Go Bokana Gotee le ba ba Boifago Modimo

“KAE le kae batho ba hlologetše go lokologa poifong—go boifa bošoro, go boifa go hloka mošomo le go boifa bolwetši bjo bošoro. Re na le tlhologelo e swanago. . . . Ka gona, ke ka baka la’ng re ahla-ahla kamoo go ka hlagolelwago poifo ka gona?” Potšišo yeo e tsošago kgahlego e ile ya botšišwa ke seboledi sa thwadi go e nngwe le e nngwe ya Dikopano tša Selete tša “Go Boifa Modimo,” tše di thomilego ka June 1994.

Ba dimilione ba ba bilego gona—la mathomo kua Amerika Leboa, ke moka ka morago ya ba kua Yuropa, Amerika Bogare le Borwa, Afrika, Asia le dihlakahlakeng tša lewatle—ba be ba fišegela go ithuta go hlagolela poifo e bjalo. Ka baka la’ng? Ka gobane go ba ga rena le karolo ditšhegofatšong tšeo Jehofa Modimo a di swaretšego batho ba gagwe go ithekgile ka go boifa ga rena Modimo. E be e le go ithuta ka go boifa Modimo mo go bego go kgobokantše ba ba tlilego kopanong, gomme lenaneong la matšatši a mararo ba ile ba ithuta mo gontši ka seka se se bohlokwa sa Bokriste.

“Boifa Modimo, O Lôtê Taêlô tša Xaxwe”

Seo e be e le sehlogo sa letšatši la pele la kopano, se theilwe go Mmoledi 12:13. Go boifa Modimo go bolela’ng? Karolong ya mathomo-thomo ya lenaneo, modula-setulo wa kopano o ile a hlalosa gore go boifa Modimo go bontšha tlhompho le kgodišo ya kgonthe go Jehofa gotee le poifo e holago ya go boifa go se mo kgahliše. Go boifa Modimo mo go bjalo ga se mo go nyamišago; ke mo go botse le mo go swanetšego.

Poifo ye e botse e re hola bjang? Polelo e latetšego e rego, “Le se ke la Lapa Gomme la Kgaotša,” e hlalositše gore go boifa Modimo go tla re tutueletša go boloka ditaelo tša Modimo ka lethabo. Poifo e bjalo gotee le lerato la go rata Modimo le moagišani e tla re tsenya matla a moya. Ee, go boifa Modimo go ka re thuša go phema go nyefiša lebelong la bophelo bjo bo sa felego.

Se se latetšego lenaneong e bile dipoledišano tše di neago bohlatse bja kgonthe bja gore go boifa Modimo go ka re thekga. Bao go boledišanwego le bona ba ile ba anega kamoo go boifa Modimo ga tlhompho go ba tutueleditšego ka gona go tšwela pele bodireding go sa šetšwe go se thabele, go se kgomege goba tlaišo, e bile go ba thušitše go kgotlelela gaešita le ge ba lebane le diteko tše thata tša motho ka noši.

Lega go le bjalo, ke ka baka la’ng batho ba bangwe ba boifa Modimo mola ba bangwe ba sa mmoife? Polelong e rego, “Go Hlagolela le go Holwa ke go Boifa Modimo,” seboledi sa thwadi se hlalositše gore go Jeremia 32:37-39, Jehofa o holofeditše gore O be a tla nea batho ba Gagwe pelo ya go boifa Modimo. Jehofa o bjala go boifa Modimo ka dipelong tša rena. Bjang? Ka moya wa gagwe o mokgethwa le Lentšu la gagwe le le buduletšwego, e lego Beibele. Lega go le bjalo, go molaleng gore re swanetše go dira boiteko bjo mafolofolo bja go ithuta Lentšu la Modimo le go ikhola ka mo go tletšego ka ditokišetšo tše dintši tša moya tšeo a di dirilego. Tše di akaretša dikopano le diboka tša rena tša phuthego tše di re thušago go ithuta go mmoifa.

Lenaneo la thapama le ile la thoma ka keletšo ya go bota Jehofa le Lentšu la gagwe. Ye e ile ya latelwa ke go ahla-ahlwa ga ditsela tše dikgolo tšeo Mmušo o swanetšego go kgoma maphelo a rena ka tšona re le Bakriste.

Ka morago go ile gwa tla tšhiedišano ya pele ya tše tharo tšeo di ilego tša neelwa kopanong. Sehlogo sa tšhiedišano ye e be e le se se rego, “Go Boifa Modimo go re Tutueletša go kwa Ditaelo tša Modimo,” e lego seo se ilego sa lebiša tlhokomelo go lapa. Se se latelago ke mohlala wa keletšo ya Mangwalo—le e šomago—e neilwego.

□ Go banna: Go boifa Modimo go swanetše go tutueletša monna gore a rate mosadi wa gagwe bjalo ka mmele wa gagwe. (Ba-Efeso 5:28, 29) Monna ga a gobatše mmele wa gagwe ka boomo, ga a inyatše pele ga bagwera ba gagwe goba go seba ka mafokodi a gagwe ka noši. Ka gona-ge, o swanetše go swara mosadi wa gagwe ka seriti le tlhompho tšeo a ineago tšona.

□ Go basadi: Go boifa ga Jesu Modimo go ile gwa mo tutueletša gore ‘a kgahliše Modimo ka mehla.’ (Johane 8:29) Wo ke moya o mobotse woo basadi ba ka o ekišago ge ba dirišana le banna ba bona.

□ Go batswadi: Batswadi ba Bakriste ba ka bontšha go boifa Modimo ka go tšeela boikarabelo bja botswadi godimo, ba lebelela bana ba bona e le bohwa bjo bo tšwago go Jehofa. (Psalme 127:3, NW) Pakane e kgolo ya batswadi e swanetše go ba ya go godiša bana ba bona gore e be Bakriste ba kgonthe.

□ Go bana: Jehofa o laela bana gore ba kwe “batswadi [ba bona] Moreneng.” (Ba-Efeso 6:1) Ka gona, go kwa batswadi ba bona ke go kwa Modimo.

Polelo ya go phetha ya letšatši e ile ya kgoma maikwelo a rena, ka gobane e ile ya ahla-ahla maikwelo a tseneletšego ao ka moka ga rena re bago le ona ge re lahlegelwa ke moratiwa ka lehu. Lega go le bjalo, mo e ka bago bogareng bja polelo go ile gwa direga semaka. Seboledi se ile sa thabiša batheetši ka go tsebiša go lokollwa ga poroutšha e rego, Ge Motho yo o mo Ratago a E-hwa. Puku ye ya matlakala a 32 ya mmala o tletšego e bolela mo gontši mo go ka thušago ba ba nyamilego gore ba kwešiše le go lebeletšana ka katlego le maikwelo ao a tšwelelago ka morago ga lehu la moratiwa. Na o kile wa ba bothateng bja go se tsebe seo o ka se bolelago go motho yo a hwetšwego? Karolo ya poroutšha ye e ahla-ahla kamoo re ka thušago ba ba nyamilego ka gona. Ge ba dutše ba theeditše seboledi, ba bantši gare ga batheetši ba be ba nagana ka motho yo mongwe yo a bego a ka holwa ke poroutšha ye e mpsha.

‘Nea Tirelo e Kgethwa ka go Boifa Modimo le go mo Šia’

Seo e be e le sehlogo sa letšatši la bobedi, se theilwe go Ba-Hebere 12:28. (NW) Lenaneong la mesong go ile gwa tla tšhiedišano ya bobedi e rego, “Diphuthego Tšeo di Sepelago ka go Boifa Jehofa.” Karolo ya mathomo e be e le mabapi le go ba gona dibokeng. Go ba gona ga rena dibokeng go bontšha go hlompha ga rena Modimo le ditokišetšo tša gagwe tša moya. Ka go ba gona, re bontšha gore re boifa leina la gagwe gomme re fišegela go dumelelana le thato ya gagwe. (Ba-Hebere 10:24, 25) Seboledi sa bobedi se ile sa hlalosa gore, gore phuthego ka moka e sepele ka go boifa Jehofa, motho yo mongwe le yo mongwe o swanetše go phetha karolo ya gagwe go kgomareleng boitshwaro bjo bobotse. Seboledi sa mafelelo se ile sa bolela ka tokelo le boikarabelo tšeo Bakriste ka moka ba nago le tšona—go tsebatša ditaba tše di lokilego ka ntle le go kgaotša. Re tla tšwela pele re bolela ka lebaka le lekaaka’ng? Go fihlela ge Jehofa a re go lekane.—Jesaya 6:11.

Sehlogo sa polelo e latetšego e bile se se rego, “Lethabo la Jehofa ke Sebo sa Gago,” go etša ge bjale se akaretšwa dihlogong tše di ithutwago ka makasineng wo. (Nehemia 8:10, NW) Ke ka baka la’ng batho ba Jehofa ba thabile? Seboledi se ile sa hlalosa mabaka a mmalwa. La bohlokwa kudu ke gore tswalano ya kgaufsi le Modimo e re dira batho ba thabilego kudu lefaseng. Seboledi se ile sa gopotša ba ba tlilego kopanong gore, anke le naganeng gore re na le tokelo ya go ba gare ga batho bao Jehofa a ba gogetšego go Jesu Kriste. (Johane 6:44) Ke lebaka le matla gakaakang la go thaba!

Tiragalo e kgahlišago kudu ya kopano e nngwe le e nngwe ke kolobetšo, gomme Dikopano tša “Go Boifa Modimo” le tšona di be di akaretšwa. Polelong e rego “Boineelo le Kolobetšo ka go Boifa Jehofa,” seboledi se ile sa hlalosa gore boikarabelo bja motho ka noši bja bohle ba ba kolobeditšwego bo na le dikarolo tše nne: (1) Re swanetše go ithuta Lentšu la Modimo ka thušo ya dipuku tše di re thušago go le kwešiša le go le diriša; (2) re swanetše go rapela; (3) re swanetše go kopanela le badumedi-gotee le rena dibokeng tša phuthego; gomme (4) re swanetše go nea bohlatse ka leina la Jehofa le Mmušo wa gagwe.

Lenaneo la Mokibelo thapama le ile la thoma ka sehlogo se se kgodišago se se rego, “Batho Bao ba sa Lahlwego ke Jehofa.” Nywaga-kgolong e 35 e fetilego ge setšhaba sa Isiraele se be se lebeletšane le dinako tše thata, Jehofa o ile a nea kgonthišetšo ka Moše a re: “Morêna Modimo wa lena . . . A ka se kê a [le] lahletša, a ka se kê a [le] tloxêla.” (Doiteronomio 31:6) Jehofa o ile a hlatsela kgonthišetšo yeo e le ya therešo ka go šireletša ba-Isiraele ge ba be ba tsena Nageng ya Kholofetšo gomme ba e tšea. Lehono ge re lebeletšane le diteko tše thata, le rena re ka ba le kgodišego e tletšego ya gore Jehofa a ka se ke a re lahla ge e ba re mo kgomarela e bile re ela hloko keletšo ya Lentšu la gagwe.

O ka thabela go bala Beibele bjang? Polelong e rego “Bala Lentšu la Modimo Beibele e Kgethwa Letšatši le Letšatši,” seboledi se ile sa eletša go bala ka monagano o nyakago go tseba le go botšiša dipotšišo tše bjalo ka tše di rego: Pego ye e nthuta eng ka dika le ditsela tša Jehofa? Nka swana le Jehofa kudu bjang maemong a? Go bala Beibele ka tsela ye ke phihlelo e thabišago le e putsago.

Se se latelago, tlhokomelo e ile ya lebišwa tšhiedišanong ya boraro ya lenaneo e rego, “Ditokišetšo tša go Thuša Bao ba Boifago Jehofa.” Le ge Jehofa a ka ba a sa dire mehlolo bakeng sa bahlanka ba gagwe lehono, ka kgonthe o thuša ba ba mmoifago. (2 Petro 2:9) Tšhiedišano ye e ile ya ahla-ahla ditokišetšo tše nne tše di tšwago go Jehofa bakeng sa go re thuša mehleng ye e thata, e lego: (1) Ka moya wa gagwe, Jehofa o re matlafaletša go phetha mediro e fetago matla a rena ka noši. (2) Ka Lentšu la gagwe, o re nea keletšo le tlhahlo. (3) Ka topollo, o re nea letswalo le le sekilego. (4) Ka mokgatlo wa gagwe go akaretša le bagolo, o re nea tlhahlo le tšhireletšo. (Luka 11:13; Ba-Efeso 1:7; 2 Timotheo 3:16; Ba-Hebere 13:17) Ka go diriša ditokišetšo tše ka mo go tletšego, re tla kgona go kgotlelela ka go rialo ra amogelwa ke Jehofa.

Polelo ya mafelelo thapameng ya Mokibelo e be e e-na le sehlogo se se rego, “Letšatši la Jehofa le le Šiišago le Batametše,” e theilwe boporofeteng bja Maleaki. Go bile le matšatši a šiišago historing e fetilego, go etša ge kahlolo e be e phethwa godimo ga Jerusalema ka 70 C.E. Eupša letšatši le le šiišago kudu phihlelong ka moka ya batho e tla ba letšatši la Jehofa le le tlago ge ‘tefetšo e tlišwa godimo ga ba ba sa tsebego Modimo le ba ba sa kwego ditaba tše di lokilego tša Morena wa rena Jesu.’ (2 Ba-Thesalonika 1:6-8) Seo se tla direga kgaufsi gakaaka’ng? Seboledi se itše: “Bofelo bo kgaufsi! Jehofa o tseba letšatši leo le iri. A ka se ke a fetola tšhupamabaka ya gagwe. Re kgothaletšwa gore re kgotlelele ka go se fele pelo.”

Go be go le thata go dumela gore matšatši a mabedi a be a šetše a fetile. Letšatši la mafelelo le be le tla tla le eng?

“Boifang Modimo, Gomme le mo Nee Letago”

Sehlogo sa letšatši la boraro se be se theilwe go Kutollo 14:7. (PK) Lenaneong la mesong, lelokelelo la dipolelo le ile la gatelela tše dingwe tša dithuto tša bodumedi tše di hlaolago Dihlatse tša Jehofa go mekgatlo e mengwe ka moka ya bodumedi.

Polelong e rego “Go tla ba le Tsogo ya Baloki,” seboledi se ile sa rotoša potšišo e kgahlišago e rego: “Letšatšing leo la Kahlolo la nywaga e sekete, ba ba hwilego ba botega nywageng ye ya mafelelo ya tshepedišo ya dilo ya Sathane ba tla tsošwa neng?” Karabo e bile efe? Seboledi se ile sa hlalosa gore: “Beibele ga e bolele. Lega go le bjalo, na ga se ga tlhaologanyo gore ba ba hwago mehleng ya rena ba tla tsošwa ka pela e le gore ba be le karolo gotee le lešaba le legolo la baphologi ba Haramagedone modirong o mogolo wa go ruta wo o swanetšego go dirwa Letšatšing la Kahlolo? Ee, go tla ba bjalo!” Na go tla ba le baphologi? Ruri ba tla ba gona. Dithuto tša Beibele le mehlala yeo e re kgonthišetšago se di ile tša hlaloswa ka mo go kwalago polelong e latetšego e rego, “Ba Phološwa ba Phela Masetla-pelong a Magolo.”

Dihlatse tša Jehofa ke kgale di kwešišitše gore Beibele e tšweletša mafelelo a mabedi—bophelo bjo bo sa felego lefaseng la paradeise bakeng sa dimilione tše di sa balegego le bophelo bjo bo se nago lehu legodimong bakeng sa palo e nyenyane ya ba ba tlago go buša gotee le Kriste Mmušong wa gagwe. Kholofelo ya legodimong e ile ya ahla-ahlwa polelong e rego, “Se Boifê, Wene Mohlatswana o Monyenyane.” (Luka 12:32) Go ya ka boemo bja gona bjale bja lefase, mohlatswana o monyenyane ga se wa swanela go boifa; yo mongwe le yo mongwe wa bona o swanetše go kgotlelela go fihla bofelong. (Luka 21:19) Seboledi se itše: “Go se boife ga bona go kgothatša ba lešaba le legolo. Le bona ba swanetše go hlagolela tshekamelo ya go se boife ge ba dutše ba fagahlela phološo nakong e kgolo ya tlalelo yeo lefase le kilego la e tseba.”

Mafelelong a lenaneo la mesong, batheetši ba ile ba bogela ka lethabo papadi ya Beibele e rego Dikgetho tše o Lebanego le Tšona. Mehleng ya Jošua gotee le ya moporofeta Eliya, ba-Isiraele ba be ba swanetše go dira diphetho. Go be go swanetše go dirwa kgetho. Eliya o itše: “Le tlo kxaotša neng xo hlotšetša ka dithokô tše pedi? Xe Modimo è le Morêna, xôna latêlang Yêna; xe Modimo è le Baali, xôna o lateleng.” (1 Dikxoši 18:21) Le lehono batho ba swanetše go dira diphetho. Ye ga se nako ya go hlotšetša ka mathokong a mabedi. Kgetho e nepagetšego ke efe? Ke yona yeo e dirilwego ke Jošua wa mehleng ya kgale. O itše: “Xe e le nna le ba lapa la-ka, rena re dirêla Morêna.”—Jošua 24:15.

Go ile gwa bonala eka gatee-tee e be e le thapama ya Sontaga le nako ya polelo ya phatlalatša e nago le sehlogo se se rego, “Lebaka Leo ka Lona o Swanetšego go Boifa Modimo wa Therešo Gona Bjale.” Go Kutollo 14:6, 7, (PK) batho bohle ba kgothaletšwa gore: “Boifang Modimo gomme le mo nee letago.” Ke ka baka la’ng e le mo go akgofilego go boifa Modimo gona bjale? Ka gobane go etša ge lengwalo le tšwela pele le bolela, “iri ya kahlolo ya gagwe e tlile.” Ka Morwa wa gagwe yoo bjale a beilwego sedulong sa bogoši e le Kgoši ya Mmušo wa Modimo wa legodimong, Jehofa o tla fediša tshepedišo ya gona bjale e šilafetšego ya borabele ya dilo. Seboledi se hlalositše gore ye ke tsela e nnoši ya go imolla ba ba boifago Modimo gotee le go phološa le go boloka legae la rena la lefaseng. Ka ge ye e le mehla ya bofelo ya tshepedišo ye ya dilo, ke mo go akgofilego gore re boife Modimo wa therešo gona bjale!

Ka morago ga kakaretšo ya thuto ya Morokami bakeng sa beke yeo, seboledi sa mafelelo se ile sa namela sethala. Se ile sa hlalosa gore, ka baka la lenaneo la kopano, go boifa Modimo go bolela selo se segolo kudu go ba ba tlilego kopanong. Se ile sa gatelela mehola e mentši yeo e tlelago ba ba boifago Modimo. Seboledi se ile sa tsebiša go lokollwa ga bidio e mpsha—e rego United by Divine Teaching. E gatelela dibopego tše di kgethegilego tša Dikopano tša Ditšhaba ka Moka tša “Thuto ya Modimo” tšeo di bego di swerwe ka 1993-94. Ge polelo e be e dutše e e-ya mafelelong ba bantši ba ile ba ipotšiša gore, ‘Re ka fagahlela eng ngwageng o tlago?’ Ke dikopano tša selete tša matšatši a mararo mafelong a mantši.

Ge se phetha, seboledi se ile sa šupa go Maleaki 3:16 e rego: “Ba-šia-Modimo, xe bôná ba boledišana, Morêna ó a theetša, ó a di kwa; ’me ba ba mmoifaxo ba ngwaletšwe puku ya kxopotšô pel’a xaxwe, ya ba sa lebalexo ’ina l’axwe.” Ba ba bego ba tlile kopanong ba tlogile ba e-na le boikemišetšo bjo bo kwalago bja go nagana ka leina la Jehofa le go mo hlankela ba boifa Modimo.

[Seswantšho go letlakala 24]

Ba ba yago kolobetšong ba swanetše go tšwela pele ba bontšha go boifa Modimo

[Seswantšho go letlakala 25]

Papadi e rego “Dikgetho tše o Lebanego le Tšona” e ile ya gatelela go batheetši go nyakega ga go dira phetho mabapi le go hlankela Jehofa

[Seswantšho go letlakala 26]

Ba ba tlilego kopanong ba be ba thabetše go amogela poroutšha e mpsha e rego, “Ge Motho yo o mo Ratago a E-hwa”