Mehola ya go Boifa Modimo wa Therešo
“Nna Morêna Modimo wa xaxo ke Xo ruta tše di Xo holaxo; ke Xo sepediša mo tseleng ye O swanetšexo xo e swara.”—JESAYA 48:17.
1. Ke manyami afe ao a ka bego a ile a thibelwa ke go boifa Modimo?
GE NKABE Adama a ile a hlagolela go boifa Modimo, nkabe go ile gwa mo thibela go dira sebe se se ilego sa lebiša lehung la gagwe ka noši la ka mo go sa felego le nywageng e dikete ya manyami bakeng sa bana ba gagwe. Ge nkabe setšhaba sa kgale sa Isiraele se ile sa kwa keletšo ya Jehofa ya go mmoifa le go mo rata, setšhaba seo nkabe se sa ka sa išwa bothopša Babele goba nkabe se sa ka sa gana Morwa wa Modimo gomme sa ba le molato wa go tšholla madi a gagwe. Ge nkabe lefase lehono le boifa Modimo, go ka be go se na tshenyego mebušong goba kgwebong, go se na bosenyi, go se na ntwa.—Diema 3:7.
2. Ke ka baka la’ng re swanetše go hlagolela go boifa Jehofa go sa šetšwe maemo lefaseng le le re dikologilego?
2 Lega go le bjalo, rena re le batho ka o tee ka o tee, re le malapa le ge re le diphuthego tša bahlanka ba Jehofa re ka holwa ke go hlagolela go boifa Modimo wa therešo, go sa šetšwe seo lefase le le re dikologilego le se dirago. Se se dumelelana le kgopotšo yeo Moše a e neilego setšhaba sa Isiraele e rego: “Morêna Modimo wa xaxo O nyaka’ng xo wêna, xe e se xore O boifê Morêna Modimo wa xaxo, O sepelê ditseleng tša xaxwe mo xo fêla, O mo ratê, O dirêlê Morêna Modimo wa xaxo ka pelo ka moka le ka matla ka moka. O hlôkômêlê ditaêlô tša xaxwe . . . xore O lêtlêxê?” (Doiteronomio 10:12, 13) E mengwe ya mehola e re tlelago ge re boifa Jehofa Modimo wa therešo ke efe?
Bohlale—Bo Bohlokwa Kudu go Feta Gauta
3. (a) Ke mohola ofe o phalago yohle wo re ka o hwetšago? (b) Ke eng se se bolelwago ke Psalme 111:10?
3 Mohola o phalago yohle ke bohlale bja kgonthe. Psalme 111:10 e bolela gore: “Xo boifa Morêna ké mathômô a bohlale.” Seo se bolela’ng? Bohlale ke bokgoni bja go diriša tsebo ka katlego bakeng sa go rarolla mathata, go thibela kotsi le go fihlelela dipakane tše itšego. Bo akaretša kahlolo e nago le tlhaologanyo. Mathomo, karolo ya mathomo, motheo wa bohlale bjo bo bjalo ke go boifa Jehofa. Ka baka la’ng? Ka gobane tlholo ka moka ke modiro wa diatla tša gagwe. E ithekgile ka yena. O neile batho tokologo ya go dira kgetho, eupša e sego ba e-na le bokgoni bja go hlahla dikgato tša bona ka katlego ka ntle le tlhahlo ya gagwe. (Jošua 24:15; Jeremia 10:23) Ke feela ge e ba re lemoga ditherešo tšeo tša motheo mabapi le bophelo gomme re phela ka go dumelelana le tšona moo re ka atlegago ka mo go sa felego. Ge e ba tsebo ya rena ya go tseba Jehofa e re nea kgodišego e sa šišinyegego ya gore thato ya Modimo e kgonthišeditšwe gore e tla atlega le gore kholofetšo ya gagwe le bokgoni bja go putsa potego ke tša kgonthe, gona go boifa Modimo go tla re tutueletša go dira dilo ka bohlale.—Diema 3:21-26; Ba-Hebere 11:6.
4, 5. (a) Ke ka baka la’ng thuto ya monna ya yunibesithing e ile ya mo tlogela a se na bohlale bja kgonthe? (b) Monna yo le mosadi wa gagwe ba ile ba hwetša bjang bohlale bja kgonthe ka morago, gona se se ile sa fetoša maphelo a bona ka tsela efe?
4 Ela hloko mohlala wo. Nywaga-someng e mmalwa e fetilego, monna yo mongwe o be a tsena Yunibesithing ya Saskatchewan kua Canada. Lenaneo-thutong go be go akaretšwa thutaphedi gomme a rutwa thuto ya tlhagelelo. Ka morago ga go aloga o ile a nwelela kudu thutong ya tša sebopego sa diathomo, a amogela thušo ya tša ditšhelete bakeng sa go tšwetša dithuto tša gagwe pele Yunibesithing ya Toronto. Ge a dutše a ithuta, o ile a bona bohlatse bjo bo kgahlišago bja thulaganyo le tlhamo ya dibopego tša diathomo. Eupša go be go sa newe dikarabo tša dipotšišo tše di rego: Ke mang yo a hlamilego se ka moka? Neng? Ka baka la’ng? Ka ntle le dikarabo tšeo, na o be a tla kgona go diriša tsebo ya gagwe ka bohlale lefaseng le le bego le le ntweng ka nako yeo? Ke eng se se bego se tla mo hlahla? Na ke botšhaba? Na ke go kganyoga meputso ya dilo tše di bonagalago? Na ruri o be a hweditše bohlale bja kgonthe?
5 Nako e kopana ka morago ga ge a alogile, monna yoo le mosadi wa gagwe ba ile ba thoma go ithuta Beibele le Dihlatse tša Jehofa. Ba ile ba thoma go hwetša dikarabo Lentšung la Modimo ka noši, tšeo ba bego ba sa di hwetše pele. Ba ile ba thoma go tseba Mmopi Jehofa Modimo. Ge ba be ba dutše ba ithuta ka Moše Lewatleng le Lehwibidu le ka Daniele le bagwera ba gagwe ba bararo kua Babele, ba ile ba lemoga bohlokwa bja go boifa Modimo e sego batho. (Ekisodo 14:10-31; Daniele 3:8-30) Go boifa Modimo mo go bjalo mo go sepedišanago le lerato la kgonthe la go rata Jehofa go ile gwa thoma go ba tutuetša. Go se go ye kae tsela ka moka ya maphelo a bona e ile ya fetoga. Mafelelong monna o ile a tseba Yo a ithutilego ka modiro wa gagwe o mobotse go thutaphedi. O ile a thoma go kwešiša morero wa Yo a bonego bohlale bja gagwe bo bonagatšwa thutong ya gagwe ya physics. Go e na le go diriša tsebo ya gagwe go tšweletša didirišwa tša go fediša mogagabo, yena le mosadi wa gagwe ba be ba nyaka go thuša ba bangwe go rata Modimo le go rata baagišani ba bona. Ba ile ba ingwadišetša tirelo ya nako e tletšego e le bagoeledi ba Mmušo wa Modimo. Ka morago ba ile ba ya Sekolong sa Beibele sa Watchtower sa Gilead gomme ba rongwa e le baromiwa.
6. Ge e ba re e-na le bohlale bjo bo theilwego poifong ya go boifa Jehofa, ke dikgahlego dife tšeo e sego tša bohlale tšeo re tlago go di phema, gona ke eng seo re tla bago re se dira legatong la seo?
6 Ee, ga se bohle bao e ka bago baromiwa. Eupša ka moka ga rena re ka ba le bohlale bjo bo theilwego go boifeng Jehofa. Ge e ba re hlagolela bohlale bjoo, re ka se ke ra monya ka phišego difilosofi tša batho bao ge e le gabotse ba phopholetšago seo bophelo bo se bolelago. Re tla katanela go ithuta Beibele e buduletšwego ke Mothopo wa bophelo Jehofa Modimo, yo a ka re neago bophelo bjo bo sa felego. (Psalme 36:9; Ba-Kolose 2:8) Go e na le go ba makgoba a tshepedišo ya tša papatšo yeo ka boyona e lego kgaufsi le go fedišwa, re tla kwa keletšo ya Jehofa ya go kgotsofalela dijo le diaparo ge re dutše re dira gore tswalano ya rena le Modimo e be selo sa pele bophelong. (1 Timotheo 6:8-12) Go e na le go itshwara bjalo ka ge eka bokamoso bja rena bo ithekgile ka go huma lefaseng le, re tla dumela Lentšu la Jehofa ge le re botša gore lefase le a feta gotee le kganyogo ya lona, eupša yo a dirago thato ya Modimo o ba gona ka mo go sa felego.—1 Johane 2:17.
7. (a) Diema 16:16 e re thuša bjang go ba le kgopolo e leka-lekanego ka dilo tša bohlokwa? (b) Ke meputso efe e tlišwago ke go dira thato ya Modimo selo seo re se šeditšego kudu maphelong a rena?
7 Diema 16:16 e re kgothatša ka go bolela ka go rereša gore: “Xo huma bohlale [bohlale bjo bo thomago ka go boifa Jehofa] xo phala thsipi e khwibidu; xo huma thlaloxanyô [“kwešišo,” NW] xo phala thsipi e thsêhla.” Bohlale bjo bo bjalo le kwešišo di tla re tutueletša go dira gore go dira thato ya Modimo e be selo seo re se šeditšego kudu maphelong a rena. Modiro wo Modimo a o neilego Dihlatse tša gagwe bakeng sa nako ye historing ya motho ke ofe? Ke go bolela ka Mmušo wa gagwe le go thuša ba dipelo tše di botegago gore e be barutiwa ba kgonthe ba Jesu Kriste. (Mateo 24:14; 28:19, 20) Wo ke modiro o tšweletšago meputso ya kgotsofalo ya kgonthe le lethabo le legolo. Ka gona, Beibele e bolela ka lebaka le le kwalago gore: “Lehlôxônôlô le n’e khwetša-bohlale.”—Diema 3:13.
Tšhireletšo Malebana le go Dira Diphošo
8. (a) Bolela mohola wa bobedi o tlišwago ke go boifa Modimo. (b) Bobe bjo re šireleditšwego go bjona ke eng? (c) Go boifa Modimo go ba bjang matla a magolo a tutuetšago?
8 Mohola wa bobedi o tšwago go boifeng Modimo ke gore re šireletšwa malebana le go dira se sebe. Ba ba hlomphago Modimo ka mo go tseneletšego ga ba ikgethele se se lokilego le se sebe. Ga ba lebelele seo Modimo a rego ke se se lokilego e le se sebe, goba ba lebelela dilo tšeo Modimo a rego ke tše mpe e le tše di lokilego. (Psalme 37:1, 27; Jesaya 5:20, 21) Go feta moo, motho yo a tutuetšwago ke go boifa Modimo ga a felele ka go fo tseba seo Jehofa a rego ke se se lokilego le seo a rego ke se sebe. Motho yo bjalo o rata seo Jehofa a se ratago gomme o hloya seo Jehofa a se hloyago. Ka baka leo, o dira dilo ka go dumelelana le ditekanyetšo tša Modimo. Ka go rialo “dibe motho ó di lahla ka xo boifa Morêna,” go etša ge go boletšwe go Diema 16:6. Go boifa Modimo mo go bjalo e ba matla a magolo a tutuetšago bakeng sa go phetha seo motho a ka bago a sa kgone go se dira ka matla a gagwe.
9. Kganyogo e matla ya go kganyoga go se nyamiše Modimo e ile ya tutuetša bjang phetho ya mosadi kua Mexico, gona mafelelo ya ba afe?
9 Gaešita le ge e ba go boifa Modimo go sa thoma go gola mothong, go ka mo tiiša gore a pheme go dira selo seo a ka tlago a itshola ka sona bophelo bja gagwe ka moka. Ka mohlala, mosadi wa moimana kua Mexico o ile a botšiša yo mongwe wa Dihlatse tša Jehofa ka go ntšha mpa. Hlatse e ile ya balela mosadi mangwalo a mmalwa ke moka ya bolela gore: “Bophelo ke bja bohlokwa kudu go Mmopi, gaešita le bophelo bja ba ba sešogo ba belegwa.” (Ekisodo 21:22, 23; Psalme 139:13-16) Tlhahlobo ya tša kalafo e be e šišintše gore lesea la gagwe le be le ka golofala. Eupša bjale, mosadi o ile a dira phetho ya go belega ngwana wa gagwe a tutueditšwe ke seo a se bonego Lentšung la Modimo. Ngaka ya gagwe e ile ya gana go mo hlahloba gape gomme monna wa gagwe a mo tšhošetša ka gore o tla mo tlogela, eupša o be a tiile. Ge nako e dutše e e-ya o ile a belega ngwanenyana—yo a feletšego, yo a phetšego gabotse le yo mobotse. Ka go tutuetšwa ke tebogo, o ile a tsoma Dihlatse gomme tša thoma go ithuta Lentšu la Modimo le yena. Yena le monna wa gagwe ba ile ba kolobetšwa lebakeng la ngwaga. Kopanong ya selete nywageng e sego kae ka morago, ba ile ba thabela go gahlana le Hlatse ya mathomo gape le go e tsebiša go morwedi wa bona yo a rategago wa nywaga e mene. Tlhompho e swanetšego ya go hlompha Modimo le kganyogo e matla ya go kganyoga go se mo nyamiše ruri di na le tutuetšo e matla bophelong bja motho.
10. Go boifa Modimo go ka tiiša batho gore ba itokolle dibopegong dife tša diphošo?
10 Go boifa Modimo go re tiiša malebana le mehuta e mentši ya diphošo. (2 Ba-Korinthe 7:1) Ge e hlagoletšwe ka mo go swanetšego, e ka thuša motho go kgaotša sebe sa ka sephiring se se tsebjago ke yena le Jehofa feela. E ka mo thuša go itokolla bokgobeng bja go diriša bjala goba dihlare-tagi gampe. Yo a bego a lemaletše dihlare-tagi Afrika Borwa o hlalositše gore: “Ge ke be ke dutše ke amogela tsebo ya go tseba Modimo, ke ile ka ba ka hlagolela go boifa go mo kweša bohloko goba go mo nyamiša. Ke be ke tseba gore o lebeletše gomme ke e-na le tlhologelo ya go ba yo a amogelegago mahlong a gagwe. E ile ya ntutueletša go senya dihlare-tagi tšeo ke bego ke e-na le tšona ka go di goga le meetse ka ntlwaneng.” Go boifa Modimo go thušitše ba bangwe ba dikete ka ditsela tše di swanago.—Diema 5:21; 15:3.
Tšhireletšo Malebana le go Boifa Batho
11. Go boifa Jehofa mo go agago go ka re šireletša moreong ofe o tlwaelegilego?
11 Gape, poifo e agago ya go boifa Modimo e re šireletša malebana le go boifa motho. Batho ba bantši ba tlaišwa ke go boifa motho ka tekanyo e kgolo goba e nyenyane. Gaešita le baapostola ba Jesu Kriste ba ile ba mo tlogela gomme ba tšhaba ge a be a swarwa ke mašole serapeng sa Getsemane. Ka morago ka lapeng la moperisita yo mogolo, Petro o ile a latola gore e be e le yo mongwe wa barutiwa ba Jesu le gore o be a bile a mo tseba ka ge a tšhošitšwe le go swarwa ke poifo. (Mareka 14:48-50, 66-72; Johane 18:15-27) Eupša baapostola ba ile ba thušwa go tsepama gape moyeng. Ka lehlakoreng le lengwe mehleng ya Kgoši Joyakima, Uria morwa wa Semaya o be a apareditšwe kudu ke poifo moo a ilego a tlogela tirelo ya gagwe e le moporofeta wa Jehofa gomme a tšhaba ka nageng, fela o ile a swarwa gomme a bolawa.—Jeremia 26:20-23.
12. (a) Diema 29:25 e šupa tšhireletšo efe malebana le go boifa motho? (b) Go bota Modimo go godišwa bjang?
12 Ke eng se se ka thušago motho go fenya go boifa motho? Ka morago ga go lemoša gore “xo boifa batho xo wetša moreong,” Diema 29:25 e oketša ka gore: “Xo pholoxa e a bôtaxo Morêna.” Go bota Jehofa ke senotlelo. Go bota mo go bjalo go theilwe tsebong le phihlelong. Ka go ithuta Lentšu la gagwe, re bona bohlatse bja go loka ga ditsela tša Jehofa. Re tlwaelana le ditiragalo tše di bontšhago go ba ga gagwe yo a ka botwago, go ba ga kgonthe ga dikholofetšo tša gagwe (go akaretša le ya tsogo), lerato le matla a gagwe a magolo. Ka gona ge re gata mogato go ya ka tsebo yeo, re dira dilo tšeo Jehofa a di laelago gomme re gana ka go tia seo a lemošago malebana le sona, re thoma go iponela ka noši tlhokomelo ya gagwe e lerato le go ba ga gagwe yo a ka botwago. Rena ka noši re bona bohlatse bja gore matla a gagwe a dirišetšwa go phetha thato ya gagwe. Go mmota ga rena go gola gotee le lerato la rena la go mo rata le kganyogo ya rena e tšwago pelong ya go kganyoga go phema go se mo kgahliše. Go bota mo go bjalo go agilwe motheong o tiilego. Go dira e le lepheko malebana le go boifa motho.
13. Go boifa Modimo go ka re thuša bjang modirong wa rena wa boiphedišo, ka gae le sekolong?
13 Go bota ga rena Jehofa go sepedišana le go boifa Modimo, go tla re dira gore re tie go se se lokilego ge e ba mothwadi a re tšhošetša ka go lahlegelwa ke modiro wa rena ka baka la go gana go tšea karolo mekgweng ya go se botege ya kgwebo. (Bapiša le Mika 6:11, 12.) Go boifa Modimo mo go bjalo go dira gore Bakriste ba dikete tše dintši ba kgone go kgotlelela borapeding bja therešo ba lebeletšane le kganetšo e tšwago go ditho tša lapa tše di sa dumelego. Go bile go nea bafsa ba ba tsenago sekolo sebete sa go itsebiša e le Dihlatse tša Jehofa, le gona go ba tiiša gore ba lebeletšane ka katlego le go kwerwa ke ba ba tsenago le bona ka klaseng ba ba kwerago ditekanyetšo tša Beibele. Ka gona, Hlatse yeo e sa lego mahlalagading e itše: “Seo ba se naganago ruri ga se sa bohlokwa. Seo Jehofa a se naganago ke sona e lego sa bohlokwa.”
14. Bahlanka ba Jehofa ba kgona bjang go tšwa ba fentše gaešita le ge maphelo a bona a le kotsing?
14 Kgopolo yeo e swanago e matlafatša Bakriste ba therešo gore ba tielele ditseleng tša Jehofa gaešita le ge maphelo a bona a le kotsing. Ba a tseba gore ba swanetše go letela tlaišo e tšwago lefaseng. Ba lemoga gore baapostola ba ile ba bethwa le gore Jesu Kriste ka boyena o ile a bethwa le go bolawa ke batho ba kgopo. (Mareka 14:65; 15:15-39; Ditiro 5:40; bapiša le Daniele 3:16-18.) Eupša bahlanka ba Jehofa ba kgodišegile ka mo go tletšego gore a ka ba matlafatša gore ba kgotlelele; gore ka thušo ya Modimo ba ka tšwa ba fentše; gore Jehofa o tla putsa ba ba botegago ka ntle le go palelwa—gaešita le ka go tsošetšwa bophelong lefaseng la gagwe le lefsa ge e ba go nyakega. Go rata ga bona Modimo go sepedišana le go boifa Modimo, go ba tutuetša ka matla gore ba pheme go dira selo le ge e le sefe se se ka mo nyamišago.
15. Ke eng se se dirilego gore Dihlatse tša Jehofa di kgone go kgomarela potego ya tšona dikampeng tša tshwenyo tša Nazi?
15 Tutuetšo ye e dirile gore Dihlatse tša Jehofa di kgone go emelana le sehlogo sa dikampeng tša tshwenyo tša Nazi nywageng ya bo-1930 le ya bo-1940. Di ile tša nweletša pelong keletšo ya Jesu e hwetšwago go Luka 12:4, 5 e rego: “’Me lena baxwêra ba-ka ke Le botša ke re: Le se kê la boifa ba ba bolayaxo mmele, ba tloxa ba se bê le se ba se kxônaxo. Ke tlo Le laetša yo Le swanetšexo xo mmoifa. Le boifê Yo e rexo xe a bolaile, a ba le matla a xo lahlêla motho moleteng. Ké Yo ke rexo Le boifê Yena.” Ka gona Gustav Auschner, e lego Hlatse yeo e bego e le kampeng ya tshwenyo ya Sachsenhausen o ile a ngwala ka morago gore: ‘Ma-SS a ile a thuntšha August Dickmann gomme a tšhošetša ka gore a tla re thuntšha ka moka ga rena ge e ba re be re sa saene pampiri ya go latola tumelo ya rena. Ga go le o tee wa rena yo a ilego a e saena. Re be re boifa kudu go nyamiša Jehofa go e na le dikolo tša bona.’ Go boifa motho go lebiša go kwanantšheng, eupša go boifa Modimo go dira motho gore a tielele go se se lokilego.
Go Phološa Bophelo
16. Ke eng se se dirilego gore Noage a kgone go kgomarela tsela e nepagetšego nywaga-someng ka go latelana ga yona go fihla Meetse-fuleng, gona mafelelo go yena le lapa la gagwe e bile afe?
16 Noage o phetše mehleng ya mafelelo ya lefase la pele ga meetse-fula. Jehofa o be a ikemišeditše go senya lefase le kgopo la mehleng yeo ka baka la bobe bja motho. Lega go le bjalo, ka nako yeo Noage o be a le lefaseng leo, le le bego le tletše bošoro, boitshwaro bjo bo gobogilego ka go fetišiša le go se kgomege ka thato ya Modimo. “Ba be ba sa šetše selô; meetsefula a bá a tla, a ba tšea ka moka,” go sa šetšwe boboledi bja Noage bja go loka. (Mateo 24:39) Eupša Noage ga se a ka a arošwa modirong wo Modimo a bego a o beile pele ga gagwe. O ile a dira “tšôna-tšeo tšohle, a di dira ka mo Modimo a mo laetšexo ka xôna.” (Genesi 6:22) Ke eng se se ilego sa dira gore Noage a kgomarele tsela e swanetšego ngwaga le ngwaga go ba go fihla Meetse-fuleng? Ba-Hebere 11:7 (NW) e araba ka gore: “Ke ka tumelo ge Noage, ka morago ga ge a neilwe temošo ya Modimo ka dilo tše di bego di sešo tša bonwa, a bontšhitšego go boifa Modimo.” Ka baka leo, yena le mosadi wa gagwe le barwa ba bona gotee le basadi ba bona ba ile ba phološwa Meetse-fuleng.
17. (a) Re swanetše go dira’ng go sa šetšwe seo batho ba bangwe ba se dirago? (b) Ke ka baka la’ng ba ba boifago Jehofa e le batho ba ba thabilego e le ka kgonthe?
17 Re phela nakong e swanago ka ditsela tše dintši le mehla ya Noage. (Luka 17:26, 27) Temošo e kwatšwa gape. Kutollo 14:6, 7 (PK) e bolela ka morongwa yo a fofago bogareng bja legodimo yo a kgothaletšago batho ba setšhaba se sengwe le se sengwe le moloko le leleme go ‘boifa Modimo le go mo nea letago.’ E-kwa mantšu ao go sa šetšwe seo lefase le le go dikologilego le se dirago, gomme o fetišetše taletšo go ba bangwe. Go swana le Noage, gata mogato ka tumelo gomme o bontšhe go boifa Modimo. Go dira ga gago bjalo go ka lebiša go phološweng ga bophelo bja gago le maphelo a ba bangwe ba bantši. Ge re dutše re naganišiša ka mehola e hwetšwago ke ba ba boifago Modimo wa therešo, re ka fo dumelelana le mopsalme yo a buduletšwego yo a opetšego ka gore: “Monna wa lehlóxônôlô ké e a boifaxo Morêna, a kxahlwa xaxolo ke ’tayô tša xaxwe.”—Psalme 112:1.
O be o tla Araba Bjang?
◻ Mehola e mengwe e megolo e tlišwago ke go boifa Modimo wa therešo ke efe?
◻ Bohlale bjo bo theilwego poifong ya go boifa Modimo bo ka re šireletša bjang?
◻ Ke ka baka la’ng go boifa Modimo go re dira gore re furalele bobe?
◻ Go boifa Modimo go re šireletša bjang malebana le go boifa motho?
◻ Go boifa Modimo go kgoma bjang ditebelelo tša rena tša bophelo tša nakong e tlago?
[Pictures on page 16, 17]
“Monna wa lehlóxônôlô ké e a boifaxo Morêna, a kxahlwa xaxolo ke ’tayô tša xaxwe.”—Psalme 112:1