe.” Se se re nea tlhohleletšo gakaakang gore re gatele pele go sa šetšwe therešo ya gore re dirilwe ka lerole!—2 Ba-Korinthe 4:7, NW; Ba-Hebere 6:10, PK.

Go ba Bao ba Dirilwego ka Lerole go Bolela’ng go Rena re le Motho ka o Tee ka o Tee?

16, 17. Ge go tliwa tabeng ya go ahlola, Jehofa o diriša bjang molao wa motheo wo o hlalositšwego go Ba-Galatia 6:4?

¹⁶ Phihlelo e rutile batswadi ba bantši le barutiši bohlale bja go ahlola bana goba barutwana go ya ka bokgoni bja yo mongwe le yo mongwe, e sego motheong wa go ba bapetša le banababo bona goba bao ba tsenago le bona ka klaseng. Se se dumelelana le molao wa motheo wa Beibele wo Bakriste ba boditšwego gore ba o latele: “Motho a a šetšê modirô wa xaxwe; ké mo a tl’o xo rêtwa ka tša xaxwe, e sexo ka tša e mongwê.”—Ba-Galatia 6:4.

¹⁷ Ka go dumelelana le molao wo wa motheo, gaešita lege Jehofa a dirišana le batho ba gagwe e le sehlopha se se rulagantšwego, fela o ba ahlola e le motho ka o tee ka o tee. Ba-Roma 14:12 e re: “Motho mang le mang wa rena ó tlo iphetolêla pele xa Modimo.” Jehofa o tseba gabotse kagego ya dikarolwana tša leabela tša yo mongwe le yo mongwe wa bahlanka ba gagwe. O tseba kagego ya bona ya mmele le ya monagano, bokgoni bja bona, dika tše dibotse le mafokodi a bona ao ba a abetšego, matla a bokgoni a ba nago le ona gotee le tekanyo yeo ka yona ba dirišago ka mo go holago dikgonagalo tše bakeng sa go tšweletša dienywa tša Bokriste. Ditlhaloso tša Jesu tša mabapi le mohlologadi yo a ilego a lahlela ditšheletiana tše pedi ka polokelong ya tempele le seswantšho sa gagwe sa peu yeo e bjetšwego mmung o mobotse ke mehlala ye e kgothatšago bakeng sa Bakriste bao ba ka bago ba ikwa ba gateletšegile ka baka la go ipapiša le ba bangwe ka tsela yeo e sego ya bohlale.—Mareka 4:20; 12:42-44.

18. (a) Ke ka baka la’ng re swanetše go lemoga seo go ba lerole go se bolelago go rena re le motho ka o tee ka o tee? (b) Ke ka baka la’ng go itlhahloba ka go lebanya go se gwa swanela go re dira gore re itlhoboge?

¹⁸ Go bohlokwa gore re lemoge seo go ba lerole go se bolelago go rena re le motho ka o tee ka o tee e le gore re ka hlankela ka bokgoni bja rena bjo bo feletšego. (Diema 10:4; 12:24; 18:9; Ba-Roma 12:1) Ke feela ka go lemoga diphošo le mafokodi a rena ka mo go tseneletšego mo re ka dulago re phafogetše go nyakega le kgonagalo ya go kaonefatša. Ge re dira boitlhahlobo, anke le ka mohla re se ke ra hlokomologa matla a moya o mokgethwa tabeng ya go re thuša go kaonefatša. Ka wona legohle le ile la bopja, Beibele e ile ya ngwalwa, gomme gare ga lefase le le hwago, lekoko la lefase le lefsa la khutšo le ile la tšweletšwa. Ka gona moya o mokgethwa wa Modimo ke o matla e le ka kgonthe go ka nea bao ba o kgopelago bohlale le matla ao a nyakegago bakeng sa go kgomarela potego.—Mika 3:8; Ba-Roma 15:13; Ba-Efeso 3:16.

19. Go ba ga rena bao ba dirilwego ka lerole ga se seširelo sa eng?

¹⁹ Go homotša gakaakang go tseba gore Jehofa o gopola gore re lerole! Lega go le bjalo, le ka mohla ga se ra swanela go nagana gore se ke seširelo se se kwagalago bakeng sa go nyefiša matsogo goba mohlomongwe bakeng sa go dira phošo. Ga go bjalo le gatee! Gore Jehofa o gopola gore re lerole ke pontšho ya botho bja gagwe bjo bo sa swanelago. Eupja ga re nyake go ba “ba ba sa boifexo Modimo, ba ba retollaxo tše Modimo wa rena a re xauxetšexo ka tšôna ba di dira tša maiphsinô, ’me ba se dumele Modimo le Jesu Kriste Mmuši a nnoši wa rena.” (Juda 4) Go ba bao ba bopilwego ka lerole ga go nee seširelo sa go ba bao ba sa boifego Modimo. Mokriste o katanela go lwantšha ditshekamelo tše fošagetšego, o otlaka mmele wa gagwe a o dira lekgoba e le gore a pheme ‘go nyamiša moya o mokgethwa.’—Ba-Efeso 4:30; 1 Ba-Korinthe 9:27.

20. (a) Ke dibopegong dife tše pedi mo re nago le ‘go gontši mo re swanetšego go go dira modirong wa Morena’? (b) Ke ka baka la’ng re e-na le lebaka la go holofela tše botse?

²⁰ Mo nakong ye, e lego nywageng ya bofelo ya tshepedišo ya lefase la Sathane, ga se nako ya go nyefiša—e sego mabapi le go bolela ka Mmušo, le gona e sego mabapi le go hlagolela ka mo go tletšego kudu dienywa tša moya wa Modimo. Mafelong ao ka bobedi re na le ‘go gontši mo re swanetšego go go dira.’ (NW) Bjale ke nako ya go gatela pele ka gobane re tseba gore ‘go itapiša ga rena ga se ga lefeela.’ (1 Ba-Korinthe 15:58) Jehofa o tla re thekga, ka gobane mabapi le yena Dafida o itše: “A ka se kê a bá a lesa moloki xe a ka šuthišwa.” (Psalme 55:22) Go thabiša gakaakang go tseba gore Jehofa o re dumelela re le batho ka noši gore re kopanele modirong o mogolo kudu woo dibopiwa tše di sa phethagalago tše e lego batho di kilego tša abelwa gore di o dire—gomme se o se dira go sa šetšwe go ba ga rena ba ba dirilwego ka lerole!

[Mongwalo wa tlase]

Na o ka Hlalosa?

◻ Genesi 2:7 le Psalme 103:14 di fapana bjang tabeng ya go šupa batho e le bao ba dirilwego ka lerole?

◻ Ke ka baka la’ng Ba-Hebere kgaolo 11 e le mothopo wa kgothatšo go Bakriste lehono?

◻ Ke ka baka la’ng re le bohlale ka go diriša molao wa motheo wo o ngwadilwego go Ba-Galatia 6:4?

◻ Ba-Hebere 6:10 le 1 Ba-Korinthe 15:58 di ka thuša bjang go thibela go nolega moko?

[Pictures on page 10]

Bakriste ba ekiša tumelo ya barapedi-gotee le bona, eupja ba latela Mophethi wa tumelo ya bona, Jesu